ᒨᓯᓯ ᐱᖓᔪᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐆᒪᔪᑦ ᑐᓂᕐᕈᑕᐅᔪᑦ ᐃᑯᐊᓪᓚᒃᑕᐅᓪᓗᑎᒃ ᐃᓚᑰᔭᕆᐊᖃᖏᓐᓂᖏᑦ

¹ ᐊᑕᓂᐅᑉ ᒨᓯᓯ ᐅᐸᒃᐹ ᐅᖃᕐᕕᒋᓪᓗᒍᓗ ᑐᐱᕐᒥ ᑲᑎᒪᕕᖕᒥ ᐅᖃᕐᓗᓂᓗ,

² “ᐃᓴᕆᐊᓕᒥᐅᑦ ᐅᖃᕐᕕᒋᒃᑭᑦ ᐃᒫᒃ ᐅᖃᐅᑎᓗᒋᑦ, ‘ᓇᓕᕐᓯ ᑐᓂᕐᕈᑎᒃᓴᒥᒃ ᑐᓂᓯᔭᕐᑐᕐᐸᑦ ᐊᑕᓂᕐᒧᑦ, ᑐᓂᕐᕈᑎᒃᓴᖃᕆᐊᖃᕐᐳᖅ ᐆᒪᔪᒥᒃ ᐃᒻᒧᒃᓯᐅᒐᕐᒥᒡᓘᓐᓃᑦ ᓰᐱᒥᒡᓘᓐᓃᑦ.

³ ᑐᓂᕐᕈᑎᒃᓴᖅ ᐆᑕᒃᓴᖅ ᐃᒻᒧᒃᓯᐅᒐᐅᒃᐸᑦ, ᐊᖑᓴᓪᓘᔪᒃᓴᐅᕗᖅ ᖃᓄᐃᑦᔪᑎᖃᖏᑦᓯᐊᕐᓗᓂ. ᑐᐱᐅᑉ ᑲᑎᒪᕕᐅᑉ ᐃᑎᕐᕕᖓᓄᐊᕐᑕᐅᔭᕆᐊᖃᕐᐳᖅ ᑕᑯᔭᐅᖁᓪᓗᒍ ᐊᑕᓂᕐᒧᑦ ᓈᒻᒪᒋᔭᐅᖕᒪᖔᑦ.

⁴ ᑐᓂᕐᕈᓯᕐᓂᐊᕐᑑᑉ ᐆᒪᔪᖅ ᓂᐊᖁᖓᒍᑦ ᐸᑎᒻᒥᔭᒃᓴᕆᕚ, ᑍᒫᒡᓗ ᑕᕝᕙ ᓈᒻᒪᒋᔭᐅᓕᕐᓂᐊᕐᐳᖅ ᐃᓅᑉ ᑖᑦᓱᒪ ᐊᔪᕐᓂᖏᓐᓄᑦ ᐲᕐᓯᑦᔪᑕᐅᖁᓪᓗᒍ.

⁵ ᑕᕝᕙᓂᓗ ᑐᖁᑕᒃᓴᕆᕚ ᐊᖑᓴᓪᓗᖅ ᐊᑕᓂᐅᑉ ᑕᒃᑯᐊᓂ, ᐂᕉᓂᒃᑯᓐᓂᓪᓗ ᑐᓂᕐᕈᓯᕐᑎᑦᓯᔨᐅᔪᓂᑦ ᐆᒪᔫᑉ ᐊᐅᖓ ᐊᒡᔭᕐᑕᐅᔪᒃᓴᐅᕗᖅ ᓯᕐᐸᕐᓴᐅᑎᒋᓗᒍᓗ ᑐᓂᕐᕈᓯᕐᕕᐅᑉ ᐃᑎᕐᑕᕐᕕᖓᑕ ᐊᕙᓗᖏᓐᓄᑦ ᑐᐱᕐᒥ ᑲᑎᒪᕕᖕᒦᑦᑐᒧᑦ.

⁶ ᑐᓂᕐᕈᓯᕐᓂᐊᕐᑑᑉ ᑐᓂᕐᕈᑎᒋᔭᓂ ᐋᒃᑐᒐᒃᓴᕆᕚ ᐊᒡᒍᕐᓗᒍᓗ,

⁷ ᑐᓂᕐᕈᓯᕐᑎᑦᓯᔨᐅᓪᓗ ᐂᕉᓂᐅᑉ ᐃᕐᓂᖓᑕ ᑐᓂᕐᕈᓯᕐᕕᒃ ᐃᑯᐊᓪᓚᒃᑕᒃᓴᕆᕚ, ᕿᔪᐃᓪᓗ ᐃᑯᐊᓪᓚᖅᑯᑎᒃᓴᑦ ᐋᖅᑭᒃᓱᕐᓗᒋᑦ.

⁸ ᑐᓂᕐᕈᑎᐅᔪᓪᓗ ᓂᖀᑦ ᐋᖅᑭᒃᓱᕐᓗᒋᑦ ᐃᑯᐊᓪᓚᒃᑕᒃᓴᕆᕔᑦ, ᓂᐊᖁᖓᓗ ᑐᓐᓄᖏᓪᓗ ᐱᖃᓯᐅᑎᓗᒋᑦ, ᑐᓂᕐᕈᓯᕐᕕᐅᑉ ᕿᔪᐃᓪᓗ ᖄᖏᓐᓂ.

⁹ ᑐᓂᕐᕈᓯᕐᑑᑉ ᐆᒪᔫᑉ ᓂᐅᖏᑦ ᐃᕐᕋᕕᖏᓪᓗ ᐃᒥᕐᒧᑦ ᐃᕐᕈᕐᑐᒐᒃᓴᕆᕔᑦ, ᑐᓂᕐᕈᓯᕐᑎᑦᓯᔨᐅᓪᓕ ᐆᑕᒃᓴᕆᕔᑦ ᐊᑕᖏᕐᓗᒋᑦ ᑐᓂᕐᕈᓯᕐᕕᖕᒥ, ᑍᒤᑦᑐᖅ ᑐᓂᕐᕈᑎᒃᓴᐅᕗᖅ ᐃᑯᐊᓪᓚᒡᓗᒍ ᑐᓂᕐᕈᓯᕐᕕᖕᒥ, ᑎᐱᖓᓗ ᐊᑕᓂᐅᑉ ᒪᒪᕆᕚ.

¹⁰ “‘ᑐᓂᕐᕈᑎᒃᓴᕐᓕ ᒥᑭᓐᓂᕐᓴᐅᒃᐸᑦ, ᓰᐱᓘᓐᓃᑦ ᒎᑦᓯᓘᓐᓃᑦ ᑐᓂᕐᕈᓯᕐᓂᐊᕐᑐᖅ ᑐᓂᕐᕈᓯᕐᑐᒃᓴᐅᕗᖅ ᐊᖑᓴᓪᓗᕐᒥᒃ ᖃᓄᐃᓐᓂᖃᖏᑦᑐᒥᒃ.

¹¹ “‘ᑐᓂᕐᕈᓯᕐᓂᐊᕐᑑᑉ ᑐᖁᑕᒃᓴᕆᕚ ᑐᓂᕐᕈᓯᕐᕕᐅᑉ ᐅᓐᓄᐊᓪᓗᐊᖓᑕ ᓇᓛᓂ ᐊᑕᓂᐅᑉ ᑕᒃᑯᐊᓂ, ᐂᕉᓂᐅᓪᓗ ᐃᕐᓂᖏᑕ ᑐᓂᕐᕈᓯᕐᑎᑦᓯᔨᐅᔪᑦ ᐆᒪᔫᑉ ᐊᐅᖏᑦ ᓯᕐᐸᕐᓴᕈᑎᒋᔭᒃᓴᕆᕚᑦ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ.

¹² ᑐᓂᕐᕈᓯᕐᓂᐊᕐᑑᑉ ᐊᒡᒍᕆᐊᖃᕐᐹ, ᑐᓂᕐᕈᓯᕐᑎᑦᓯᔨᐅᓪᓗ ᐋᖅᑭᒃᓱᕐᓗᓂᐅᒃ, ᓂᐊᖁᐊᓗ ᑐᓐᓄᖏᓪᓗ, ᕿᔪᐃᑦ ᐃᑯᒪᔪᑦ ᖄᖏᓐᓄᑦ ᑐᓂᕐᕈᓯᕐᕕᖕᒥ.

¹³ ᑐᓂᕐᕈᓯᕐᓂᐊᕐᑑᑉ ᐆᒪᔫᑉ ᐃᕐᕋᕕᖏᑦ ᓂᐅᖏᓪᓗ ᐃᒥᕐᒧᑦ ᐃᕐᕈᕐᑐᕐᓗᒋᑦ, ᑐᓂᕐᕈᓯᕐᑎᑦᓯᔨᐅᓪᓗ ᐊᒡᔭᕐᓗᓂᒋᑦ ᐃᑯᐊᓚᑎᓪᓗᒋᓪᓗ ᑐᓂᕐᕈᓯᕐᕕᖕᒥ, ᑍᒤᑦᑐᖅ ᑐᓂᕐᕈᓯᕐᓂᐅᖕᒪᑦ ᐃᑯᐊᓪᓚᒡᓗᒍ ᑐᓂᕐᕈᓯᕐᕕᖕᒥ, ᑎᐱᖓᓗ ᐊᑕᓂᐅᑉ ᒪᒪᕆᕚ.

¹⁴ “‘ᑐᓂᕐᕈᑎᒃᓴᕐᓕ ᐊᑕᓂᕐᒧᑦ ᐃᑯᐊᓚᑎᑕᒃᓴᖅ ᑎᖕᒥᐊᖑᒃᐸᑦ, ᑐᓂᕐᕈᓯᕐᑐᒃᓴᐅᕗᖅ ᑑᕕᒥᒃ ᐅᕝᕙᓘᓐᓃᑦ ᐊᕿᒡᒋᐅᔮᕐᑐᒥᒃ ᐱᑦᔨᐊᓐᒥᒃ ᐱᐊᕋᕕᓂᕐᒥᒃ.

¹⁵ ᑐᓂᕐᕈᓯᕐᑎᑦᓯᔨᐅᑉ ᑐᓂᕐᕈᓯᕐᕕᖕᒧᐊᕈᑎᔭᕆᐊᖃᕐᐹ ᓂᐊᖁᐊᓗ ᕿᐱᓪᓗᒍ ᐲᕐᓗᒍ ᑐᓂᕐᕈᓯᕐᕕᖕᒥᓗ ᐃᑭᓪᓗᒍ; ᐊᐅᖓ ᑐᓂᕐᕈᓯᕐᕕᐅᑉ ᓴᓂᕌᓄᑦ ᑯᕕᑎᓪᓗᒍ ᐱᔪᒃᓴᐅᕗᖅ.

¹⁶ ᑐᓂᕐᕈᓯᕐᓂᐊᕐᑑᑉ ᑎᖕᒥᐊᑉ ᐳᕕᐊᖓ ᐲᕐᓗᓂᐅᒃ ᐃᓗᓕᖏᓪᓗ ᐃᒋᓪᓗᒋᑦ ᑐᓂᕐᕈᓯᕐᕕᐅᑉ ᓴᓂᕌᓄᑦ ᓯᕿᓂᐅᑉ ᓄᐃᕕᐊᑕ ᓇᓛᓄᑦ, ᐊᕐᔭᓂᓗᒃᑯᕕᖕᒧᑦ.

¹⁷ ᑐᓂᕐᕈᓯᕐᓂᐊᕐᑑᑉ ᐊᓕᒃᑕᒃᓴᕆᕚ ᐊᖕᒪᕐᓗᒍ ᐃᓴᕈᖏᑎᒍᑦ, ᐲᑦᓯᐊᒻᒪᕆᖏᓪᓗᒋᒃ, ᑐᓂᕐᕈᓯᕐᑎᑦᓯᔨᐅᑉ ᐃᑯᐊᓚᑎᑕᒃᓴᕆᕚ ᕿᔪᐃᑦ ᖄᖓᓂ ᑐᓂᕐᕈᓯᕐᕕᖕᒥ, ᑍᒤᑦᑐᖅ ᑐᓂᕐᕈᓯᕐᓂᐅᖕᒪᑦ ᐃᑯᐊᓚᓗᒍ ᑐᓂᕐᕈᓯᕐᕕᖕᒥ, ᑎᐱᖓᓗ ᐊᑕᓂᐅᑉ ᒪᒪᕆᕚ.’”