ᔫᑎᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᓗᓁᕐᓯᓃᑦ

¹ ᔫᑎᒥᑦ, ᔩᓱᓯ ᙭ᔅᑑᓯᐅᑉ ᐱᔨᖓᓂᑦ ᔧᒥᓯᐅᑉ ᓄᑲᖓᓂᑦ, ᑎᑎᕋᕐᐳᖓ ᕾᖁᔭᐅᓯᒪᔪᓄᑦ, ᒎᑎᒥ ᐊᑖᑕᒥ ᓇᒡᓕᖕᓇᕐᑐᓄᑦ ᓴᐳᑎᔭᐅᓯᒪᔪᓄᓪᓗ ᔩᓱᓯ ᙭ᔅᑑᓯᒧᑦ:

² ᓂᑲᒋᔭᐅᓂᖅ, ᐃᓅᓯᕐᒧᑦ ᓮᒪᔪᒦᓐᓇᕐᑐᖅ, ᓇᒡᓕᖕᓂᕐᓗ ᐃᓕᑦᓯᓐᓂ ᐊᑐᓂ ᐱᕙᓪᓕᐊᖏᓐᓇᕐᓕ.

ᐊᔪᕆᕐᑐᐃᓂᕐᓗᒃᑐᑦ

³ ᓇᒡᓕᖕᓇᕐᑐᓯ, ᑎᑎᕋᐅᓯᖃᕈᒪᓯᒪᒐᒪ ᐱᐅᓕᔭᐅᓯᒪᖃᑎᒌᖕᓂᑦᑎᓐᓂᒃ, ᐱᔭᕆᐊᖃᓪᓚᕆᒐᓱᒋᒐᒪ ᑎᑎᕋᕐᕕᒋᓗᓯ ᑕᒪᒃᑯᓂᖓ ᑲᔪᖏᕐᓴᕐᓗᓯ ᐅᒃᐱᕐᓂᒃᑯᑦ ᐃᑦᔪᕐᓁᑎᑕᐅᔪᓄᑦ ᑐᓂᔭᐅᓯᒪᔪᖅ ᑲᔪᓯᑦᔪᑎᒋᑦᓯᐊᕐᓗᒍ ᓯᕐᓂᒋᓗᒍᓗ ᐱᖁᓪᓗᓯ.

⁴ ᐃᓚᖏᑦ ᐱᖏᑦᓯᕐᑐᕐᓗᑎᒃ ᐅᕙᑦᑎᓐᓄᑦ ᐃᓚᓕᐅᑎᓯᒪᖕᒪᑕ ᑍᑦᓱᒪᓂᐊᓗᖕᓂᑦ ᐅᖃᐅᓯᐅᔭᕇᕐᓯᒪᔪᑦ ᓱᒋᐊᕐᑕᐅᓛᕐᓂᕐᒥᖕᓂᒃ ᐱᓯᒪᓕᕇᕐᑐᑦ, ᑖᒃᑯᐊ ᐅᒃᐱᖏᑦᑐᑦ ᒎᑎᑦᑕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᓇᕐᕈᓇᕐᓯᑎᑉᐹᑦ ᐃᒃᓯᒎᕐᓂᕐᒥᖕᓂᒃ ᐊᑐᕐᓂᕐᒥᖕᓄᑦ ᓱᓇᐅᑎᓐᖏᓛᓪᓗ ᐊᖓᔪᖅᑳᑐᐊᕗᑦ ᐊᑕᓂᑐᐊᕗᓪᓗ ᔩᓱᓯ ᙭ᔅᑑᓯ.

⁵ ᖃᐅᔨᒪᒐᓗᐊᕐᑎᓪᓗᓯ ᐃᖅᑬᑎᑦᓱᒪᕙᑦᓯ, ᐊᑕᓂᐅᑉ ᐃᓴᕆᐊᓕᒥᐅᑦ ᐱᐅᓕᓚᐅᕐᓗᒋᑦ ᐄᑦᔨᑉᑎᒥᑦ, ᑭᖑᕐᖓᒍᑦ ᐅᒃᐱᖏᑦᑐᑦ ᐊᓯᕈᓚᐅᕐᒪᒋᑦ.

⁶ ᐂᖏᓖᓪᓗ ᐱᔪᓐᓇᕐᓂᕐᒥᓃᖏᓐᓇᓚᐅᓐᖏᓚᑦ ᐃᓂᒋᔭᒥᖕᓂᒡᓗ ᕿᒤᓚᐅᕐᐳᑦ ᑖᑦᓱᒧᖓᓗ ᕿᓚᒃᑕᐅᓚᐅᕐᐳᑦ ᓴᕕᕋᔭᖕᓄᑦ ᐃᓱᖃᖏᑦᑐᒧᑦ ᕿᓚᒃᓯᒪᓂᐊᓕᕐᓗᑎᒃ ᑖᕐᑐᕐᔪᐊᕐᒥ ᐊᒃᐸᓯᖕᓂᕐᐹᒥ ᑕᕝᕙᓂᓗ ᐅᑕᖅᑭᑎᑕᐅᕗᑦ ᐅᓪᓗᕐᔪᐊᕐᒧᑦ ᐃᖅᑲᕐᑐᐃᓂᐅᓛᕐᑐᒧ;

⁷ ᐃᖅᑲᐅᒪᓯᐅᒃᑕᐅᖅ ᓱᑑᒪ ᒍᒨᕋᓗ ᖃᓂᒋᔭᖓᓃᑦᑐᓪᓗ ᓄᓇᓖᑦ, ᑖᒃᑯᐊ ᑖᒃᑯᑎᑐᓇᕐᑕᐅᖅ ᐃᒃᖠᒎᕐᓂᖃᓚᐅᕐᑐᑦ ᐊᖑᑏᑦ ᐊᕐᓁᓪᓗ ᐱᐅᓯᐅᕙᖏᑦᑐᓄᑦ ᓄᓕᐊᖃᑦᑕᓚᐅᕐᑐᑦ, ᓱᒋᐊᕐᑕᐅᓚᐅᕐᐳᑦ ᐃᑯᒪᒧᑦ ᖃᒥᓱᐃᑦᑐᒧᑦ ᐅᓗᕆᐊᒋᔭᒃᓴᐅᖁᓪᓗᒋᑦ.

⁸ ᑍᒫᒃᑕᐅᖅ ᑖᒃᑯᐊ ᓯᓐᓇᒃᑑᒪᓂᒃᑯᑦ ᑕᑯᑎᑕᐅᓯᒪᓂᕋᕐᓗᑎᒃ ᐊᔪᕐᑐᓕᑎᓚᐅᕐᐳᑦ ᓇᖕᒥᓂᖅ ᑎᒥᒥᒃᑎᒍᑦ, ᒎᑎᐅᑉ ᐊᐅᓚᑦᓯᓂᖓᓄᑦ ᐊᐅᓚᑕᐅᔪᒪᓇᑎᒃ, ᐃᑦᔪᕐᓁᑦᑐᕐᔪᐊᓪᓗ ᕿᓚᖕᒦᑦᑐᑦ ᐅᖃᕐᓂᕐᓘᑎᒋᕔᑦ.

⁹ ᐂᖏᓖᓪᓕ ᐊᖓᔪᖅᑳᖓᑦ ᒤᑯᓪ, ᐊᑭᕋᕐᑐᕐᓗᓂ ᓵᑖᓇᓯᒥᒃ, ᒨᓯᓯᐅᑉ ᑎᒥᖓᓂᒃ ᐂᕝᕙᑦᔪᑎᖃᕐᓗᑎᒃ, ᒤᑯᓪ ᐅᖃᐅᓯᖃᓚᐅᓐᖏᓚᖅ ᓵᑖᓇᓯᐅᑉ ᐃᖅᑲᕐᑐᕐᑕᐅᓂᒃᓴᖓᓂᒃ, ᐅᖃᑐᐃᓐᓇᓚᐅᕐᐳᕐᓕ, “ᐊᑕᓂᐅᑉ ᓱᒋᐊᕐᓕᑎᑦ.”

¹⁰ ᐃᓄᐃᓪᓕ ᑖᒃᑯᐊ ᓱᓇᓕᒫᓂᒃ ᐅᖃᕐᓂᕐᓘᑎᖃᖃᑦᑕᕐᐳᑦ ᑐᑭᓯᓯᒪᓐᖏᑕᒥᖕᓂᒃ, ᐃᒃᐱᒋᓕᕐᑕᑐᐃᓐᓇᒥᖕᓂᒃᓗ ᖃᐅᔨᓯᒪᔭᒥᖕᓄᑦ ᐆᒪᔪᑎᑐᑦ ᓄᔪᐊᕐᑐᑎᑐᑦ ᐱᓇᓱᐊᕐᐸᒃᐳᑦ, ᑕᒪᒃᑯᓄᖓ ᑕᕝᕙ ᓱᒋᐊᕐᑕᐅᑦᔪᑎᖃᕐᐳᑦ.

¹¹ ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᑖᒃᑯᐊ! ᑬᓂᐅᑉ ᐱᓂᐊᕐᓂᕆᓚᐅᕐᑕᖓᓂᒃ ᒪᓕᖕᒪᑕ, ᐸᓛᒥᐅᓪᓗ ᑕᒻᒪᕐᓂᕆᓚᐅᕐᑕᖏᑎᑐᑦ ᑮᓇᐅᔭᓂᒃ ᐱᔪᒪᓗᐊᕐᓂᕐᒧᑦ ᐃᒻᒥᖕᓂᒃ ᐊᓐᓂᕆᔪᓐᓃᕐᓯᒪᕗᑦ, ᑰᕋᐅᓪᓗ ᐊᑭᓂᐊᕋᓱᖕᓂᖓᑐᑦ ᑖᑦᓱᑐᓇᖅ ᐊᓯᕈᕐᑕᐅᕗᑦ.

¹² ᐃᓅᖃᑎᒌᑦᓯᐊᕐᓂᖅ ᐱᓪᓗᒍ ᓂᕆᕕᒃᔪᐊᖃᑎᒌᖕᓂᑦᓯᓂ ᐱᓐᖏᑦᓯᕐᑐᕐᓗᑎᒃ ᐱᖃᑕᐅᕗᑦ ᓱᕅᔪᒪᓪᓗᑎᒃ ᐃᓕᑦᓯᓐᓂᒃ, ᐃᒻᒥᖕᓂᑐᐊᖅ ᐃᓱᒪᒋᕗᑦ; ᓄᕗᔭᑎᑐᑦ ᓯᓚᓗᒃᑎᑦᓯᔪᓐᓇᖏᑦᑐᑎᑐᑦ ᐊᓄᕆᒧᑦ ᐃᖏᕐᕋᔪᑎᑐᑦ ᑍᒤᑉᐳᑦ; ᓇᐹᕐᑐᑎᑐᑦ ᐱᕈᕐᑐᖃᖏᑦᑐᑎᑐᑦ ᐅᑭᐊᒃᓵᖑᓕᕐᑎᓪᓗᒍ, ᓇᐹᕐᑐᑦ ᐊᒫᖏᑎᒍᑦ ᐲᕐᑕᐅᓯᒪᔪᑎᑐᑦ, ᑐᖁᖓᓪᓚᕆᒃᐳᑦ.

¹³ ᐃᖏᐅᓕᐊᓗᒃᑎᑐᑦ ᐃᒪᕕᖕᒥ ᑍᒤᑉᐳᑦ, ᖃᐳᐊᓕᕐᑎᑦᓯᓂᕐᒥᒃ ᓴᖅᑭᑎᑦᓯᔪᑎᑐᑦ ᐱᓂᐊᕐᓂᕐᒥᒃᑎᒍᑦ ᑲᓐᖑᓇᕐᑐᒦᑎᑉᐳᑦ; ᐅᓪᓗᕆᐊᑎᑐᑦ ᐃᖏᕐᕋᑐᐃᓐᓈᕐᑐᑎᑐᑦ ᑍᒤᑉᐳᑦ ᐃᓂᓕᐅᕐᑕᐅᔭᕆᕐᓯᒪᕗᑦ ᐃᓱᖃᖏᑦᑐᒧᑦ ᑕᕝᕙᓃᖏᓐᓇᕐᓂᐊᓕᕐᓗᑎᒃ ᑖᕐᑐᕐᔪᐊᕐᒥ.

¹⁴ ᐃᓅᑭ ᐋᑕᒥᐅᑉ ᑭᖑᕚᖏᑕ 7ᖓᓐᓂᑦ ᐱᓯᒪᓪᓗᓂ ᓇᓚᐅᑦᑍᑎᑕᐅᓚᐅᕐᐳᖅ ᑖᒃᑯᓂᖓ ᐱᑦᔪᑎᖃᕐᖢᓂ, “ᑕᑯᒋᑦ, ᐊᑕᓂᖅ ᕾᓕᕐᐳᖅ ᐂᖏᓖᑦ ᐃᑦᔪᕐᓁᑦᑐᖁᑎᓂ ᓈᓴᒐᒃᓴᐅᖏᑦᑐᑦ ᐃᓚᒋᓗᒋᑦ,

¹⁵ ᑕᒤᓐᓂᒃ ᐃᖅᑲᕐᑐᐃᔭᕐᑐᕐᓗᓂ, ᐅᒃᐱᖏᑦᑐᑦ ᐱᓂᐊᕐᓂᓕᒫᖏᑦ ᓴᖅᑭᑎᓚᐅᕐᑕᖏᓪᓗ ᓱᒋᐊᕆᐊᕐᑐᓕᕐᓗᒋᑦ, ᐅᖃᕐᓂᕐᓗᖃᑦᑕᕐᓯᒪᔪᓪᓗ ᐅᒃᐱᖏᑦᑐᑦ ᐊᔪᕐᑐᓕᔪᓪᓗ ᐊᑭᕋᕐᑐᕐᓗᑎᒃ ᑖᑦᓱᒥᖓ!”

¹⁶ ᑖᒃᑯᐊ ᓈᒪᒃᓴᓐᖏᓐᓇᐅᔭᕐᐳᑦ, ᐊᓯᒥᖕᓂᒡᓗ ᓈᒻᒪᖏᑦᔪᑎᒃᓴᓯᐅᕐᐸᒃᓗᑎᒃ; ᐱᔪᒪᕕᒡᔪᐊᕐᑕᒥᖕᓂᒃ ᐱᐅᖏᑦᑐᓂᒃ ᒪᓕᑐᐃᓐᓇᕐᐳᑦ, ᖃᓂᑐᐃᓐᓇᕐᒥᒃᑎᒍᑦ ᐊᔪᖏᑦᑐᐊᓘᔮᕐᐳᑦ, ᐃᓄᖕᓄᑦ ᐱᐅᒋᔭᐅᑎᓐᓇᓱᐊᕐᐳᑦ ᐱᔪᒪᔭᒥᖕᓂᒃ ᐊᑐᕈᒪᓪᓗᑎᒃ.

ᐅᓗᕆᐊᒋᔭᒃᓮᑦ ᐊᔪᕆᕐᑐᐃᓃᓪᓗ

¹⁷ ᐃᖅᑲᐅᒪᔪᒃᓴᐅᕗᓯ ᓇᒡᓕᖕᓇᕐᑐᓯ, ᐅᖃᐅᓯᐅᓯᒪᔪᓂᒃ ᐱᓛᕐᑐᓂᒃ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐋᐴᓯᑕᓕᑯᑎᖏᑎᒍᑦ.

¹⁸ ᐅᖃᐅᑎᓚᐅᕐᒪᓯ, “ᐅᓪᓗᐃᑦ ᑭᖑᓪᓕᖏᓐᓂ ᒥᑕᐅᑎᒃᓴᕐᑎᑕᖃᕈᒫᕐᐳᖅ, ᒎᑎ ᑲᒪᒋᓇᒍ ᐃᒃᖠᒎᕐᓂᕐᒥᖕᓂᒃ ᒪᓕᑐᐃᓐᓇᕐᑐᓂᒃ.”

¹⁹ ᑖᒃᑯᐊ ᑕᕝᕙ ᐃᓄᖕᓂᒃ ᐊᕕᑎᑦᓯᔪᑦ, ᓯᓚᕐᔪᐊᕐᒥᒃ ᒪᓕᑐᐃᓐᓇᕐᑐᑦ, ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐱᓯᒪᖏᑦᑐᑦ.

²⁰ ᐃᓕᑦᓯᓕ ᓇᒡᓕᒋᔭᒃᑲ, ᐃᓕᑦᓯᓐᓂᒃ ᐱᕙᓪᓕᐊᑎᓕᕆᑦᓯ ᐅᒃᐱᕐᓂᑯᑦ ᐃᑦᔪᕐᓁᑦᑐᒃᑯᑦ; ᑐᒃᓯᐊᕐᓗᓯ ᐊᓂᕐᓂᒃᑯᑦ ᐃᑦᔪᕐᓁᑦᑐᒃᑯᑦ;

²¹ ᒎᑎᐅᑉ ᓇᒡᓕᖕᓂᖓᓃᑦᓮᓐᓇᕆᑦᓯ; ᐅᑕᖅᑭᓗᓯ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᓂᑲᒍᓱᖕᓂᕆᔪᒫᕐᑕᖓᓂᒃ ᐃᓅᓯᕐᒧᑦ ᓄᖑᓱᐃᑦᑐᒧᑦ ᑎᑭᐅᑎᔪᒥᒃ.

²² ᖁᓚᕐᑐᑦ ᓂᑲᒍᓱᒃᕕᒋᓯᐅᒃ;

²³ ᐃᓚᖏᑦ ᓄᓱᒃᓯᒋᒃ ᓴᐳᑎᓗᒋᓪᓗ ᐃᑯᒪᕐᔪᐊᒥᑦ; ᐃᓚᖏᑦ ᓂᑲᒋᓗᒋᑦ ᓯᕘᕋᓂᕐᒥᑦ, ᐊᓐᓄᕌᖏᑦ ᐆᒥᒋᓗᒋᑦ ᑎᒥᐅᑉ ᐃᒃᖠᒎᕐᓂᖓᓄᑦ ᐃᑦᓴᒃᑕᐅᓯᒪᔪᑦ.

ᑐᒃᓯᐊᕐᓂᖅ ᓂᕐᑐᐃᓂᕐᓗ

²⁴ ᑖᓐᓇᓕ ᐃᓕᑦᓯᓐᓂᒃ ᓴᐳᑦᔨᔪᓐᓇᕐᑐᖅ ᑲᑕᖁᓇᓯ ᐸᓯᔭᒃᓴᐅᖁᓇᓯᓗ ᓵᒥᓄᑦ ᐱᓐᓇᕐᓇᕐᑐᕐᔪᐊᒧᑦ ᐂᑎᑦᓯᔪᓐᓇᕐᑐᖅ ᖁᕕᐊᓱᒃᑐᐊᓘᑎᓪᓗᓯ;

²⁵ ᒎᑎᑐᐊᒧᑦ, ᐱᐅᓕᔨᑦᑎᒍᑦ ᔩᓱᓯ ᙭ᔅᑑᓯᒃᑯᑦ ᐊᑕᓂᑦᑎᒍᑦ, ᑖᓐᓇ ᐱᖃᕐᑐᖅ ᓂᕐᑐᕐᑕᐅᓂᕐᒥᒃ, ᐅᐱᒋᔭᐅᓂᕐᒥᒃ, ᐊᖓᔪᖅᑲᐅᓂᕐᒥᒃ, ᐱᔪᓐᓇᕐᓂᕐᒥᒡᓗ, ᓲᕐᓗ ᐱᒋᐊᕐᓂᕐᒥᑦ ᑍᒤᓚᐅᕐᒪᑦ ᑍᒤᒻᒪᓗ ᒫᓐᓇ ᑍᒤᖏᓐᓇᕐᓂᐊᕐᒪᓪᓗ ᐃᓱᖃᖏᑦᑐᒧᑦ. ᐋᒦᓐ.