ᔮᓱᐊᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᒋᐱᐊᒥᐅᑦ ᓯᓔᕐᕆᒃᓯᕐᓂᖓᑦ ᔮᓱᐊᒥᒃ

¹ ᐃᓴᕆᐊᓕᒥᐅᑦ ᓵᓚᖃᕐᓂᖓᑦ ᑐᓴᐅᒪᔭᐅᓕᕐᐳᖅ ᐊᖓᔪᖅᑳᕐᔪᐊᓕᒫᓄᑦ ᔪᐊᕐᑕᓂᐅᑉ ᖃᖅᑲᖏᓐᓃᑦᑐᓄᑦ, ᓇᑎᕐᓇᒦᑦᑐᓄᑦ ᒥᑎᑎᕆᓂᐊᑉ ᑕᕆᐅᖓᑕ ᓯᓈᖓᓃᑦᑐᓕᒫᓄᓪᓗ ᓕᐸᓇᓂ ᑎᑭᓪᓗᒍ, ᕼᐃᑍᑎᒥᐅᑦ, ᐊᒧᕅᑎᒥᐅᑦ, ᑬᓇᓂᒥᐅᑦ, ᐱᕆᔧᑎᒥᐅᑦ, ᕼᐃᕔᑎᑎᒥᐅᑦ, ᔨᐳᓮᑎᒥᐅᓄᓪᓗ.

² ᑖᒃᑯᐊ ᑲᑎᓚᐅᕐᐳᑦ ᑲᑐᑦᔨᖃᑎᒌᒡᓗᑎᒃ ᐅᓇᑕᕈᒪᓪᓗᑎᒃ ᔮᓱᐊᒥᒃ ᐃᓴᕆᐊᓕᒥᐅᓂᒡᓗ ᑕᐱᕇᓕᓗᑎᒃ.

³ ᒋᐱᐅᓂᒥᐅᓪᓕ ᑐᓴᕋᒥᒃ ᔮᓱᐊᑉ ᐱᓂᐊᕐᓂᕆᓚᐅᕐᑕᖏᓐᓂᒃ ᔨᕆᑯᒧᑦ ᐂᒧᓪᓗ,

⁴ ᓯᓔᕐᕆᒃᓯᔪᒪᓕᕐᐳᑦ ᑖᒃᑯᓂᖓ ᐱᔨᑦᓯᕐᑎᐅᓐᖑᐊᕈᒪᓪᓗᑎᒃ, ᓂᕿᓂᒃ ᐅᓯᓕᕐᓱᕐᐳᑦ ᓯᐅᑎᖅᑯᕐᑐᔪᖁᑎᒥᖕᓂᒃ ᐴᖅᑬᓪᓗᑎᒡᓗ ᐱᑐᖃᕐᓄᑦ ᕔᓂᖃᐅᑎᓄᑦ ᐃᓛᕐᑐᕐᓯᒪᔪᓄᓪᓗ.

⁵ ᐊᓐᓄᕌᕕᓂᑐᖃᕐᓂᒃ ᐊᑎᕗᑦ, ᐃᑎᒐᐅᔭᕐᓗᑎᒡᓗ ᐃᓛᕐᑐᕐᓯᒪᔪᓂᒃ; ᓂᐊᖂᔭᓂᒡᓗ ᓇᒃᓴᕐᐳᑦ ᐸᓂᕐᑐᓂ ᐅᖁᒃᓯᒪᔪᓂᒃ.

⁶ ᔮᓱᐊᓪᓗ ᑕᖕᒫᕐᓯᒪᕕᖓᓄᑦ ᒋᐅᓪᒐᐅᓪᒧᑦ ᐂᕗᑦ, ᐅᖃᕐᓗᑎᒡᓗ ᔮᓱᐊᒧᑦ ᐃᓴᕆᐊᓕᒥᐅᓄᓪᓗ, “ᐅᖓᓯᒃᑐᒥᑦ ᓄᓇᒥᑦ ᐱᕗᒍᑦ; ᐊᖏᖃᑎᖃᕈᒪᒐᑦᑕ ᐃᓕᑦᓯᓐᓂᒃ.”

⁷ ᐃᓴᕆᐊᓕᒥᐅᑦ ᕼᐃᕔᑎᒥᐅᓄᑦ ᐅᖃᕐᐳᑦ, “ᓱᖕᒪᑦ ᐊᖏᖃᑎᖃᕆᐊᖃᕐᐱᑖ? ᐃᒻᒪᖄᓕ ᒫᓂᑦᓯᐊᖅ ᓄᓇᖃᕐᑐᓯ, ᖃᓄᖅ ᐊᖏᖃᑎᖃᕈᒪᒐᑦᓯ?”

⁸ ᑖᒃᑯᐊ ᔮᓱᐊᒧᑦ ᐅᖃᕐᐳᑦ, “ᐃᓱᒤᓐᓇᕐᕈᑕᐅᕗᒍᑦ ᐃᓕᖕᓄᑦ.” ᔮᓱᐊᑉ ᐅᖃᐅᑎᕔᑦ, “ᑭᓇᒃᑯᒥᐅᑕᐅᕕᓰ? ᓇᑭᓪᓗ ᐱᓯᒪᕕᓰ?”

⁹ ᑖᒃᑯᐊ ᐅᖃᐅᑎᕚᑦ, “ᓄᓇᒥᑦ ᐅᖓᓯᒃᑐᒥᑦ ᐱᓯᒪᕗᒍᑦ, ᑐᓴᓚᐅᕋᑦᑕ ᐊᑕᓂᕐᒥᒃ ᒎᑎᑦᓯᓐᓂᒃ, ᑐᓴᕐᑎᑕᐅᓯᒪᒐᑦᑕ ᑖᑦᓱᒥᖓ, ᐱᓂᐊᕐᓂᕆᓯᒪᔭᓕᒫᖏᓐᓂᒡᓗ ᐄᑦᔨᑉᑎᒥ,

¹⁰ ᐱᓂᐊᕐᓂᕆᓚᐅᕐᑕᖓᓂᒡᓗ ᐊᖓᔪᖅᑳᕐᔪᐊᖕᓄᑦ ᒪᕐᕉᖕᓄᑦ ᐊᒧᕅᒥᐅᑕᓄᑦ ᔪᐊᕐᑕᓂᐅᑉ ᐊᑭᐊᓃᑦᑐᓄᑦ, ᐊᖓᔪᖅᑲᕐᔪᐊᖅ ᓮᕼᐆᓂ ᕼᐃᓴᐸᓂᒥᐅᑕᖅ, ᐹᓴᓂᒥᐅᓪᓗ ᐊᖓᔪᖅᑳᕐᔪᐊᖓ ᐋᒡ, ᓄᓇᖃᓚᐅᕐᑐᖅ ᐋᔅᑕᕉᑎᒥ.

¹¹ ᐊᖓᔪᖅᑳᑦᑕ ᐃᓄᖁᑎᑦᑕᓗ ᓄᓇᑦᑎᓐᓃᑦᑐᑦ ᐅᖃᐅᑎᓚᐅᕐᐹᑎᒍᑦ, ‘ᓂᕿᓂᒃ ᑕᖁᐊᕐᓗᓯ ᐂᓚᐅᕆᑦᓯ, ᑲᑎᓯᔭᕐᑐᕐᓗᓯ ᐅᖃᐅᑎᓛᕐᐸᓯ, “ᐃᓕᑦᓯᓐᓄᑦ ᒪᓂᕗᒍᑦ; ᕾᓗᓯ ᐊᖏᖃᑎᒌᓚᐅᕐᑕ.”’

¹² ᑕᑯᓚᐅᕐᓯᒋᑦ ᓂᐊᖂᔧᑦ ᓇᒃᓴᕐᑕᕗᑦ; ᐊᐅᓪᓚᕐᑎᓪᓗᑕ ᓄᓇᑦᑎᓐᓂᑦ ᐆᓇᓚᐅᕐᑑᒐᓗᐊᑦ ᑕᖁᐊᕆᓕᕐᓗᑎᒍ, ᑕᑯᓚᐅᕐᓯᒋᑦ ᒫᓐᓇ ᐸᓂᕐᒪᑕ ᐅᖁᒃᓯᒪᓕᕐᓗᑎᒡᓗ;

¹³ ᕔᓂᖃᐅᑎᕗᑦ ᓄᑖᖑᑎᓪᓗᒋᑦ ᐃᒻᒥᓚᐅᕐᑕᕋᓗᐊᕗᑦ, ᑕᑯᓚᐅᕐᓯᒋᑦ, ᐊᓕᒃᑐᕐᓯᒪᓕᕐᑐᑦ, ᐊᓐᓄᕌᕗᓪᓗ ᐃᑎᒐᐅᔭᕗᓪᓗ ᐱᑐᖃᐅᓕᕐᐳᑦ ᐊᑯᓂ ᐃᖏᕐᕋᓂᑦᑎᓐᓄᑦ.”

¹⁴ ᐃᓴᕆᐊᓕᒥᐅᑦ ᐊᖏᖃᑎᖃᓚᐅᕐᐳᑦ ᑖᒃᑯᓂᖓ ᓂᕿᖏᓐᓂᒡᓗ ᐱᓪᓗᑎᒃ, ᑭᓯᐊᓂᓕ ᐊᑕᓂᕐᒥᒃ ᖃᐅᔨᒋᐊᓚᐅᓐᖏᓚᑦ.

¹⁵ ᔮᓱᐊ ᐊᖏᖃᑎᖃᓚᐅᕐᐳᖅ ᐃᓚᓐᓈᕆᔪᒪᓪᓗᒋᑦ, ᑐᖁᑕᐅᖁᓇᒋᓪᓗ; ᐃᓴᕆᐊᓕᒥᐅᓪᓗ ᓯᕗᓕᕐᑎᖏᑦ ᐊᖏᒻᒪᕆᓚᐅᕐᐳᑦ ᐃᓚᓐᓈᖃᕈᒪᓪᓗᑎᒃ ᑖᒃᑯᓂᖓ.

¹⁶ ᐅᓪᓗᐃᑦ ᐱᖓᓱᑦ ᐊᓂᒍᕐᒪᑕ ᐊᖏᖃᑎᖃᓚᐅᕐᑎᓪᓗᒋᑦ ᑖᒃᑯᓂᖓ, ᐃᓴᕆᐊᓕᒥᐅᑦ ᑐᓴᓕᓚᐅᕐᐳᑦ ᑖᒃᑯᐊ ᖃᓂᑦᑐᒥ ᓄᓇᖃᕐᓂᖏᓐᓂᒃ, ᓄᓇᖓᑕᓗ ᐃᓚᖓᓃᓐᓂᖏᓐᓂᒃ.

¹⁷ ᐃᓴᕆᐊᓕᒥᐅᓪᓗ ᐊᐅᓪᓚᕋᒥᒃ ᐅᓪᓗᐃᑦ ᐱᖓᓱᑦ ᐊᓂᒍᕐᑎᓪᓗᒋᑦ ᑎᑭᑉᐳᑦ ᐃᒡᓗᒐᓴᖕᓄᑦ ᐅᑯᓄᖓ, ᒋᐱᐅᓂᒥᐅᓄᑦ, ᓯᐱᕋᒥᐅᓄᑦ, ᐱᐊᕌᔅᒥᐅᓄᑦ, ᑭᕆᐊᑦ-ᔨᕆᒻᒧᓪᓗ.

¹⁸ ᐃᓴᕆᐊᓕᒥᐅᓪᓕ ᑖᒃᑯᓂᖓ ᑐᖁᑦᓯᔪᓐᓇᓚᐅᓐᖏᓚᑦ, ᑖᒃᑯᐊ ᓯᕗᓕᕐᑎᖏᓐᓄᑦ ᐊᖏᖃᑎᖃᓚᐅᕐᒪᑕ ᐊᑕᓂᐅᑉ ᐊᑎᖓᓂ ᐃᓴᕆᐊᓕᒥᐅᑦ ᒎᑎᖓᓄᑦ. ᑕᕝᕙ ᐃᓄᓕᒫᑦ ᐱᐅᒃᓴᕈᓐᓃᓚᐅᕐᐳᑦ ᐅᖃᕐᓂᕐᓘᑎᖃᕐᓗᑎᒡᓗ ᑕᒪᑐᒥᖓ ᓯᕗᓕᕐᑎᒥᖕᓂᒃ.

¹⁹ ᓯᕗᓕᕐᑏᓪᓕ ᐅᖃᓚᐅᕐᐳᑦ ᐃᓄᓕᒫᓄᑦ, “ᐊᖏᖃᑎᖃᓚᐅᕋᑦᑕ ᑖᒃᑯᓂᖓ ᐊᑕᓂᕐᒧᑦ ᐃᓴᕆᐊᓕᒥᐅᑦ ᒎᑎᖓᑕ ᐊᑎᖓᓄᑦ, ᒫᓐᓇᓕ ᐱᒋᐊᕈᓐᓇᓐᖏᓚᕗᑦ.

²⁰ ᐃᒤᓕᖓᔪᒃᓴᐅᓕᕐᐳᒍᑦ ᑖᒃᑯᓄᖓ, ᐃᓅᑎᑕᒃᓴᕆᕙᕗᑦ ᐊᖏᕐᕕᒋᓚᐅᕋᑦᑎᒍᑦ, ᑲᔪᓯᓐᖏᑐᐊᕈᑦᑕ ᒎᑎᒧᑦ ᓂᓐᖓᐅᑦᔭᐅᓗᑕ ᓱᒋᐊᕐᑕᐅᖁᓇᑕ.”

²¹ ᑕᕝᕙ ᐅᖃᒃᑲᓐᓂᕐᐳᑦ ᐃᓄᖕᓄᑦ, “ᐃᓅᑎᓕᕐᓚᕗᑦ,” ᕿᔪᖕᓂᒡᓕ ᓇᑲᑎᕆᔨᐅᓕᓚᐅᕐᐳᑦ ᐃᒥᕐᑕᕐᑎᐅᓪᓗᑎᒡᓗ ᐃᓄᓕᒫᓄᑦ, ᓯᕗᓕᕐᑏᑦ ᐊᖏᖃᑎᖃᕐᓯᒪᖕᒪᑕ ᑖᒃᑯᓂᖓ.

²² ᑕᕝᕙ ᔮᓱᐊᑉ ᕾᖁᔭᐅᖁᓚᐅᕐᐰᑦ ᐊᐱᕆᓪᓗᒋᓪᓗ, “ᓱᖕᒪᑦ ᐅᕙᑦᑎᓐᓂᒃ ᓯᓔᕐᕆᒃᓯᓚᐅᕐᐱᓰ? ᐅᖃᓚᐅᕋᑦᓯ, ‘ᐅᖓᓯᒋᔭᑦᓯᓐᓂ ᓄᓇᖃᕐᐳᒍᑦ,’ ᖃᓂᑦᑐᒥ ᓄᓇᖃᕐᑎᓪᓗᓯ?

²³ ᒫᓐᓇ ᐱᓇᓱᐊᕐᓂᕆᓚᐅᕐᑕᓯ ᒪᓕᒡᓗᒍ ᒎᑎᐅᑉ ᓱᒋᐊᕐᓂᐊᕐᐹᓯ, ᐃᓚᓯ ᐱᔨᒋᔭᐅᖏᓐᓇᕐᓂᐊᓕᕐᐳᑦ, ᕿᔪᖕᓂᒡᓗ ᓇᑲᑎᕆᔨᐅᓕᕐᓗᓯ ᐃᒥᕐᑕᕐᑎᐅᓗᓯᓗ ᒎᑎᒪ ᐃᒡᓗᖁᑎᖓᓄᑦ.”

²⁴ ᑖᒃᑯᐊ ᔮᓱᐊᒧᑦ ᑭᐅᕗᑦ ᐅᖃᕐᓗᑎᒡᓗ, “ᑍᒫᒃ ᐱᓂᐊᕐᓂᖃᓚᐅᕐᐳᒍᑦ ᐊᖓᔪᖅᑳᒃ, ᑐᓴᓚᐅᕋᑦᑕ ᐊᑕᓂᐅᑉ ᒎᑎᑦᓯ ᐱᔨᓂ ᒨᓯᓯ ᐱᖁᓚᐅᕐᒪᒍ ᓄᓇᓕᓕᒫᓂᒃ ᐃᓕᖕᓄᐊᕆᖁᓪᓗᒍ, ᑐᖁᑕᐅᖁᓪᓗᒋᓪᓗ ᐃᓄᓕᒫᑦ ᓄᓇᓖᑦ ᖃᓂᖏᔭᑦᓯᓐᓃᑦᑐᑦ; ᑍᒫᒃ ᐱᓂᐊᕐᓂᖃᓚᐅᕐᐳᒍᑦ ᐊᒃᓱᐊᓗᒃ ᑲᑉᐱᐊᓱᓚᐅᕋᑦᑕ ᐃᓕᑦᓯᓐᓂᒃ, ᐃᓅᓯᕗᑦ ᓴᐳᑎᓇᓱᓚᐅᕐᐸᕗᑦ.

²⁵ ᒫᓐᓇᓕ, ᐃᓕᑦᓯᓐᓄᑦ ᐃᓱᒪᕐᓲᑕᐅᕗᒍᑦ; ᐱᓂᐊᕐᕕᒋᓕᕐᑎᒍᑦ ᐅᕙᑦᑎᓐᓄᑦ ᐃᓱᐊᕐᑑᓇᓱᒋᔭᓯ ᒪᓕᒡᓗᒍ.”

²⁶ ᑕᕝᕙ ᔮᓱᐊ ᐱᓇᓱᐊᓚᐅᕐᐳᖅ ᑖᒃᑯᓄᖓ, ᓴᐳᑎᓚᐅᕐᐰᑦ ᑐᖁᑕᐅᖁᓇᒋᑦ ᐃᓴᕆᐊᓕᒥᐅᓄᑦ; ᑖᒃᑯᐊᓗ ᑐᖁᑕᐅᓚᐅᓐᖏᓚᑦ.

²⁷ ᐅᓪᓗᒥ ᑖᑦᓱᒪᓂ ᔮᓱᐊᑉ ᐱᔨᓐᖑᕐᑎᓚᐅᕐᐰᑦ, ᕿᔪᖕᓂᒃ ᓇᑲᑎᕆᔨᓐᖑᕐᓗᑎᒃ ᐃᒥᕐᑕᕐᑎᐅᓕᕐᓗᑎᒡᓗ ᐃᓴᕆᐊᓕᒥᐅᓄᑦ ᐊᑕᓂᐅᓪᓗ ᑐᓂᕐᕈᓯᕐᕕᖁᑎᖓᓄᑦ, ᐅᓪᓗᒥᒧᑦ ᑎᑭᓪᓗᒍ ᓱᓕ ᑍᒤᓕᐅᕐᐳᑦ ᐊᑕᓂᐅᑉ ᑐᒃᓯᐊᕆᐊᕐᑐᕐᕕᐅᖁᔭᖓᓄᑦ, ᐱᓇᓱᐊᕐᑎᐅᓪᓗᑎᒃ.