ᔮᓱᐊᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᑉ ᓵᓚᐅᓂᖓ ᐊᓯᕈᕐᑕᐅᓂᖓᓗ

¹ ᐊᑕᓂᖅ ᐅᖃᕐᐳᖅ ᔮᓱᐊᒧᑦ, “ᐅᓇᑕᕐᑐᒃᓴᓕᒫᑦ ᐃᓚᒋᓗᒋᑦ ᐂᒨᓕᕆᑦᓯ; ᑲᑉᐱᐊᓱᒃᑍᓕᒋᑦᓯ ᓴᐱᕐᑍᓕᓗᓯᓗ, ᓵᓚᖃᕐᑎᓐᓂᐊᕐᐸᒋᑦ ᐂᑉ ᐊᖓᔪᖅᑳᕐᔪᐊᖓᓂᒃ, ᐃᓄᖁᑎᖏᓐᓂᒡᓗ, ᐃᒡᓗᒐᓴᖏᑦ ᓄᓇᖁᑎᖏᓪᓗ ᐱᓂᐊᕐᐸᓯ.

² ᐱᓂᐊᕐᓂᖃᕐᑐᒃᓴᐅᕗᓯ ᐂᑉ ᐊᖓᔪᖅᑳᕐᔪᐊᖓᓄᑦ ᑍᒫᑦᓮᓐᓇᖅ ᔨᕆᑰᑉ ᐊᖓᔪᖅᑳᕐᔪᐊᖓᓂᒃ ᐱᓂᐊᕐᕕᖃᓚᐅᕐᓂᑦᓯᑐᑦ; ᑭᓯᐊᓂᓕ ᑕᒪᑐᒪᓂ ᐱᖁᑎᖏᑦ ᐱᔪᓐᓇᕐᓂᐊᕐᐸᓯ ᐆᒪᔪᖁᑎᖏᓪᓗ ᓇᖕᒥᓂᕐᑖᕆᓗᒋᑦ; ᐅᓇᑕᕆᐊᓕᕐᓯᐅᒃ ᐃᒡᓗᒐᓮᑦ ᐅᐸᓗᐃᓗᒋᑦ ᑐᓄᐊᓂᑦ.”

³ ᑕᕝᕙ ᔮᓱᐊ ᐊᑐᐃᓐᓇᐅᓕᕐᐳᖅ, ᐅᓇᑕᕐᑐᒃᓴᖁᑎᖏᓪᓗ ᐂᒧᑦ ᐅᓇᑕᕆᐊᕐᓂᐊᕐᓗᑎᒃ; ᓂᕈᐊᕐᐳᕐᓗ 30,000ᓂᒃ ᐱᔪᓐᓇᕐᓂᕐᐹᓂᒃ, ᑎᓕᕔᓪᓗ ᐅᓐᓄᐊᑯᑦ.

⁴ ᐃᒫᒃ ᐅᖃᐅᑎᓪᓗᒋᑦ, “ᐃᔨᕐᓯᒪᓂᐊᕐᐳᓯ ᐃᒡᓗᒐᓮᑦ ᑐᓄᐊᓂ; ᐅᖓᓯᒋᔭᖓᓃᑦᑍᓕᒋᑦᓯ ᖃᓂᒋᔮᓂᓕ ᐊᑐᐃᓐᓇᐅᓂᐊᕐᐳᓯ ᐅᓇᑕᕐᓂᕐᒧᑦ.

⁵ ᐅᕙᖓᓕ ᐃᓄᐃᓪᓗ ᐃᓚᒋᔭᒃᑲ, ᐃᒡᓗᒐᓮᑦ ᐅᐸᖕᓂᐊᕐᐸᕗᑦ, ᐂᒥᐅᑍᓪᓗ ᐅᐸᒃᐸᑎᒍᑦ, ᕿᒫᓂᐊᕐᐳᒍᑦ, ᑍᒫᑦᓮᓐᓇᖅ ᑍᒤᓚᐅᕋᑦᓯ ᓯᕗᓪᓕᕐᒥᒃ.

⁶ ᒪᓕᖕᓂᐊᕐᐹᑎᒍᓪᓗ, ᐃᒡᓗᒐᓮᑦ ᐅᖓᓯᒋᔮᓄᐊᕐᑎᓐᓇᓱᖕᓂᐊᕐᐸᕗᑦ; ᐃᓱᒪᓂᐊᕐᒪᑕ ᕿᒫᔭᐅᓇᓱᒋᓗᑎᒃ, ᑍᒫᑦᓮᓐᓇᖅ ᑍᒤᓚᐅᕋᑦᑕ.

⁷ ᑍᒪᓕ ᐃᔨᕐᓯᒪᕕᑦᓯᓐᓂᑦ ᐊᓂᓗᓯ ᐃᒡᓗᒐᓮᑦ ᐅᐸᖕᓂᐊᕐᐸᓯ ᓵᓚᒋᓗᒋᓪᓗ; ᐊᑕᓂᐅᑉ ᒎᑎᑦᓯ ᑐᓂᓂᐊᕐᐹ ᐃᓕᑦᓯᓐᓄᑦ.

⁸ ᐃᒡᓗᒐᓮᑦ ᓵᓚᒋᒍᑦᓯᐅᒃ ᐃᑯᐊᓪᓚᒃᑎᓐᓂᐊᕐᐸᓯ ᐊᑕᓂᖅ ᑍᒫᒃ ᑎᓕᓯᓚᐅᕐᒪᑦ; ᑖᒃᑯᐊ ᑕᕝᕙ ᑎᓕᓯᑦᔪᑎᒋᔭᒃᑲ ᐃᓕᑦᓯᓐᓄᑦ.”

⁹ ᑕᕝᕙ ᔮᓱᐊᑉ ᐊᐅᓪᓚᕐᑎᑉᐰᑦ; ᐃᔨᕐᕕᒃᓴᒥᖕᓄᓪᓗ ᐂᕗᑦ, ᐅᑕᖅᑭᓕᕐᓗᑎᒡᓗ ᑕᕝᕙᓂ, ᐂᑉ ᓯᕿᓂᖓᑕ ᓂᐱᕕᐊᑕ ᓇᓛᓃᑦᑐᒧᑦ, ᐂᓪᓗ ᐱᑎᓕᐅᓪᓗ ᐊᑯᓐᓂᖓᓃᑦᑐᒧᑦ, ᔮᓱᐊᓕ ᓯᓂᓚᐅᕐᐳᖅ ᑕᖕᒫᕐᓯᒪᕕᖕᒥᓂ.

¹⁰ ᔮᓱᐊᓗ ᐅᓪᓛᒻᒪᕆᒃᑯᑦ ᒪᑭᑉᐳᖅ ᐅᓇᑕᕐᑐᒃᓴᖁᑎᖏᓪᓗ, ᐃᓴᕆᐊᓕᒥᐅᓪᓗ ᐊᖓᔪᖅᑳᖏᑦ ᐃᓚᒋᓪᓗᒋᑦ ᐂᒧᐊᕐᐳᑦ.

¹¹ ᐅᓇᑕᕐᑐᒃᓮᓪᓗ ᐃᓚᒋᓪᓗᒋᑦ ᐃᒡᓗᒐᓮᑦ ᐃᑎᕐᑕᕐᕕᖓᑕ ᖃᓂᒋᔮᓄᐊᕋᒥᒃ ᑕᖕᒫᕐᐳᑦ ᐃᒡᓗᒐᓮᑦ ᐅᓐᓄᐊᖓᑕ ᓇᓛᓄᑦ, ᑖᒃᑯᐊᓗ ᐂᓪᓗ ᐊᑯᓐᓂᖓᓂ ᓇᑎᕐᓇᕐᑕᖃᓚᐅᕐᐳᖅ.

¹² ᐊᖑᑎᓪᓗ 5,000ᓮᑦ ᐃᓚᒋᓪᓗᒋᑦ ᐃᔨᕆᐊᕐᑐᕐᐳᑦ, ᐃᒡᓗᒐᓮᑦ ᓯᕿᓂᐅᑉ ᓂᐱᕕᐊᑕ ᓇᓛᓄᑦ, ᐂᓪᓗ ᐱᑎᓕᐅᓪᓗ ᐊᑯᓐᓂᖓᓄᑦ.

¹³ ᑕᕝᕙ ᐅᓇᑕᕐᑐᒃᓮᑦ ᐋᖅᑭᒃᓱᕐᐳᑦ ᐅᓇᑕᕐᓂᕐᒧᑦ, ᐃᓚᖏᓪᓗ ᑕᖕᒫᕐᓗᑎᒃ ᐃᒡᓗᒐᓮᑦ ᐅᓐᓄᐊᖓᑕ ᓇᓛᓄᑦ, ᐊᓯᓕᒫᖏᑦ ᐃᒡᓗᒐᓮᑦ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᒧᑦ ᐂᕗᑦ, ᔮᓱᐊᓕ ᐅᓐᓄᒥ ᑕᕝᕙᓂ ᓯᓂᒃᑕᕐᐳᖅ ᓇᕐᓴᒥ.

¹⁴ ᐂᑉ ᐊᖓᔪᖅᑳᕐᔪᐊᖓ ᔮᓱᐊᑉ ᐃᓄᖁᑎᖏᓐᓂᒃ ᑕᑯᒐᒥ ᐅᐃᒻᒪᒃᓗᓂ ᐱᒋᐊᓚᐅᕐᐳᖅ, ᐊᖑᑎᓕᒫᑦ ᐃᓚᒋᓪᓗᒋᑦ ᐊᓂᕗᑦ ᔪᐊᕐᑕᓂᐅᑉ ᓇᑎᕐᓇᖓᑕ ᓇᓛᓄᑦ ᐅᓇᑕᕆᐊᕐᓗᑎᒃ ᐃᓴᕆᐊᓕᒥᐅᓂᒃ ᑕᕝᕗᖓᑦᓮᓐᓇᖅ ᐅᓇᑕᕐᕕᒋᓚᐅᕐᑕᒥᖕᓄᑦ; ᖃᐅᔨᒪᓚᐅᓐᖏᓚᕐᓕ ᐃᒡᓗᒐᓴᖏᑕ ᑐᓄᐊᓂᑦ ᐱᒋᐊᕐᑕᐅᓕᒑᓂᕐᒥᖕᓂᒃ.

¹⁵ ᔮᓱᐊᓗ ᐃᓴᕆᐊᓕᒥᐅᓕᒫᓪᓗ ᑲᑉᐱᐊᓱᓐᖑᐊᓚᐅᕐᐳᑦ, ᕿᒫᓪᓗᑎᒡᓗ ᐃᓄᖃᔪᐃᑦᑐᒧᑦ.

¹⁶ ᐊᖑᑎᓕᒫᑦ ᐃᒡᓗᒐᓴᖕᒥᐅᑦ ᑎᓕᔭᐅᓚᐅᕐᐳᑦ ᒪᓕᒃᓴᖁᔭᐅᓪᓗᑎᒃ ᔮᓱᐊᒃᑯᓐᓂᒃ, ᒪᓕᒃᑎᓪᓗᒋᑦ ᕿᒤᕙᓪᓕᐊᑎᑕᐅᓚᐅᕐᐳᑦ ᐃᒡᓗᒐᓴᖕᓂᒃ.

¹⁷ ᐊᖑᑎᓕᒫᑦ ᐂᒦᑦᑐᑦ ᐱᑎᓕᒦᑦᑐᓪᓗ ᒪᓕᓚᐅᕐᐳᑦ ᐃᓴᕆᐊᓕᒥᐅᓂᒃ; ᐃᒡᓗᒐᓴᒥᓂᒃ ᕿᒤᓪᓗᑎᒃ ᐅᒃᑯᐃᓐᖔᕐᑐᒥᒃ ᓴᐳᑦᔨᔨᒃᓴᖃᖏᑦᑐᓂᒃ, ᐃᓴᕆᐊᓕᒥᐅᓂᒃ ᒪᓕᒡᓗᑎᒃ.

¹⁸ ᐊᑕᓂᕐᓕ ᐅᖃᕐᐳᖅ ᔮᓱᐊᒧᑦ, “ᖃᓗᒋᐊᑦ ᑎᒃᑯᐊᕐᑎᓚᐅᕈᒃ ᐂᒧᑦ; ᐃᓕᖕᓄᑦ ᑐᓂᓂᐊᓕᕋᒃᑯ.” ᑕᕝᕙ ᔮᓱᐊ ᓈᓚᒃᐳᖅ ᐅᖃᐅᑦᔭᐅᑦᔪᑎᒥᓂᒃ ᖃᓗᒋᐊᓂᓗ ᑎᒃᑯᐊᕐᑎᑉᐹ ᐃᒡᓗᒐᓴᖕᓄᑦ.

¹⁹ ᐊᒡᒐᓂ ᐃᓴᑐᐊᕐᒪᒋᑦ, ᐊᖑᑏᑦ ᐃᔨᕐᓯᒪᔪᑦ ᐃᓂᒥᖕᓂᑦ ᑐᐊᕕᕐᓗᑎᒃ ᒪᑭᑉᐳᑦ, ᐅᓪᓚᒃᓗᑎᒡᓗ ᐃᒡᓗᒐᓴᖕᓄᑦ ᐃᑎᕐᐳᑦ ᓵᓚᒋᓪᓗᒍᓗ, ᑐᐊᕕᕐᓗᑎᒡᓗ ᐃᒡᓗᒐᓮᑦ ᐃᑯᐊᓪᓚᒃᑎᑉᐰᑦ.

²⁰ ᐊᖑᑏᓪᓕ ᐂᒥᐅᑦ ᐅᑎᒧᑦ ᑕᑯᓴᕋᒥᒃ, ᑕᑯᕗᑦ ᐃᓯᕐᓗᖕᒥᒃ ᓯᓚᒥ ᐃᒡᓗᒐᓴᖕᓂᑦ ᐱᔪᒥᒃ; ᕿᒫᕖᒍᑎᓪᓗᑎᒡᓗ ᓇᒧᑐᐃᓐᓇᖅ, ᐃᓴᕆᐊᓕᒥᐅᓪᓗ ᕿᒫᓚᐅᕐᑐᑦ ᐃᓄᖃᔪᐃᑦᑐᒧᑦ ᐅᑎᒧᑦ ᓵᓪᓗᑎᒃ ᒪᓕᒃᑐᓂᒃ ᐅᓇᑕᕆᐊᓕᕐᐳᑦ.

²¹ ᔮᓱᐊᓕ ᐃᓄᖁᑎᖏᓪᓗ ᑕᑯᒐᒥᒃ ᐃᒡᓗᒐᓮᑦ ᓵᓚᐅᓂᖓᓂᒃ ᐃᑯᐊᓪᓚᒃᑕᐅᓂᖓᓂᒡᓗ, ᐅᑎᒧᑦ ᓵᓪᓗᑎᒃ ᑐᖁᕅᓕᕐᐳᑦ ᐂᒥᐅᓂᒃ.

²² ᐃᓴᕆᐊᓕᒥᐅᓪᓗ ᐃᓚᖏᑦ ᐃᒡᓗᒐᓴᖕᓂᑦ ᐊᓂᓪᓗᑎᒃ ᐅᓇᑕᕆᐊᓕᕐᐳᑦ; ᐂᒥᐅᓪᓕ ᖃᐅᔨᓕᕐᐳᑦ ᐊᕙᓗᔭᐅᓯᒪᓂᕐᒥᖕᓂᒃ ᐃᓴᕆᐊᓕᒥᐅᓄᑦ; ᕿᒪᒃᓯᔪᖃᓚᐅᓐᖏᓚᖅ ᐊᓐᓇᒃᑐᖃᕋᓂᓗ ᑕᕝᕙᓐᖓᑦ.

²³ ᐂᓪᓕ ᐊᖓᔪᖅᑳᕐᔪᐊᖓ ᑐᖁᑕᐅᓇᓂ ᑎᒍᔭᐅᕗᖅ, ᔮᓱᐊᒨᕈᑎᔭᐅᓪᓗᓂᓗ.

²⁴ ᐃᓴᕆᐊᓕᒥᐅᓪᓕ ᑐᖁᕅᔭᕇᕋᒥᒃ ᐊᑭᕋᒥᖕᓂᒃ ᐃᓄᖃᔪᐃᑦᑐᒧᑦ ᒪᓕᓚᐅᕐᑐᓂᒃ, ᐂᒧᑦ ᐅᑎᕐᓗᑎᒃ ᑍᑲᓃᑦᑐᓕᒫᑦ ᑐᖁᕋᕐᐰᑦ.

²⁵ ᐂᒥᐅᓕᒫᑦ ᐅᓪᓗᒥ ᑍᑦᓱᒪᓂ, ᐊᖑᑏᑦ ᐊᕐᓁᓪᓗ 12,000ᓮᑦ ᑐᖁᑕᐅᓚᐅᕐᐳᑦ.

²⁶ ᔮᓱᐊᑉ ᖃᓗᒋᐊᓂ ᑎᒃᑯᐊᖎᓐᓇᓚᐅᕐᐹ ᐂᒧᑦ, ᐃᓄᓕᒫᖏᑦ ᑐᖁᑕᐅᔪᐃᓐᓇᐅᓚᐅᖄᕐᑎᓐᓇᒋᑦ.

²⁷ ᐃᓴᕆᐊᓕᒥᐅᑦ ᐃᒡᓗᒐᓴᖕᓃᑦᑐᓂᒃ ᐆᒪᔪᓂᒃ ᐱᖁᑎᓂᒡᓗ ᐱᓚᐅᕐᐳᑦ, ᐊᑕᓂᐅᑉ ᑍᒫᒃ ᔮᓱᐊ ᐅᖃᐅᑎᓚᐅᕐᒪᒍ.

²⁸ ᔮᓱᐊᑉ ᐃᑯᐊᓪᓚᓚᐅᕐᐹ ᐂ, ᕿᒪᓚᐅᕐᐹᓗ ᐊᓯᕈᒻᒪᕆᒡᓗᒍ, ᐅᓪᓗᒥᒧᑦ ᓱᓕ ᑍᒤᓕᖓᕗᖅ ᐃᓄᖃᕋᓂ.

²⁹ ᐂᑉ ᐊᖓᔪᖅᑳᕐᔪᐊᖓ ᕿᒥᓚᐅᕐᐹ ᓇᐹᕐᑐᒥ; ᑕᕝᕙᓃᑎᓚᐅᕐᐹᓗ ᐅᓐᓄᒃ ᑎᑭᓪᓗᒍ, ᓯᕿᓂᖅ ᓂᐱᓕᕐᑎᓪᓗᒍ ᔮᓱᐊ ᑎᓕᓯᕗᖅ ᑎᒥᖓ ᐲᕐᑕᐅᖁᓪᓗᒍ, ᐃᓕᔭᐅᕗᕐᓗ ᐃᒡᓗᒐᓮᑦ ᐃᑎᕐᑕᕐᕕᖓᑕ ᓯᕗᕌᓄᑦ, ᐱᕉᕐᓗᒍᓗ ᐅᔭᖅᑲᓄᑦ ᐳᕐᑐᓯᒻᒪᕆᒃᓗᒍ, ᐅᓪᓗᒥ ᓱᓕ ᑍᒤᓕᖓᕗᖅ.

ᐱᖁᔧᑦ ᐅᖃᓕᒫᕐᑕᐅᓂᖏᑦ ᖃᖅᑲᒥ ᐄᐸᓪᒥ

³⁰ ᔮᓱᐊᓗ ᖃᖅᑲᒥ ᐄᐸᐅᓪᒥ ᑐᓂᕐᕈᓯᕐᕕᓕᐅᕐᐳᖅ ᐊᑕᓂᕐᒧᑦ, ᐃᓴᕆᐊᓕᒥᐅᑉ ᒎᑎᖓᓄᑦ.

³¹ ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᓴᓇᖁᔨᓚᐅᕐᓂᖓᓂᒃ ᑲᔪᓯᑎᑦᓯᓪᓗᓂ ᑎᓕᓯᑦᔪᑎᒋᓚᐅᕐᑕᖏᓐᓂᒃ ᐃᓴᕆᐊᓕᒥᐅᓄᑦ, ᑍᒫᒃ ᒨᓯᓯᐅᑉ ᐱᖁᔭᖏᓐᓂ ᑎᑎᕋᕐᓯᒪᖕᒪᑦ: “ᑐᓂᕐᕈᓯᕐᕕᒃ ᓇᑲᑎᕐᑕᐅᓯᒪᖏᑦᑐᓂᒃ ᐅᔭᕋᖃᕆᐊᖃᕐᐳᖅ, ᓴᕕᕋᔭᖕᓄᑦ ᓴᓇᕐᕈᑎᓄᑦ ᐊᒃᑐᕐᑕᐅᓯᒪᖏᓪᓗᑎᒃ.” ᖄᖓᓂ ᑐᓂᕐᕈᓯᓚᐅᕐᐳᖅ ᐃᑯᐊᓚᑎᑦᓯᓪᓗᑎᒃ ᐊᑕᓂᕐᒧᑦ, ᑐᓂᕐᕈᓯᕐᓗᑎᒡᓗ ᓮᒻᒪᕐᑎᑕᐅᓂᕐᒧᑦ ᑐᓂᕐᕈᑎᒥᒃ.

³² ᑕᕝᕙᓂᓗ ᐃᓴᕆᐊᓕᒥᐅᑦ ᑕᑯᓐᓇᕐᑎᓪᓗᒋᑦ, ᔮᓱᐊᑉ ᑎᑎᕋᓚᐅᕐᐳᖅ ᐅᔭᕋᒃᑎᒍᑦ ᒨᓯᓯᐅᑉ ᐱᖁᔭᖏᑦ ᐊᑦᔨᓕᐅᕐᓗᒋᑦ, ᑖᑦᓱᒪ ᑎᑎᕋᕐᓯᒪᔭᖏᑦ.

³³ ᐃᓴᕆᐊᓕᒥᐅᓕᒫᑦ, ᐊᖓᔪᖅᑳᖏᓪᓗ ᐅᓇᑕᕐᑐᒃᓮᓪᓗ ᐊᖓᔪᖅᑳᖏᑦ, ᐃᓱᒪᓕᐅᕆᔩᓪᓗ ᓄᓇᓕᑐᖃᐅᖏᑦᑐᓪᓗ ᐃᓚᒋᔭᖏᑦ ᓇᖏᓚᐅᕐᐳᑦ ᐊᑭᓕᕇᒃᓗᑎᒃ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᑕ ᓴᓂᐊᓂ, ᓵᓐᖓᓪᓗᑎᒃ ᓕᕔᑎᓄᑦ ᑐᓂᕐᕈᓯᕐᑎᑦᓯᔨᓄᑦ ᐊᒡᔭᕐᓯᔪᓄᑦ ᑖᑦᓱᒥᖓ, ᐃᓄᐃᑦ ᐊᕝᕙᖏᑦ ᓇᖏᕐᐳᑦ ᖃᖅᑲᐅᑉ ᒋᕆᔨᐅᑉ ᓵᖓᓂ, ᐊᕝᕙᖏᓪᓗ ᖃᖅᑲᐅᑉ ᐄᐸᐅᑉ ᓵᖓᓃᓪᓗᑎᒃ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑍᒫᒃ ᐱᖁᓚᐅᕐᒪᒋᑦ ᓯᕗᓪᓕᕐᐹᒥᒃ, ᐃᓴᕆᐊᓕᒥᐅᓕᒫᑦ ᓮᒻᒪᕐᑕᐅᕕᒃᓴᖓᑦ ᓇᓪᓕᐅᑎᒃᐸᑦ.

³⁴ ᑭᖑᓂᖓᒍᑦ ᔮᓱᐊᑉ ᓂᐱᖃᕐᓗᓂ ᐱᖁᔭᓕᒫᑦ ᐅᖃᓕᒫᓕᕐᐰᑦ, ᓮᒻᒪᕐᑎᑕᐅᓇᕐᑐᑦ ᓱᒋᐊᕐᑕᐅᓇᕐᑐᓪᓗ, ᑍᒫᒃ ᐱᖁᔧᑦ ᑎᑎᕋᕐᓯᒪᔪᑦ ᒪᓕᒡᓗᒋᑦ.

³⁵ ᒨᓯᓯᐅᑉ ᐱᖁᔭᓕᒫᖏᑦ ᔮᓱᐊᑉ ᐅᖃᓕᒫᓚᐅᕐᐰᑦ ᑲᑎᒪᔪᓄᑦ ᐃᓴᕆᐊᓕᒥᐅᓄᑦ, ᐊᕐᓁᑦ ᕿᑐᕐᖓᖏᓪᓗ ᓄᓇᓕᑐᖃᐅᖏᑦᑐᓪᓗ ᐃᓅᖃᑎᖏᑦ ᐱᖃᑕᐅᔪᐃᓐᓇᐅᑎᓪᓗᒋᑦ.