ᔮᓱᐊᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᑲᓂᐅᑉ ᐊᔪᕐᑐᓕᓂᖓ

¹ ᐃᓴᕆᐊᓕᒥᐅᑉ ᑎᒍᓯᔪᖃᓚᐅᕐᐳᑦ ᐱᔭᐅᖁᔭᐅᖏᑦᑐᓂᒃ; ᐊᖑᑦ ᐂᑲᓐᒥᒃ ᐊᑎᓕᒃ ᑳᕐᒥᐅᑉ ᐃᕐᓂᖓ, ᑳᕐᒥ ᐃᕐᓂᕆᔭᐅᕗᖅ ᔭᑉᑍᒧᑦ, ᔭᑉᑍ ᐃᕐᓂᕆᔭᐅᕗᖅ ᔨᕋᒧᑦ, ᔫᑕᐅᑉ ᑭᖑᕚᖏᓐᓂᑦ ᐱᔪᖅ, ᑖᓐᓇ ᐂᑲᓐ ᐊᑕᓂᕐᒧᑦ ᑐᓂᔭᐅᓯᒪᔪᓂᒃ ᑎᒍᓯᓚᐅᕐᒪᑦ; ᐊᑕᓂᖅ ᓂᓐᖓᐅᑦᔨᓚᐅᕐᐳᖅ ᐃᓴᕆᐊᓕᒥᐅᓂᒃ.

² ᔮᓱᐊ ᐊᖑᑎᓂᒃ ᑎᓕᓯᓚᐅᕐᐳᖅ ᔨᕆᑯᒥᑦ ᐂᒧᑦ, ᐃᒡᓗᒐᓴᖕᓄᑦ ᐱᑦᐂᕕᐅᑉ ᖃᒥᒋᔮᓃᑦᑐᓄᑦ, ᐱᑎᓕᐅᑉ ᓯᕿᓐᓂᓕᕐᕕᖓᑕ ᓇᓛᓃᑦᑐᓄᑦ, ᑎᓕᓚᐅᕐᐰᑦ ᐅᖃᐅᑎᓪᓗᒋᑦ, “ᖃᐅᔨᓴᕆᐊᓚᐅᕆᑦᓯ ᓄᓇᖓᓂᒃ.” ᑍᒤᒻᒪᑦ ᑖᒃᑯᐊ ᖃᐅᔨᓴᕆᐊᓕᓚᐅᕐᐳᑦ ᓄᓇᒥᒃ ᐂᒥᒃ.

³ ᐅᑎᕋᒥᒃ ᔮᓱᐊᒧᑦ ᐅᖃᕐᐳᑦ, “ᐃᓄᓕᒫᑦ ᐂᔭᕆᐊᖃᓐᖏᓚᑦ ᐅᓇᑕᕆᐊᕐᓗᑎᒃ ᐂᒧᑦ, ᑎᓕᓯᓕᕆᑦ ᐃᒻᒪᖄ 2,000ᓂᒃ ᐅᕝᕙᓗ 3,000ᓂᒃ ᐊᖑᑎᓂᒃ ᐅᓇᑕᕆᐊᖁᓪᓗᒋᑦ ᐂᒥᒃ; ᐅᓇᑕᕐᑐᒃᓴᓕᒫᑦ ᑎᓕᔭᕆᐊᖃᓐᖏᑕᑎᑦ, ᐅᓇᑕᕐᑐᒃᓴᖏᑦ ᐅᓄᖏᒻᒪᑕ.”

⁴ ᑍᒤᒻᒪᑦ 3,000ᓮᑦ ᖃᓂᒋᔮᓃᑦᑐᑦ ᐃᓴᕆᐊᓕᒥᐅᑦ ᐅᓇᑕᕆᐊᓚᐅᕐᐳᑦ; ᑭᓯᐊᓂᓕ ᓵᓚᐅᓕᕋᒥᒃ ᐂᒥᐅᓄᑦ ᕿᒫᒃᓯᓚᐅᕐᐳᑦ,

⁵ ᐊᖑᑏᑦ ᐂᒥᐅᑦ ᕿᒫᑎᑦᓯᓚᐅᕐᐳᑦ ᐃᑎᕐᑕᕐᕕᖕᒥᑦ ᐱᒋᐊᕐᓗᑎᒃ ᓯᐸᕆᒻᒧᑦ ᑎᑭᓪᓗᑎᒃ, ᑐᖁᑦᓯᓚᐅᕐᐳᑦ 36ᓂᒃ. ᐃᓴᕆᐊᓕᒥᐅᑦ ᓴᐱᓕᓚᐅᕐᐳᑦ, ᑲᑉᐱᐊᓱᓕᕐᓗᑎᒡᓗ.

⁶ ᑕᕝᕙ ᔮᓱᐊ ᐃᓴᕆᐊᓕᒥᐅᓪᓗ ᐊᖓᔪᖅᑳᖏᑦ ᐊᓐᓄᕌᑎᒃ ᐊᓕᒃᐰᑦ ᕿᒃᓵᖕᓂᕐᒧᑦ, ᐹᒻᒪᒃᐳᓪᓗ ᐊᑕᓂᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓᑕ ᓵᖓᓄᑦ, ᑕᕝᕙᓃᓚᐅᕐᐳᓪᓗ ᐅᓐᓄᒃ ᑎᑭᓪᓗᒍ; ᐊᕐᔭᓕᓂᕐᓂᒡᓗ ᓂᐊᖁᕐᒥᓅᕆᓚᐅᕐᐳᑦ ᓇᓗᓁᕐᓯᓪᓗᑎᒃ ᕿᒃᓵᕕᒡᔪᐊᕐᓂᕐᒥᖕᓂᒃ.

⁷ ᔮᓱᐊᓗ ᐅᖃᕐᐳᖅ, “ᐊᔪᒐᖃᖏᑦᑐᑎᑦ ᐊᑕᓃᖅ ᒎᑏ! ᓱᖕᒪᑦ ᐃᑳᕐᑎᓚᐅᕐᐱᑎᒎᑦ ᔪᐊᕐᑕᓂᐅᑉ ᑰᖓᓂᒃ? ᐊᒧᕅᑎᒥᐅᓄᑦ ᑐᓂᔪᒪᓪᓗᑖ? ᐊᓯᕈᕈᒪᓪᓗᑕᓘ? ᐱᐅᓂᕐᓴᐅᒐᔭᓚᐅᓐᖏᓛᖅ ᔪᐊᕐᑕᓂᐅᑉ ᑰᖓᑕ ᐊᑭᐊᓃᑐᐃᓐᓇᓚᐅᕈᑦᑕ?

⁸ ᖃᓄᕐᓕ ᐅᖃᕐᑐᒃᓴᐅᕗᖓ, ᐊᑕᓃᖅ? ᐃᓴᕆᐊᓕᒥᐅᑦ ᕿᒫᓚᐅᕐᒪᑕ ᐊᑭᕋᒥᖕᓂᑦ!

⁹ ᑬᓇᓂᒥᐅᑉ ᓄᓇᓕᓕᒫᓪᓗ ᖃᓂᒋᔮᓃᑦᑐᑦ ᑐᓴᕐᓂᐊᕐᐳᑦ ᑕᒪᑐᒥᖓ, ᐊᕙᓗᔭᐅᓗᑕ ᑐᖁᑕᐅᓂᐊᓕᕐᐳᒍᑦ! ᖃᓄᐃᓕᐅᕐᓂᐊᕐᐱᓪᓖ ᐊᑎᕐᐱᑦ ᐅᐱᓐᓇᕐᓂᖓ ᓴᐳᑎᓗᒍ?”

¹⁰ ᐊᑕᓂᖅ ᐅᖃᕐᐳᖅ ᔮᓱᐊᒧᑦ, “ᒪᑭᓕᕆᑦ! ᓱᖕᒪᑦ ᐹᒻᒪᖓᕖᑦ ᒪᓂᖅᑲᒥ ᑍᒫᒃ?

¹¹ ᐃᓴᕆᐊᓕᒥᐅᑦ ᐊᔪᕐᑐᓕᓯᒪᖕᒪᑕ! ᓯᖁᒥᑦᓯᓚᐅᕐᒪᑕ ᐊᖏᖃᑎᒌᒍᑎᒋᓚᐅᕐᑕᑦᑎᓐᓂᒃ ᑎᓕᓯᑦᔪᑎᒋᓚᐅᕐᑕᓐᓂᒃ ᑖᒃᑯᓄᖓ; ᑎᒍᓯᓯᒪᖕᒪᑕ ᐱᖁᔭᐅᓚᐅᖏᑦᑐᓂᒃ ᑎᒡᓕᒡᓯᒪᓪᓗᑎᒃ, ᓴᒡᓗᓯᒪᓪᓗᑎᒡᓗ, ᑎᒍᔭᒥᖕᓂᒃ ᐱᖁᑎᒥᖕᓄᑦ ᐃᓚᓕᐅᑦᔨᓯᒪᖕᒪᑕ.

¹² ᑍᒤᒻᒪᑦ ᐃᓴᕆᐊᓕᒥᐅᑦ ᐃᓄᖏᑦ ᐊᑭᒪᔪᓐᓇᓐᖏᓚᑦ ᐊᑭᕋᒥᖕᓂᒃ; ᕿᒫᓚᐅᕐᐳᑦ ᐊᑭᕋᒥᖕᓂᒃ, ᐃᒻᒥᖕᓂᒃ ᐊᓯᕈᕋᒃᓴᐅᓕᕐᑎᓯᒪᖕᒪᑕ. ᐃᓚᒋᓂᐊᕈᓐᓁᕐᐸᑦᓯ, ᐊᓯᕈᐃᓚᐅᖏᓐᓂᑦᓯᓐᓂ ᐱᖁᔭᐅᓚᐅᖏᑦᑐᓂᒃ!

¹³ ᒪᑭᓕᕆᑦ! ᐃᓄᐃᑦ ᐃᑦᔪᕐᓁᓕᑎᓕᒃᑭᑦ, ᐅᖃᐅᑎᓗᒋᓪᓗ, ‘ᖃᐅᒃᐸᑦ ᐃᑦᔪᕐᓁᓕᕐᑎᑦᑐᒃᓴᐅᕗᓯ; ᐊᑕᓂᖅ, ᐃᓴᕆᐊᓕᒥᐅᑦ ᒎᑎᖓ ᑍᒫᒃ ᐅᖃᕐᒪᑦ, “ᐱᖁᑎᓂᒃ ᐱᓯᒪᒐᑦᓯ ᐊᓯᕈᕐᑕᐅᖁᓚᐅᕐᑕᓐᓂᒃ! ᐃᓴᕆᐊᓕᒥᐅᑦ; ᐊᑭᒪᔪᓐᓇᕐᓂᐊᓐᖏᓐᓇᑦᓯ ᐊᑭᕋᑦᓯᓐᓂᒃ ᐱᖁᔭᐅᓚᐅᖏᑦᑐᓂᒃ ᐱᓯᒪᓂᓯ ᑕᒪᓐᓇ ᑲᒪᒋᔭᐅᓚᐅᖅᑳᕐᑎᓐᓇᒍ.”

¹⁴ ᑍᒤᒻᒪᑦ ᐅᓪᓛᒃᑯᑦ ᑭᖑᕚᕇᑦ ᒪᓕᒡᓗᒋᑦ ᕾᔭᕆᐊᖃᕐᓂᐊᕐᐳᑦ; ᑭᖑᕚᕇᓪᓗ ᐊᑕᓂᐅᑉ ᓇᓗᓁᕐᑕᖏᑦ ᕾᔭᕆᐊᖃᕐᓂᐊᕐᐳᑦ ᐃᓚᒌᖑᓗᑎᒃ; ᐃᓚᒌᓪᓗ ᐊᑕᓂᐅᑉ ᓇᓗᓁᕐᑕᖏᑦ ᕾᔭᕆᐊᖃᕐᓂᐊᕆᕗᑦ ᐃᒡᓗᒥᐅᖃᑎᒌᖑᓪᓗᑎᒃ, ᐃᒡᓗᒥᐅᖃᑎᒌᓪᓗ ᐊᑕᓂᐅᑉ ᓇᓗᓁᕐᑕᖏᑦ ᕾᔭᕆᐊᖃᕐᓂᐊᕆᕗᑦ ᐊᖑᑏᑦ ᐃᓛᒃᑰᕐᓗᑎᒃ.

¹⁵ ᑖᓐᓇᓗ ᓇᓗᓁᕐᑕᐅᔪᖅ ᐱᐅᖏᑦᑐᒥᒃ ᐱᖁᑎᓂᒃ ᐱᓯᒪᔪᖅ ᐃᑭᑕᐅᔪᒃᓴᐅᕗᖅ, ᐃᓚᒌᑦ ᐃᓚᒋᓗᒋᑦ ᐱᖁᑎᓕᒫᖏᓪᓗ, ᑖᓐᓇ ᐊᔪᕐᑐᓕᑎᑦᓯᖕᒪᑦ ᐃᓴᕆᐊᓕᒥᐅᓂᒃ ᓯᖁᒥᑦᑎᓯᒪᓪᓗᓂᓗ ᐊᑕᓂᐅᑉ ᐊᖏᖃᑎᒌᒍᑎᒋᓯᒪᔭᖓᓂᒃ, ᑲᓐᖑᓇᕐᑐᒦᑎᑦᓯᓪᓗᓂᓗ ᐃᓴᕆᐊᓕᒥᐅᓂᒃ.’”

¹⁶ ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᔮᓱᐊᑉ ᒪᑭᑉᐳᖅ, ᐃᓴᕆᐊᓕᒥᐅᓪᓗ ᕾᖁᖃᑦᑕᓕᕐᐰᑦ ᑭᖑᕚᕇᑦ ᒪᓕᒡᓗᒋᑦ, ᔫᑕᐅᓪᓗ ᑭᖑᕚᖏᑦ ᓇᓗᓁᕐᑕᐅᕗᑦ;

¹⁷ ᔫᑕᐅᓪᓗ ᑭᖑᕚᖏᑦ ᕾᖁᔭᐅᕗᑦ, ᐃᓚᒌᑦ ᒪᓕᒡᓗᒋᑦ ᔨᕋᐅᓪᓗ ᐃᓚᖏᑦ ᓇᓗᓁᕐᑕᐅᕗᑦ, ᔨᕋᐅᓪᓗ ᐃᓚᖏᑦ ᕾᖁᔭᐅᕗᑦ, ᔭᑉᑍᓪᓗ ᐃᓚᖏᑦ ᓇᓗᓁᕐᑕᐅᕗᑦ.

¹⁸ ᔭᑉᑍᓪᓗ ᐃᓚᖏᑦ ᕾᖁᔭᐅᕗᑦ, ᐊᖑᑎᑦ ᐃᓛᒃᑯᕐᑎᑕᐅᖕᒪᑕ, ᐂᑲᓐᓗ, ᑳᕐᒥᐅᑉ ᐃᕐᓂᖓ ᔮᑉᑎᐅᑉ ᐃᕐᖑᑕᖓ, ᔨᕋᐅᑉ ᑭᖑᕚᖓ ᔫᑕᐅᑉ ᑭᖑᕚᖏᓐᓂᑦ ᓇᓗᓁᕐᑕᐅᕗᖅ.

¹⁹ ᔮᓱᐊᓪᓗ ᐂᑲᓐ ᐅᖃᐅᑎᕚ, “ᐃᕐᓃᒃ, ᓱᓕᔪᒥᒃ ᐅᖃᓚᐅᕆᑦ ᐊᑕᓂᐅᑉ ᓵᖓᓂ ᐃᓴᕆᐊᓕᒥᐅᑦ ᒎᑎᖓᑕ, ᖃᕿᐊᓕᕐᓗᑎᓪᓗ, ᐅᖃᐅᑎᓚᐅᓐᖓ ᖃᓄᐃᓕᐅᕐᓂᕐᒪᖔᕐᐱᑦ; ᐊᓐᖏᒍᑎᖏᓪᓗᖓ.”

²⁰ ᐂᑲᓐ ᔮᓱᐊᒧᑦ ᑭᐅᕗᖅ, “ᓱᓕᕗᖅ ᐊᔪᕐᑐᓕᓚᐅᕐᐳᖓ ᐊᑕᓂᕐᒧᑦ ᐃᓴᕆᐊᓕᐅᑉ ᒎᑎᖓᓄᑦ, ᐃᒫᒃ ᐱᓂᐊᕐᓂᖃᓚᐅᕐᐳᖓ.

²¹ ᑎᒍᓚᐅᕐᑕᑦᑕ ᐃᓚᖏᓐᓂᒃ ᑕᑯᓚᐅᕐᐳᖓ ᐱᐅᔪᐊᓗᖕᒥᒃ ᐹᐱᓘᓂᒥᐅᑦ ᐅᓕᒡᔪᐊᖓᓂᒃ, ᓯᐅᓪᕕᕆᓂᒡᓗ ᑕᓪᓕᒪᓂᒃ ᐅᖁᒤᓐᓂᓕᖕᒥᒃ, ᒎᓗᒥᒡᓗ ᐊᑕᐅᓯᕐᒥᒃ ᐅᖁᒤᓐᓂᓕᖕᒥᒃ, ᐱᔪᒪᒻᒪᕆᓕᕋᒃᑭᑦ ᑎᒍᓚᐅᕐᐸᒃᑲ; ᑕᑯᒋᓪᓗ, ᓇᓂᔪᓐᓇᕐᐸᓯ ᓴᐅᓯᒪᔪᑦ ᓄᓇᒥ ᑐᐱᕐᒪ ᐊᑖᓂ, ᓯᐅᓪᕕᕇᑦ ᐊᓪᓕᕐᐸᐅᑎᓪᓗᒋᑦ.”

²² ᔮᓱᐊᓗ ᑎᓕᓯᕗᖅ ᐊᖑᑎᓂᒃ, ᑖᒃᑯᐊᓗ ᑐᐊᕕᕐᓗᑎᒃ ᑐᐱᕐᒧᐊᕋᒥᒃ ᓇᓂᓯᕗᑦ ᐱᖁᑎᓂᒃ ᐃᔨᕐᓯᒪᔪᓂᒃ, ᓯᐅᓪᕕᕇᑦ ᐊᓪᓕᕐᐸᐅᑎᓪᓗᒋᑦ.

²³ ᑎᒍᒐᒥᒋᓪᓗ ᑐᐱᕐᒥᑦ ᐊᓂᕗᑦ, ᔮᓱᐊᒧᐊᕈᑎᓪᓗᒋᓪᓗ ᐃᓴᕆᐊᓕᒥᐅᓄᓪᓗ; ᐃᓕᕔᓪᓗ ᐊᑕᓂᐅᑉ ᓇᔪᕐᑕᖓᓄᑦ.

²⁴ ᔮᓱᐊᓪᓗ ᐃᓴᕆᐊᓕᒥᐅᓪᓗ ᐃᓚᒋᓪᓗᒋᑦ ᐂᑲᓐ ᔨᕋᐅᑉ ᑭᖑᕚᖓ ᑎᒍᕚᑦ, ᓯᐅᓪᕕᕇᓪᓗ ᐅᓕᒡᔪᐊᕐᓗ ᒎᓗᐃᓪᓗ, ᐃᕐᓂᖏᓪᓗ ᐸᓂᖏᓪᓗ ᐆᒪᔪᖁᑎᖏᓪᓗ ᓯᐅᑎᖅᑯᕐᑐᔪᖁᑎᖏᑦ ᓰᐱᖁᑎᖏᓪᓗ ᑐᐱᖓ ᓱᓇᑐᐃᓐᓇᓕᒫᓪᓗ ᓇᖕᒥᓂᖏᑦ; ᓇᕐᓴᒧᑦ ᐂᑯᐊᒧᑦ ᐂᑎᑉᐰᑦ.

²⁵ ᑕᕝᕙ ᔮᓱᐊᑉ ᐅᖃᐅᑎᕚ, “ᖃᓄᐃᒻᒪᑦ ᐱᐅᖏᑦᑐᒥᒃ ᐅᕙᑦᑎᓐᓄᑦ ᐱᑎᑦᓯᓚᐅᕐᐲᑦ? ᐊᑕᓂᐅᑉ ᒫᓐᓇ ᐱᐅᖏᑦᑐᒥᒃ ᐱᑎᓐᓂᐊᓕᕐᐹᑎᑦ.” ᐃᓴᕆᐊᓕᒥᐅᓕᒫᓪᓗ ᐅᔭᕋᖕᓄᑦ ᒥᓪᓗᕐᐹ ᑐᖁᓪᓗᒍ; ᐃᑭᓪᓗᒋᓪᓗ ᐃᓚᖏᑦ ᐱᖁᑎᖏᓪᓗ.

²⁶ ᐅᔭᕋᖕᓄᓪᓗ ᐱᕉᕐᐰᑦ ᐳᕐᑐᓯᓪᓗᒋᑦ ᐅᔭᕅᓪᓗ ᐅᓪᓗᒥᒧᑦ ᓱᓕ ᑕᕝᕙᓃᑉᐳᑦ; ᑍᒤᒻᒪᑦ ᑖᓐᓇ ᐅᓪᓗᒥᒧᑦ ᑍᔭᐅᓕᕐᐳᖅ ᓇᕐᓴᒥᒃ ᐂᑯᐊᒥᒃ. ᑭᖑᓂᖓᒍᓪᓗ ᐊᑕᓂᐅᑉ ᓂᓐᖓᐅᒪᓂᕐᒥᓂᑦ ᓮᒻᒪᕐᕕᒋᕔᑦ.