ᔮᓱᐊᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᑭᐱᔭᐅᓂᖅ ᒋᐅᓪᒐᐅᓪᒥ

¹ ᐊᒧᕅᑏᑦ ᐊᖓᔪᖅᑳᕐᔪᐊᓕᒫᖏᑦ ᔪᐊᕐᑕᓂᐅᑉ ᓄᓇᖓᑕ ᓯᕿᓂᖓᑕ ᓂᐱᕕᐊᑕ ᓇᓛᓃᑦᑐᑦ, ᑬᓇᓂᒥᐅᓪᓗ ᐊᖓᔪᖅᑳᕐᔪᐊᓕᒫᖏᑦ ᒥᑎᑎᕆᓂᐊᑉ ᐃᒪᖓᑕ ᑭᒡᓕᖓᓃᑦᑐᑦ ᑐᓴᕋᒥᒃ ᔪᐊᕐᑕᓂᐅᑉ ᑰᖓ ᐊᑕᓂᐅᑉ ᓴᓗᐊᕐᑎᓚᐅᕐᓂᖓᓂᒃ ᐃᓴᕆᐊᓕᒥᐅᑦ ᐃᑳᖅᑳᕐᑎᓐᓇᒋᑦ, ᑲᑉᐱᐊᓱᓕᕐᐳᑦ ᐅᓇᖕᒥᓱᒍᓐᓃᕐᓗᑎᒡᓗ ᐃᓴᕆᐊᓕᒥᐅᓂᒃ.

² ᑍᑦᓱᒪᓂᐅᑎᓪᓗᒍ ᐊᑕᓂᐅᑉ ᔮᓱᐊ ᐅᖃᐅᑎᕚ, “ᓴᕕᓕᐅᕆᑦ ᐅᔭᕋᖕᓂᒃ ᐊᖕᒫᓂᒃ, ᑭᐱᓯᖁᓪᓗᑎᑦ ᐃᓴᕆᐊᓕᒥᐅᓂᒃ ᑭᐱᔭᐅᓯᒪᖏᑦᑐᓂᒃ.”

³ ᑕᕝᕙ ᔮᓱᐊ ᐊᖕᒫᓂᒃ ᓴᕕᓕᐅᓚᐅᕐᓗᓂ, ᐃᓴᕆᐊᓕᒥᐅᑦ ᑭᐱᕔᑦ ᓄᓇᒥ ᑍᔭᐅᔪᒥ ᒋᐱᑦ-ᕼᐊᕋᓗᑎᒥᒃ ᖃᖅᑲᒥ.

⁴ ᑍᒤᒻᒪᑦ ᔮᓱᐊᑉ ᑭᐱᓚᐅᕐᐰᑦ: ᐃᓄᓕᒫᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᑐᑦ ᐊᖑᑏᑦ, ᐅᓇᑕᕈᓐᓇᕐᑐᓕᒫᑦ, ᑐᖁᓚᐅᕐᒪᑕ ᐃᓄᖃᔪᐃᑦᑐᒥ ᐊᖅᑯᑖᓂ, ᐄᑦᔨᑉᑎᒥᑦ ᐊᐅᓪᓚᕐᓯᒪᓕᕐᑎᓪᓗᒋᑦ.

⁵ ᐃᓄᓕᒫᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᑐᑦ ᑭᐱᓯᒪᓚᐅᕐᐳᑦ, ᑭᓯᐊᓂᓕ ᑍᒃᑯᐊ ᐃᓄᖃᔪᐃᑦᑐᒥ ᐃᓅᓚᐅᕐᑐᑦ ᑭᐱᔭᐅᓯᒪᓚᐅᖏᒻᒪᑕ.

⁶ ᐃᓴᕆᐊᓕᒥᐅᑦ ᐃᖏᕐᕋᓚᐅᕐᒪᑕ ᐊᕐᕌᒍᓂᒃ 40ᓂᒃ ᐃᓄᖃᔪᐃᑦᑐᒃᑯᑦ, ᐃᓅᖃᑎᒌᒡᔪᐊᑦ ᐊᖑᑏᑦ ᐅᓇᑕᕈᓐᓇᕐᑐᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᑐᑦ, ᐊᑕᓂᕐᒥᒃ ᓈᓚᓚᐅᖏᑦᑐᑦ ᑐᖁᖅᑳᕐᑎᓐᓇᒋᑦ; ᐊᑕᓂᐅᑉ ᑕᒪᓐᓇ ᐊᖏᕈᑎᒋᓚᐅᕐᒪᒍ ᑖᒃᑯᐊ ᑕᑯᖁᓇᒋᑦ ᓄᓇᒥᒃ ᓯᕗᓕᖏᓐᓄᑦ ᐊᖏᕈᑕᐅᓯᒪᔪᒥᒃ, ᓄᓇᒥᒃ ᓂᕿᒃᓴᖃᑦᓯᐊᕐᑐᒥᒃ ᐊᔪᕐᓴᕐᓇᖏᑦᑐᒥᓗ.

⁷ ᑖᒃᑯᐊ ᑕᕝᕙ ᕿᑐᕐᖓᖏᑦ, ᐃᖏᕐᕋᑎᓪᓗᒋᑦ ᐃᓄᖃᖏᑦᑐᒃᑯᑦ ᐃᓅᓕᕐᓯᒪᔪᑦ ᑭᐱᔭᐅᓯᒪᓚᐅᖏᒻᒪᑕ, ᔮᓱᐊᑉ ᑭᐱᓚᐅᕐᐰᑦ; ᑕᒫᓂ ᐊᖅᑯᑖᓂ ᐃᖏᕐᕋᑎᓪᓗᒋᑦ ᐃᓅᓕᕐᓯᒪᔪᑦ ᑭᐱᔭᐅᓯᒪᔪᖃᓚᐅᖏᒻᒪᑕ.

⁸ ᑭᐱᔭᐅᓂᕐᓗ ᐃᓅᖃᑎᒌᒡᔪᐊᓕᒫᓂ ᐱᔭᕇᕐᒪᑦ, ᐅᓪᓕᑑᒪᓚᐅᕐᐳᑦ ᑭᐱᔭᐅᓂᖏᑦ ᒪᒥᑦᓯᐊᓚᐅᖅᑳᕐᑎᓐᓇᒋᑦ.

⁹ ᑕᕝᕙ ᐊᑕᓂᖅ ᐅᖃᕐᐳᖅ ᔮᓱᐊᒧᑦ, “ᐅᓪᓗᒥ ᐄᑦᔨᑉᑎᒥ ᓇᕐᕈᓇᕐᓯᑎᑕᐅᓂᕆᓚᐅᕐᑕᓯ ᓱᓇᐅᒋᔭᐅᖏᓐᓂᒃᑯᑦ ᐲᕐᐸᕋ.” ᑍᒤᒻᒪᑦ ᓄᓇ ᓇᔪᕐᑕᖓ ᐊᑎᕐᑖᕐᑕᐅᕗᖅ ᒋᐅᓪᒐᐅᓪᒥᒃ ᐅᓪᓗᒥᒧᓪᓗ ᑎᑭᓪᓗᒍ ᐊᑎᕇᓐᓇᓕᕐᐹ.

¹⁰ ᐃᓴᕆᐊᓕᒥᐅᑦ ᑕᖕᒫᕐᓯᒪᓪᓗᑎᒃ ᒋᐅᓪᒐᐅᓪᒥ ᓇᑎᕐᓇᒦᑦᑐᒥ ᔨᕆᑰᑉ ᓴᓂᐊᓂ, ᓇᓪᓕᐅᓐᓂᕐᓯᐅᓚᐅᕐᐳᑦ ᖄᖏᕐᑕᐅᕕᐅᑉ ᓇᓪᓕᐅᓂᖓᓂᒃ ᑕᖅᑭᐅᑉ ᐅᓪᓗᖓᑕ 14ᖓᓂ ᐅᓐᓄᒃᑎᓪᓗᒍ.

¹¹ ᖃᐅᑎᓪᓗᒍ ᖄᖏᕐᑕᐅᕕᒃ ᐊᓂᒍᕐᑎᓪᓗᒍ, ᑕᕝᕙᓂ ᐅᓪᓗᒥ ᓯᕗᓪᓕᕐᐹᒥ, ᓂᕆᓕᓚᐅᕐᐳᑦ ᑬᓇᓂᒥ ᐱᕈᕐᑐᕕᓂᕐᓂᒃ, ᓂᐊᖂᔭᒥᒃ ᐆᓯᒪᔪᒥᒃ ᓂᐊᖂᔭᒥᒡᓗ ᐳᕙᓪᓚᕐᓴᐅᑎᖃᖏᑦᑐᒥᒃ ᐅᓪᓗᒥ ᑕᕝᕙᓂᑦᓮᓐᓇᖅ.

¹² ᑍᒤᒻᒪᑦ ᓂᕿᒃᓴᖓᑦ ᒫᓇ ᓄᖅᑲᓚᐅᕐᐳᖅ, ᐅᓪᓗᒥᑦ ᑕᕝᕙᓐᖓᑦ ᐱᒋᐊᕐᓗᒍ ᓂᕆᑐᐊᕐᒪᑕ ᓄᓇᒥᑦ ᑬᓇᓂᒥ ᐱᕈᕐᑐᕕᓂᕐᓂᒃ; ᐃᓴᕆᐊᓕᒥᐅᓪᓗ ᒫᓇᒥᒃ ᓂᕆᖃᑦᑕᕈᓐᓁᓚᐅᕐᐳᖅ, ᑬᓇᓂᒥᓪᓕ ᓂᕿᒃᓴᓂᒃ ᓂᕆᖃᑦᑕᖔᓕᓚᐅᕐᐳᑦ ᐊᕐᕌᒍᒥ ᑕᕝᕙᓂ ᐱᒋᐊᕐᓗᑎᒃ.

ᔮᓱᐊᓗ ᐊᖑᑏᓪᓗ ᓴᕕᒡᔪᐊᓖᑦ

¹³ ᔮᓱᐊ ᔨᕆᑰᑉ ᓴᓂᐊᓃᓪᓗᓂ, ᑕᑯᓴᕋᒥ ᑕᑯᕗᖅ ᐊᖑᒻᒥᒃ ᓇᖏᕐᑐᒥᒃ, ᓯᕗᕋᕐᒥᓂ ᓴᕕᒡᔪᐊᒥᓂᒃ ᑎᒍᒥᐊᕐᑐᒥᒃ; ᔮᓱᐊᑉ ᐅᐸᒃᓗᒍ ᐊᐱᕆᕚ, “ᐅᓇᑕᕐᑐᒃᓴᖁᑎᒋᕙᑦᑎᒌᑦ ᐅᕝᕙᓗ ᐊᑭᕋᑦᑎᓐᓂᒥᐅᑕᐅᕕᑦ?”

¹⁴ ᐊᖑᓪᓕ ᑭᐅᕗᖅ, “ᓇᓪᓕᐊᓐᓃᓐᖏᓚᖓ; ᑕᒫᓃᑉᐳᖓᓕ ᐊᑕᓂᐅᑉ ᐅᓇᑕᕐᑎᖏᓐᓄᑦ ᐊᖓᔪᖅᑳᕆᔭᐅᓪᓗᖓ.” ᔮᓱᐊᓗ ᐹᒻᒪᒃᐳᖅ ᒪᓂᖅᑲᒧᑦ ᑐᒃᓯᐊᕐᕕᒋᓪᓗᒍᓗ, ᐅᖃᕐᐳᖅ, “ᐱᔨᒋᕙᕐᒪ ᐊᖓᔪᖅᑳᒃ, ᓱᓇᒥᒃ ᐱᓇᓱᐊᖁᕕᖔ?”

¹⁵ ᑕᕝᕙ ᐊᑕᓂᐅᑉ ᐅᓇᑕᕐᑎᖏᑕ ᐊᖓᔪᖅᑳᖓᑕ ᔮᓱᐊ ᐅᖃᐅᑎᕚ, “ᑲᒥᓪᓚᕆᑦ; ᑕᒪᓐᓇ ᓇᖏᕐᕕᒋᔧᑦ ᐃᑦᔪᕐᓁᒻᒪᑦ.” ᔮᓱᐊᓗ ᐅᖃᐅᑦᔭᐅᑦᔪᑎᒥᓂᒃ ᒪᓕᒃᐳᖅ.