ᔮᓱᐊᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᐃᑳᕐᓂᖓ ᔪᐊᕐᑕᓂᒃᑯᑦ

¹ ᐅᓪᓛᒻᒪᕆᒃᑯᑦ ᔮᓱᐊᓗ ᐃᓴᕆᐊᓕᒥᐅᓪᓗ ᒪᑭᓚᐅᕐᐳᑦ, ᐊᐅᓪᓚᕐᓗᑎᒡᓗ ᑕᖕᒫᕐᓯᒪᕕᖕᒥᓂᑦ ᓯᑎᒻᒥᑦ ᔪᐊᕐᑕᓂᒧᐊᓕᕐᓗᑎᒃ, ᑕᕝᕗᖓᓗ ᔪᐊᕐᑕᓂᒧᑦ ᑎᑭᓐᓇᒥᒃ, ᑕᖕᒫᓚᐅᕐᐳᑦ ᐃᑳᕆᐊᓚᐅᖏᓐᓂᕐᒥᖕᓂ.

² ᐅᓪᓗᑦ ᐱᖓᓱᑦ ᓈᖕᒪᑕ ᐊᖓᔪᖅᑳᖏᑦ ᐃᓄᓕᒫᓄᑦ ᐅᐸᒍᑎᕗᑦ ᑕᖕᒫᕐᓯᒪᔪᓄᑦ.

³ ᐅᖃᐅᑎᓪᓗᒋᓪᓗ, “ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ ᑕᑯᒍᑦᓯᒋᒃ ᐊᑕᓂᑦᓯ ᒎᑎᑦᓯ ᐊᖏᖃᑎᒌᖕᓂᖓᑕ ᐃᒃᓯᕐᕕᖓᓂᒃ ᐊᒡᔭᕐᓯᑎᓪᓗᒋᑦ, ᑕᕝᕙ ᐃᓂᒋᔭᑦᓯᓐᓂᑦ ᐸᕐᓇᓕᕐᓂᐊᕐᐳᓯ ᒪᓕᓕᕐᓗᒋᓪᓗ ᑖᒃᑯᐊ.

⁴ ᑕᒫᓃᓚᐅᕐᓯᒪᖏᓐᓇᑦᓯ, ᑖᒃᑯᓇᓐᖓᑦ ᖃᐅᔨᑎᑕᐅᓂᐊᕐᐳᓯ ᓇᐅᒃᑰᕆᐊᖃᕐᒪᖔᑦᓯ, ᑭᓯᐊᓂᓕ ᖃᒡᓕᔭᕆᐊᖃᕐᓂᐊᓐᖏᓚᓯ ᑖᓐᓇ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ, ᑭᖑᓂᖓᓂ 1,000 ᖃᓂᒋᔮᓂ ᐃᑎᒐᖕᓂᒃ ᓯᕕᑐᓂᖃᕐᓗᓯ ᒪᓕᖕᓂᐊᕐᐳᓯ.”

⁵ ᔮᓱᐊᓪᓗ ᐃᓄᐃᑦ ᐅᖃᐅᑎᕔᑦ, “ᐃᓕᑦᓯᓐᓂᒃ ᐃᑦᔪᕐᓁᑎᓕᕆᑦᓯ; ᖃᐅᒃᐸᑦ ᐊᑕᓂᖅ ᑲᒪᓇᕐᑐᒥᒃ ᐱᓇᓱᐊᕐᓂᐊᕐᒪᑦ ᐃᓕᑦᓯᓐᓂ.”

⁶ ᑐᓂᕐᕈᓯᕐᑎᑦᓯᔩᓪᓗ ᔮᓱᐊᑉ ᐅᖃᐅᑎᕔᑦ, “ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ ᑎᒍᓗᓯᐅᒃ, ᓯᕗᓪᓕᐅᓗᓯ ᐃᓄᖕᓂᑦ ᐱᓱᓕᕆᑦᓯ.” ᑕᕝᕙ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ ᓇᒃᓴᕐᓗᒍ ᐱᓱᓕᕐᐳᑦ, ᐃᓄᐃᑦ ᓯᕗᓂᖓᓐᓂ.

⁷ ᐊᑕᓂᕐᓗ ᐅᖃᕐᐳᖅ ᔮᓱᐊᒧᑦ, “ᐅᓪᓗᒥ ᐃᓄᖕᓄᑦ ᐃᓴᕆᐊᓕᒥᐅᓄᑦ ᐅᐱᒋᔭᐅᑎᑦᓯᐊᕐᓂᐊᕐᐸᒋᑦ ᐊᖏᔪᕈᕐᑎᑕᐅᓗᑎᑦ, ᖃᐅᔨᓂᐊᕐᒪᑕ ᐃᓕᖕᓂ ᓇᔫᑎᓂᓐᓂᒃ ᒨᓯᓯᒥ ᓇᔫᑎᓂᕆᓚᐅᕐᑕᑦᑐᑦ.

⁸ ᑐᓂᕐᕈᓯᕐᑎᑦᓯᔩᑦ ᐅᖃᐅᑎᓂᐊᕐᐸᑎᑦ ᐊᒡᔭᕐᓯᓗᑎᒃ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᓂᒃ, ᑰᖕᒧᑦ ᔪᐊᕐᑕᓂᒧᑦ ᑎᑭᑐᐊᕈᑎᒃ, ᔪᐊᕐᑕᓂᐅᑉ ᓯᓈᓂ ᐅᑕᕿᖁᓪᓗᒋᑦ ᓇᖏᕐᓗᑎᒃ.”

⁹ ᔮᓱᐊᓗ ᐅᖃᓕᕐᐳᖅ ᐃᓄᖕᓄᑦ, “ᒪᐅᖓ ᕾᒋᑦᓯ, ᑐᓴᕐᓗᓯᓗ ᐊᑕᓂᐅᑉ ᒎᑎᑦᓯ ᐅᖃᐅᓯᖏᓐᓂᒃ.”

¹⁰ ᔮᓱᐊᓗ ᐅᖃᕐᐳᖅ, “ᖃᐅᔨᒪᓂᐊᕐᐳᓯ ᒎᑎᐅᑉ ᐆᒪᔪᑉ ᐃᓚᒋᖕᒪᓯ, ᑖᑦᓱᒪ ᑲᔪᓯᑦᓯᐊᕐᓗᓂ ᐱᕙᓪᓕᐊᑎᓐᓂᐊᕐᐹᓯ ᓯᖏᑦᓯᖁᓪᓗᓯ ᑬᓇᓂᒥᐅᓂᒃ, ᕼᐃᑍᑎᒥᐅᓂᒃ, ᕼᐃᕔᑎᑎᒥᐅᓂᒃ, ᐱᕆᔧᑎᒥᐅᓂᒃ, ᒋᕐᒐᓮᑎᒥᐅᓂᒃ, ᐊᒧᕅᑎᒥᐅᓂᒃ, ᔨᐳᓮᑎᒥᐅᓂᒡᓗ,

¹¹ ᑕᑯᒋᑦ, ᐊᑕᓂᐅᑉ ᓄᓇᕐᔪᐊᕐᒥᐅᓕᒫᑦ ᐊᑕᓂᖓᑕ, ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ ᓯᕗᓪᓕᐅᓗᓂ ᐃᓕᑦᓯᓐᓂᑦ ᐃᑳᕐᓂᐊᕐᐳᖅ ᔪᐊᕐᑕᓂᐅᑉ ᑰᖓᒍᑦ.

¹² ᒫᓐᓇ ᑍᒤᒻᒪᑦ ᓂᕈᐊᓕᕆᑦᓯ ᐊᖑᑎᓂᒃ 12ᓂᒃ ᐃᓴᕆᐊᓕᒥᐅᑦ ᑭᖑᕚᖏᓐᓂᑦ, ᑭᖑᕚᕇᓂᑦ ᐊᑐᓂᑦ ᐱᓯᒪᔪᓂᒃ.

¹³ ᑐᓂᕐᕈᓯᕐᑎᑦᓯᔩᑦ ᐊᒡᔭᕐᓯᔪᑦ ᐊᖏᖃᑎᖏᖕᓂᐅᑉ ᐃᒃᓯᕐᕕᖁᑎᖓᓂᒃ ᐊᑕᓂᐅᔫᑉ ᓄᓇᕐᔪᐊᕐᒥᐅᓕᒫᓄᑦ ᐱᖓᓂᒃ ᐃᑎᒐᖏᑦ ᐃᒫᓄᑦ ᐊᒃᑐᑐᐊᕐᐸᑕ ᔪᐊᕐᑕᓂᐅᑉ ᑰᖓ ᓄᖅᑲᕐᓂᐊᕐᐳᖅ, ᑲᖏᐊᓂᓪᓗ ᑰᒃᑐᑦ ᓄᖅᑲᖓᓗᑎᒃ ᐊᑕᐅᓯᕐᒧᑦ ᑲᑎᓐᓂᐊᕐᐳᑦ.”

¹⁴ ᑕᕝᕙ ᐃᓄᐃᑦ ᐊᐅᓪᓚᕋᒥᒃ ᑕᖕᒫᕐᓯᒪᕕᖕᒥᓂᑦ, ᐃᑳᕆᐊᕐᑐᓕᕐᓗᑎᒃ ᔪᐊᕐᑕᓂᐅᑉ ᑰᖓᓄᑦ ᑐᓂᕐᕈᓯᕐᑎᑦᓯᔩᑦ ᓯᕗᓪᓕᐅᓚᐅᕐᐳᑦ ᐊᒡᔭᕐᓯᓪᓗᑎᒃ ᐊᖏᖃᑎᒌᖕᓂᐅᑉ ᐃᒃᓯᕐᕕᖓᓂᒃ ᐃᓄᐃᑦ ᓯᕗᓂᖓᓂ,

¹⁵ ᑖᒃᑯᐊ ᐊᖏᖃᑎᒌᖕᓂᐅᑉ ᐃᒃᓯᕐᕕᖓᓂᒃ ᐊᒡᔭᕐᓯᔪᑦ ᑎᑭᐅᑎᖕᒪᑕ ᔪᐊᕐᑕᓂᒧᑦ, ᑐᓂᕐᕈᓯᕐᑎᑦᓯᔩᑦ ᐃᑎᒐᖏᑦ ᐊᒃᑐᑐᐊᕐᒪᑕ ᑰᖕᒧᑦ; ᑍᑦᓱᒪᓂ ᔪᐊᕐᑕᓂᐅᑉ ᑰᖓ ᑕᑕᑦᓯᐊᓚᐅᕐᐳᖅ ᑰᒃᑐᒻᒪᕆᐊᓘᓪᓗᓂ ᐱᕈᕐᑐᓂᒃ ᑲᑎᕐᓱᐃᕕᒃ ᓇᓪᓕᐅᑎᓯᒪᑎᓪᓗᒍ,

¹⁶ ᑰᒍᓐᓃᓚᐅᕐᐳᖅ ᐊᑕᐅᓯᕐᒧᓪᓗ ᑲᑎᓪᓗᓂ ᑲᖏᐊᓄᑦ ᓄᓇᒧᑦ ᐊᑎᓕᖕᒧᑦ ᐋᑕᒥᒧᑦ, ᑖᑦᓱᒧᖓ ᐃᒡᓗᒐᓮᑦ ᔭᕆᑖᓐ ᓴᓂᐊᓃᑦᑐᒧᑦ, ᑰᓪᓗ ᑭᑖᓄᑦ ᑎᑭᓪᓗᒍ ᐃᒪᖅ ᑕᕆᐅᕐᒥᒃ ᑍᔭᐅᔪᒧᑦ ᑰᒍᓐᓃᓚᐅᕐᐳᖅ, ᐃᓄᐃᓪᓗ ᐃᑳᕈᓐᓇᕐᓯᓚᐅᕐᐳᑦ ᔨᕆᑰᑉ ᐊᑭᐊᓄᑦ.

¹⁷ ᐃᓄᐃᑦ ᐃᑳᕐᑎᓪᓗᒋᑦ ᓄᓇᒃᑯᑦ ᓴᓗᐊᒪᔪᒃᑰᓚᐅᕐᐳᑦ, ᑐᓂᕐᕈᓯᕐᑎᑦᓯᔩᓪᓗ ᐊᒡᔭᕐᓯᔪᑦ ᐊᑕᓂᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓᓂᒃ ᔪᐊᕐᑕᓂᐅᑉ ᑰᖓᑕ ᕿᑎᐊᓂ ᓄᖅᑲᖓᓚᐅᕐᐳᑦ ᐃᓅᖃᑎᒌᒡᔪᐊᑦ ᐃᑳᕇᓚᐅᖏᓐᓂᖏᓐᓂ.