ᔮᓱᐊᑉ ᐊᒡᓚᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

ᔮᓱᐊᑉ ᑕᕝᕙᐅᕗᑏᓕᕐᓗᓂ ᐅᖃᓪᓚᖕᓂᖓ

¹ ᑭᖑᕐᖓᒍᑦ ᐊᑯᓂᑲᓪᓚᒃ, ᐊᑕᓂᐅᑉ ᐃᓴᕆᐊᓕᒥᐅᑦ ᓴᐳᑎᓯᒪᓚᐅᕐᐰᑦ ᐊᑭᕋᖏᓐᓂᑦ ᖃᓂᒋᔮᓃᑦᑐᓂᑦ, ᑍᑦᓱᒪᓂᓗ ᔮᓱᐊ ᐃᓄᑐᖃᐅᓕᓚᐅᕐᐳᖅ,

² ᑍᒤᒻᒪᑦ ᔮᓱᐊᑉ ᐃᓴᕆᐊᓕᒥᐅᓕᒫᑦ ᕾᖁᕔᑦ, ᐊᖓᔪᖅᑳᖏᑦ, ᓯᕗᓕᕐᑎᖏᓪᓗ, ᐃᓱᒪᓕᐅᕐᑎᖏᑦ, ᐱᓇᓱᐊᕐᑎᐅᔪᓪᓗ ᐃᓄᖕᓄᑦ, ᐅᖃᐅᑎᓪᓗᒋᓪᓗ, “ᐃᓄᑐᖃᐅᓕᕋᒪ ᒫᓐᓇ;

³ ᑕᑯᓯᒪᕗᓯ ᐊᑕᓂᐅᑉ ᒎᑎᑦᓯ ᐱᓂᐊᕐᓂᕆᓚᐅᕐᑕᓕᒫᖏᓐᓂᒃ ᐃᓅᖃᑎᒌᒡᔪᐊᓕᒫᓄᑦ ᐃᓕᑦᓯ ᐱᓪᓗᓯ, ᐊᑕᓂᖅ ᒎᑎᓯ ᐅᓇᑕᕈᑦᔨᓚᐅᕐᒪᑦ ᐃᓕᑦᓯᓐᓂᒃ.

⁴ ᑕᑯᒋᑦ, ᓇᓚᐅᑦᑖᕈᑎᑎᒍᑦ ᑐᓂᓚᐅᕐᐸᑦᓯ ᑭᖑᕐᖑᑦᔨᖁᓪᓗᓯ ᑭᖑᕚᓯᓗ ᓄᓇᑖᖁᓪᓗᓯ ᐃᓅᖃᑎᒋᒡᔪᐊᑦ ᓄᓇᖃᕋᓗᐊᕐᑎᓪᓗᒋᑦ ᓱᓕ, ᑖᒃᑯᐊᓗ ᐅᓇᑕᕐᓂᒃᑯᑦ ᐃᓅᖃᑎᒌᒡᔪᐊᓂᑦ ᓄᓇᑖᕆᓚᐅᕐᑕᕗᑦ, ᔪᐊᕐᑕᓂᐅᑉ ᑰᖓᓂᑦ ᐱᒋᐊᕐᓗᒍ ᒥᑎᑎᕆᓂᐊᑉ ᑕᕆᐅᖓ ᓯᕿᓂᐅᑉ ᓂᐱᕕᐊᓃᑦᑐᖅ ᑎᑭᓪᓗᒍ.

⁵ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓂᑦ ᐊᔭᐅᕈᒫᕐᐰᑦ, ᓯᖏᓪᓗᒋᓪᓗ ᐊᑯᓐᓇᑦᓯᓐᓂᑦ; ᓄᓇᖓᓪᓗ ᓄᓇᑖᕆᔪᒫᕐᐸᓯ, ᐊᑕᓂᐅᑉ ᒎᑎᑦᓯ ᑍᒫᒃ ᐊᖏᕈᑎᒋᓚᐅᕐᒪᒍ ᐃᓕᑦᓯᓐᓄᑦ.

⁶ ᑍᒤᒻᒪᑦ ᑲᒪᑦᓯᐊᕐᑐᒃᓴᐅᕗᓯ ᓈᓚᑦᓯᐊᕐᓗᒋᓪᓗ ᐱᓇᓱᐊᕐᓗᒋᑦ ᑎᑎᕋᕐᑕᐅᓯᒪᔪᓕᒫᑦ ᐊᒡᓚᖕᓂ ᒨᓯᓯᐅᑉ ᐱᖁᔭᖏᓐᓂ, ᓇᓪᓕᐊᓐᓄᓪᓘᓐᓃᑦ ᓴᖑᑦᑍᓕᒋᑦᓯ ᑕᓕᕐᐱᒧᑦ ᓴᐅᒥᒧᓪᓘᓐᓃᑦ,

⁷ ᐃᓅᖃᑎᒌᒡᔪᐊᓂᓗ ᐊᒥᐊᒃᑰᓯᒪᔪᓂᒃ ᐂᑉᐸᕐᑖᕐᑐᒃᓴᐅᓐᖏᓚᓯ, ᐅᖃᐅᓯᕆᑦᑍᓕᓗᒋᓪᓗ ᒎᑎᖏᑕ ᐊᑎᖏᑦ, ᐊᑎᖏᓪᓘᓐᓃᑦ ᐊᖏᕈᑎᒋᓂᐊᕋᓯᐅᒃ, ᒎᑎᖏᓪᓗ ᑐᒃᓯᐊᕐᕕᒋᔭᒃᓴᕆᓐᖏᓚᓯ, ᐹᒻᒪᒡᕕᒋᓂᐊᕐᓇᒋᓪᓗ.

⁸ ᐊᑕᓂᕐᒥᒡᓕ ᒎᑎᑦᓯᓐᓂᒃ ᓴᒃᑯᐃᑦᑍᓕᔪᒃᓴᐅᕗᓯ, ᐅᓪᓗᒥᒧᑦ ᑎᑭᓪᓗᒍ ᑍᒤᓯᒪᒐᑦᓯ.

⁹ ᐊᑕᓂᐅᑉ ᓯᖏᓚᐅᕐᒪᒋᑦ ᐃᓕᑦᓯ ᐱᓪᓗᓯ ᐱᓯᑎᐊᓗᐃᑦ ᓴᓐᖏᔪᐊᓗᐃᓪᓗ ᐃᓅᖃᑎᒌᒡᔪᐊᑦ; ᐃᓕᑦᓯᓗ ᑭᓇᒧᓪᓘᓐᓃᑦ ᓵᓚᐅᔪᓐᓇᓚᐅᓐᖏᓚᓯ ᐅᓪᓗᒥᒧᑦ ᑎᑭᓪᓗᒍ.

¹⁰ ᐃᓕᑦᓯᓗ ᐊᑕᐅᓯᐅᓪᓗᓯ ᐊᖑᑏᑦ 1,000ᓮᑦ ᐅᓇᑕᕈᓐᓇᓚᐅᕐᐸᓯ, ᐊᑕᓂᐅᑉ ᒎᑎᑦᓯ ᐅᓇᑕᕈᑎᖃᑦᑕᓚᐅᕐᒪᓯ, ᑍᒫᒃ ᐃᓕᑦᓯᓐᓄᑦ ᐊᖏᕈᑎᖃᕐᓯᒪᒐᒥ.

¹¹ ᑍᒤᒻᒪᑦ ᐃᓕᑦᓯᓐᓂᒃ ᑲᒪᒋᑦᓯᐊᕆᑦᓯ, ᐊᑕᓂᖅ ᒎᑎᓯ ᐅᖓᒋᓗᒍ.

¹² ᑲᔪᓯᑦᓯᐊᖏᒃᑯᑦᓯ, ᐃᓅᖃᑎᒌᑦᔪᐊᓄᓪᓗ ᐊᒥᐊᒃᑰᔪᓄᑦ ᐃᓚᓕᐅᑎᓗᓯ ᐂᑉᐸᕐᑖᕐᑐᕈᑦᓯ, ᐂᑉᐸᕐᑖᕐᕆᔭᐅᓗᓯ ᐃᓕᑦᓯᓗ ᐊᒥᐊᒃᑰᔪᓂᑦ ᐊᕐᓇᓂᒃ ᐂᑉᐸᕐᑖᕐᓂᐊᕈᑦᓯ,

¹³ ᑕᕝᕙ ᖃᐅᔨᔪᒫᕐᐳᓯ ᖁᓚᕐᓇᖏᑦᑐᒥᒃ ᐊᑕᓂᐅᑉ ᒎᑎᑦᓯ ᓯᖏᑉᐸᓪᓕᐊᔪᓐᓃᕈᒫᕐᒪᒋᑦ ᐃᓅᖃᑎᒌᒡᔪᐊᑦ ᐃᓕᑦᓯᓐᓂᑦ; ᑖᒃᑯᐊᓕ ᐃᓕᑦᓯᓐᓄ ᑲᑉᐱᐊᓇᕐᓯᔪᒫᕐᐳᑦ ᓂᒐᕐᑎᑐᑦ ᒥᑭᒋᐊᑎᑐᓪᓗ, ᐋᓐᓂᐊᑎᑕᐅᓗᓯ ᐊᕙᑎᓕᒫᑦᓯᓐᓂᑦ, ᐃᑦᔨᓯᒪᐅᑎᑐᑦ ᑲᐳᕋᕐᓇᕐᑐᑎᑐᑦ, ᑕᒪᓐᓇᓗ ᑍᒤᒐᔭᕐᐳᖅ ᐊᓂᑎᑕᐅᖅᑳᕐᑎᓐᓇᓯ ᑕᒫᓐᖓᑦ ᓄᓇᑦᓯᐊᕙᖕᒥᑦ ᐊᑕᓂᐅᑉ ᒎᑎᑦᓯ ᑐᓂᓚᐅᕐᑕᖓᓂᒃ ᐃᓕᑦᓯᓐᓄᑦ.

¹⁴ “ᑕᑯᒋᑦ, ᐅᓪᓗᒥ ᑐᖁᕕᒃᓴᕋ ᓇᓪᓕᐅᑎᓕᕐᐳᖅ, ᖃᐅᔨᒪᔪᐃᓐᓇᐅᕗᓯ ᐆᒻᒪᑎᑦᓯᒍᑦ ᑕᕐᓂᑦᓯᒍᓪᓗ, ᐊᑕᓂᐅᑉ ᒎᑎᑦᓯ ᑐᓂᓚᐅᕐᒪᓯ ᐱᐅᔪᓂᒃ ᐊᖏᕈᑎᒋᓚᐅᕐᑕᓕᒫᒥᓂᒃ ᐃᓕᑦᓯᓐᓄᑦ; ᐊᖏᕈᑎᒋᓚᐅᕐᑕᓕᒫᓂ ᐃᓕᑦᓯᓐᓄᑦ ᑲᔪᓯᑎᓚᐅᕐᒪᒋᑦ; ᐊᑕᐅᓯᕐᒥᒡᓘᓐᓃᑦ ᐊᑐᖏᑦᑑᑎᑦᓯᓚᐅᖏᓚᖅ.

¹⁵ ᑍᒤᒻᒪᑦ ᑍᒫᒃ ᐊᖏᕈᑎᒥᓂᒃ ᑲᔪᓯᑎᑦᓯᓚᐅᕐᒪᑦ ᐃᓕᑦᓯᓐᓄᑦ ᐱᐅᔪᓂᒃ ᐱᓂᐊᕐᓂᕋᕐᑕᓕᒫᒥᓂᒃ, ᑍᒤᒻᒪᑦ ᐊᑕᓂᖅ ᑲᔪᓯᑎᑦᓯᒐᔭᕆᕗᖅ ᐃᓕᑦᓯᓐᓄᑦ ᐱᐅᖏᑦᑐᓂᒃ ᐋᓐᓂᕐᓇᕐᑐᓂᒡᓗ, ᓄᖒᑦᓯᓚᐅᖏᓐᓂᓕᒫᒥᓂ ᐃᓕᑦᓯᓐᓂᒃ ᑕᒫᓐᖓᑦ ᓄᓇᑦᓯᐊᕙᖕᒥᑦ ᐊᑕᓂᐅᑉ ᒎᑎᓯ ᑐᓂᓚᐅᕐᑕᖓᓂᒃ ᐃᓕᑦᓯᓐᓄᑦ.

¹⁶ ᐊᖏᖃᑎᒌᒍᑎᒋᓚᐅᕐᑕᓯ ᑲᔪᓯᑎᖏᒃᑯᑦᓯᐅᒃ, ᐊᑕᓂᐅᑉ ᒎᑎᑦᓯ ᑎᓕᓯᑦᔪᑎᒋᓚᐅᕐᑕᖓ ᐃᓕᑦᓯᓐᓄᑦ, ᐱᔨᑦᓯᓕᕈᑦᓯᓗ ᒎᑎᐅᑉ ᐊᓯᐊᓂᒃ ᐹᒻᒪᒃᑎᕐᕕᒋᓕᕐᓗᒋᓪᓗ. ᑕᕝᕙ ᐊᑕᓂᐅᑉ ᓂᓐᖓᐅᓯᕐᒥᓄᑦ ᓱᒋᐊᕈᒫᕐᐹᓯ, ᐊᑯᓂᐅᖏᑦᑐᕐᓗ ᑕᒫᓃᑦᓱᓐᓁᕈᒫᕐᐳᓯ ᓄᓇᒥ ᐱᐅᔪᒥ ᑐᓂᓚᐅᕐᑕᖓᓂ ᐃᓕᑦᓯᓐᓄᑦ.”