ᔮᓱᐊᑉ ᐊᒡᓚᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᑭᖑᕚᕇᑦ ᓯᕿᓂᐅᑉ ᓄᐃᕕᐊᓂᑦ ᐱᓯᒪᔪᑦ ᐅᑎᕐᓂᖓᑦ ᓄᓇᒥᖕᓄᑦ

¹ ᑕᕝᕙ ᔮᓱᐊᑉ ᕉᐱᓂᐅᑉ, ᒑᑎᐅᓪᓗ ᑭᖑᕚᖏᑦ, ᒫᓇᓯᑯᓪᓗ ᑭᖑᕚᖏᑕ ᐊᕙᖏᑦ ᕾᖁᓪᓗᒋᑦ ᑲᑎᖁᕔᑦ.

² ᐅᖃᐅᑎᓪᓗᒋᓪᓗ, “ᒪᓕᓚᐅᕐᐳᓯ ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑎᓕᓯᑦᔪᑎᒋᓚᐅᕐᑕᓕᒫᖏᓐᓂᒃ, ᐅᕙᓐᓂᒡᓗ ᓇᓚᑦᓯᐊᖃᑦᑕᓚᐅᕐᓗᓯ ᑎᓕᓯᑦᔪᑎᒋᓚᐅᕐᑕᓕᒫᓐᓂᒃ.

³ ᐊᑕᐅᓯᐊᕐᓗᓯᓘᓐᓃᑦ ᐃᓴᕆᐊᓕᒥᐅᖑᖃᑎᑦᓯᓐᓂᒃ ᕿᒤᓚᐅᓐᖏᓚᓯ ᑖᒃᑯᓇᓂ ᐅᓪᓗᒐᓵᓗᖕᓂ, ᐅᓪᓗᒥᒧᑦ ᑎᑭᓪᓗᒍ, ᑲᒪᑦᓯᐊᓚᐅᕐᐳᓯᓕ ᓈᓚᑦᓯᐊᕐᓗᓯᓗ ᐊᑕᓂᐅᑉ ᒎᑎᑦᓯ ᐱᖁᔨᑦᔪᑎᒋᓯᒪᔭᖏᓐᓂᒃ.

⁴ ᒫᓐᓇᓕ ᐊᑕᓂᐅᑉ ᒎᑎᑦᓯ ᐊᖏᕈᑎᒋᓚᐅᕐᑕᓂ ᒪᓕᒡᓗᒍ, ᒥᕐᖑᐃᕐᓯᕐᕕᖕᒥᒃ ᑐᓂᓚᐅᕐᐰᑦ ᐃᓴᕆᐊᓕᒥᐅᖑᖃᑎᓯ; ᑕᒪᓐᓇ ᐊᖏᕈᑎᒋᓯᒪᖕᒪᒍ ᑖᒃᑯᓄᖓ; ᑍᒤᒻᒪᑦ, ᐊᖏᕐᕋᓕᕆᑦᓯ ᓄᓇᒧᑦ ᓇᖕᒥᓂᕐᑖᕆᓚᐅᕐᑕᑦᓯᓐᓄᑦ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᐃᓕᑦᓯᓐᓄᑦ ᑐᓂᓚᐅᕐᑕᖓᓄᑦ ᓄᓇᒧᑦ ᔪᐊᕐᑕᓂᐅᑉ ᑰᖓᑕ ᐊᑭᐊᓃᑦᑐᒧᑦ.

⁵ ᑲᒪᑦᓯᐊᕐᓗᓯ ᓈᓚᑦᓯᐊᕐᑐᒃᓴᐅᕗᓯ ᐱᖁᔭᓂᒃ ᒨᓯᓯᐅᑉ ᑎᓕᓯᑦᔪᑎᒋᓚᐅᕐᑕᖓᓂ ᐃᓕᑦᓯᓐᓄᑦ, ᐊᑕᓂᖅ ᒎᑎᓯ ᐅᖓᒋᔭᒃᓴᕆᕙᓯ, ᐊᑐᕐᑕᐅᖁᔭᓕᒫᖏᓪᓗ ᐊᑐᕐᓗᒋᑦ, ᐱᖁᔭᖏᓪᓗ ᓈᓚᒡᓗᒋᑦ, ᑎᒍᒥᐊᕐᓗᒍ ᓴᒃᑯᑦᑍᓕᓗᒍᓗ, ᐱᔨᑦᓯᕐᓗᒍᓗ ᐆᒻᒪᑎᓕᒫᕐᓄᑦ ᑕᕐᓂᓕᒫᕐᓄᓪᓗ.”

⁶ ᑕᕝᕙ ᔮᓱᐊᑉ ᓮᒻᒪᕐᑎᑉᐰᑦ, ᐊᐅᓪᓚᕐᑎᓪᓗᒋᓪᓗ; ᑖᒃᑯᐊᓗ ᐊᖏᕐᕋᒥᖕᓄᐊᕐᐳᑦ.

⁷ ᒫᓇᓯᐅᓪᓕ ᑭᖑᕚᖏᑕ ᐊᕝᕙᖏᑦ ᒨᓯᓯᐅᑉ ᓄᓇᑖᕐᑎᓚᐅᕐᐰᑦ ᐹᓴᓂᒥᒃ; ᐊᕝᕙᖏᓪᓗ ᖃᑕᓐᖑᑎᖏᑦ ᔮᓱᐊᑉ ᑐᓂᓚᐅᕐᑕᖏᑦ ᓄᓇᑖᖁᓪᓗᒋᑦ ᔪᐊᕐᑕᓂᐅᑉ ᐊᑭᐊᓂ ᓯᕿᓂᐅᑉ ᓂᐱᕕᐊᓃᑦᑐᒥ. ᔮᓱᐊᓪᓗ ᓮᒻᒪᕐᑎᓪᓗᒋᑦ ᐊᖏᕐᕋᖁᕔᑦ,

⁸ ᐅᖃᐅᑎᓪᓗᒋᓪᓗ, “ᑐᐱᑦᓯᓐᓄᑦ ᐊᖏᕐᕋᕐᑐᒃᓴᐅᕗᓯ ᐊᔪᕐᓴᖏᓪᓗᓯ, ᐆᒪᔪᖁᑎᖃᑦᓯᐊᕐᓗᓯ, ᓯᐅᓪᕕᕆᖃᕐᓗᓯ ᒎᓗᖃᕐᓗᓯ ᑲᓐᓄᔭᖃᕐᓗᓯ, ᓴᕕᕋᔭᖃᕐᓗᓯᓗ, ᐊᓐᓄᕌᖃᑦᓯᐊᕐᓗᓯᓗ ᐊᒥᒐᖏᑦᑐᓂᒃ; ᐃᓅᖃᑎᑦᓯᓐᓂᒃ ᐊᒡᒍᖃᑎᖃᑦᓯᐊᕐᑐᒃᓴᐅᕗᓯ ᐊᑭᕋᑦᓯᓐᓂᑦ ᐅᓇᑕᕐᓂᒃᑯᑦ ᐱᑕᕆᓚᐅᕐᑕᑦᓯᓐᓂᒃ.”

⁹ ᑍᒤᒻᒪᑦ ᕉᐱᓂᐅᑉ, ᒑᑦᓗ ᑭᖑᕚᖏᑦ, ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᑦ ᐅᑎᕐᐳᑦ ᐊᖏᕐᕋᒥᖕᓄᑦ, ᐃᓴᕆᐊᓕᒥᐅᖑᖃᑎᑎᒃ ᕿᒪᒡᓗᒋᑦ ᓮᓗᐊᒧᑦ, ᑖᒃᑯᐊ ᑬᓇᓂᐅᑉ ᓄᓇᖓᓃᑦᑐᑦ, ᐊᐅᓪᓚᕐᐳᑦ ᓄᓇᒧᑦ ᒋᓕᐊᑎᒧᑦ, ᓇᖕᒥᓂᖅ ᓄᓇᖁᑎᑖᕆᓚᐅᕐᑕᒥᖕᓄᑦ ᐊᑕᓂᐅᑉ ᒨᓯᓯᒃᑯᑦ ᑎᓕᓯᓂᕆᓯᒪᔭᖓ ᒪᓕᒡᓗᒍ.

ᑐᓂᕐᕈᓯᕐᕕᒃ ᔪᐊᕐᑕᓂᐅᑉ ᑰᖓᑕ ᓴᓂᐊᓃᑦᑐᖅ

¹⁰ ᕉᐱᓂᐅᑉ, ᒑᑦᓗ ᑭᖑᕚᖏᑦ, ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᑦ ᓄᓇᒧᑦ ᑬᓇᓂᒧᑦ ᑎᑭᓐᓇᒥᒃ, ᔪᐊᕐᑕᓂᐅᑉ ᑰᖓᑕ ᐊᑭᐊᓂ ᓴᓇᕗᑦ ᑐᓂᕐᕈᓯᕐᕕᖕᒥᒃ ᐊᖏᔪᐊᓗᖕᒥᒃ.

¹¹ ᐃᓴᕆᐊᓕᒥᐅᑦ ᐃᓄᖏᑦ ᐅᖃᐅᑦᔭᐅᕗᑦ, “ᑕᑯᒋᑦᓯ, ᕉᐱᓂᐅᑉ, ᒑᑦᓗ, ᒫᓇᓯᒃᑯᓪᓗ ᑭᖑᕚᖏᑕ ᐊᕝᕙᖏᑦ ᑐᓂᕐᕈᓯᕐᕕᖕᒥᒃ ᓴᓇᕗᑦ ᑬᓇᓂᒥ, ᐃᓴᕆᐊᓕᒥᐅᑦ ᐃᓄᖏᑕ ᓄᓇᖓᓂ ᔪᐊᕐᑕᓂᐅᑉ ᑰᖓᑕ ᑭᒡᓕᖓᓂ.”

¹² ᐃᓴᕆᐊᓕᒥᐅᓪᓗ ᐃᓄᖏᑕ ᑕᒪᓐᓇ ᑐᓴᕋᒥᑦᔪᒃ, ᓄᓇᖅᑲᑎᒌᓕᒫᑦ ᐃᓴᕆᐊᓕᒥᐅᑦ ᑲᑎᕗᑦ ᓮᓗᐊᒥ, ᐅᓇᑕᕆᐊᕈᒪᓪᓗᑎᒃ ᑖᒃᑯᓄᖓ.

¹³ ᑕᕝᕙ ᐃᓴᕆᐊᓕᒥᐅᑉ ᐃᓄᖏᑕ ᑎᓕᕚᑦ ᐱᓂᕼᐋᔅ ᐃᓕᓯᕆᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓ, ᕉᐱᓂᐅᑉ, ᒑᑦᓗ, ᒫᓇᓯᒃᑯᓪᓗ ᑭᖑᕚᖏᑕ ᐊᕝᕙᖏᓐᓄᑦ, ᒋᓕᐊᑎᒧᑦ.

¹⁴ ᓯᕗᓕᕐᑏᑦ ᐊᖑᑏᑦ ᖁᓕᑦ ᒪᓕᒃᐳ ᕕᓂᕼᐊᔅᒥᒃ, ᐃᓚᒌᓂᑦ ᐊᑕᐅᓯᕐᒥᒃ ᐊᑐᓂᑦ ᐱᓯᒪᓪᓗᑎᒃ ᐊᖓᔪᖅᑳᖑᔪᑦ ᑭᖑᕚᕇᓂᑦ.

¹⁵ ᕉᐱᓂᐅᑉ, ᒑᑦᓗ, ᒫᓇᓯᒃᑯᓪᓗ ᑭᖑᕚᖏᑕ ᐊᕝᕙᖏᑕ ᓄᓇᖓᓐᓄᐊᕋᒥᒃ ᒋᓕᐊᑎᒧᑦ, ᑖᒃᑯᓄᖓ ᐅᖃᕐᐳᑦ,

¹⁶ “ᐊᑕᓂᐅᑉ ᐃᓄᖁᑎᖏᑦ ᐅᖃᕐᐳᑦ, ‘ᓲᖕᒪᑦ ᐊᔪᕐᑐᓕᓂᐊᓗᖕᒥᒃ ᐱᓇᓱᐊᕐᐱᓯ ᐃᓴᕆᐊᓕᐅᑉ ᒎᑎᖓᓄ ᐊᑭᕋᕐᑐᓕᕐᓗᓯ? ᐊᑕᓂᕐᒥᒃ ᐊᑭᕋᕐᑐᓕᕐᐳᓯ ᑐᓂᕐᕈᓯᕐᕕᓕᐅᓂᕐᒧᑦ ᓇᖕᒥᓂᑦᓯᓐᓂᒃ ᒪᓕᒍᓐᓃᕋᑦᓯ ᑖᑦᓱᒥᖓ.

¹⁷ ᐃᖅᑲᐅᒪᕕᓰ ᐊᔪᕐᑐᓕᓂᕆᓚᐅᕐᑕᑦᑎᓐᓂᒃ ᐱᐅᕆᒥ ᐊᑕᓂᐅᑉ ᐃᓄᖁᑎᓂ ᓱᒋᐊᓚᐅᕐᒪᒋᑦ ᖃᓂᒪᓇᕐᑐᒧᑦ ᓱᓕ ᐅᓪᓗᒥᒧᑦ ᑕᒪᓐᓇ ᐅᖁᒤᓪᓕᐅᕈᑎᒋᕙᕗᑦ, ᑍᓐᓇ ᐱᑦᔪᑎᒋᓪᓗᒍ ᐊᔪᕐᑐᓕᓂᕗᑦ ᓈᒻᒪᒋᓕᓚᐅᓐᖏᓚᓯᐅᒃ?

¹⁸ ᓇᕐᕈᒋᓕᕐᐱᓯᐅᒃ ᒪᓕᒍᓐᓃᕐᓗᒍᓗ ᒫᓐᓇ ᐊᑕᓂᖅ? ᐊᑭᕋᕐᑐᓕᕐᓂᐊᕈᓯ ᐊᑕᓂᕐᒥᒃ ᐅᓪᓗᒥ ᑕᕝᕙ ᖃᐅᒃᐸᑦ ᓂᓐᖓᒍᒫᕐᐳᖅ ᐃᓴᕆᐊᓕᒥᐅᓕᒫᓄᑦ.

¹⁹ ᒫᓐᓇᓕ, ᓄᓇᖁᑎᑦᓯ ᑐᒃᓯᐊᕐᕕᒋᒋᐊᖓ ᓈᒻᒪᖏᐸᑦ, ᕾᓚᐅᕆᑦᓯ ᐃᑳᕐᓗᓯ ᑕᒪᐅᖓ ᐊᑕᓂᐅᑉ ᓄᓇᖓᓄᑦ, ᑐᐱᖁᑎᖓᓄᑦ ᓇᔪᕐᑕᖓᓄᓪᓗ, ᓄᓇᑖᕈᒪᓗᓯᓗ ᐊᑯᓐᓇᑦᑎᓐᓂ; ᑭᓯᐊᓂᓕ ᐊᑭᕋᕐᑐᓕᕐᑍᓕᒋᑦᓯ ᐊᑕᓂᕐᒥᒃ, ᐅᕝᕙᓘᓐᓃᑦ ᐊᑭᕋᕐᑐᓕᕐᑎᑦᑍᓕᑎᒍᑦ ᑐᓂᕐᕈᓯᕐᕕᓕᐅᕐᓂᑦᓯᓐᓄᑦ ᑐᓂᕐᕈᓯᕐᕕᒋᐊᓪᓚᖕᒥᒃ ᐊᑕᓂᕐᒧᑦ ᒎᑎᑦᑎᓐᓄᑦ.

²⁰ ᐃᖅᑲᐅᒪᕕᓰ? ᐂᑲᓂᐅᑉ ᔨᕋᐅᑉ ᐃᕐᓂᖓᑕ ᐱᖁᔭᒥᒃ ᓈᓚᖏᓐᓂᕆᓚᐅᕐᑕᖓᓂᒃ, ᐃᓴᕆᐊᓕᒥᐅᓕᒫᑦ ᓱᒋᐊᕐᑕᐅᓚᐅᕐᒪᑕ, ᐂᑳᓐᓗ ᐃᓄᑑᓗᓂ ᑐᖁᑕᐅᓚᐅᓐᖏᓚᖅ ᐊᔪᕐᑐᓕᓂᓂ ᐱᓪᓗᒍ.’”

²¹ ᑕᕝᕙ ᕉᐱᓂᐅᑉ, ᒑᓪᓗ ᑭᖑᕚᖏᑦ, ᒫᓇᓯᒃᑯᓪᓗ ᑭᖑᕚᖏᑕ ᐊᕝᕙᖏᑦ ᑭᐅᕗᑦ ᐅᖃᕐᓗᑎᒡᓗ ᐃᓴᕆᐊᓕᒃᑯᑦ ᓯᕗᓕᕐᑎᖏᓐᓄᑦ,

²² “ᐊᔪᒐᖃᖏᑦᑐᖅ, ᒎᑎ, ᐊᑕᓂᐅᕗᖅ! ᐊᔪᒐᖃᖏᑦᑐᖅ, ᒎᑎ, ᐊᑕᓂᐅᕗᖅ! ᑖᓐᓇ ᖃᐅᔨᒪᕗᖅ; ᓱᖕᒪᑦ ᑍᒤᓐᓂᑦᑎᓐᓂᒃ, ᐃᓴᕆᐊᓕᑎᓪᓗ ᖃᐅᔨᔪᒃᓴᐅᕗᑦ! ᑕᒪᓐᓇ ᐊᑭᕋᕐᑐᕐᓂᐅᒃᐸᑦ, ᐅᒃᐱᕐᓂᕐᒥᒡᓗ ᐊᑕᓂᕐᒧᑦ ᓱᕅᓂᐅᒃᐸᑦ, ᐅᓪᓗᒥ ᐃᓅᑎᑦᑍᓕᑎᒍᑦ!

²³ ᐊᑕᓂᕐᒥᒃ ᓈᓚᖏᓪᓗᑕ ᑐᓂᕐᕈᓯᕐᕕᓕᐅᓚᐅᕈᑦᑕ; ᐅᕝᕙᓗ ᑐᓂᕐᕈᑎᒃᓴᓂᒃ ᐃᑯᐊᓚᑎᑕᒃᓴᓂᒃ ᑐᓂᕐᕈᑎᒃᓴᒥᒡᓗ ᓂᐊᖂᔭᒃᓴᒥᒃ ᐃᓚᒌᑦᓯᐊᕐᓂᕐᒧᓪᓗ ᑐᓂᕐᕈᓯᕐᓂᕐᒥᒃ, ᐊᑕᓂᐅᑉ ᓇᖕᒥᓂᖅ ᐊᑭᒋᐊᕐᑕᒃᓴᕆᕚᑎᒍᑦ.

²⁴ ᑍᒫᒃ ᐱᓂᐊᓚᐅᕐᐳᒍᑦ ᑲᑉᐱᐊᓱᓚᐅᕋᑦᑕ ᓯᕗᓂᒃᓴᑦᑎᓐᓂᒃ ᑭᖑᕚᓯ ᐅᖃᑐᐃᓐᓇᕆᐊᖃᕐᒪᑕ ᑭᖑᕚᑦᑎᓐᓄᑦ ᐃᒫᒃ, ‘ᐊᑕᓂᖃᕋᓱᒋᕕᓰ ᐃᓴᕆᐊᓕᒥᐅᑦ ᒎᑎᖓᓐᓂᒃ?

²⁵ ᓄᓇᖁᑎᑦᑎᓐᓄᑦ ᔪᐊᕐᑕᓂᐅᑉ ᑰᖓ ᑭᒡᓕᒋᔭᐅᑎᓚᐅᕐᒪᒍ ᐃᓕᑦᓯᓐᓄ ᐅᕙᑦᑎᓐᓄᓪᓗ ᕉᐱᓂᐅᑉ, ᒑᓪᓗ ᑭᖑᕚᖏᓐᓄᑦ; ᐊᑕᓂᕐᒧᑦ ᐃᓚᒋᔭᐅᓂᖃᓐᖏᓚᓯ.’ ᑕᕝᕙ ᑭᖑᕚᑦᓯ ᑭᖑᕚᑦᑎᓐᓂᒃ ᑐᒃᓯᐊᖃᑦᑕᕐᓂᕐᒥᒃ ᐊᑕᓂᕐᒧᑦ ᓄᖅᑲᕐᑎᑦᓯᑐᐃᓐᓇᕆᐊᖃᕋᔭᕐᐳᑦ.

²⁶ ᑍᒤᒻᒪᑦ ᑐᓂᕐᕈᓯᕐᕕᓕᐅᓚᐅᕐᐳᒍᑦ ᐃᑯᐊᓚᑎᑦᓯᓂᕐᒧᑦ ᑐᓂᕐᕈᓯᕐᕕᐅᖏᑦᑐᒥᒃ ᑐᓂᕐᕈᓯᕐᕕᒃᓴᐅᖏᑦᑐᒥᒡᓗ,

²⁷ ᑭᓯᐊᓂᓕ ᓇᓗᓁᒃᑯᑕᐅᖁᓪᓗᒍ ᐃᓄᖁᑎᑦᑎᓐᓄᑦ ᐃᓕᑦᓯᓐᓄᓪᓗ ᑭᖑᕚᑦᑎᓐᓄᓪᓗ, ᑐᒃᓯᐊᕐᕕᖃᕐᓂᑦᑎᓐᓂᒃ ᐊᑕᓂᕐᒧᑦ ᐃᑦᔪᕐᓁᑦᑑᑉ ᑐᐱᖓᑕ ᓵᖓᓂ ᑐᓂᕐᕈᑎᒃᓴᕗᓪᓗ ᐃᑯᐊᓚᑎᑕᒃᓮᑦ ᑐᓂᕐᕈᓯᕈᑎᒃᓮᓪᓗ ᐃᓚᒌᑦᓯᐊᕈᑎᒃᓴᒧᓪᓗ ᑐᓂᕐᕈᓯᕐᓃᑦ; ᑍᒤᓚᐅᕐᐳᒍᑦ ᑭᖑᕚᓯ ᐅᖃᓛᖁᓇᒋᑦ ᑭᖑᕚᑦᑎᓐᓄᑦ, ‘ᐊᑕᓂᕐᒧᑦ ᐱᓂᐊᕐᓂᖃᖃᑕᐅᓐᖏᓚᓯ.’

²⁸ ᐃᓱᒪᓚᐅᕋᑦᑕ ᑍᒤᑦᑐᖃᕋᔭᕐᐸᑦ ᑕᕝᕙ ᑭᖑᕚᕗᑦ ᐅᖃᕈᓐᓇᖁᓪᓗᒋᑦ, ‘ᑕᑯᒋᑦ! ᓯᕗᓕᕗᑦ ᑐᓂᕐᕈᓯᕐᕕᓕᐅᓚᐅᕐᐳᑦ ᐊᑕᓂᐅᑉ ᑐᓂᕐᕈᓯᕐᕕᖓᑕ ᐊᑦᔨᖓᓂᒃ, ᓴᓇᔭᐅᓚᐅᓐᖏᓚᕐᓕ ᐃᑯᐊᓚᑦᓯᓂᕐᒧᑦ ᑐᓂᕐᕈᓯᕐᕕᐅᖅᑯᓪᓗᒍ ᐅᕝᕙᓘᓐᓃᑦ ᑐᓂᕐᕈᓯᕐᓂᕐᒧᑦ, ᓇᓗᓁᒃᑯᑕᒃᓴᐅᖁᓪᓗᒍᓕ ᐅᕙᑦᑎᓐᓄᑦ ᐃᓕᑦᓯᓐᓄᓪᓗ.’

²⁹ ᐊᑕᓂᕐᒥᒃ ᐊᑭᕋᕐᑐᕐᓂᐊᓐᖏᓚᒍᑦ, ᒪᓕᒍᓐᓁᕐᓂᐊᕐᓇᒍᓗ ᒫᓐᓇ ᑐᓂᕐᕈᓯᕐᕕᓕᐅᕐᓂᑦᑎᓐᓄᑦ ᐃᑯᐊᓚᑎᑦᓯᓂᕐᒧᑦ ᑐᓂᕐᕈᑎᓂᒃ ᓂᐊᖂᔭᒃᓴᒧᑦ ᑐᓂᕐᕈᑎᓂᒃ ᐅᕝᕙᓘᓐᓃᑦ ᑐᓂᕐᕈᓯᑐᐃᓐᓇᕐᓂᕐᒧᑦ, ᑐᓂᕐᕈᓯᕐᕕᖕᒥᒃ ᓴᓇᓂᐊᓐᖏᓚᒍᑦ ᐊᑕᓂᐅᑉ ᒎᑎᑦᑕ ᑐᓂᕐᕈᓯᕐᕕᖓᑕ ᑐᐱᕐᒦᑦᑑᑉ ᐊᓯᐊᓂᒃ!”

³⁰ ᑐᓂᕐᕈᓯᕐᑎᑦᓯᔨ ᐱᓂᕼᐋᔅ ᐊᖑᑏᓪᓗ ᓯᕗᓕᕐᑏᑦ ᓄᓇᖃᑎᒌᓄᑦ, ᑭᖑᕚᕇᓪᓗ ᐊᖓᔪᖅᑳᖏᑦ ᒪᓕᓚᐅᕐᑐᑦ ᑐᓴᕋᒥᒃ ᐃᓄᖕᓂᑦ ᕉᐱᓂᐅᑉ, ᒑᓪᓗ ᒫᓇᓯᐅᓪᓗ ᑭᖑᕚᖏᑕ ᐅᖃᐅᓯᖏᓐᓂᒃ, ᓈᒻᒪᒃᓴᓕᓚᐅᕐᐳᑦ.

³¹ ᐱᓂᕼᐋᓯᓗ ᐃᓕᓯᕆᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓ ᐅᖃᕐᐳᖅ ᑖᒃᑯᓄᖓ ᕉᐱᓂᒃᑯᓐᓄᑦ, “ᐅᓪᓗᒥ ᖃᐅᔨᕗᒍᑦ ᐊᑕᓂᐅᑉ ᐃᓚᒋᖕᒪᑎᒍᑦ, ᐱᓇᓱᐊᕐᓂᑦᓯᒍᓪᓗ ᐊᑕᓂᕐᒥᒃ ᐊᑭᕋᕐᑐᓕᓚᐅᖏᓐᓇᑦᓯ; ᑍᒤᑦᒪᑦ ᒫᓐᓇ ᐃᓴᕆᐊᓕᒥᐅᑦ ᐃᓄᖏᑦ ᐱᐅᓕᓚᐅᕐᐸᓯ ᐊᑕᓂᐅᑉ ᐊᒡᒐᖏᓐᓂᑦ.”

³² ᑕᕝᕙ ᐱᓂᕼᐋᓯᓗ ᐃᓕᓯᕆᐅᑉ ᐃᕐᓂᖓ ᐊᖓᔪᖅᑲᐅᔪᓪᓗ, ᐅᑎᓕᕐᐳᑦ ᕿᒤᓕᕐᓗᑎᒃ ᕉᐱᓂᐅᑉ, ᒑᓪᓗ ᐃᓄᖏᓐᓂᒃ ᒋᓕᐊᑎᐅᑉ ᓄᓇᖓᓂᒃ ᐅᑎᓕᕐᓗᑎᒡᓗ ᑬᓇᓂᒧᑦ, ᐃᓴᕆᐊᓕᐅᑉ ᐃᓄᖏᓐᓄᑦ, ᐅᓂᒃᑳᕐᐳᓪᓗ ᑖᒃᑯᓄᖓ.

³³ ᐃᓴᕆᐊᓕᒥᐅᓪᓗ ᓈᒻᒪᒃᓴᓕᕐᐳᑦ ᑐᓴᕐᑎᑦᓯᐅᑕᐅᔪᓂᒃ; ᒎᑎᓗ ᓂᕐᑐᓕᕐᐹᑦ, ᐅᖃᐅᓯᖃᕈᓐᓃᕐᐳᓪᓗ ᐅᓇᑕᕈᒪᓂᕐᒥᒃ ᑖᒃᑯᓂᖓ, ᓄᓇᖏᓐᓂᒡᓗ ᐊᓯᕈᐃᔪᒪᓂᕐᒥᒃ ᕉᐱᓂᐅᑉ ᒑᓪᓗ ᓄᓇᒋᓕᕐᑕᖓᓐᓂᒃ.

³⁴ ᕉᐱᓂᐅᑉ ᒑᓪᓗ ᐃᓄᖏᑦ ᐅᖃᕐᐳᑦ, “ᐅᓇ ᑐᓂᕐᕈᓯᕐᕕᒃ ᓇᓗᓁᒃᑯᑕᐅᕗᖅ ᐅᕙᑦᑎᓐᓄᑦ ᐃᓕᑦᓯᓐᓄᓪᓗ ᐊᑕᓂᖅ ᒎᑎᐅᖕᒪᑦ.” ᑍᒤᒻᒪᑦ ᐊᑎᕐᑖᕐᑕᐅᕗᖅ “ᓇᓗᓁᕐᓯᕕᖕᒥᒃ.”