ᔮᓱᐊᑉ ᐊᒡᓚᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᓕᕔᑎᒃᑯᑦ ᐃᒡᓗᒐᓴᖏᑦ

¹ ᑕᕝᕙ ᓕᕔᑎᑦ ᑭᖑᕚᖏᓐᓂ ᓯᕗᓕᕐᑏᑦ ᐃᓕᓯᕆᒧᐊᕐᐳᑦ ᑐᓂᕐᕈᓯᕐᑎᑦᓯᔨᒧᑦ, ᔮᓱᐊᒧᓪᓗ ᓈᓂᐅᑉ ᐃᕐᓂᖓᓄᑦ, ᐊᖓᔪᖅᑳᕆᔭᐅᔪᓄᓪᓗ ᐃᓴᕆᐊᓕᒥᐅᑦ ᑭᖑᕚᖏᓐᓄᑦ.

² ᑕᕝᕙᓂ ᓮᓗᐊᒥ ᑬᓇᓂᐅᑉ ᓄᓇᖓᓂ ᐅᖃᐅᑎᓚᐅᕐᐰᑦ, “ᐊᑕᓂᖅ ᑎᓕᓯᓚᐅᕐᒪᑦ ᒨᓯᓯᒃᑯᑦ ᐃᒡᓗᒐᓴᖕᓂᒃ ᑐᓂᓯᕕᐅᖁᓪᓗᑕ ᓇᔪᒐᒃᓴᑦᑎᓐᓂᒃ, ᐱᕈᕐᓰᕕᖃᕐᑐᒥᒃ ᐆᒪᔪᖁᑎᕗᑦ ᐃᓂᖃᕈᓐᓇᖁᓪᓗᒋᑦ.”

³ ᑕᕝᕙ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᐃᓴᕆᐊᓕᒥᐅᑦ ᑐᓂᓯᕗᑦ ᓕᕔᑎᓄᑦ ᐃᒡᓗᒐᓴᖕᓂᒃ ᐱᕈᕐᑐᓕᖕᓂᒃ ᓄᓇᒥᒃ ᓄᓇᖁᑎᒥᑕ ᐃᓚᖏᓐᓂᒃ.

⁴ ᓇᓚᐅᑦᑖᕈᑎᒧᑦ ᓇᓚᐅᑕᐅᓚᐅᕐᐳᑦ ᓕᕔᑎᑦ ᑭᖑᕚᖏᑕ ᐃᓚᖏᑦ ᑯᕼᐋᑎᐅᑉ ᑭᖑᕚᖏᑦ. ᑖᒃᑯᐊ ᓕᕔᑦ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᑭᖑᕚᖏᑦ ᑐᓂᔭᐅᕗᑦ ᓇᓚᐅᑦᑖᕈᑎᒃᑯᑦ ᐃᒡᓗᒐᓴᖕᓂᒃ 13ᓂᒃ ᔫᑕᐅᑉ, ᓯᒥᐅᓂᐅᓪᓗ, ᐱᓐᔭᒥᓂᐅᓪᓗ ᓄᓇᖁᑎᖓᑕ ᐃᓚᖏᓐᓂᑦ.

⁵ ᑯᕼᐋᑎᐅᑉ ᑭᖑᕚᖏᑕ ᐃᓚᖏᑦ ᐃᒡᓗᒐᓴᖕᓂᒃ 10ᓂᒃ ᑐᓂᔭᐅᕗᑦ ᓇᓚᐅᑦᑖᕈᑎᒃᑯᑦ ᐃᕗᕅᑎᐅᑉ, ᑖᓐᓗ, ᒫᓇᓯᒃᑯᓪᓗ ᓄᓇᖁᑎᖓᑕ ᐃᓚᖏᓐᓂᑦ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᓂᒃ.

⁶ ᒌᕐᓲᓂᐅᑉ ᑭᖑᕚᖏᑕ ᐃᓚᖏᑦ ᑐᓂᔭᐅᕗᑦ ᓇᓚᐅᑦᑖᕈᑎᒃᑯᑦ ᐃᓴᑳᕆᐅᓪᓗ, ᐋᓱᕆᓗ, ᓈᑉᑕᓕᐅᓪᓗ ᒫᓇᓯᐅᓪᓗ ᓄᓇᖁᑎᖏᑕ ᐃᓚᖏᓐᓂᒃ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓂᒃ ᐹᓴᓂᒥ, 13ᓂᒃ ᐃᒡᓗᒐᓴᖕᓂᒃ.

⁷ ᒥᕋᕆᐅᑉ ᑭᖑᕚᖏᑦ ᑐᓂᔭᐅᕗᑦ ᕉᐱᓂᐅᑉ, ᒑᑦᓗ ᓯᐳᓗᓂᐅᓪᓗ ᓄᓇᖁᑎᖏᑕ ᐃᓚᖏᓐᓂᒃ, ᐃᒡᓗᒐᓴᖕᓂᒃ 12ᓂᒃ.

⁸ ᑖᒃᑯᐊ ᐃᒡᓗᒐᓮᑦ ᐱᕈᕐᓰᕕᖏᓪᓗ ᐃᓴᕆᐊᓕᒥᐅᓂᑦ ᑐᓂᔭᐅᓚᐅᕐᐳᑦ ᓇᓚᐅᑦᑖᕈᑎᒃᑯᑦ ᓕᕔᑦ ᑭᖑᕚᖏᓐᓄᑦ, ᐊᑕᓂᖅ ᒨᓯᓯᒃᑯᑦ ᑍᒫᒃ ᑎᓕᓯᓯᒪᓂᖓ ᒪᓕᒡᓗᒍ.

⁹ ᐅᑯᐊ ᑕᕝᕙ ᐃᒡᓗᒐᓮᑦ ᐊᑎᖏᑦ ᔫᑕᐅᓪᓗ ᓯᒥᐅᓂᐅᓪᓗ ᓄᓇᖁᑎᖓᓂᑦ ᑐᓂᔭᐅᓚᐅᕐᑐᑦ,

¹⁰ ᐂᕉᓂᐅᑉ ᑭᖑᕚᖏᓐᓄᑦ, ᑯᕼᐊᓯᐅᓪᓗ ᐃᓚᒌᖏᓐᓄᑦ ᓕᕔᑦ ᑭᖑᕚᖏᓐᓄᑦ ᐃᓚᒋᔭᐅᔪᓄᑦ; ᑖᒃᑯᐊ ᓯᕗᓪᓕᕐᐸᐅᓪᓗᑎᒃ ᓇᓚᐅᑦᑖᕈᑎᒧᑦ ᓇᓚᐅᑕᐅᓚᐅᕐᐳᑦ.

¹¹ ᑐᓂᔭᐅᕗᑦ ᐃᒡᓗᒐᓴᖕᓂᒃ ᑭᕆᐊᑦ-ᐊᕋᐸᒥᒃ (ᑖᓐᓇ ᐋᕐᐸ ᐋᓇᑭᐅᑉ ᐊᑖᑕᒋᓚᐅᕐᑕᖓ), ᒫᓐᓇ ᑍᔭᐅᔪᖅ ᕼᐃᐸᕋᓐᒥᒃ, ᔫᑕᐅᑉ ᓄᓇᖓᓂ ᖃᖅᑲᓃᑦᑐᖅ, ᓄᓇ ᐱᕈᕐᑐᓕᒃ ᐊᕙᑖᓃᑦᑐᖅ ᐃᓚᒋᔭᐅᑎᓪᓗᒍ.

¹² ᐃᒡᓗᒐᓮᓪᓕ ᐱᕈᕐᓰᕕᖏᑦ ᑕᕝᕙᓃᑦᑐᖅ ᓄᓇᓖᓪᓗ ᑐᓂᔭᐅᔭᕇᕐᓯᒪᕗᑦ ᑬᓚᐱᐅᑉ ᐃᕐᓂᖓᓄᑦ ᔨᐳᓂᐊᒧᑦ ᐱᖁᑎᒋᔭᐅᓪᓗᑎᒃ.

¹³ ᐂᕉᓂᐅᓪᓗ ᑐᓂᕐᕈᓯᕐᑎᑦᓯᔨᐅᑉ ᑭᖑᕚᖏᓐᓄᑦ ᑐᓂᔭᐅᕗᑦ ᕼᐃᐸᕋᓐ ᐱᖃᓯᐅᑎᓪᓗᒍ ᐃᒡᓗᒐᓮᑦ ᕿᒫᕖᑦ ᐱᔮᕆᓇᑎᒃ ᑐᖁᑦᓯᔪᕕᓂᕐᓄᑦ, ᐱᕈᕐᓰᕕᖏᓪᓗ, ᓕᑉᓇ ᐱᕈᕐᓰᕕᖏᓪᓗ ᐱᖃᓯᐅᑎᓪᓗᒋᑦ,

¹⁴ ᔮᑎᐊᕐ ᐱᕈᕐᓰᕕᖏᓪᓗ, ᐃᔅᑎᒧᐊ ᐱᕈᕐᓰᕕᖏᓪᓗ,

¹⁵ ᕼᐅᓗᓐ ᐱᕈᕐᓰᕕᖏᓪᓗ, ᑎᐱᕆ ᐱᕈᕐᓰᕕᖏᓪᓗ,

¹⁶ ᐂᓐ ᐱᕈᕐᓰᕕᖏᓪᓗ, ᔫᑦᑕ ᐱᕈᕐᓰᕕᖏᓪᓗ, ᐱᑦ-ᓯᒥᔅ ᐱᕈᕐᓰᕕᖏᓪᓗ ᐱᕈᕐᑐᓖᑦ: ᐃᒡᓗᒐᓮᑦ 9ᖑᕗᑦ ᔫᑕᒥᑦ ᓯᒥᐅᓂᒥᓪᓗ ᑐᓂᔭᐅᔪᑦ.

¹⁷ ᐱᓐᔭᒥᓂᐅᑉ ᓄᓇᖓᓂᑦ ᐃᒡᓗᒐᓮᑦ ᓯᑕᒪᐅᕗᑦ: ᒋᐱᐅᓂ ᐱᕈᕐᓰᕕᖏᓪᓗ, ᒋᐸ ᐱᕈᕐᓰᕕᖏᓪᓗ,

¹⁸ ᐊᓇᑑᑎ ᐱᕈᕐᓰᕕᖏᓪᓗ, ᐊᓪᒪᓐ ᐱᕈᓰᕕᖏᓪᓗ ᐱᖃᓯᐅᑎᓪᓗᒋᑦ:

¹⁹ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᑉ ᑭᖑᕚᖏᓐᓄᑦ ᑐᓂᔭᐅᔪᑦ ᐃᒡᓗᒐᓮᑦ ᐊᑕᖏᕐᓗᒋᑦ 13ᖑᕗᑦ ᐱᕈᕐᓰᕕᖏᑦ ᐱᖃᓯᐅᑎᓪᓗᒋᑦ.

²⁰ ᑯᕼᐋᑎᐅᑉ ᑭᖑᕚᖏᓐᓂ ᓕᕔᑎᒃᑯᑦ ᐃᓚᖏᑦ, ᓇᓚᐅᑦᑖᕈᑎᒃᑯᑦ ᐃᒡᓗᒐᓴᖕᓂᒃ ᑐᓂᔭᐅᕗᑦ ᐃᕗᕅᒥᐅᑉ ᑭᖑᕚᖏᑕ ᓄᓇᖓᓂᑦ.

²¹ ᑖᒃᑯᐊ ᑐᓂᓯᕕᐅᕗᑦ ᓯᑭᒻᒥᒃ, ᖃᖅᑲᓃᑦᑐᒥᒃ ᐃᒡᓗᒐᓴᖕᓂᒃ ᐱᔮᕆᓇᑎᒃ ᑐᖁᑦᓯᔪᕕᓂᕐᓄᑦ ᕿᒫᕖᑦ ᐱᕈᕐᓰᕕᖏᓐᓂᒃ ᐃᕗᕅᒥᒥ, ᒋᔨᕆᓗ ᐱᕈᕐᓰᕕᖏᓪᓗ,

²² ᑭᑉᔭ-ᐂᒻ ᐱᕈᕐᓰᕕᖏᓪᓗ, ᐱᑦ-ᕼᐅᕋᓐᓗ ᐱᕈᕐᓰᕕᖏᓪᓗ: ᑖᒃᑯᐊ ᐃᒡᓗᒐᓮᑦ ᓯᑕᒪᑦ;

²³ ᑖᓐ ᓄᓇᖓᓂᑦ, ᐃᐅᓪᑎᑭ ᐱᕈᕐᓰᕕᖏᓪᓗ, ᒋᐱᑖᓐ ᐱᕈᕐᓰᕕᖏᓪᓗ,

²⁴ ᐂᔭᓚᓐ ᐱᕈᕐᓰᕕᖏᓪᓗ, ᒑᑎ-ᕆᒪᓐᓗ ᐱᕈᕐᓰᕕᖏᓪᓗ ᐃᒡᓗᒐᓮᑦ ᓯᑕᒪᑦ;

²⁵ ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᑕ ᓄᓇᖓᓂᑦ, ᑖᓇᒃ ᐱᕈᕐᓰᕕᖏᓪᓗ, ᒑᑎ-ᕆᒪᓐ ᐱᕈᕐᓰᕕᖏᓪᓗ ᐃᒡᓗᒐᓵᒃ ᒪᕐᕉᒃ ᑐᓂᔭᐅᕘᒃ.

²⁶ ᑖᒃᑯᐊ ᐃᓚᒌᑦ ᑯᕼᐋᑎᐅᑉ ᑭᖑᕚᖏᑦ ᐃᒡᓗᒐᓴᖕᓂᒃ ᖁᓕᓂᒃ ᑐᓂᔭᐅᕗᑦ ᑲᑎᓪᓗᒋᑦ ᐱᕈᕐᓰᕕᖏᓪᓗ ᐃᓚᒋᓗᒋᑦ.

²⁷ ᒌᕐᓲᓂᐅᑉ ᑭᖑᕚᖏᑦ ᑐᓂᔭᐅᓚᐅᕆᕗᑦ, ᓕᕔᑉ ᑭᖑᕚᖏᑕ ᐃᓚᖏᑦ, ᒫᓇᓯᐅᑉ ᑭᖑᕚᒋᑕ ᐃᓚᖏᓐᓂᑦ ᓄᓇᖁᑎᑖᕐᑎᑕᐅᒋᕗᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑑᖕᓂᒃ ᐃᒡᓗᒐᓵᖕᓂᒃ ᒪᕐᕉᖕᓂᒃ; ᒎᓚᓐ ᐹᓴᓂᒦᑦᑐᖅ ᐱᕈᕐᓰᕕᖏᓪᓗ, ᐃᒡᓗᒐᓮᑦ ᐱᔮᕆᓇᑎᒃ ᑐᖁᑦᓯᔪᕕᓂᕐᓄᑦ ᕿᒫᕖᑦ ᐱᖃᓯᐅᑎᓪᓗᒋᑦ, ᐲ-ᓯᑏᕋ ᐱᕈᕐᓰᕕᖏᓪᓗ;

²⁸ ᐃᓴᑳᕆᐅᑉ ᑭᖑᕚᖏᑕ ᓄᓇᖓᓂᑦ ᑐᓂᔭᐅᕗᑦ ᑭᓯᐊᓐ ᐱᕈᕐᓰᕕᖏᓪᓗ, ᑕᐱᕋᑦ ᐱᕈᕐᓰᕕᖏᓪᓗ,

²⁹ ᔭᕐᒨᑎ ᐱᕈᕐᓰᕕᖏᓪᓗ, ᐃᓐ-ᒐᓂᒻᓗ ᐱᕈᕐᓰᕕᖏᓪᓗ; ᐃᒡᓗᒐᓴᖕᓂᒃ ᓯᑕᒪᓂᒃ;

³⁰ ᐋᓱᕆᐅᑉ ᑭᖑᕚᖏᑕ ᓄᓇᖓᓂᑦ ᑐᓂᔭᐅᕗᑦ ᒥᓴᐅᓪᒥᒃ ᐱᕈᕐᓰᕕᖏᓂᒡᓗ, ᐊᑉᑖᓐᒥᒃ ᐱᕈᕐᓰᕕᖏᓐᓂᒡᓗ,

³¹ ᕼᐃᐅᓪᑲᔅ ᐱᕈᕐᓰᕕᖏᓪᓗ, ᕅᕼᐊᑉᓗ ᐱᕈᕐᓰᕕᖏᓪᓗ, ᓯᑕᒪᓂᒃ ᐃᒡᓗᒐᓴᖕᓂᒃ.

³² ᓈᑉᑕᓕᐅᑉ ᑭᖑᕚᖏᑕ ᓄᓇᖓᓂᑦ, ᑐᓂᔭᐅᕗᑦ ᑭᑎᔅ ᒐᓕᓕᐊᒦᑦᑐᖅ ᐱᕈᕐᓰᕕᖏᓪᓗ, ᐃᒡᓗᒐᓮᑦ ᐱᔮᕆᓇᑎᒃ ᑐᖁᑦᓯᔪᕕᓂᕐᓄᑦ ᕿᒫᕕᒃ ᐱᖃᓯᐅᑎᓪᓗᒍ, ᕼᐊᒪᑕ-ᑐᐊᕐ ᐱᕈᕐᓰᕕᖏᓪᓗ, ᑳᕐᑖᓐᓗ ᐱᕈᕐᓰᕕᖏᓪᓗ; ᐃᒡᓗᒐᓴᖕᓂᒃ ᐱᖓᓱᓂᒃ.

³³ ᑖᒃᑯᐊ ᐃᓚᒌᑦ ᒌᕐᓲᓂᐅᑉ ᑭᖑᕚᖏᑦ ᑐᓂᔭᐅᕗᑦ ᐃᒡᓗᒐᓴᖕᓂᒃ ᑲᑎᓪᓗᒋᑦ 13ᓂᒃ ᐱᕈᕐᓰᕕᖏᓐᓂᒡᓗ.

³⁴ ᒥᕋᕆᐅᑉ ᑭᖑᕚᖏᑦ ᑐᓂᔭᐅᕗᑦ, ᑖᒃᑯᐊ ᓕᕔᑎᑦ ᐃᓚᖏᑦ, ᓯᐳᓗᓂᐅᑉ ᓄᓇᖓᓂᑦ ᐅᑯᓂᖓ: ᔫᒃᓂ-ᐊᒻ ᐱᕈᕐᓰᕕᖏᓪᓗ, ᑳᕐᑕ ᐱᕈᕐᓰᕕᖏᓪᓗ,

³⁵ ᑎᒻᓇ ᐱᕈᕐᓰᕕᖏᓪᓗ, ᓇᕼᐊᓚᐅᓪ ᐱᕈᕐᓰᕕᖏᓪᓗ; ᐃᒡᓗᒐᓴᖕᓂᒃ ᓯᑕᒪᓂᒃ;

³⁶ ᕉᐱᓂᐅᑉ ᓄᓇᖓᓂᑦ ᑐᓂᔭᐅᕗᑦ ᐃᒡᓗᒐᓴᖕᓂᒃ ᓯᑕᒪᓂᒃ ᐅᑯᓂᖓ: ᐱᔮᕐ ᐱᕈᕐᓰᕕᖏᓪᓗ, ᔧᕼᐋᓯ ᐱᕈᕐᓰᕕᖏᓪᓗ,

³⁷ ᑭᑎᒫᑎ ᐱᕈᕐᓰᕕᖏᓪᓗ, ᒥᕚ-ᑕᓗ ᐱᕈᕐᓰᕕᖏᓪᓗ.

³⁸ ᒑᑦ ᑭᖑᕚᖏᓐᓂᑦ ᑐᓂᔭᐅᕗᑦ ᐃᒡᓗᒐᓴᖕᓂᒃ ᓯᑕᒪᓂᒃ ᐅᑯᓂᖓ: ᕌᒪᑦᒥᒃ ᒋᓕᐊᑎᒦᑦᑐᒥᒃ ᐱᕈᕐᓰᕕᖏᓪᓗ, ᐃᒡᓗᒐᓮᑦ ᐱᔮᕆᓇᑎᒃ ᑐᖁᑦᓯᔪᕕᓂᕐᓄᑦ ᕿᒫᕕᒃ ᐱᖃᓯᐅᑎᓪᓗᒍ, ᒪᕼᐊᓁ ᐱᕈᕐᓰᕕᖏᓪᓗ,

³⁹ ᕼᐃᓴᐸᓂ ᐱᕈᕐᓰᕕᖏᓪᓗ, ᔧᔨᕆ ᐱᕈᕐᓰᕕᖏᓪᓗ ᐱᖃᓯᐅᑎᓪᓗᒋᑦ; ᑖᒃᑯᐊ ᓯᑕᒪᐅᕗᑦ ᐃᒡᓗᒐᓮᑦ ᑲᑎᓪᓗᒋᑦ.

⁴⁰ ᒥᕋᕆᐅᑉ ᑭᖑᕚᖏᑦ ᓇᓚᐅᑦᑖᕈᑎᒃᑯᑦ ᑐᓂᔭᐅᕗᑦ ᑲᑎᓪᓗᒋᑦ ᐃᒡᓗᒐᓴᖕᓂᒃ 12ᓂᒃ, ᑖᒃᑯᐊ ᑕᕝᕙ ᓕᕔᑦ ᑭᖑᕚᖏᑕ ᐊᒥᐊᒃᑯᖏᑦ.

⁴¹ ᓕᕔᑦ ᑭᖑᕚᖏᑦ ᑐᓂᔭᐅᕗᑦ ᐃᒡᓗᒐᓴᖕᓂᒃ ᐃᓴᕆᐊᓕᒥᐅᑦ ᓄᓇᖓᓂᑦ ᑲᑎᓪᓗᒋᑦ 48ᓂᒃ ᐱᕈᕐᓰᕕᖏᑦ ᖃᓂᒋᔭᖓᓃᑦᑐᑦ ᐱᖃᓯᐅᑎᓪᓗᒋᑦ.

⁴² ᐃᒡᓗᒐᓴᓕᒫᑦ ᑖᒃᑯᐊ ᐊᑐᓂᑦ ᐱᕈᕐᓰᕕᖃᐅᕐᐳᑦ ᖃᓂᒋᔭᒥᒃᑎᒍᑦ; ᐊᑕᖏᕐᓗᒋᑦ ᑕᕝᕙ ᑍᒤᑦᑑᓚᐅᕐᐳᑦ ᑖᒃᑯᐊ ᐃᒡᓗᒐᓮᑦ.

ᐃᓴᕆᐊᓕᒥᐅᑦ ᓄᓇᒥᒃ ᐱᕙᓪᓕᐊᓂᖏᑦ

⁴³ ᑍᒫᒃ ᑕᕝᕙ ᐊᑕᓂᖅ ᐃᓴᕆᐊᓕᒥᐅᓄᑦ ᓄᓇᒥᒃ ᑐᓂᓯᓚᐅᕐᐳᖅ ᓯᕗᓕᖏᓐᓄᑦ ᐊᖏᕈᑎᒋᓚᐅᕐᑕᓂ ᒪᓕᒡᓗᒍ ᑐᓂᓂᐊᕐᓂᕋᓚᐅᕐᑕᒥᓂᒃ; ᓄᓇᑖᕆᒐᒥᑦᔪᒃ, ᑖᒃᑯᓇᓂ ᓇᔪᒐᖃᓕᓚᐅᕐᐳᑦ.

⁴⁴ ᐊᑕᓂᐅᑉ ᒥᕐᖑᐃᕐᓯᕐᑎᓕᓚᐅᕐᐰᑦ ᓄᓇᒥ ᐊᕙᑎᓕᒫᒥᖕᓂᑦ ᐸᕕᓴᒃᑕᐅᔪᓐᓃᕐᓗᑎᒃ ᑍᒫᒃ ᑕᒪᓐᓇ ᓯᕗᓕᖏᓐᓄᑦ ᐊᖏᒻᒪᕆᒍᑎᒋᓚᐅᕋᒥᐅᒃ; ᐊᑭᕋᖏᓐᓄᑦ ᐊᑕᐅᓯᕐᒧᓪᓘᓐᓃᑦ ᓄᖅᑲᕐᑎᑕᐅᔪᓐᓇᓚᐅᓐᖏᓚᑦ; ᐊᑕᓂᐅᑉ ᓵᓚᖃᕐᑎᖃᑦᑕᓚᐅᕐᒪᒋᑦ ᐊᑭᕋᓕᒫᖏᓐᓂᒃ.

⁴⁵ ᐅᖃᐅᓯᕐᒥᒃ ᐊᑕᐅᓯᕐᒥᒡᓘᓐᓃᑦ ᐊᖏᕈᑕᐅᓯᒪᔪᒥᒃ ᑲᔪᓯᖏᑦᑐᕐᑕᖃᓚᐅᓐᖏᓚᖅ; ᐊᑕᓂᐅᑉ ᐅᖃᐅᓯᕆᓚᐅᕐᑕᓕᒫᓂ ᓇᓚᐅᑦᓯᑎᓚᐅᕐᐰᑦ ᐃᓴᕆᐊᓕᒥᐅᓄᑦ.