ᔮᓱᐊᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᔮᓱᐊᑉ ᑎᓕᓯᓂᖓ ᖃᐅᔨᓴᕆᐊᕐᑐᓂᒃ ᔨᕆᑯᒧᑦ

¹ ᔮᓱᐊ ᓈᓂᐅᑉ ᐃᕐᓂᖓ ᑎᓕᓯᕗᖅ ᒪᕐᕉᖕᓂᒃ ᖃᐅᔨᓴᕆᐊᕐᑑᖕᓂᒃ ᑕᖕᒫᕐᓯᒪᕕᖕᒥᓂᑦ ᓯᑎᒻᒥᑦ, ᐃᒫᒃ ᐅᖃᐅᑎᓪᓗᒋᑦ, “ᖃᐅᔨᔭᐅᑦᑍᓕᓗᓯᒃ ᑬᓇᐅᑉ ᓄᓇᖓᓂᒃ ᖃᐅᔨᓴᕆᐊᕆᑦᓯᒃ ᐱᓗᐊᕐᑐᒥᒃ ᔨᕆᑰᑉ ᐃᒡᓗᒐᓴᖏᓐᓂᒃ.” ᑖᒃᑯᐊᓗ ᐃᒡᓗᒐᓴᖕᓄᐊᕐᐳᑦ, ᑕᕝᕙᓃᑉᐳᓪᓗ ᐅᓪᓘᖕᓂᒃ ᒪᕐᕉᖕᓂᒃ, ᑐᔪᕐᒥᓪᓗᑎᒃ ᕅᕼᐊᐱᒥᒃ ᐊᑎᓕᖕᒥᒃ, ᑖᓐᓇ ᑮᓇᐅᔭᒧᑦ ᐊᑐᒐᐅᓚᐅᕐᑐᖅ.

² ᔨᕆᑰᑉ ᐊᖓᔪᖅᑳᕐᔪᐊᖓ ᑐᓴᕐᑎᑕᐅᓚᐅᕐᐳᖅ ᐃᓴᕆᐊᓕᒥᐅᑦ ᐃᓚᖏᑦ ᐅᓐᓄᐊᒃᑯᑦ ᑎᑭᑦᑐᕕᓂᐅᓂᖏᓐᓂᒃ ᖃᐅᔨᓴᕆᐊᕐᓗᑎᒃ ᓄᓇᖁᑎᖓᓂᒃ.

³ ᑍᒤᒻᒪᑦ ᔨᕆᑰᑉ ᐊᖓᔪᖅᑳᕐᔪᐊᖓ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᕅᕼᐊᐱᒧᑦ, “ᐊᖑᑏᑦ ᐃᒡᓗᖕᓃᑦᑐᑦ ᕾᑎᓚᐅᒃᑭᑦ, ᖃᐅᔨᓴᕆᐊᕐᓯᒪᖕᒪᑕ ᓄᓇᑦᑎᓐᓂᒃ.”

⁴ ᐊᕐᓇᐅᓪᓕ ᐊᖑᑏᒃ ᒪᕐᕉᒃ ᐃᔨᕐᑎᓚᐅᕐᐰᒃ; ᐅᖃᕐᓗᓂᓗ, “ᐊᖑᑎᓂᒃ ᕾᔪᖃᓚᐅᕐᑑᒐᓗᐊᖅ, ᑭᓯᐊᓂᓕ ᖃᐅᔨᒪᓚᐅᓐᖏᓚᒃᑲ ᓇᓂᒥᐅᑕᐅᖕᒪᖔᑎᒃ.

⁵ ᐃᑎᕐᑕᕐᕕᒡᓕ ᐅᒃᑯᐊᕐᓂᐊᓕᕐᑎᓪᓗᒍ, ᐊᐅᓪᓚᓚᐅᕐᐴᒃ ᓯᕿᓂᖅ ᓂᐱᓕᕐᑎᓪᓗᒍ, ᓇᒧᓐᖓᓚᐅᕐᒪᖔᑕ ᖃᐅᔨᒪᖏᑦᑐᖓ; ᒫᓐᓇ ᑐᐊᕕᕐᓗᓯ ᒪᓕᒃᓴᕈᑦᓯᒋᑦ, ᐊᖑᔪᓐᓇᕐᐸᓯ.”

⁶ ᕅᕼᐊᐱᐅᓪᓕ ᐃᔨᕐᓯᒪᓚᐅᕐᐰᒃ ᐊᖑᑏᒃ ᐃᒡᓘᑉ ᖄᖓᓄᑦ, ᐱᕈᕐᑐᓄᑦ ᐃᕕᒃᓱᒐᕐᓄᓪᓗ ᓴᐅᓯᒪᓪᓗᒋᒃ ᐃᒡᓘᑉ ᖄᖓᓃᑦᑐᖁᑎᒥᓄᑦ.

⁷ ᑕᕝᕙ ᐊᖑᑏᑦ ᒪᓕᒃᓴᕐᒪᑕ ᔪᐊᕐᑕᓂᐅᑉ ᑰᖓᑕ ᓇᓛᓄᑦ, ᐃᑎᕐᑕᕐᕕᐅᑉ ᐅᒃᑯᐊᖓ ᐅᒃᑯᐊᕐᑕᐅᕗᖅ, ᐊᖑᑏᓪᓗ ᕿᓂᓚᐅᕐᐳᑦ ᔪᐊᕐᑕᓂᐅᑉ ᑰᖓ ᑎᑭᓪᓗᒍ.

⁸ ᖃᐅᔨᓴᕆᐊᕐᓯᒪᔫᒃ ᓯᓂᒐᓱᓕᓚᐅᕐᑎᓐᓇᒋᒃ, ᕅᕼᐊᐱᐅᑉ ᐅᐸᑉᐰᒃ ᐃᒡᓘᑉ ᖄᖓᓄᑦ.

⁹ ᐅᖃᐅᑎᓪᓗᒋᓪᓗ, “ᖃᐅᔨᒪᕗᖓ ᐊᑕᓂᐅᑉ ᓄᓇ ᐃᓕᑦᓯᓐᓄᑦ ᑐᓂᓚᐅᕐᒪᒍ, ᐃᓕᑦᓯᓐᓂᒃ ᑲᑉᐱᐊᓱᖕᓂᕐᔪᐊᖃᓕᕋᑦᑕ, ᓄᓇᓕᓕᒫᓪᓗ ᐃᓕᑦᓯᓐᓂᒃ ᓯᕘᕋᓕᕐᓗᑎᒃ.

¹⁰ ᑐᓴᐅᒪᒐᑦᑕ ᐊᑕᓂᐅᑉ ᐃᒪᖅ ᐊᐅᐸᓗᒃᑕᖅ ᓴᓗᐊᕐᑎᓚᐅᕐᒪᒍ ᐊᐅᓪᓚᕐᑎᓪᓗᓯ ᐄᑦᔨᑉᑎᒥᑦ, ᑐᓴᓚᐅᕆᕗᒍᑦᑕᐅᖅ ᑐᖁᕅᓂᕆᓚᐅᕐᑕᑦᓯᓐᓂᒃ ᓮᕼᐆᓂᒥᐅᓂᒃ ᐋᒡᒥᐅᓂᒡᓗ ᑖᒃᑯᐊᓗ ᐊᖓᔪᖅᑳᕐᔪᐊᒃ ᒪᕐᕉᒃ ᐊᒧᕅᑎᒥᐅᑕᖅ ᐋᒡᒥᐅᑕᕐᓗ ᑐᖁᕋᕐᑕᐅᓚᐅᕐᓂᖏᓐᓂᒃ ᓄᖑᑕᐅᓪᓗᑎᒃ ᔪᐊᕐᑕᓂᐅᑉ ᐅᖓᑖᓂ.

¹¹ ᑐᓴᑐᐊᕋᑦᑕᓗ ᑲᑉᐱᐊᓱᓕᓚᐅᕐᐳᒍᑦ, ᓴᐱᓕᕐᓗᑎᒡᓗ ᐊᖑᑎᓕᒫᑦ ᐃᓕᑦᓯᓐᓂᒃ; ᐊᑕᓂᖅ ᒎᑎᓯ ᒎᑎᐅᖕᒪᑦ ᕿᓚᖕᒥᐅᓄᑦ ᓄᓇᕐᔪᐊᕐᒥᐅᓄᓪᓗ.

¹² ᒫᓐᓇᓕ ᐊᖏᕐᕕᒋᓚᐅᕐᓯᓐᖓ ᐊᑕᓂᕐᒧᑦ ᐱᑦᓯᐊᕐᕕᒋᓚᐅᕋᑦᓯᒃ ᑍᒫᒃᑕᐅᖅ ᐅᕙᓐᓂᒃ ᐱᑦᓯᐊᖁᓪᓗᓯ ᐃᓚᓐᓂᒡᓗ, ᓱᓕᑦᔪᑎᑦᓯᓐᓂᒃ ᓇᓗᓁᒃᑯᑕᖃᖁᔨᔪᖓ ᐅᒃᐱᕈᓱᒍᓐᓇᖁᓪᓗᖓ.

¹³ ᐊᖏᕐᕕᒋᓯᓐᖓ ᐊᑖᑕᒐ ᐊᓈᓇᒐᓗ ᖃᑕᓐᖑᑎᒃᑲᓗ ᐃᓚᓕᒫᒃᑲᓗ ᓴᐳᑎᔭᐅᖁᓪᓗᒋᑦ ᑐᖁᒥᑦ.”

¹⁴ ᐊᖑᑏᒡᓗ ᐅᖃᕐᐴᒃ ᑖᑦᓱᒧᖓ, “ᒎᑎᐅᑉ ᑐᖁᓪᓕᑎᒍᒃ ᐅᖃᐅᓯᑦᑎᓐᓂᒃ ᐊᑐᖏᒃᑯᓐᓄᒃ! ᐅᖃᐅᓯᖃᕐᓂᐊᓐᖏᑐᐊᕈᕕᑦ ᐱᓇᓱᐊᕐᓂᕆᔭᑦᑎᓐᓂᒃ, ᑕᕝᕙ ᐃᓕᖕᓄᑦ ᐱᑦᓯᐊᕐᓂᐊᕐᐳᒍᒃ ᑲᔪᓯᑦᓯᐊᕐᓗᓄᒡᓗ ᐊᖏᕈᑎᒋᔭᑦᑎᓐᓂᒃ ᐊᑕᓂᐅᑉ ᑐᓂᒃᐸᑎᒍᑦ ᓄᓇᒥᒃ ᑕᒪᑐᒥᖓ.”

¹⁵ ᕅᕼᐊᐱ ᐊᖏᕐᕋᖃᓚᐅᕐᐳᖅ ᐃᒡᓗᒐᓮᑦ ᐊᕙᓗᐊᓂ, ᑍᒤᒻᒪᑦ ᐃᒐᓛᒃᑯᑦ ᐊᖅᑲᕐᑎᓚᐅᕐᐰᒃ ᐊᒃᓱᓈᒃᑯᑦ ᓂᖏᑎᓪᓗᒋᒃ.

¹⁶ ᐅᖃᐅᑎᓪᓗᒋᒡᓗ, “ᖃᖅᑲᓄᐊᕆᑦᓯᒃ, ᐃᓕᑦᓯᓐᓂᒃ ᕿᓂᕐᑐᓄᑦ ᓇᓂᔭᐅᖁᓇᓯᒃ; ᑕᕝᕙᓂᓗ ᐃᔨᕐᓯᒪᒋᑦᓯᒃ ᐅᓪᓗᓂᒃ ᐱᖓᓱᓂᒃ, ᕿᓂᕆᐊᕐᓯᒪᔪᑦ ᐅᑎᓚᐅᖏᓐᓂᖏᓐᓂ; ᐅᑎᕐᓯᒪᓕᕐᐸᑕ ᐃᓱᒪᒋᔭᑦᓯᓐᓄᑦ ᐂᒋᐊᓛᕐᐳᓯᒃ.”

¹⁷ ᑕᕝᕙ ᐊᖑᑏᒃ ᐅᖃᕐᐴᒃ ᑖᑦᓱᒧᖓ, “ᐊᖏᕈᑎᒋᔭᐅᖁᓚᐅᕐᑍᑦ ᑕᒪᓐᓇ ᓱᓕᑦᓯᐊᕐᓗᑕ ᑲᔪᓯᑎᓐᓂᐊᕐᐸᕗᑦ.

¹⁸ ᐃᒤᓕᐅᕐᑐᒃᓴᐅᕗᑎᓪᓕ, ᓄᓇᖕᓄᑦ ᑎᑭᒍᑦᑕ ᐊᐅᐸᕐᑐᒥᒃ ᐊᒃᓱᓈᒥᒃ ᓂᕕᖓᑎᑦᓯᓛᕐᐳᑎᑦ ᐃᒐᓛᕐᓂ ᐊᖅᑲᕐᕕᒋᓚᐅᕐᑕᑦᑎᒍᑦ; ᐊᑖᑍᓪᓗ ᐊᓈᓁᓪᓗ ᐊᓂᑎᓪᓗ, ᐊᑖᑕᕕᓪᓗ ᐃᓚᓕᒫᖏᑦ ᑲᑎᑎᓯᒪᓛᕐᐸᑎᑦ ᐃᒡᓗᖕᓄᑦ.

¹⁹ ᓇᓪᓕᐊᓐᓂᒡᓕ ᐊᓂᔪᖃᑐᐊᕐᐸᑦ ᐃᒡᓗᒥᑦ, ᑖᓐᓇ ᐃᒻᒥᓂᒃ ᑐᖁᒧᑦ ᐱᑎᓐᓂᐊᕐᐳᖅ, ᐅᕙᒍᒡᓗ ᐸᓯᔭᒃᓴᐅᔪᒫᓐᖏᓚᒍᒃ ᑖᑦᓱᒧᖓ; ᑭᓯᐊᓂᓕ ᐃᒡᓗᖕᓂ ᐃᑎᕐᓯᒪᔪᒥᒃ ᑐᖁᑕᐅᔪᖃᕐᐸᑦ ᑕᕝᕙ ᐅᕙᒍᒃ ᐸᓯᔭᒃᓴᐅᔪᒫᕐᐳᒍᒃ.

²⁰ ᐅᖃᑐᐊᕈᕕᓪᓕ ᑭᓇᑐᐃᓐᓇᕐᒧᑦ ᐱᓇᓱᐊᕐᓂᕆᓚᐅᕐᑕᑦᑎᓐᓂᒃ, ᑕᕝᕙ ᐸᓯᔭᒃᓴᐅᓂᐊᓐᖏᓚᒍᒃ ᐊᖏᖃᑎᒌᒍᑎᒋᓯᒪᔭᕗᑦ ᑲᔪᓯᑎᖏᒃᑲᓗᐊᕈᑦᑎᒍᒃ.”

²¹ ᐊᕐᓇᐅᓪᓗ ᐅᖃᐅᑎᕚᒃ, “ᐅᖃᐅᓯᕆᔭᓯᒃ ᑲᔪᓯᑎᓕᕐᓚᕗᑦ.” ᑖᑦᓱᒪ ᐊᖏᖃᑎᒋᓚᐅᕐᓗᒋᒃ ᐊᐅᓪᓚᖁᓕᕐᐹᒃ, ᑕᕝᕙ ᐊᐅᓪᓚᕐᒪᑎᒃ; ᐊᐅᐸᕐᑐᒥᒃ ᐊᒃᓱᓈᒥᒃ ᓂᕕᓐᖓᕐᓯᓚᐅᕐᐳᖅ ᐃᒐᓛᕐᒥᓂ.

²² ᑕᕝᕙ ᐊᖑᑏᒃ ᕿᒪᕉᑎᕘᒃ ᑕᕝᕙᓐᖓᑦ, ᖃᖅᑲᓄᐊᕐᓗᑎᒡᓗ, ᑕᕝᕙᓃᓚᐅᕐᐴᒡᓗ ᐅᓪᓗᓂᒃ ᐱᖓᓱᓂᒃ, ᕿᓂᕆᐊᕐᓯᒪᔪᑦ ᐅᑎᓚᐅᖏᓐᓂᖏᓐᓂ; ᕿᓂᕆᐊᕐᓯᒪᔪᓪᓕ ᕿᓂᓚᐅᕐᐳᑦ ᓇᓂᑐᐃᓐᓇᖅ ᓇᓂᓯᓚᐅᕋᑎᒡᓕ ᐅᑎᓚᐅᕐᐳᑦ ᔨᕆᑯᒧᑦ.

²³ ᑕᕝᕙ ᑖᒃᑯᐊᒃ ᖃᐅᔨᓴᕆᐊᓚᐅᕐᑑᒃ ᐊᖅᑲᓚᐅᕐᐴᒃ ᖃᖅᑲᒥᑦ, ᐃᑳᕐᓗᑎᒃ ᑰᒃᑯᑦ ᐅᑎᓚᐅᕐᐴᒃ ᔮᓱᐊᒧᑦ ᓈᓂᐅᑉ ᐃᕐᓂᖓᓄᑦ.

²⁴ ᔮᓱᐊᓗ ᐅᖃᐅᑎᓪᓗᒍ, “ᓱᓕᓪᓚᕆᒃᑐᒥᒃ ᐊᑕᓂᐅᑉ ᑐᓂᓚᐅᕐᐹᑎᒍᑦ ᓄᓇᓕᒫᒥᒃ; ᐃᓄᓕᒫᓪᓗ ᓄᓇᖃᕐᑐᑦ ᑍᑲᓂ ᓴᐱᓕᕐᓗᑎᒃ ᐅᕙᑦᑎᓐᓂᒃ.”