ᔮᓱᐊᑉ ᐊᒡᓚᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᓄᓁᑦ ᐊᓯᖏᑦᑕ ᐊᕕᒃᑐᕐᑕᐅᓂᖏᑦ

¹ ᓄᓇ ᐅᓇᑕᕐᓂᒃᑯᑦ ᐱᑖᕆᒐᒥᑦᔪᒃ, ᐃᓴᕆᐊᓕᒥᐅᓕᒫᑦ ᑲᑎᕗᑦ ᓮᓗᐊᒥ, ᑕᕝᕙᓂᓗ ᑐᐱᖅ ᐊᑕᓂᐅᑉ ᓇᔪᕐᑕᖓ ᓇᑉᐸᕐᐹᑦ ᑲᑎᒪᕕᒃᓴᕆᓪᓗᒍ.

² ᐃᓚᒌᓪᓕ ᓱᓕ ᐃᓴᕆᐊᓕᒥᐅᑦ ᑭᖑᕚᕇᖁᑎᖏᑦ 7 ᑐᓂᔭᐅᓚᐅᓐᖏᓚᑦ ᓄᓇᐅᑉ ᐃᓚᖓᓂᒃ ᓄᓇᑖᕆᓗᒍ ᑭᖑᕐᖑᑎᓂᐊᕐᑕᖏᓐᓂᒃ.

³ ᑕᕝᕙ ᔮᓱᐊᑉ ᐃᓄᐃᑦ ᐃᓴᕆᐊᓕᒥᐅᑦ ᐅᖃᐅᑎᕔᑦ, “ᖃᓄᖅ ᓱᓕ ᐊᑯᓂᐅᑎᒋᔪᒥᒃ ᐅᑕᖅᑭᓂᐊᕐᐱᓰ ᓄᓇᑖᕐᑍᓕᓗᓯ ᐊᑕᓂᐅᑉ ᓯᕗᓕᑦᓯ ᒎᑎᖓᑕ ᑐᓂᔭᕇᕐᓯᒪᔭᖓᓂᒃ ᐃᓕᑦᓯᓐᓄᑦ?

⁴ ᑭᖑᕚᕇᓂᑦ ᐊᑐᓂᑦ ᐱᓯᒪᔪᓂᒃ ᐊᖑᑎᓂᒃ ᐱᖓᓱᓂᒃ ᑐᓂᓚᐅᕐᓯᓐᖓ, ᑖᒃᑯᐊ ᑎᓕᓂᐊᕋᒃᑭᑦ ᖃᐅᔨᓴᖁᓪᓗᒋᑦ ᓇᓗᓁᕐᓯᑦᓯᐊᖁᓪᓗᒋᓪᓗ ᓇᓪᓕᐊᓐᓂᒃ ᓄᓇᑖᕈᒪᖕᒪᖔᑕ ᑭᖑᕐᖑᑎᔭᒃᓴᒥᖕᓂᒃ, ᖃᐅᔨᓴᕇᕈᑎᒡᓗ ᐅᕙᓐᓄᑦ ᐅᑎᖁᓪᓗᒋᑦ.

⁵ ᓄᓇ ᐊᕕᒃᑐᕐᑕᐅᔪᓐᓇᕐᐳᖅ 7ᐅᓕᓗᒍ; ᔫᑕᐅᑉ ᑭᖑᕚᖏᑦ ᓅᓐᓂᐊᓐᖏᓚᑦ ᓄᓇᒥᖕᓂᑦ ᓯᕿᓂᐅᑉ ᓇᓛᓃᑦᑐᒥᑦ, ᔫᓯᐱᐅᓪᓗ ᑭᖑᕚᖏᑦ ᓄᓇᒥᖕᓂᑦ ᐅᓐᓄᐊᓪᓗᐊᑉ ᓇᓛᓃᑦᑐᒥᑦ ᓅᓐᓂᐊᖏᓐᓂᕗᑦ.

⁶ ᓄᓇ ᕿᒥᕐᕈᐊᕐᓗᒍ ᓄᓇᓐᖑᐊᓕᐅᕐᓗᒍᑦ ᓇᓗᓁᕐᓂᐊᕐᐸᓯ ᐊᕕᒃᑐᕐᓗᒋᑦ 7ᓄᑦ ᕾᓪᓗᓯᐅᒡᓗ ᐅᕙᓐᓄᑦ; ᓇᓚᐅᑦᑖᕈᑎᒃᑯᑦ ᐊᑕᓂᐅᑉ ᒎᑎᑦᑕ ᓵᖓᓂ ᖃᐅᔨᒋᐊᕈᒫᕐᐸᒃᑲ ᐃᓕᑦᓯ ᐱᑦᔪᑎᒋᓗᓯ.

⁷ ᓕᕔᒃᑯᓪᓕ ᑭᓯᐊᓂ ᓄᓇᑖᕐᓂᐊᓐᖏᓚᑦ ᐊᑯᓐᓇᑦᓯᓐᓂ, ᐱᔭᒃᓴᖃᕐᒪᑕᓕ ᐊᑕᓂᕐᒥᒃ ᐱᔨᑦᓯᕐᓗᑎᒃ ᑐᓂᕐᕈᓯᕐᑎᑦᓯᔨᐅᓂᕐᒥᒃ ᑕᒪᓐᓇ ᑭᖑᕐᖑᑎᔭᒃᓴᕆᖕᒪᒍ; ᐅᑯᐊᓗ ᐃᓚᒌᑦ ᒑᑦ, ᕉᐱᓂᓗ, ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᑦ ᓯᕿᓂᐅᑉ ᓄᐃᕕᐊᓃᑦᑐᑦ ᓄᓇᑖᕇᕐᓯᒪᓕᕐᒪᑕ ᓄᓇᒥᒃ ᔪᐊᕐᑕᓂᐅᑉ ᑰᖓᑕ ᐊᑭᐊᓂ ᓯᕿᓂᐅᑉ ᓄᐃᕕᐊᓃᑦᑐᒥᒃ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑐᓂᓚᐅᕐᑕᖓᓂᒃ.”

⁸ ᑕᕝᕙ ᐊᖑᑏᑦ ᖃᐅᔨᓴᕆᐊᓕᕐᐳᑦ ᓄᓇᓐᖑᐊᓕᐅᕆᐊᕐᑐᕐᓗᑎᒃ; ᔮᓱᐊᑉ ᐅᖃᐅᑎᓚᐅᕐᒪᒋᑦ ᖃᓄᐃᓕᐅᕆᐊᖃᕐᓂᖏᓐᓂᒃ, “ᓄᓇ ᕿᒥᕐᕈᐊᕆᐊᕐᑐᓕᕐᓯᐅᒃ, ᓄᓇᓐᖑᐊᓕᐅᕐᓗᒍ ᓇᓗᓁᕐᓂᐊᕐᐸᓯ, ᕾᓪᓗᓯᐅᒡᓗ ᐅᕙᓐᓄᑦ, ᑕᕝᕙᓂᓗ ᓮᓗᐊᒥ ᐊᑕᓂᖅ ᖃᐅᔨᒋᐊᕈᒫᕐᐸᕋ ᖃᓄᐃᓕᐅᖁᔨᖕᒪᖔᑦ ᓇᓚᐅᑦᑖᕈᑎᒃᑯᑦ.”

⁹ ᑕᕝᕙ ᐊᖑᑏᑦ ᖃᐅᔨᓴᕆᐊᕐᐳᑦ ᓄᓇᓐᖑᐊᓕᐅᕐᓗᑎᒡᓗ ᐊᕕᒃᑐᕐᓗᒍ ᓄᓇ 7ᐅᓕᖅᑲᖓᓪᓗᒍ, ᓄᓇᓖᑦ ᑎᑎᕋᕐᑕᐅᕗᑦ ᐊᒡᓚᖕᓄᑦ ᑲᑎᑕᐅᓪᓗᑎᒃ, ᐅᑎᕐᐳᓪᓗ ᔮᓱᐊᒧᑦ ᑕᖕᒫᕐᓯᒪᕕᖕᒦᑦᑐᒧᑦ ᓮᓗᐊᒥ.

¹⁰ ᔮᓱᐊᓗ ᓇᓚᐅᑦᑖᕈᑎᒃᑯᑦ ᓮᓗᐊᒥ ᐊᑕᓂᕐᒥᒃ ᖃᐅᔨᒋᐊᕐᐳᖅ ᑖᒃᑯᐊ ᐱᑦᔪᑎᒋᓪᓗᒋᑦ, ᐊᕕᒃᑐᕐᐰᓪᓗ ᐃᓴᕆᐊᓕᒥᐅᓄᑦ ᓄᓇᑖᕆᐊᖃᕐᑐᓄᑦ ᑭᖑᕚᕇᑦ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ.

ᓄᓇ ᑐᓂᔭᐅᔪᖅ ᐱᓐᔭᒥᓂᒧᑦ

¹¹ ᓄᓇ ᓇᓚᐅᑕᐅᔪᖅ ᓯᕗᓪᓕᕐᐹᒥ ᑐᓂᔭᐅᕗᖅ ᐱᓐᔭᒥᓂᐅᑉ ᑭᖑᕚᖏᓐᓄᑦ, ᔫᑕᐅᓪᓗ ᔫᓯᐱᐅᓪᓗ ᓄᓇᖁᑎᖓᑕ ᐊᑯᓐᓂᖓᓃᑦᑐᖅ.

¹² ᐅᓐᓄᐊᓪᓗᐊᑉ ᓇᓛᓃᑦᑐᖅ ᓄᓇᖁᑎᖓᑕ ᑭᒡᓕᖓ ᐱᒋᐊᕐᓂᖃᕐᐳᖅ ᔪᐊᕐᑕᓂᐅᑉ ᑰᖓᓂᑦ; ᑲᔪᓯᓪᓗᓂ ᖃᖅᑲᔮᓄᑦ ᔨᕆᑯᒧᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ, ᐊᒻᒪ ᓯᕿᓂᐅᑉ ᓂᐱᕕᐊᓄᑦ ᖃᖅᑲᔮᓕᒃᑎᒍᑦ; ᐃᓄᖃᔪᐃᑦᑐᖅ ᐱᑦᐂᕕᓐ ᑎᑭᓪᓗᒍ.

¹³ ᓄᓇᖁᑎᖓᑕ ᑭᒡᓕᖓ ᐱᒋᐊᕐᓂᖃᕐᐳᖅ ᓚᔾᒥᑦ ᐅᓪᓗᓪᓗᐊᑉ ᒥᒃᓯᖔᖓᒍᑦ (ᑍᔭᐅᓚᐅᕐᒥᔪᖅ ᐱᑎᓕᒥᒃ), ᑕᐅᓄᖓᓗ ᐊᑕᕉᑎ-ᐊᑕᕆᒧᑦ, ᖃᖅᑲᒧᑦ ᐊᒃᐸᓯᖕᓂᕐᓴᒧᑦ ᐱᑦ-ᕼᐅᕋᓐᒧᑦ ᐅᓪᓗᓪᓗᐊᑉ ᓇᓛᓃᑦᑐᒧᑦ.

¹⁴ ᓄᓇᐅᓪᓗ ᑭᒡᓕᖓ ᐃᒡᓗᐊᓄᑦ ᑎᑎᕐᓯᒪᒋᕗᖅ ᐅᓪᓗᓪᓗᐊᑉ ᓇᓛᓄᑦ, ᑕᕝᕙᓐᖓᑦ ᖃᖅᑲᐅᑉ ᓯᕿᓂᖓᑕ ᓂᐱᕕᐊᒍᑦ ᑍᑯᖓ ᑭᕆᐊᑦ-ᐰᓕᒧᑦ (ᑍᔭᐅᕙᖕᒥᔪᖅ ᑭᕆᐊᑦ-ᔨᕆᒻᒥᒃ), ᐱᑦ-ᕼᐅᕋᐅᑉ ᐊᑭᐊᓃᑦᑐᒧᑦ, ᑕᒪᓐᓇ ᔫᑕᐅᑉ ᑭᖑᕚᖏᓐᓄᑦ ᐱᒋᔭᐅᕗᖅ. ᑕᒪᓐᓇ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ ᓄᓇᖁᑎᖓᑕ ᑭᒡᓕᒋᓚᐅᕐᐹ.

¹⁵ ᐅᓪᓗᓪᓗᐊᓪᓕ ᓇᓛᓃᑦᑐᖅ ᐱᒋᐊᕐᓂᖃᕐᐳᖅ ᑭᕆᐊᑦ-ᔨᕆᒻ ᑭᒡᓕᖓᓂᑦ; ᑕᒫᓐᖓᑦ ᐱᒋᐊᕐᓗᓂ ᑎᑭᓯᒪᕗᖅ ᐃᐸᕋᓐᒧᑦ, ᓂᑉᑐᐊᑉ ᐃᒥᕐᑕᕐᕕᖓᓄᑦ ᓄᓇᐅᑉ ᐃᓗᐊᓂᑦ ᑰᒃᑐᒧᑦ.

¹⁶ ᑕᕝᕙᓐᖓᑦ ᑕᐅᓄᖓ ᖃᖅᑲᐅᑉ ᓇᑎᕐᓇᖓᓄᑦ ᓄᓇ ᑭᒡᓕᖃᕐᐳᖅ ᐅᔭᐅᒪᔪᒧᑦ ᕼᐃᓇᒻ ᓇᕐᓴᖓᓄᑦ, ᕆᐰᒻ ᓇᕐᓴᖓᑕ ᐅᓐᓄᐊᓪᓗᐊᖓᑕ ᐃᓱᐊᓄᑦ, ᐅᓪᓗᓪᓗᐊᑉ ᓇᓛᓄᑦ ᑲᔪᓯᓯᒪᕗᖅ ᕼᐃᓇᒻ ᓇᕐᓴᖓᒍᑦ, ᔨᐳᓮᑎᑦ ᐱᖑᖓᑕ ᐅᓪᓗᓪᓗᐊᖓᑕ ᓇᓛᒍᑦ, ᑕᐅᓄᖓ ᐊᒻᒧᐊᒃᓯᒪᓪᓗᓂ ᐃᓐ-ᕈᒋᐅᓪ ᓇᓛᓄᑦ.

¹⁷ ᑕᕝᕙᓐᖓᑦ ᓴᖑᓪᓗᓂ ᐅᓐᓄᐊᓪᓗᐊᒧᑦ ᐃᓐ-ᓯᒥᔅᒧᑦ, ᑕᕝᕙᓐᖓᑦ ᑲᔪᓯᒋᓪᓗᓂ ᒋᓕᓛᔅᒧᑦ, ᐊᑐᒻᒥᐅᑉ ᐊᑭᐊᓃᑦᑐᒧᑦ; ᓄᓇᐅᑉ ᑭᒡᓕᖓ ᑲᔪᓯᕗᖅ ᑕᐅᓄᖓ ᐊᒻᒧᐊᒃᓯᒪᓪᓗᓂ ᐴᕼᐊᓐ ᓄᓇᖁᑎᖓᑕ ᓇᓗᓁᒃᑯᑕᖓᓄᑦ ᐅᔭᕋᖕᒧᑦ; ᑖᓐᓇ ᐴᕼᐊᓐ ᐃᕐᓂᕆᔭᐅᕗᖅ ᕉᐱᓂᒧᑦ.

¹⁸ ᑕᕝᕙᓐᖓᑦ ᐅᓐᓄᐊᓪᓗᐊᒧᑦ ᐱᖑᕐᒧᑦ ᔪᐊᕐᑕᓂᐅᑉ ᓇᕐᓴᖓᓄᑦ ᑕᑯᒃᓴᐅᔪᒧᑦ ᑲᔪᓯᓯᒪᕗᖅ ᐱᑦ-ᐊᕋᐸᒧᑦ, ᑕᕝᕙᓐᖓᑦ ᑕᐅᓄᖓ ᐊᒻᒧᐊᒃᓯᒪᓪᓗᓂ ᓇᕐᓴᒧᑦ ᐊᕋᐸᒧᑦ.

¹⁹ ᑕᕝᕙᓐᖓᑦ ᐅᓐᓄᐊᓪᓗᐊᑉ ᓇᓛᓄᑦ ᑲᔪᓯᓯᒪᕗᖅ ᐱᑦ-ᕼᐅᒡᓚᐅᑉ ᐱᖑᖓᓄᑦ; ᐃᓱᖃᕐᓗᓂ ᑕᓯᐅᔭᕐᒧᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ ᑕᓯᕐᒧᑦ ᑕᕆᐅᕐᒧᑦ, ᔪᐊᕐᑕᓂᐅᑉ ᐅᓪᓗᓪᓗᐊᖓᑕ ᓇᓛᓃᑦᑐᖅ: ᑕᒪᓐᓇ ᐅᓪᓗᓪᓗᐊᑉ ᓇᓛᓃᑦᑐᒥ ᓄᓇᖓ ᑭᒡᓕᖃᕐᐳᖅ.

²⁰ ᔪᐊᕐᑕᓂᐅᑉ ᑰᖓᓄᑦ ᓯᕿᓂᐅᑉ ᓄᐃᕕᐊᓃᑦᑐᒧᑦ ᑭᒡᓕᖃᕐᐳᖅ. ᑖᒃᑯᐊ ᐱᓐᔭᒥᓂᐅᑉ ᑭᖑᕚᖏᑕ ᓄᓇᖁᑎᖓᑕ ᑭᒡᓕᒋᕔᑦ ᑭᖑᕐᖑᑎᔭᐅᔪᑦ, ᐃᓚᒌᑦ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ.

²¹ ᐃᒡᓗᒐᓮᑦ ᐃᓚᒌᑦ ᐊᕕᒃᑐᕐᓯᒪᓂᖏᑦ ᒪᓕᒡᓗᒋᑦ ᐱᓐᔭᒥᓂᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᑦ ᐅᑯᐊ, ᔨᕆᑯ, ᐱᑦ-ᕼᐅᒡᓚ, ᐃᒥᒃ-ᑭᔨᔨ,

²² ᐱᑦ-ᐊᕋᐸ, ᔨᒪᕅᒻ, ᐱᑎᓕ,

²³ ᐊᐅᐃᒻ, ᐸᕋ, ᐅᐸᕋ,

²⁴ ᓯᑉᕼᐊᕋᐊᒨᓂ, ᐆᑉᓂ, ᒋᐸᓗ: ᑖᒃᑯᐊ ᐃᒡᓗᒐᓮᑦ 12ᕗᑦ, ᓄᓇᓕᖕᓂᒃ ᖃᓂᒋᔭᖏᓐᓃᑦᑐᓂᒃ ᐃᓚᖃᕐᓗᑎᒃ.

²⁵ ᐅᑯᐊᓗ ᒋᐱᐅᓂ, ᕌᒪ, ᐱ-ᐊᕌᔅ,

²⁶ ᒥᔅᐱ, ᓯᐱᕋ, ᒨᔭ,

²⁷ ᕆᑭᒻ, ᐃᕐᐱᐅᓪ, ᑕᕋᓚ,

²⁸ ᔨᓚ, ᕼᐊᓕᑉ, ᔩᐳᓯ (ᐅᕝᕙᓗ ᔨᕉᓴᓕᒻ), ᒋᐱ-ᐊ, ᑭᕆᐊᑦ-ᔨᕆᒻᓗ: ᑖᒃᑯᐊ ᐃᒡᓗᒐᓮᑦ 14ᖑᕗᑦ ᓄᓇᓕᖕᓂᒃ ᖃᓂᒋᔭᖓᓃᑦᑐᓂᒃ ᐃᓚᖃᕐᓗᑎᒃ, ᑕᒪᓐᓇ ᓄᓇᑖᕆᔭᐅᕗᖅ ᑭᖑᕐᖑᑎᔭᐅᓪᓗᓂ ᐃᓚᒌᓄᑦ ᐱᓐᔭᒥᓂᐅᑉ ᑭᖑᕚᖏᓐᓄᑦ.