ᔮᓱᐊᑉ ᐊᒡᓚᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᒫᓇᓯᐅᑉ ᑭᖑᕚᖏᑕ ᐊᕝᕙᖏᑦ ᓯᕿᓂᐅᑉ ᓂᐱᕕᐊᓃᑦᑐᑦ

¹ ᓄᓇᐅᑉ ᐃᓚᖓ ᔪᐊᕐᑕᓂᐅᑉ ᑰᖓᑕ ᓯᕿᓂᖓᑕ ᓂᐱᕕᐊᓃᑦᑐᖅ ᓇᓚᐅᑦᑖᕈᑎᒃᑯᑦ ᑐᓂᔭᐅᕗᖅ ᐃᓚᒌᓄᑦ ᔫᓯᐱᐅᑉ ᐃᕐᓂᖓᓄᑦ ᐊᖓᔪᕐᓯᕐᒧᑦ ᒫᓇᓯᐅᑉ ᑭᖑᕚᖏᓐᓄᑦ. ᒪᑬᕆ ᒫᓇᓯᐅᑉ ᐊᖓᔪᕐᓯᕐᐹᖁᑎᖓ, ᒋᓕᐊᑎᐅᑉ ᐊᑖᑕᖓ, ᓄᓇᑖᕐᑎᑕᐅᓚᐅᕐᐳᖅ ᔪᐊᕐᑕᓂᐅᑉ ᑰᖓᑕ ᓯᕿᓂᖓᑕ ᓄᐃᕕᐊᓃᑦᑐᒥᒃ ᒋᓕᐊᑎᒥᒃ ᐹᓴᓂᒥᒡᓗ, ᑖᓐᓇ ᐅᓇᑕᕐᓂᕐᒥᒃ ᐱᓯᑎᐅᓚᐅᕐᒪᑦ.

² ᓄᓇᓖᑦ ᔪᐊᕐᑕᓂᐅᑉ ᑰᖓᑕ ᓯᕿᓂᖓᑕ ᓂᐱᕕᐊᓃᑦᑐᖅ ᑐᓂᔭᐅᕗᖅ ᒫᓇᓯᐅᑉ ᐃᓚᖏᓐᓄᑦ ᓄᓇᑖᓚᐅᖏᑦᑐᓄᑦ ᐅᑯᓄᖓ: ᐊᐰᔨᕆ, ᕼᐃᓕᒃ, ᐊᔅᕅᐊᓪ, ᓯᑭᒻ, ᕼᐃᕙᕐ, ᓯᒤᑕᓗ; ᑖᒃᑯᐊ ᐊᖑᑏᑦ ᒫᓇᓯᐅᑉ ᑭᖑᕚᕆᓚᐅᕐᐰᑦ ᔫᓯᐱᐅᑉ ᐃᕐᓂᖓᑕ, ᓯᕗᓕᕐᑎᒋᔭᐅᓪᓗᑎᒡᓗ ᐃᓚᒥᖕᓄᑦ.

³ ᔨᓘᕕᕼᐊᑦ ᕼᐃᕙᕐ ᐃᕐᓂᕆᕚ, ᑖᓐᓇ ᒋᓕᐊᑎᐅᑉ ᐃᕐᓂᖓ, ᑖᓐᓇ ᒪᑬᕆᐅᑉ ᐃᕐᓂᖓ, ᑖᓐᓇ ᒫᓇᓯᐅᑉ ᐃᕐᓂᖓ, ᐃᕐᓂᖃᓚᐅᓐᖏᓚᖅ, ᐸᓂᖃᓚᐅᕐᐳᕐᓕ ᐅᑯᓂᖓ ᒪᕼᐊᓚ, ᓄᐊ, ᕼᐅᒡᓚ, ᒥᐅᓪᑲ, ᑏᕐᔭᓗ.

⁴ ᑖᒃᑯᐊ ᐃᓕᓯᕆᒧᐊᕐᐳᑦ ᑐᓂᕐᕈᓯᕐᑎᑦᓯᔨᒧᑦ ᔮᓱᐊᒧᓪᓗ ᓈᓂᐅᑉ ᐃᕐᓂᖓᓄᑦ ᓯᕗᓕᕐᑎᓄᓪᓗ, ᐅᖃᕐᓗᑎᒡᓗ, “ᐊᑕᓂᐅᑉ ᒨᓯᓯ ᐱᖁᓚᐅᕐᐹ ᑐᓂᔭᐅᖁᓪᓗᑕ, ᓄᓇᒥᒃ ᐃᓚᕗᓪᓗ ᓄᓇᑖᕆᓂᐊᕐᑕᑦᑎᓐᓂᒃ.” ᑕᕝᕙ ᐊᑕᓂᐅᑉ ᑎᓕᓯᓂᕆᓚᐅᕐᑕᖓ ᒪᓕᒡᓗᒍ ᓄᓇᒥᒃ ᑐᓂᔭᐅᕗᑦ ᐊᖑᑎᓄᑦ ᐱᖃᓯᐅᑦᔭᐅᓪᓗᑎᒃ ᐊᑖᑕᖓᑦᑕ ᖃᑕᓐᖑᑎᖏᓐᓄᑦ.

⁵ ᑍᒤᒻᒪᑦ ᒫᓇᓯ ᑐᓂᔭᐅᒃᑲᓐᓂᓚᐅᕐᐳᖅ ᓄᓇᓕᖕᓂᒃ ᖁᓕᓂᒃ, ᒋᓕᐊᑎᐅᓪᓗ ᐹᓴᓂᐅᓪᓗ ᔪᐊᕐᑕᓂᐅᑉ ᑰᖓᑕ ᐊᑭᐊᓃᑦᑐᑦ ᐊᓯᖏᓐᓂᒃ.

⁶ ᑖᒃᑯᐊ ᐊᕐᓁᑦ ᑭᖑᕚᖏᑦ ᐊᖑᑎᓄᑦ ᑐᓂᔭᐅᔪᓂᒃ ᓄᓇᒥᒃ ᑭᖑᕐᖑᑦᔨᖃᑕᐅᓚᐅᕐᒪᑕ, ᒋᓕᐊᑎᐅᓪᓕ ᓄᓇᖓ ᑐᓂᔭᐅᕗᖅ ᒫᓇᓯᐅᑉ ᑭᖑᕚᖏᑕ ᐃᓚᖏᓐᓄᑦ.

⁷ ᒫᓇᓯᐅᑉ ᓄᓇᖁᑎᖓ ᑎᑭᐅᒪᕗᖅ ᐋᓱᕆᒥᑦ ᒥᒃ-ᒥᑖᔅᒧᑦ, ᓯᑭᒻᒥᐅᑉ ᓯᕿᓂᖓᑕ ᓄᐃᕕᐊᓃᑦᑐᒥᑦ ᓄᓇᐅᑉ ᑭᒡᓕᖓ ᑲᔪᓯᕗᖅ ᐅᓪᓗᓪᓗᐊᑉ ᓇᓛᓄᑦ ᐃᓐ-ᑕᐳᐊᑉ ᐃᓄᖏᑦ ᐃᓚᓕᐅᑎᓪᓗᒋᑦ.

⁸ ᐃᓐ-ᑕᐳᐊᑉ ᓄᓇᖓᑕ ᖃᓂᒋᔭᖓᓃᑦᑐᑦ ᒫᓇᓯᒧᑦ ᐱᒋᔭᐅᕗᖅ, ᑕᐳᐊᓪᓕ ᓄᓇᖁᑎᖓᑕ ᑭᒡᓕᖓᓃᑦᑐᖅ ᐱᒋᔭᐅᕗᖅ ᐃᕗᕅᑎᐅᑉ ᑭᖑᕚᖏᓐᓄᑦ.

⁹ ᓄᓇᖁᑎᖓ ᑭᒡᓕᖃᕐᐳᖅ ᑕᐅᓄᖓ ᑲᓇᐅᑉ ᑰᖓᓄᑦ, ᐃᒡᓗᒐᓮᑦ ᓯᕿᓂᐅᑉ ᓇᓛᓃᑦᑐᑦ ᐱᒋᔭᐅᕗᑦ ᐃᕗᕅᑎᒧᑦ, ᒫᓇᓯᐅᑉ ᓄᓇᖁᑎᖓᑕ ᐃᓗᐊᓃᒃᑲᓗᐊᕐᑎᓪᓗᒋᑦ, ᒫᓇᓯᐅᑉ ᓄᓇᖁᑎᖓ ᑭᒡᓕᖃᕐᐳᖅ ᑰᖕᒧᑦ ᐅᓐᓄᐊᓪᓗᐊᒧᑦ ᐃᓱᖃᕐᓗᓂ ᒥᑎᑎᕇᓂᐊᑉ ᑕᕆᐅᖓᓄᑦ.

¹⁰ ᐃᕗᕅᑎᐅᑉ ᓄᓇᑯᑎᖏᑦ ᓯᕿᓂᐅᑉ ᓇᓛᓃᑉᐳᑦ, ᒫᓇᓯᐅᓪᓗ ᓄᓇᖁᑎᖏᑦ ᐅᓐᓄᐊᓪᓗᐊᑉ ᓇᓛᓃᓪᓗᑎᒃ, ᒥᑎᑎᕇᓂᐊᑉ ᑕᕆᐅᖓᓄᑦ ᓄᓇᖁᑎᖓ ᐃᓱᖃᕐᓗᓂ; ᓄᓇᖁᑎᖓ ᐱᒋᐊᒃᑲᓐᓂᕐᓗᓂ ᐋᓱᕆᒥᑦ ᐅᓐᓄᐊᓪᓗᐊᑉ ᓯᕿᓂᐅᑉ ᓂᐱᕕᐊᑕᓗ ᐊᑯᓐᓂᖓᓃᑦᑐᒧᑦ ᐃᓴᑳᕆᒧᑦ.

¹¹ ᐃᓴᑳᕆᐅᓪᓗ ᐋᓱᕆᐅᓪᓗ ᓄᓇᖓᑕ ᐃᓗᐊᓂ, ᒫᓇᓯᐅᑉ ᐱᒋᕔᑦ ᐱᑦ-ᓰᓐ ᓄᓇᓕᖁᑎᖏᓪᓗ, ᐃᑉᓖᒻᓗ ᐃᓚᖃᕐᓗᓂ ᓄᓇᓕᖕᓂᒃ ᖃᓂᒋᔭᖓᓃᑦᑐᓂᒃ, ᐅᑯᐊᓗ ᑐᐊᕆ, ᐃᓐ-ᑐᐊᕆ, ᑖᓇᒃᓗ ᓄᓇᓖᓪᓗ ᖃᓂᒋᔮᓃᑦᑐᑦ, ᒥᒌᑐᓗ ᓄᓇᓖᓪᓗ ᖃᓂᒋᔭᖓᓃᑦᑐᑦ.

¹² ᒫᓇᓯᐅᓪᓕ ᑭᖑᕚᖏᑦ ᓄᓇᖃᕐᑐᓂᒃ ᐃᒡᓗᒐᓴᓕᖕᓂᒃ ᓯᖏᑦᓯᔪᓐᓇᓚᐅᓐᖏᓚᑦ; ᑍᒤᒻᒪᑦ ᑬᓇᓂᒥᐅᑦ ᓄᓇᕾᓐᓇᓚᐅᕐᐳᑦ ᓄᓇᒥᖕᓂ.

¹³ ᐃᓴᕆᐊᓕᒥᐅᑦ ᓲᖑᓯᕙᓪᓕᐊᒐᓗᐊᕐᑎᓪᓗᒋᑦ ᑬᓇᓂᒥᐅᓂᒃ ᓯᖏᑦᓯᔪᓐᓇᓚᐅᓐᖏᓚᑦ, ᑭᓯᐊᓂᓕ ᐃᖅᑲᓁᔭᕐᑎᒋᔭᐅᓚᐅᕐᐳᑦ ᐱᔪᒪᖏᒃᑲᓗᐊᕐᑎᓪᓗᒋᑦ, ᓄᓇᖏᓐᓂᑦ ᓯᖏᑕᐅᓪᓚᕆᒐᑎᒃ.

ᐃᕗᕅᑎᒃᑯᑦ ᒫᓇᓯᑯᓪᓗ ᑭᖑᕚᖏᑕ ᓯᕿᓂᐅᑉ ᓂᐱᕕᐊᓃᓐᓂᕐᓮᑦ ᓄᓇᑖᒃᑲᓐᓂᕈᒪᓂᖏᑦ

¹⁴ ᔫᓯᐱᐅᑉ ᑭᖑᕚᖏᑦ ᔮᓱᐊᒧᑦ ᐅᖃᓚᐅᕐᐳᑦ ᐅᖃᕐᓗᑎᒃ, “ᓱᖕᒪᑦ ᓇᓚᐅᑦᑖᕈᑎᒃᑯᑦ ᓄᓇᐅᑉ ᐃᓔᓐᓇᖓᓂᒃ ᑐᓂᓚᐅᕐᐱᑎᒎᑦ? ᐃᓚᖏᓐᓂᒡᓗ ᐱᖃᖃᑕᐅᑎᑐᐃᓐᓇᕐᓗᑕ ᓄᓇᒥᒃ, ᐊᑕᓂᕐᒧᑦ ᐱᑦᓯᐊᕐᕕᐅᓯᒪᓂᑦᑎᓐᓄᑦ ᐃᓄᒋᐊᒃᑐᐊᓘᑎᓪᓗᑕ.”

¹⁵ ᔮᓱᐊ ᑭᐅᕗᖅ, “ᐃᓄᒋᐊᒃᑐᐊᓗᒐᑦᓯ, ᓄᓇᑖᕋᓱᓕᕆᑦᓯ ᓇᐹᕐᑐᓕᖕᒥ ᓇᐹᕐᑐᐃᑦ ᐲᔭᕐᓗᒋᑦ ᐱᕆᔧᑎᒥᐅᓪᓗ ᕆᐰᒥᐅᓪᓗ—ᐃᓄᒃᐰᑦ—ᓄᓇᖁᑎᖓᓂᒃ ᐊᕐᓵᕐᓗᒋᑦ, ᐃᕗᕅᒻ ᖃᖅᑲᖏᑦ ᒥᑭᓗᐊᕐᐸᑕ ᐃᓕᑦᓯᓐᓄᑦ.”

¹⁶ ᔫᓯᐱᐅᑉ ᑭᖑᕚᖏᑦ ᑭᐅᕗᑦ, “ᖃᖅᑲᔮᑦ ᒥᑭᓗᐊᕐᐳᑦ ᐅᕙᑦᑎᓐᓄᑦ; ᑬᓇᓂᒥᐅᓪᓕ ᒪᓂᖅᑲᒦᑦᑐᑦ ᓴᕕᕋᔭᖕᓂᒃ ᐊᒃᓴᓗᐊᓕᖕᓂᒃ ᑲᓕᒐᖁᑎᖃᕐᐳᑦ, ᑕᒪᖏᒃ ᐱᑦ-ᓰᓐᒥᐅᑦ ᓄᓇᓖᓪᓗ ᖃᓂᒋᔭᖓᓃᑦᑐᑦ ᓄᓇᓖᓪᓗ ᔨᔭᕆᐅᓪ ᓇᕐᓴᖓᓃᑦᑐᓕᒫᑦ.”

¹⁷ ᑕᕝᕙ ᔮᓱᐊ ᐅᖃᕐᐳᖅ ᔫᓯᐱᐅᑉ ᑭᖑᕚᖏᓐᓄᑦ, ᐃᕗᕅᒻᑯᓐᓄᑦ ᒫᓇᓯᒃᑯᓐᓄᓪᓗ ᓯᕿᓂᐅᑉ ᓂᐱᕕᐊᓃᓐᓂᕐᓴᓄᑦ, “ᐃᓄᒋᐊᒃᑐᐊᓘᒐᑦᓯ, ᐊᔪᖏᑦᑐᐊᓘᓪᓗᓯᓗ; ᓇᓚᐅᑦᑖᕈᑎᒃᑯᑦ ᐱᑖᕐᑐᒃᓴᐅᕗᓯ ᐊᑕᐅᓯᐅᖏᑦᑐᒥᒃ ᓄᓇᐅᑉ ᐊᕕᒃᑐᕐᓯᒪᓂᖓᓂᒃ.

¹⁸ ᖃᖅᑲᔮᑦ ᐱᑖᕆᓂᐊᕐᐸᓯ, ᓇᐹᕐᑐᓕᐊᓘᒐᓗᐊᕐᑎᓪᓗᒍ, ᓇᐹᕐᑐᖏᑦ ᓇᑲᑎᕐᓗᒋᑦ ᐲᔭᕐᓂᐊᕐᐸᓯ, ᓄᓇᑖᕆᓗᒍᓗ ᐃᓱᐊᓂᑦ ᐃᓱᐊᓄᑦ; ᑬᓇᓂᒥᐅᑦ ᓯᖏᓐᓂᐊᕐᐸᓯ, ᓴᕕᕋᔭᖕᓂᒃ ᐊᒃᓴᓗᐊᓕᖕᓂᒃ ᑲᓕᒐᖃᕋᓗᐊᕐᑎᓪᓗᒋᑦ, ᐃᓄᖏᓪᓗ ᓲᖑᔫᒐᓗᐊᕐᑎᓪᓗᒋᑦ.”