ᔮᓱᐊᑉ ᐊᒡᓚᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦᓄᓁᑦ ᑐᓂᔭᐅᔪᑦ ᐃᕗᕅᑎᒧᑦ ᒫᓇᓯᐅᓪᓗ ᑭᖑᕚᖏᓐᓄᑦ ᓯᕿᓂᐅᑉ ᓂᐱᕕᐊᓃᑦᑐᓄᑦ 1 ᔫᓯᐱᐅᑉ ᑭᖑᕚᖏᓐᓄᑦ ᓇᓚᐅᑦᑖᕈᑎᒃᑯᑦ ᑐᓂᔭᐅᓚᐅᕐᑐᖅ ᐱᒋᐊᕐᓂᖃᕐᐳᖅ ᔪᐊᕐᑕᓂᐅᑉ ᑰᖓᑕ ᖃᓂᒋᔮᓂᑦ ᔨᕆᑯᒥᑦ, ᐃᒥᕐᑕᕐᕖᑦ ᔨᕆᑰᑉ ᓯᕿᓂᖓᑕ ᓄᐃᕕᐊᓃᑦᑐᒥᑦ ᐃᓄᖃᔪᐃᑦᑐᒧᑦ ᑎᑭᓪᓗᒍ, ᔨᕆᑯᒥᑦ ᑕᑉᐸᐅᖓ ᖃᖅᑲᔮᓄᑦ ᑎᑭᐅᒪᓪᓗᓂ ᐱᑎᓕᒧᑦ. 2 ᐱᑎᓕᒥᑦ ᐱᒋᐊᕐᓗᒍ ᑎᑭᐅᒪᕗᖅ ᓚᔾᒧᑦ, ᑲᔪᓯᓪᓗᓂᓗ ᐊᑕᕉᔅ ᖄᖏᕐᓗᒍ, ᐊᑬᑎᐅᑉ ᓄᓇᖓᑕ ᑭᒡᓕᖓᓄᑦ. 3 ᑕᕝᕙᓐᖓᓪᓗ ᑲᔪᓯᓪᓗᓂ ᓴᐅᒥᖕᒧᑦ ᔭᑉᓕᑍᑎᒥᐅᑦ ᓄᓇᖓᓄᑦ, ᑎᑭᐅᒪᓪᓗᓂ ᐱᑦ-ᕼᐅᕋᓐᒧᑦ, ᑍᑲᓐᖓᓪᓗ ᑲᔪᓯᕗᖅ ᒋᔨᕆᒧᑦ, ᒥᑎᑎᕇᓂᐊᑉ ᑕᕆᐅᖓᓄᑦ ᐃᓱᖃᕐᓗᓂ. 4 ᔫᓯᐱᐅᑉ ᑭᖑᕚᖏᑦ, ᐃᕗᕅᑎᐅᓪᓗ ᒫᓇᓯᐅᓪᓗ ᑭᖑᕚᖏᑦ, ᓄᓇᑖᕐᐳᑦ ᑖᒃᑯᓂᖓ ᑭᖑᕐᖑᑎᓕᕐᓗᒍ. ᐃᕗᕅᑎᒥᐅᑦ 5 ᐃᕗᕅᑎᒥᐅᑦ ᓄᓇᑖᓚᐅᕐᐳᑦ ᐅᑯᓂᖓ: ᓄᓇᖁᑎᖓ ᑭᒡᓕᖃᕐᐳᖅ ᐊᑕᕉᑎ-ᐊᑕᕆᒧᑦ ᓯᕿᓂᐅᑉ ᓄᐃᕕᐊᑕ ᓇᓛᓄᑦ ᖁᑦᑎᖕᓂᕐᓴᒧᑦ ᐱᑦ-ᕼᐅᕋᓐᒧᑦ. 6 ᑍᑲᓐᖓᓪᓗ ᒥᑎᑎᕇᓂᐊᑉ ᑕᕆᐅᖓᓄᑦ ᑎᑭᓪᓗᓂ; ᒥᒃ-ᒥᑖᔅᒧᑦ ᐅᓐᓄᐊᓪᓗᐊᒦᑦᑐᒧᑦ, ᑍᑲᓐᖓᓪᓗ ᓯᕿᓂᐅᑉ ᓄᐃᕕᐊᓄᑦ ᓄᓇᖁᑎᖓ ᑭᒡᓕᖃᕐᐳᖅ ᓴᖑᖓᓪᓗᓂ ᑖᓇᑦ-ᓮᓗᐊᑉ ᓇᓛᓄᑦ; ᖄᖏᕐᓗᒍᓗ ᑖᓐᓇ ᓯᕿᓂᐅᑉ ᓄᐃᕕᐊᓄᑦ ᑎᑭᐅᒪᕗᖅ ᔭ-ᓄᐊᒧᑦ. 7 ᔭ-ᓄᐊᒥᑦ ᑕᐅᓄᖓ ᐊᑕᕌᔅᒧᑦ ᓈᕋᒧᓪᓗ, ᓵᓐᖓᓪᓗᓂ ᔨᕆᑯᒧᑦ, ᐃᓱᖃᕐᓗᓂ ᔪᐊᕐᑕᓂᐅᑉ ᑰᖓᓄᑦ. 8 ᑕᐳᐊᒥᑦ ᐱᒋᐊᕐᓗᒍ ᓄᓇᐅᑉ ᑭᒡᓕᖓ ᓯᕿᓂᐅᑉ ᓂᐱᕕᐊᓄᑦ ᑲᓇᐅᑉ ᑰᖓᓄᑦ ᑎᑭᐅᒪᕗᖅ, ᐃᓱᖃᕐᓗᓂ ᒥᑎᑎᕇᓂᐊᑉ ᑕᕆᐅᖓᓄᑦ, ᑖᒃᑯᐊ ᑕᕝᕙ ᓄᓁᑦ ᐃᕗᕅᑎᐅᑉ ᑭᖑᕚᖏᓐᓄᑦ ᑐᓂᔭᐅᓚᐅᕐᑐᑦ ᑭᖑᕐᖑᑎᔭᐅᖁᓪᓗᒋᑦ. 9 ᐃᕗᕅᑎᐅᑉ ᑭᖑᕚᖏᑦ ᓄᓇᖁᑎᑖᒃᑲᓐᓂᓚᐅᕐᐳᑦ ᓄᓇᓕᖕᓂᒃ ᐊᓯᖏᓐᓂᒃ ᒫᓇᓯᐅᑉ ᓄᓇᖁᑎᖓᓃᓚᐅᕐᑐᓂᒃ, ᐃᒡᓗᒐᓮᓪᓗ ᓄᓇᓕᖁᑎᖏᓪᓗ ᐊᑕᖏᕐᓗᒋᑦ. 10 ᑬᓇᓂᒥᐅᓂᒡᓕ ᓯᖏᑦᓯᓚᐅᓐᖏᓚᑦ ᓄᓇᖃᕐᑐᓂᒃ ᒋᔨᕆᒥ; ᑍᒤᒻᒪᑦ ᑬᓇᓂᒥᐅᑦ ᓄᓇᖃᖃᑕᐅᕗᑦ ᐃᕗᕅᑎᒥᐅᓄᑦ ᓱᓕ ᐅᓪᓗᒥᒧᑦ, ᓯᐊᓛᖑᓕᓚᐅᕐᐳᓪᓕ ᐃᖅᑲᓁᔭᕐᑎᑕᐅᓪᓗᑎᒃ ᐊᑭᓕᕐᓱᕐᑕᐅᓇᑎᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society