ᔮᓱᐊᑉ ᐊᒡᓚᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᑦ ᒨᓯᓯᐅᑉ ᓵᓚᒋᓚᐅᕐᑕᖏᑦ

¹ ᐅᑯᐊ ᑕᕝᕙ ᑕᒫᓂ ᓄᓇᓕᖕᓂ ᐊᖓᔪᖅᑳᕐᔪᐊᕆᔭᐅᓚᐅᕐᑐᑦ, ᐃᓴᕆᐊᓕᒥᐅᓄᑦ ᓵᓚᐅᓚᐅᕐᑐᑦ, ᓄᓇᖓᓐᓂᒡᓗ ᓄᓇᖃᓕᕐᓗᑎᒃ ᔪᐊᕐᑕᓂᐅᑉ ᑰᖓᑕ ᓯᕿᓂᐅᑉ ᓄᐃᕕᖓᓃᑐᒥᒃ, ᐱᒋᐊᕐᓗᓂ ᐋᕐᓄᓂᐅᑉ ᓇᕐᓴᖓᓂᑦ ᑲᖏᒧᑦ ᖃᖅᑲᒧᑦ ᕼᐊᕐᒪᓐᒧᑦ ᑎᑭᓪᓗᒍ.

² ᐊᖓᔪᖅᑳᕐᔪᐊᖅ ᓮᕼᐆᓂᒥᒃ ᐊᒧᕅᑎᑦ ᐊᖓᔪᖅᑳᕐᔪᐊᖓᑦ ᐊᐅᓚᑦᓯᔪᖅ ᕼᐃᓴᐸᓂᒥᒃ, ᐊᖓᔪᖅᑲᐅᓂᖓ ᐊᐅᓚᑦᓯᕕᖃᓚᐅᕐᐳᖅ ᐊᕈᐃᕆᒥ, ᐋᕐᓄᓂᐅᑉ ᓇᕐᓴᖓᑕ ᑭᒡᓕᖓᓂᑦ ᐃᒡᓗᒐᓴᖕᓂᑦ ᓇᕐᓴᐅᑉ ᕿᑎᐊᓃᑦᑐᒥᑦ, ᔭᐴᑉ ᑰᖓ ᑎᑭᓪᓗᒍ, ᑕᒪᓐᓇ ᐊᒧᓁᑎᒃᑯᑦ ᓄᓇᖁᑎᒋᓚᐅᕐᒪᒍ, ᒋᓕᐊᑎᐅᑉ ᕿᑎᖅᑲᓕᒫᖓ,

³ ᐅᑯᐊᓗ ᔪᐊᕐᑕᓂᐅᑉ ᑰᖓ ᓯᓂᕆᑎᐅᑉ ᑕᓯᖓᓂᑦ ᐱᒋᐊᕐᓗᒍ ᓯᕿᓂᕐᒧᑦ ᐱᑦ-ᔨᓯᒫᔅ ᑎᑭᓪᓗᒍ, ᑕᓯᐅᑉ ᑕᕆᐅᑉ ᓯᕿᓂᖓᑕ ᓄᐃᕕᐊᓃᑦᑐᒧᑦ, ᖃᖅᑲᐅᑉ ᐱᔅᒐᐅᑉ ᐅᕕᖓᓂᖓᑕ ᑭᒡᓕᖓᓄᑦ ᑎᑭᓪᓗᒍ.

⁴ ᓵᓚᖃᓚᐅᕆᕗᑦ ᐊᖓᔪᖅᑳᕐᔪᐊᒥᒃ ᐋᒡᒥᒃ ᐹᓴᓂᒥᐅᑕᕐᒥᒃ, ᐃᓄᒃᐸᖕᓄᑦ ᕆᐰᒻᓄᑦ ᐊᒥᐊᒃᑯᒋᔭᐅᔪᒥᒃ; ᐊᐅᓚᑦᓯᔪᖅ ᐋᔅᑕᕉᑎᒥᑦ ᐃᑐᕆᐂᒥᒡᓗ.

⁵ ᐊᐅᓚᑦᓯᓚᐅᕆᕗᖅ ᐅᑯᓂᖓ ᖃᖅᑲᒥᒃ ᕼᐊᕐᒪᓐᒥᒃ ᓴᓕᑲᒥᒡᓗ ᐹᓴᓂᒥᐅᓕᒫᓪᓗ ᒋᓱᕅᒥᐅᓪᓗ ᒫᑲᑍᑎᒥᐅᓪᓗ ᓄᓇᖓᑕ ᑭᒡᓕᖓ ᑎᑭᓪᓗᒍ, ᒋᓕᐊᑎᐅᓪᓗ ᕿᑎᖅᑲᖓ ᐊᖓᔪᖅᑳᕐᔪᐊᓪᓗ ᓮᕼᐆᓂ ᕼᐃᓴᐸᓂᒥᐅᑕᐅᑉ ᓄᓇᖁᑎᖓ ᑭᒡᓕᖓ ᑎᑭᓪᓗᒍ.

⁶ ᑖᒃᑯᐊᒃ ᐊᖓᔪᖅᑳᕐᔪᐊᑦ ᒨᓯᓯᐅᑉ ᐃᓴᕆᐊᓕᒥᐅᓪᓗ ᓵᓚᒋᓚᐅᕐᐰᑦ; ᒨᓯᓯ ᐊᑕᓂᐅᑉ ᐱᔨᖓ ᓄᓇᑖᕐᑎᑦᓯᓚᐅᕐᐳᖅ ᑕᒪᑐᒥᖓ ᕉᐱᓂᐅᑉ ᑭᖑᕚᖏᓐᓂᒃ, ᒑᑎᐅᓪᓗ ᑭᖑᕚᖏᓐᓂᒃ ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᓐᓂᒃ, ᓄᓇᒥᒃ ᑕᒪᑐᒥᖓ ᓇᖕᒥᓂᖃᖁᓪᓗᒋᑦ.

ᐊᖓᔪᖅᑳᕐᔪᐊᑦ ᔮᓱᐊᑉ ᓵᓚᒋᓚᐅᕐᑕᖏᑦ

⁷ ᔮᓱᐊᑉ ᐃᓴᕆᐊᓕᒥᐅᓪᓗ ᐃᓄᖏᑕ ᐊᖓᔪᖅᑳᕐᔪᐊᓕᒫᑦ ᔪᐊᕐᑕᓂᐅᑉ ᓯᕿᓂᖓᑕ ᓂᐱᕕᐊᑕ ᓇᓛᓂ ᓄᓇᖃᕐᑐᑦ ᓵᓚᒋᓚᐅᕐᐰᑦ, ᐱᒋᐊᕐᓗᑎᒃ ᐰᓕ-ᒑᑦᒥᑦ ᓕᐸᓇᓂᐅᑉ ᓇᕐᓴᖓᓂᑦ ᖃᖅᑲᒧᑦ ᕼᐊᓚᒃᒧᑦ ᑎᑭᓪᓗᒍ, ᓰᐊᕆᐅᑉ ᖃᓂᒋᔮᓄᑦ, ᔮᓱᐊᑉ ᓄᓇ ᑕᒪᓐᓇ ᐊᕕᒃᑐᕐᑕᐅᑎᓚᐅᕐᐹ ᑭᖑᕚᕇᓄᑦ ᓇᖕᒥᓂᕐᑕᕆᔭᐅᖁᓪᓗᒍ.

⁸ ᖃᖅᑲᓃᑦᑐᓂᒃ ᐃᓚᖃᕐᓗᓂ, ᓯᕿᓂᐅᑉ ᓂᐱᕕᐊᓂᑦ ᖃᖅᑬᑦ ᓇᑎᕐᓇᖏᓐᓄᑦ, ᔪᐊᕐᑕᓂᐅᑉ ᓇᕐᓴᖓ ᓇᑎᕐᓇᖏᓪᓗ ᓯᕿᓂᐅᑉ ᓄᐃᕕᐊᓂᑦᑐᓄᑦ ᒪᔪᖅᑲᓄᑦ ᓯᕿᓂᕐᒦᑦᑐᒧᑦ ᓄᓇᒧᑦ ᓂᒋᑉᒧᑦ ᐸᓂᕐᑐᒧᑦ ᑎᑭᓪᓗᒍ, ᑕᒪᓐᓇ ᓄᓇᒋᔭᐅᓯᒪᔪᖅ ᕼᐃᑍᑎᒥᐅᓄᑦ, ᐊᒧᕅᑎᒥᐅᓄᑦ, ᑬᓇᓂᒥᐅᓄᑦ, ᐱᕆᔧᑎᒥᐅᓄᑦ, ᕼᐃᕔᑎᒥᐅᓄᑦ, ᔨᐳᓮᑎᒥᐅᓄᓪᓗ.

⁹ ᐃᓴᕆᐊᓕᒥᐅᑦ ᓵᓚᖃᓚᐅᕆᕗᑦ ᐊᖓᔪᖅᑳᕐᔪᐊᓂᒃ ᐃᒡᓗᒐᓴᖕᓂᒡᓗ, ᔨᕆᑯᒥᐅᓂᒃ, ᐂᒥᐅᓂᒃ, ᐱᑎᓕᐅᑉ ᖃᓂᒋᔭᖓᓃᑦᑐᓂᒃ;

¹⁰ ᔨᕉᓴᓕᒥᐅᑦ ᐊᖓᔪᖅᑳᕐᔪᐊᖓᑦ, ᕼᐃᐸᕋᓐᒥᐅᑦ ᐊᖓᔪᖅᑳᕐᔪᐊᖓᑦ;

¹¹ ᔭᕐᒨᑎᒥᐅᑦ ᐊᖓᔪᖅᑳᕐᔪᐊᖓᑦ, ᓚᑮᓯᒥᐅᑦ ᐊᖓᔪᖅᑳᕐᔪᐊᖓᑦ;

¹² ᐃᒡᓚᓐᒥᐅᑦ ᐊᖓᔪᖅᑳᕐᔪᐊᖓᑦ, ᒋᔨᕆᒥᐅᑦ ᐊᖓᔪᖅᑳᕐᔪᐊᖓᑦ;

¹³ ᑎᐱᕆᒥᐅᑦ ᐊᖓᔪᖅᑳᕐᔪᐊᖓᑦ, ᒊᑕᒥᐅᑦ ᐊᖓᔪᖅᑳᕐᔪᐊᖓᑦ;

¹⁴ ᕼᐅᕐᒪᒥᐅᑦ ᐊᖓᔪᖅᑳᕐᔪᐊᖓᑦ, ᐊᕌᑎᒥᐅᑦ ᐊᖓᔪᖅᑳᕐᔪᐊᖓᑦ;

¹⁵ ᓕᑉᓇᒥᐅᑦ ᐊᖓᔪᖅᑳᕐᔪᐊᖓᑦ, ᐊᑑᓚᒥᐅᑦ ᐊᖓᔪᖅᑳᕐᔪᐊᖓᑦ;

¹⁶ ᒪᑮᑕᒥᐅᑦ ᐊᖓᔪᖅᑳᕐᔪᐊᖓᑦ, ᐱᑎᓕᒥᐅᑦ ᐊᖓᔪᖅᑳᕐᔪᐊᖓᑦ;

¹⁷ ᑕᐳᐊᒥᐅᑦ ᐊᖓᔪᖅᑳᕐᔪᐊᖓᑦ, ᕼᐃᕙᕆᒥᐅᑦ ᐊᖓᔪᖅᑳᕐᔪᐊᖓᑦ;

¹⁸ ᐊᐱᒃᒥᐅᑦ ᐊᖓᔪᖅᑳᕐᔪᐊᖓᑦ, ᓚᓵᕋᓐᒥᐅᑦ ᐊᖓᔪᖅᑳᕐᔪᐊᖓᑦ;

¹⁹ ᒤᑕᓐᒥᐅᑦ ᐊᖓᔪᖅᑳᕐᔪᐊᖓᑦ, ᕼᐂᔭᒥᐅᑦ ᐊᖓᔪᖅᑳᕐᔪᐊᖓᑦ;

²⁰ ᓯᒻᕌᓐ-ᒥᕌᓐᒥᐅᑦ ᐊᖓᔪᖅᑳᕐᔪᐊᖓᑦ, ᐊᒃᓴᐸᒥᐅᑦ ᐊᖓᔪᖅᑳᕐᔪᐊᖓᑦ;

²¹ ᑖᓇᒃᒥᐅᑦ ᐊᖓᔪᖅᑳᕐᔪᐊᖓᑦ, ᒥᒌᑐᒥᐅᑦ ᐊᖓᔪᖅᑳᕐᔪᐊᖓᑦ;

²² ᑭᑎᓯᒥᐅᑦ ᐊᖓᔪᖅᑳᕐᔪᐊᖓᑦ, ᔫᒃ-ᓂᐊᒥᐅᑦ ᐊᖓᔪᖅᑳᕐᔪᐊᖓᑦ ᑳᕐᒥᐅᓪᒦᑦᑐᖅ;

²³ ᑐᐊᕆᒥᐅᑦ ᐊᖓᔪᖅᑳᕐᔪᐊᖓᑦ ᓇᐸᑕ-ᑐᐊᕆᒦᑦᑐᖅ, ᒍᐃᒻ ᐊᖓᔪᖅᑳᕐᔪᐊᖓᑦ ᒐᓕᓕᐊᒥᐅᖅ;

²⁴ ᑎᕆᔭᒥᐅᑦ ᐊᖓᔪᖅᑳᕐᔪᐊᖓᑦ, ᑖᒃᑯᐊ ᐊᖓᔪᖅᑳᕐᔪᐊᓕᒫᑦ ᐊᑕᖏᕐᓗᑎᒃ 31ᖑᕗᑦ.