ᔮᓱᐊᑉ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᔮᓱᐊᑉ ᓵᓚᖃᕐᓂᖓ ᔮᐱᓐᒥᐅᓂᒃ ᐃᑲᔪᕐᑎᖏᓐᓂᒡᓗ

¹ ᐃᓴᕆᐊᓕᒥᐅᑦ ᓵᓚᖃᕐᓂᖏᑦ ᑐᓴᐅᒪᔭᐅᓕᕐᐳᖅ ᐊᖓᔪᖅᑳᕐᔪᐊᒧᑦ ᔮᐱᓂᒧᑦ ᕼᐂᔭᒥᐅᑕᕐᒧᑦ, ᐅᖃᕆᐊᕐᑐᕐᑎᑦᓯᕗᕐᓗ ᐊᖓᔪᖅᑳᕐᔪᐊᕐᒧᑦ ᔫᐸᐱᒧᑦ ᒤᑕᓐᒥᐅᑕᒧᑦ, ᐊᖓᔪᖅᑳᕐᔪᐊᒧᓪᓗ ᓯᒻᕌᓐᒧᑦ ᐊᒃᓴᐸᒥᐅᑕᕐᒧᑦ,

² ᐊᖓᔪᖅᑳᕐᔪᐊᓄᓪᓗ ᑕᕐᕋᒦᑦᑐᓄᑦ ᖃᖅᑲᒥᐅᓄᑦ ᔪᐊᕐᑕᓂᐅᓪᓗ ᓇᑎᕐᓇᖓᓃᑦᑐᓄᑦ ᓯᓂᕆᑎᐅᑉ ᓯᕿᓂᖓᓄᑦ, ᓇᑎᕐᓇᒦᑦᑐᓄᓪᓗ ᓇᐴᑦ-ᑐᐊᕆᐅᑉ ᓯᓈᓃᑦᑐᓄᑦ.

³ ᐅᖃᕆᐊᕐᑐᕐᑎᑦᓯᓚᐅᕆᕗᖅ ᑬᓇᓂᒥᐅᓄᑦ ᔪᐊᕐᑕᓂᐅᓪᓗ ᑰᖓᑕ ᓯᓈᓃᑦᑐᓄᑦ, ᐊᒧᕅᒥᐅᓄᑦ, ᕼᐃᑍᑎᒥᐅᓄᑦ, ᐱᕆᔧᑎᒥᐅᓄᑦ, ᔨᐳᓮᑎᒥᐅᓄᑦ ᖃᖅᑲᓃᑦᑐᓄᑦ, ᕼᐃᕔᑎᑎᒥᐅᓄᓪᓗ ᓄᓇᓕᖕᓄᑦ ᓇᑎᕐᓇᒥ ᖃᖅᑲᐅᑉ ᕼᐊᕐᒪᓐ ᐊᑖᓃᑦᑐᓄᑦ ᒥᔅᐸᒥᐅᑦ ᓄᓇᖓᓃᑦᑐᓄᑦ.

⁴ ᐂᓕᕐᐳᓪᓗ ᐅᓇᑕᕐᑐᒃᓴᓕᔭᕐᓗᑎᒃ, ᐅᓇᑕᕐᑎᖏᑦ ᐊᖑᑏᑦ ᐅᓄᕐᑐᒻᒪᕆᐊᓘᓚᐅᕐᐳᑦ ᓯᐅᕋᕐᑎᑐᑦ ᓯᒡᔭᒦᑦᑐᑎᑐᑦ, ᐅᓄᕐᑐᐊᓗᖕᓂᒃ ᕿᒻᒥᕐᔪᐊᖃᕐᓗᑎᒃ ᑲᓕᒐᖃᕐᑐᓂᒡᓗ ᐊᒃᓴᓗᐊᓕᖕᓂᒃ.

⁵ ᑖᒃᑯᐊᓕᒫᓪᓗ ᐊᖓᔪᖅᑳᕐᔪᐊᑦ ᐃᓚᒌᓕᕐᐳᑦ ᑲᑎᓪᓗᑎᒃ, ᑕᖕᒫᓚᐅᕐᐳᓪᓗ ᒥᕉᒻ ᑰᒐᓛᖓᓂ, ᐅᓇᑕᕆᐊᕐᐸᓪᓕᐊᓪᓗᑎᒃ ᐃᓴᕆᐊᓕᒥᐅᓂᒃ.

⁶ ᐊᑕᓂᕐᓗ ᐅᖃᕐᐳᖅ ᔮᓱᐊᒧᑦ, “ᑲᑉᐱᐊᒋᑦᑍᓕᒃᑭᑦ, ᑍᒤᓪᓗᐊᓕᕐᐸᑦ ᖃᐅᒃᐸᑦ ᑐᖁᑦᓱᒫᕐᐸᒃᑲ ᐊᑕᖏᕐᓗᒋᑦ, ᐃᓴᕆᐊᓕᒥᐅᑦ ᐱᓪᓗᒋᑦ; ᕿᒻᒥᕐᔪᐊᖏᑦ ᓂᐅᕈᕐᑕᕐᓗᒋᑦ ᑐᓯᐊᓕᕐᑎᓛᕐᐸᑎᑦ, ᑲᓕᒐᖏᓪᓗ ᐊᒃᓴᓗᐊᓖᑦ ᐃᑯᐊᓪᓚᒡᓗᒋᑦ.”

⁷ ᑍᒤᒻᒪᑦ ᔮᓱᐊᑉ ᐅᓇᑕᕐᑐᒃᓴᖁᑎᓕᒫᓂᓗ ᐃᓚᒋᓪᓗᒋᑦ ᐅᓇᑕᕈᓐᓇᕐᑐᑦ, ᐅᐸᓗᐃᓪᓗᓂᒋᑦ ᐅᓇᑕᕐᐰᑦ ᒥᕉᒻ ᑰᒐᓛᖓᓂ.

⁸ ᐊᑕᓂᐅᓪᓗ ᐃᓴᕆᐊᓕᒥᐅᑦ ᓵᓚᖃᕐᑎᑉᐰᑦ, ᐃᓴᕆᐊᓕᒥᐅᓪᓗ ᑐᖁᕅᓚᐅᕐᐳᑦ ᒪᓕᒡᓗᑎᒃ ᒥᔅᕆᐸᑦ-ᒤᒻᒧᑦ ᓮᑐᓂᒧᓪᓗ, ᓯᕿᓂᐅᑉ ᓄᐃᕕᖓᓄᑦ ᒥᔅᐱᐅᑉ ᓇᕐᓴᖓ ᑎᑭᓪᓗᒍ; ᐅᓇᑍᓐᓇᓚᐅᕐᐰᓪᓗ, ᐊᑕᖏᕐᓗᒋᑦ ᑐᖁᔪᐃᓐᓇᐅᓚᐅᖃᕐᑎᓐᓇᒋᑦ.

⁹ ᔮᓱᐊᓪᓗ ᐱᓂᐊᕐᕕᒋᓚᐅᕐᐰᑦ ᐊᑕᓂᕐᒧᑦ ᑎᓕᔭᐅᓂᓂ ᒪᓕᒡᓗᒍ; ᕿᒻᒥᕐᔪᐊᖏᑕ ᓂᐅᖏᑦ ᐃᑭᓕᕐᓱᓚᐅᕐᐰᑦ ᑐᓯᐊᓕᕐᑎᓪᓗᒋᑦ, ᑲᓕᒐᖏᓪᓗ ᐊᒃᓴᓗᐊᓖᑦ ᐃᑯᐊᓪᓚᒃᓗᒋᑦ.

¹⁰ ᔮᓱᐊᓗ ᑍᑦᓱᒪᓂᐅᑎᓪᓗᒍ ᐅᑎᕐᐳᖅ, ᕼᐂᔭᓗ ᓵᓚᒋᓪᓗᒍ, ᐊᖓᔪᖅᑳᕐᔪᐊᖓᓪᓗ ᑐᖁᓪᓗᒍ; ᑍᑦᓱᒪᓂ ᕼᐂᔭ ᓂᐊᖁᕆᔭᐅᓚᐅᕐᐳᖅ ᑖᒃᑯᓄᖓ ᐊᖓᔪᖅᑳᕐᔪᐊᖃᕐᕕᐅᔪᓕᒫᓄᑦ.

¹¹ ᑕᕝᕙᓃᑦᑐᓕᒫᑦ ᐃᓄᖏᑦ ᑐᖁᑉᐰᑦ, ᐊᑕᖏᑦᓯᐊᕐᓗᑎᒃ ᑐᖁᑕᐅᓚᐅᕐᐳᑦ; ᐊᓂᕐᓂᖃᕐᑐᓕᒫᑦ ᓄᖑᑕᐅᓚᐅᕐᐳᑦ, ᐃᒡᓗᒐᓮᓪᓗ ᕼᐂᔭ ᐃᑯᐊᓪᓚᒃᑎᓚᐅᕐᐰᑦ.

¹² ᔮᓱᐊᓪᓗ ᓵᓚᒋᓚᐅᕐᐰᑦ ᐃᒡᓗᒐᓴᓕᒫᑦ ᐊᖓᔪᖅᑳᕐᔪᐊᓕᒫᖏᓪᓗ, ᐊᑕᖏᕐᓗᒋᓪᓗ ᑐᖁᓚᐅᕐᐰᑦ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑍᒫᒃ ᐱᖁᓚᐅᕐᓯᒪᖕᒪᒍ.

¹³ ᐃᓴᕆᐊᓕᒥᐅᓪᓕ ᐃᑯᐊᓪᓔᓚᐅᓐᖏᓚᑦ ᐃᒡᓗᒐᓴᕕᓃᑦ ᐃᓂᖏᓐᓂ ᐃᒡᓗᒐᓴᓕᐅᕐᓯᒪᔪᓂᒃ, ᕼᐂᔭ ᑖᓐᓇᑐᐊᖅ; ᔮᓱᐊᑉ ᐃᑯᐊᓪᓚᒃᑕᑐᐊᕆᓚᐅᕐᐹ.

¹⁴ ᐃᓴᕆᐊᓕᒥᐅᓪᓗ ᑎᒍᓯᓚᐅᕐᐳᑦ ᐃᒡᓗᒐᓴᖕᒥᐅᑦ ᐆᒪᔪᖁᑎᖏᓐᓂᒃ ᐱᖁᑎᖏᓐᓂᒡᓗ ᐱᑖᕆᓚᐅᕐᐰᑦ ᓵᓚᖃᐅᓯᐊᕆᓪᓗᒋᑦ; ᐃᓄᓕᒫᖏᓪᓕ ᑐᖁᓚᐅᕐᐰᑦ, ᐊᑕᖏᑦᓯᐊᕐᓗᒋᑦ ᐊᒥᐊᒃᑯᖃᕈᓐᓃᓚᐅᕐᐳᑦ.

¹⁵ ᐊᑕᓂᐅᑉ ᐱᔨᓂ ᒨᓯᓯ ᑎᓕᓚᐅᕐᒪᒍ, ᑍᒤᒻᒪᑦ ᒨᓯᓯᐅᑉ ᔮᓱᐊ ᑎᓕᓚᐅᕐᐹ, ᔮᓱᐊᓪᓗ ᓈᓚᒃᓗᒋᑦ ᐱᓇᓱᐊᓚᐅᕐᐳᖅ; ᐊᑕᓂᐅᑉ ᑎᓕᓯᑦᔪᑎᒋᓚᐅᕐᑕᓕᒫᖏᑦ ᒨᓯᓯᒧᑦ ᐱᓇᓱᐊᕐᑍᓐᓇᕆᓚᐅᕐᐰᑦ.

ᔮᓱᐊᑉ ᓄᓇᓕᖁᑎᑖᕆᓚᐅᕐᑕᖏᑦ

¹⁶ ᔮᓱᐊᑉ ᓄᓇᓕᒫᖅ ᐊᑕᖏᕐᓗᒍ ᓄᓇᑖᕆᕚ, ᖃᖅᑬᑦ ᓇᑎᕐᓁᓪᓗ ᑕᕐᕋᒥᐅᓄᑦ ᓯᕿᓂᕐᒥᐅᓄᑦ ᓂᒋᑉᒥ ᒎᓯᓂᐅᑉ ᖃᓂᒋᔭᓕᒫᖏᑦ ᓄᓇᓗ ᐸᓂᕐᑐᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᔪᐊᕐᑕᓂᐅᓪᓗ ᓇᕐᓴᖓ.

¹⁷ ᓄᓇᖁᑎᖓ ᑎᑭᐅᒪᕗᖅ ᖃᖅᑲᒥᑦ ᕼᐊᓚᒃᒥᑦ ᐱᒋᐊᕐᓗᒍ ᓰᐊᕆᐅᑉ ᒥᒃᓵᓄᑦ, ᐰᓕ-ᒑᑦᒧᑦ ᑎᑭᓪᓗᒍ, ᓕᐸᓇᓂᐅᑉ ᓇᕐᓴᖓᓄᑦ ᖃᖅᑲᒧᑦ ᕼᐊᕐᒪᓐ ᓯᕿᓂᖓᓄᑦ. ᐊᖓᔪᖅᑳᕐᔪᐊᓕᒫᖏᑦ ᓵᓚᒋᓚᐅᕐᐰᑦ, ᑐᖁᓪᓗᒋᓪᓗ.

¹⁸ ᔮᓱᐊᑉ ᐊᑯᓂᐊᓗᒃ ᐅᓇᑕᖃᑎᒋᓚᐅᕐᐰᑦ ᑖᒃᑯᐊ ᐊᖓᔪᖅᑳᕐᔪᐊᓕᒫᑦ.

¹⁹ ᐃᒡᓗᒐᓮᑦ ᐊᖏᖃᑎᖃᓚᐅᕐᑐᑦ ᐅᓇᑕᖃᑎᖃᕈᒪᓇᑎᒃ ᐃᓴᕆᐊᓕᒥᐅᓂᒃ ᐅᑯᐊᖑᕗᑦ ᒋᐱᐅᓂᒥᐅᑦ, ᑕᕝᕙᓂᓗ ᕼᐃᕔᑎᒥᐅᑦ ᐃᓚᖏᑦ ᓄᓇᖃᕐᑐᑦ, ᐊᓯᓕᒫᖏᓪᓕ ᓵᓚᒋᓚᐅᕐᐰᑦ ᐅᓇᑕᕐᓂᒃᑯᑦ.

²⁰ ᐊᑕᓂᐅᑉ ᐅᓇᑕᕈᒪᑎᓚᐅᕐᐰᑦ ᐃᓴᕆᐊᓕᒥᐅᓂᒃ, ᑐᖁᑕᐅᖁᓪᓗᒋᑦ ᐊᓯᕈᕐᑕᐅᖁᓪᓗᒋᓪᓗ ᓄᖑᑕᐅᓗᑎᒃ, ᑕᒪᓐᓇ ᐊᑕᓂᐅᑉ ᑎᓕᓯᑦᔪᑎᒋᓚᐅᕐᒪᒍ ᒨᓯᓯᒧᑦ.

²¹ ᑍᑦᓱᒪᓂᐅᑎᓪᓗᒍ ᔮᓱᐊ ᐂᕗᖅ ᐊᓯᕈᐃᓪᓗᓂᓗ ᐃᓄᒃᐸᖕᓂᒃ ᑍᔭᐅᔪᓂᒃ ᐊᓇᑭᒥᐅᓂᒃ ᓄᓇᖃᕐᑐᓂᒃ ᖃᖅᑲᓂ, ᕼᐃᐸᕋᓐᒥ, ᑎᐱᕆᒥ, ᐊᓈᑉᒥ, ᔫᑕᐅᓪᓗ ᖃᖅᑲᓕᒫᖏᓐᓂ ᓄᓇᖃᕐᑐᓂᒃ, ᐃᓴᕆᐊᓕᐅᓪᓗ ᖃᖅᑲᓕᒫᖏᓐᓂ ᓄᓇᖃᕐᑐᓂᒃ; ᔮᓱᐊᑉ ᐊᓯᕈᕐᑍᓐᓇᕆᓚᐅᕐᐰᑦ ᐃᒡᓗᒐᓴᓕᒫᖏᓪᓗ.

²² ᐊᓇᑭᒥᐅᓂᑦ ᓇᓪᓕᐊᓐᓂᒡᓘᓐᓃᑦ ᐊᓐᓇᒃᑐᖃᓚᐅᓐᖏᓚᖅ ᐃᓴᕆᐊᓕᒥᐅᑦ ᓄᓇᖓᓂ; ᐅᓄᖏᑦᑐᑦ ᐊᒥᐊᒃᑯᒋᔭᑑᓚᐅᕐᐳᑦ ᓄᓇᓕᖕᓂ ᐅᑯᓇᓂ ᒑᓴᒥ, ᒑᑎᒥ, ᐋᔅᑖᑦᒥᓗ.

²³ ᑕᕝᕙ ᔮᓱᐊᑉ ᓄᓇᓕᒫᖅ ᓄᓇᑖᕆᓚᐅᕐᐹ, ᑍᒫᒃ ᐊᑕᓂᐅᑉ ᒨᓯᓯ ᐅᖃᐅᑎᓚᐅᕐᒪᒍ; ᔮᓱᐊᓪᓗ ᐃᓴᕆᐊᓕᒥᐅᓄᑦ ᓇᖕᒥᓂᕐᑖᕆᔭᐅᑎᓚᐅᕐᐹ, ᐊᕕᒃᑐᕐᑕᐅᑎᓪᓗᒍᓗ ᑭᖑᕙᕇᓄᑦ. ᑭᖑᓂᖓᒍᓪᓗ ᐅᓇᑕᕈᓐᓃᑍᓐᓇᓚᐅᕐᐳᑦ.