ᔮᓱᐊᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᔮᓱᐊᒥᒃ ᑎᓕᓯᓂᖓ ᓵᓚᖃᖁᓪᓗᒍ ᑬᓇᒥᐅᓂᒃ

¹ ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑐᖁᓂᖓᑕ ᑭᖑᓂᐊᒍᑦ, ᐊᑕᓂᖅ ᐅᖃᕐᐳᖅ ᒨᓯᓯᐅᑉ ᐃᑲᔪᕐᑎᖓᓄᑦ, ᔮᓱᐊᒧᑦ ᓈᓂᐅᑉ ᐃᕐᓂᖓᓄᑦ.

² ᐅᖃᕐᓗᓂ, “ᐱᔨᒐ ᒨᓯᓯ ᑐᖁᖕᒪᑦ ᐊᑐᐃᓐᓇᐅᓕᕆᑦ, ᐃᓴᕆᐊᓕᒥᐅᓄᑦ ᔪᐊᕐᑕᓂᐅᑉ ᑰᖓ ᐃᑳᕐᓗᒍ ᓄᓇᒧᑦ ᑐᓂᓯᒪᔭᓐᓄᑦ ᑖᒃᑯᓄᖓ ᐃᓴᕆᐊᓕᒥᐅᓄᑦ.

³ ᒨᓯᓯ ᐊᖏᕐᕕᒋᓚᐅᕋᒃᑯ ᐃᒫᒃ, ᑐᓂᔪᒫᕐᐸᒃᑲ ᐃᓄᖁᑎᒃᑲ ᓄᓇᒥᒃ ᐱᓱᒃᕕᒋᔭᖏᓐᓂᒃ.

⁴ ᓄᓇᖁᑎᓯ ᑭᒡᓕᖓ ᐃᓱᖃᕈᒫᕐᐳᖅ ᓕᐸᓇᓂᒥᑦ ᐃᓄᖃᔪᐃᑦᑐᒧᑦ ᑰᖕᒧᑦ ᑎᑭᓪᓗᒍ ᑍᔭᐅᔪᒧᑦ ᐃᕗᕅᑎᒧᑦ, ᕼᐃᑍᑎᐅᓪᓗ ᓄᓇᓕᒫᖓᓂᑦ ᐃᒪᕐᔪᐊᒧᑦ ᑎᑭᓪᓗᒍ.

⁵ ᔮᓱᐊ ᑭᓇᒧᓪᓘᓐᓃᑦ ᓵᓚᐅᓂᐊᓐᖏᓚᑎᑦ ᐃᓅᑎᓪᓗᑎᑦ ᓇᔪᐃᓐᓇᕐᓂᐊᕐᐸᒋᑦ ᑍᒫᑦᓮᓐᓇᖅ ᒨᓯᓯ ᓇᔪᓚᐅᕋᒃᑯ ᓇᔪᐃᓐᓇᕐᓂᐊᕐᐸᒋᑦ ᕿᒪᖕᓂᐊᕐᓇᒡᓗ.

⁶ ᓲᖑᓂᖃᓕᕆᑦ ᖁᓚᖏᓪᓗᑎᓪᓗ; ᓯᕗᓕᕐᑎᐅᓛᕋᕕᑦ ᐃᓄᖕᓄᑦ ᓄᓇᑖᓕᕐᑎᓪᓗᒋᑦ ᑕᒪᓐᓇ ᑍᒫᒃ ᓯᕗᓕᖏᓐᓄᑦ ᐊᖏᕈᑎᒋᓚᐅᕋᒃᑯ.

⁷ ᓲᖑᓂᖃᓕᕆᑦ ᓯᕘᕋᖏᑦᓯᐊᕐᓗᑎᓪᓗ, ᓈᓚᑦᓯᐊᓪᓗᑎᑦ ᐱᖁᔭᓐᓂᒃ ᒨᓯᓯᐅᑉ ᐱᔨᒪ ᑐᓂᓚᐅᕐᑕᖏᓐᓂᒃ ᐃᓕᖕᓄᑦ, ᑕᓕᕐᐱᒧᓪᓘᓐᓃᑦ, ᓴᐅᒥᒧᓪᓘᓐᓃᑦ ᓴᖑᑦᑍᓕᒋᑦ ᐱᔪᓐᓇᑦᓯᐊᖁᓪᓗᑎᑦ ᓇᒧᓐᖓᕐᓂᐊᕋᓗᐊᕈᕕᑦ.

⁸ ᐅᑯᐊ ᐱᖁᔭᑦ ᖃᓂᒃᑯᑦ ᐅᖃᐅᓯᕆᔪᓐᓃᕐᑍᓕᒃᑭᑦ, ᐃᓱᒪᒃᓴᕐᓯᐅᕈᑎᒋᖃᑦᑕᒃᑭᑦ ᐅᓪᓗᑯᑦ ᐅᓐᓄᒃᑯᓪᓗ, ᓈᓚᑦᓯᐊᕐᓗᒋᓪᓗ ᑎᑎᕋᕐᓯᒪᓂᖏᑦ ᒪᓕᒡᓗᒋᑦ, ᑍᒤᒃᑯᕕᑦ ᐊᖅᑯᑎᒋᔭᕐᓂ ᖃᓄᐃᓕᐅᕐᑕᓕᒫᕐᓂᓗ ᐱᕙᓪᓕᐊᑎᑦᓯᖃᑦᑕᕐᓂᐊᕐᐳᑎᑦ.

⁹ ᐃᖅᑲᐅᒪᓂᐊᕐᐳᑎᑦ ᑎᓕᓚᐅᕋᒃᑭᑦ, ᓴᓐᖏᔫᓕᕆᑦ ᓴᐱᖏᓪᓗᑎᓪᓗ; ᑲᑉᐱᐊᓱᒃᑍᓕᒋᑦ, ᖁᓚᖏᓪᓗᑎᓪᓗ; ᐊᑕᓂᐅᑉ ᒎᑎᕕᑦ ᐃᓚᒋᓂᐊᕐᐹᑎᑦ ᓇᒧᓐᖓᕐᓂᐊᕈᕕᓪᓘᓐᓃᑦ.”

ᔮᓱᐊᑉ ᑎᓕᓯᓂᖓ ᐃᓄᖕᓂᒃ

¹⁰ ᑕᕝᕙ ᔮᓱᐊᑉ ᓯᕗᓕᕐᑏᑦ ᑎᓕᕔᑦ ᐅᖃᐅᑎᓪᓗᒋᑦ,

¹¹ “ᐃᓄᐃᑦ ᑕᖕᒫᕐᓯᒪᔪᑦ ᐅᖃᐅᑎᓯᐅᒃ, ‘ᓂᕿᓂᒃ ᐊᑐᐃᓐᓇᕈᐃᒋᑦᓯ, ᐅᓪᓗᐃᑦ ᐱᖓᓱᑦ ᓈᒃᐸᑕ ᐃᑳᕐᓂᐊᕋᑦᓯ ᔪᐊᕐᑕᓂᐅᑉ ᑰᖓᒍᑦ ᓄᓇᓗ ᓄᓇᑖᕆᓗᒍ, ᐊᑕᓂᐅᑉ ᒎᑎᕕᑦ ᑐᓂᓯᒪᔭᖓ ᐃᓕᑦᓯᓐᓄᑦ.’”

¹² ᔮᓱᐊᑉ ᐅᖃᐅᑎᓚᐅᕐᐰᑦ ᐅᑯᐊ ᕉᐱᓂᐅᑉ ᒑᑎᐅᑉ ᑭᖑᕚᒋᑦ, ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᑦ,

¹³ “ᐃᖅᑲᐅᒪᒋᑦᓯ ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᐅᖃᐅᓯᖏᓐᓂᒃ ᑎᓕᓯᓚᐅᕐᒪᑦ ᐃᓕᑦᓯᓐᓂᒃ, ᐅᖃᕐᓗᓂ, ‘ᐊᑕᓂᐅᑉ ᒎᑎᕕᑦ ᑐᓂᕚᑎᑦ ᑕᕾᕐᓯᕐᕕᖕᒥᒃ, ᑕᒪᓐᓇᓗ ᓄᓇ ᑐᓂᕚ ᐃᓕᑦᓯᓐᓄᑦ.’

¹⁴ ᓄᓕᐊᓯ, ᕿᑐᕐᖓᓯ, ᐆᒪᔪᖁᑎᓯᓗ ᑕᒫᓃᓐᓂᐊᕐᐳᑦ ᒨᓯᓯᐅᑉ ᑐᓂᓚᐅᕐᑕᖓᓂ ᔪᐊᕐᑕᓂᐅᑉ ᐊᑭᐊᓂ, ᐅᓇᑕᕐᑐᒃᓴᖁᑎᓯᓕ ᐅᓇᑕᐅᑎᒥᓂᒃ ᐊᑎᓂᐊᕐᐳᑦ, ᐃᑳᕐᓗᑎᒡᓗ ᓯᕗᓪᓕᐅᓗᑎᒃ ᐃᓴᕆᐊᓕᒥᐅᖑᖃᑎᒥᖕᓂᒃ ᐃᑲᔪᕆᐊᕐᓗᑎᒃ.

¹⁵ ᓄᓇᖃᓕᕐᐸᑕ ᑭᓯᐊᓂ ᔪᐊᕐᑕᓂᐅᑉ ᓯᕿᓂᖓᑕ ᓄᐃᕕᐊᑕ ᓇᓛᓂ ᒎᑎᐅᑉ ᑐᓂᓚᐅᕐᑕᖓᓂᒃ ᑖᒃᑯᓄᖓ ᐃᓕᑦᓯᓐᓄᓪᓗ; ᓄᓇᑖᕈᒫᕆᕗᓯ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᑖᒃᑯᓄᖓ, ᑕᕝᕙ ᐅᑎᕈᒫᕐᐳᓯ ᓄᓇᖁᑎᑦᓯᓐᓄᑦ ᓄᓇᑖᕆᓗᒍᓗ ᓄᓇ ᑕᒪᓐᓇ ᒨᓯᓯᐅᑉ ᐊᑕᓂᐅᑉ ᐱᔨᖓᑕ ᑐᓂᓚᐅᕐᑕᖓ ᔪᐊᕐᑕᓂᒥᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᑦ.”

¹⁶ ᑖᒃᑯᐊ ᑭᐅᕗᑦ ᔮᓱᐊᒧᑦ, “ᑎᓕᓯᑦᔪᑎᓕᒫᕐᓂᒃ ᐊᑐᕐᓂᐊᕐᐳᒍᑦ ᓇᒧᑐᐃᓐᓇᕐᓗ ᑎᓕᓯᓂᐊᕈᕕᑦ ᐂᓂᐊᕐᐳᒍᑦ.

¹⁷ ᑍᒫᑦᓮᓐᓇᖅ ᒨᓯᓯ ᓈᓚᓚᐅᕋᑦᑎᒍᑦ ᓱᓇᓕᒫᓄᑦ, ᑍᒫᒃᑕᐅᖅ ᐃᓕᖕᓂᒃ ᓈᓚᖕᓂᐊᕆᕗᒍᑦ ᐊᑕᓂᐅᑉ ᒎᑎᕕᑦ ᐃᓚᒋᓕᑎᑦ, ᑍᒫᑦᓮᓐᓇᖅ ᒨᓯᓯ ᐃᓚᒋᓚᐅᕐᒪᒍ.

¹⁸ ᓇᓪᓕᐊᑦ ᐃᓕᖕᓂᒃ ᐊᑭᕋᕐᑐᕐᑐᑦ ᓈᓚᖏᑦᑐᓪᓘᓐᓃᑦ ᐅᖃᐅᓯᕐᓂᒃ ᑎᓕᓯᑎᓪᓗᑎᑦ, ᑖᓐᓇ ᑐᖁᑕᒃᓴᐅᕗᖅ. ᓲᖑᓂᖃᕐᓯᐊᕆᑦ ᓴᐱᖏᓪᓗᑎᓪᓗ.”