ᔫᓇᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓇᐅᑉ ᓂᓐᖓᐅᒪᓂᖓ ᒎᑎᐅᑉ ᓂᑲᒍᓱᓕᕐᓂᖓᓂᒃ

¹ ᔫᓇᐅᓪᓗ ᑕᒪᓐᓇ ᖁᕕᐊᓱᖏᑦᔪᑎᒋᒻᒪᕆᓕᕐᐹ ᓂᓐᖓᒻᒪᕆᒃᓗᓂᓗ.

² ᑐᒃᓯᐊᓕᕐᐳᕐᓗ ᐊᑕᓂᕐᒧᑦ ᐅᖃᕐᓗᓂ: “ᐊᑕᓃᖅ, ᐅᖃᐅᓯᕆᓚᐅᕐᑕᕋ ᓇᓚᐅᑦᓯᓐᖏᓛᖅ ᓄᓇᑦᑎᓐᓃᓪᓗᖓ ᓱᓕ ᑍᒤᓕᐅᕋᔭᕐᓂᕐᓂᒃ? ᑕᒪᓐᓇ ᐱᓪᓗᒍ ᑐᐊᕕᕐᓗᖓ ᕿᒫᓚᐅᕐᐳᖓ ᑖᕐᓯᓯᒧᑦ, ᖃᐅᔨᒪᒐᒪ ᐃᕝᕕᑦ ᒎᑎᐅᒐᕕᑦ ᐱᑦᓯᐊᕐᓂᖃᕐᑐᖅ ᓈᒃᑭᒍᓱᒃᑐᕐᓗ, ᓂᓐᖓᒃᓴᕅᖏᑦᑐᖅ ᓇᒡᓕᒍᓱᒃᑐᕐᔫᔪᕐᓗ, ᐃᓱᒤᓪᓗ ᓱᒋᐊᕐᓂᕐᒥᑦ ᓴᖑᑎᓲᕆᒐᕕᐅᒃ ᖃᕿᐊᓕᕐᑐᖃᑐᐊᕐᒪᑦ ᐊᑲᐅᖏᓐᓂᕐᒥᑦ.

³ ᒫᓐᓇᓕ ᐊᑕᓃᖅ, ᐃᓅᓯᕋ ᑎᒍᓕᕈᒃ, ᑐᖁᑐᐃᓐᓇᕈᒪ ᐱᐅᓂᕐᓴᐅᓕᕐᐳᖅ ᐃᓅᒐᔭᕐᓂᓐᓂᑦ.”

⁴ ᐊᑕᓂᐅᓪᓗ ᑭᐅᕚ, “ᓂᓐᖓᒡᓗᑎᑦ ᓈᒻᒪᓈᕋᓗᐊᕐᐲᑦ?”

⁵ ᔫᓇᓗ ᑕᕝᕙ ᐃᒡᓗᒐᓮᑦ ᕿᒪᒡᓗᒋᑦ ᐃᒃᓯᕙᕗᖅ ᓯᕿᓂᐅᑉ ᓄᐃᕕᖓᑕ ᓇᓛᓂ. ᐅᖂᑕᓕᐅᕐᓗᓂᓗ ᑕᕝᕙᓂ ᐃᒃᓯᕙᕗᖅ ᑖᑦᓱᒪ ᑕᕐᕋᓕᓂᖓᓂ, ᑕᑯᔪᒪᓪᓗᓂ ᖃᓄᖅ ᐃᒡᓗᒐᓴᒡᔪᐊᑦ ᓂᓂᕕᒥᐅᑦ ᐱᓂᐊᕐᕕᐅᓛᕐᒪᖔᑕ.

⁶ ᐊᑕᓂᐅᓪᓗ ᒎᑎᐅᑉ ᐱᕈᕐᑐᖅ ᐱᕈᕐᓴᕅᑦᑐᖅ ᐊᑐᐃᓐᓇᕈᕐᐹ ᓄᐃᑎᓪᓗᒍᓗ ᔫᓇᐅᑉ ᖁᓛᒎᖁᓪᓗᒍ ᑕᕐᕋᓕᓂᖃᕐᑎᑦᓯᖁᓪᓗᒍᓗ ᓂᐊᖁᐊᓄᑦ, ᐱᐅᓕᒃᓯᖁᓪᓗᒍᓗ ᑖᑦᓱᒥᖓ ᖃᓄᐃᓐᓂᖓᓂᑦ; ᔫᓇᐅᓪᓗ ᑖᓐᓇ ᖁᕕᐊᒋᑦᓯᐊᕐᐹ ᐱᕈᕐᑐᖅ.

⁷ ᖃᐅᖕᒪᓪᓕ ᖃᐅᒻᒪᓕᓵᕐᑎᓪᓗᒍ ᒎᑎᐅᑉ ᐊᑐᐃᓐᓇᕈᕐᐹ ᖁᒡᓗᒋᐊᖅ ᐊᓯᕈᐃᖁᓪᓗᒍ ᐱᕈᕐᑐᒥᒃ; ᑖᑦᓱᒪᓗ ᑖᓐᓇ ᐱᕈᕐᑐᖅ ᑲᐱᕚ ᑐᖁᓕᑎᓪᓗᒍᓗ.

⁸ ᓯᕿᓂᐅᓪᓗ ᓄᐃᓂᖓᓂᑦ ᒎᑎᐅᑉ ᐊᑐᐃᓐᓇᕈᕐᐹ ᐊᓄᕆ ᐆᓇᕐᑐᖅ ᓯᕿᓂᐅᑉ ᓄᐃᕕᖓᑕ ᓇᓛᓂᑦ, ᓯᕿᓂᕐᓗ ᔫᓇᐅᑉ ᓂᐊᖁᐊᓄᑦ ᐊᑭᖕᒥᒃᐳᖅ, ᔫᓇᓗ ᓄᑭᖃᕈᓐᓁᑲᓴᓕᕐᐳᖅ ᑕᒪᑐᒧᖓ ᐊᑭᖕᒥᒃᑐᒧᑦ. ᕿᓚᓈᕐᐳᕐᓗ ᑐᖁᔪᒪᓪᓗᓂ, ᑐᒃᓯᐊᕐᐳᕐᓗ, ᐅᖃᕐᓗᓂ: “ᑐᖁᑐᐃᓐᓇᕈᒪ ᐱᐅᓂᕐᓴᐅᓕᕐᐳᖅ ᐃᓅᒐᔭᕐᓂᓐᓂᑦ.”

⁹ ᒎᑎᐅᓪᓕ ᔫᓇ ᐅᖃᐅᑎᕚ, “ᓂᓐᖓᒡᓗᑎᑦ ᓈᒻᒪᓈᕋᓗᐊᕐᐲᑦ? ᑖᑦᓱᒧᖓ ᐱᕈᕐᑐᒧᑦ?” ᔫᓇᓗ ᐅᖃᕐᐳᖅ: “ᓂᓐᖓᖕᓂᕋ ᓈᒻᒪᓈᕐᐳᖅ, ᓂᓐᖓᖕᓂᕐᒧᑦ ᐊᒡᓛᑦ ᑐᖁᒐᓗᐊᕈᒪ ᖃᓄᐃᒃᓴᓐᖏᓚᖓ!”

¹⁰ ᐊᑕᓂᐅᓪᓗ ᑭᐅᓪᓗᓂᐅᒃ ᐅᖃᐅᑎᕚ, “ᐅᓇ ᐱᕈᕐᑐᖅ ᐅᓐᓄᐊᖏᓐᓇᖅ ᐱᕈᕐᐳᖅ ᖃᐅᑐᐊᕐᒪᓪᓗ ᓄᖑᓪᓗᓂ; ᐃᕝᕕᓪᓕ ᖃᓄᐃᓕᐅᓚᐅᓐᖏᓚᑎᓪᓘᓐᓃᑦ ᑖᑦᓱᒧᖓ, ᐱᕈᑦᑎᑦᓯᓚᐅᓐᖏᓚᑎᓪᓘᓐᓃᑦ, ᑭᓯᐊᓂᓕ ᐅᒡᒍᐊᕆᕙᑦ!

¹¹ ᐊᖏᓂᕐᓴᒥᒡᓕ ᖃᓄᖅ ᑕᕝᕙ, ᓂᑲᒍᓱᒃᑲᓐᓂᕈᓐᓇᕐᐳᖔ ᓂᓂᕕᒥᐅᓂᒃ? ᐃᒡᓗᒐᓴᒡᔪᐊᖑᖕᒪᑕ ᐊᖏᔪᐊᓘᓪᓗᑎᒃ. ᑖᒃᑯᓇᓂᓗ ᐸᓯᔭᒃᓴᐅᖏᑦᑐᓂᒃ ᓱᕈᓯᕐᑕᖃᕐᐳᖅ 120,000ᓂᒃ, ᖃᐅᔨᒪᖏᑦᑐᓂᒃ ᑕᓕᕐᐱᖕᒥᖕᓂᒃ ᓴᐅᒥᖕᒥᖕᓂᒡᓗ, ᐆᒪᔪᕐᑕᖃᕐᓗᓂᓗ ᐅᓄᕐᑐᕐᔪᐊᓂᒃ!”