ᔫᓇᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓇᐅᑉ ᓈᓚᖏᓐᓂᖓ ᐊᑕᓂᕐᒥᒃ

¹ ᐅᓪᓗᐃᑦ ᐃᓚᖓᓐᓂ ᐊᑕᓂᖅ ᔫᓇᒧᑦ ᐅᖃᕐᐳᖅ, ᐊᒥᑍᑉ ᐃᕐᓂᖓᓄᑦ ᐅᖃᕐᓗᓂ:

² “ᓂᓂᕕᒧᐊᓕᕆᑦ, ᐃᒡᓗᒐᓴᒡᔪᐊᓄᑦ ᐊᖏᔪᐊᓗᖕᓄᑦ; ᓂᐱᖅᑯᕐᑐᓗᑎᓪᓗ ᐅᖃᕐᕕᒋᒃᑭᑦ ᐱᐅᖏᑦᑐᓕᓂᖏᑦ ᒪᔪᐊᕐᒪᑕ ᓵᓐᓄᑦ.”

³ ᓂᑯᕕᑉᐳᕐᓗ ᔫᓇ ᑖᕐᓯᓯᒧᑦ ᕿᒫᔪᒪᓪᓗᓂ ᐊᑕᓂᕐᒥᑦ; ᐊᑎᕐᓗᓂᓗ ᔮᐸᒧᑦ ᐅᒥᐊᕐᔪᐊᕐᓯᐅᕐᐳᖅ ᑖᕐᓯᓯᓕᐊᕐᑐᒥᒃ, ᐊᑭᓖᕗᕐᓗ ᐃᖏᕐᕋᑦᔪᑎᒋᓂᐊᕐᑕᒥᓂᒃ, ᐃᑭᕗᕐᓗ ᐅᒥᐊᕐᔪᐊᒧᑦ ᐃᖏᕐᕋᖃᑎᒋᔪᒪᓪᓗᒋᑦ ᑖᕐᓯᓯᒧᑦ, ᕿᒫᔪᒪᓪᓗᓂ ᐊᑕᓂᐅᑉ ᓵᖓᓂᑦ.

⁴ ᐊᑕᓂᐅᓪᓕ ᐃᒪᕐᕕᒃ ᑎᓕᒃᓕᕐᕕᒋᕚ ᐊᓄᕆᕐᔪᐊᒥᒃ, ᐊᖅᑯᓇᕐᑐᐊᓘᓚᐅᕐᐳᕐᓗ ᐅᒥᐊᕐᔪᐊᖅ ᓱᕋᑐᐃᓐᓇᕆᐊᖃᕐᓗᓂ ᐊᒡᓛᑦ.

⁵ ᐅᒥᐊᕐᔪᐊᒥᐅᓪᓗ ᓇᖏᐊᕐᓗᑎᒃ ᑐᒃᓯᐊᓚᐅᕐᐳᑦ ᐊᑐᓂᑦ ᒎᑎᒋᔭᒥᖕᓄᑦ, ᐅᒥᐊᕐᔪᐊᓪᓗ ᐅᓯᔭᖏᑦ ᐃᒋᐅᖅᑲᕐᐰᑦ ᐃᒫᓄᑦ ᐅᕿᓐᓂᕐᓴᐅᑎᑕᐅᖁᓪᓗᒍ, ᔫᓇᓕ ᐃᑎᕐᓯᒪᓪᓗᓂ ᐅᒥᐊᕐᔪᐊᑉ ᐃᓗᐊᓄᑦ ᐅᓯᕕᖓᓂ ᐃᓐᓇᖓᓪᓗᓂ ᓯᓐᓇᕆᒃᐳᖅ.

⁶ ᑕᕝᕙ ᐅᒥᐊᕐᔪᐊᑉ ᐊᖓᔪᖅᑳᖓᑕ ᐅᐸᒃᐹ ᐅᖃᐅᑎᓪᓗᒍᓗ: “ᖃᓄᐃᒻᒪᑦ ᓯᓐᓇᕆᒃᐲᑦ? ᒪᑭᓪᓗᑎᑦ ᒎᑏᑦ ᑐᒃᓯᐊᕐᕕᒋᓚᐅᕈᒃ, ᐃᒻᒪᖄ ᒎᑎᐅᑉ ᓇᒡᓕᒋᓕᕈᓂᑎᒍᑦ ᐱᐅᓕᒐᔭᕐᐹᑎᒍᑦ ᐊᓯᐅᖁᓇᑕ.”

⁷ ᐅᒥᐊᕐᑐᕐᑏᓪᓗ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ ᐅᖃᕐᓗᑎᒡᓗ: “ᐊᑏ ᓇᓚᐅᑦᑖᓚᐅᕐᑕ ᑭᓇ ᐱᑦᔪᑎᒋᓪᓗᒍ ᐊᑲᐅᖏᑦᑐᒥᒃ ᑕᒪᑐᒥᖓ ᐱᑎᑕᐅᖕᒪᖔᑦᑕ ᖃᐅᔨᖁᓪᓗᑕ.” ᓇᓚᐅᑦᑖᓕᕐᐳᑦ ᑕᕝᕙ, ᓇᓚᐅᑦᑖᕈᑎᐅᓪᓗ ᔫᓇᐅᑉ ᐊᑎᖓ ᓇᓚᐅᑉᐹ.

⁸ ᑕᕝᕙ ᑖᒃᑯᐊ ᐅᖃᐅᑎᕚᑦ: “ᐅᖃᐅᑎᓚᐅᕐᑎᒍᑦ ᑭᓇ ᐱᑦᔪᑎᒋᓪᓗᒍ ᐊᑲᐅᖏᓐᓂᕐᒥᒃ ᑕᒪᑐᒥᖓ ᐱᑎᑕᐅᖕᒪᖔᑦᑕ, ᓱᓇᓕᕆᔨᐅᕖᑦ? ᓇᑭᓐᖔᕐᓯᒪᕕᓪᓗ? ᓇᓂᓗ ᓄᓇᖃᕐᐲᑦ? ᐃᓅᖃᑎᑎᓪᓗ ᑭᓱᒥᐅᑕᐅᕚᑦ?”

⁹ ᐅᖃᐅᑎᕔᓪᓗ: “ᐄᑉᕈᐃᖑᕗᖓ, ᓯᕘᕋᒋᕙᕋ ᐊᑕᓂᖅ ᕿᓚᐅᑉ ᒎᑎᖓ ᐃᒪᕐᒥᒃ ᓄᓇᒥᒡᓗ ᐱᓐᖑᑎᑦᓯᓯᒪᔪᖅ.”

¹⁰ ᐊᖑᑎᓪᓗ ᑖᒃᑯᐊ ᑲᑉᐱᐊᓱᒃᑐᐊᓘᓪᓗᑎᒃ ᐅᖃᐅᑎᕚᑦ: “ᓱᓇᐅᕙ ᑕᒪᓐᓇ ᐱᓇᓱᐊᕐᑍᑦ?” ᖃᐅᔨᓚᐅᕐᒪᑕ ᔫᓇᐅᑉ ᕿᒫᓇᓱᐊᕐᓂᖓᓂᒃ ᐊᑕᓂᕐᒥᑦ ᐅᖃᐅᑎᓚᐅᕐᒪᒋᑦ.

¹¹ ᑖᒃᑯᐊᓗ ᔫᓇ ᐊᐱᕆᕚᑦ, “ᓱᓇᒥᒃ ᐅᕙᑦᑎᓐᓅᑦ ᐱᓂᐊᕐᕕᐅᔪᒃᓴᐅᕖᑦ ᐃᒪᖅ ᐅᕐᓱᐊᓕᖁᓪᓗᒍ?” ᒪᓪᓕᓕᕐᐸᓪᓕᐊᑐᐃᓐᓇᓚᐅᕐᒪᑦ.

¹² ᔫᓇᐅᓪᓗ ᐅᖃᐅᑎᕔᑦ: “ᑎᒍᓯᓐᖓ ᐃᒋᓪᓗᖓᓗ ᐃᒫᓄᑦ ᐃᒪᖅ ᐅᕐᓱᐊᓕᖁᓪᓗᒍ ᐃᓕᑦᓯᓐᓄᑦ; ᖃᐅᔨᒪᒐᒪ ᐅᕙᖓ ᐱᑦᔪᑎᒋᓪᓗᖓ ᐊᖅᑯᓇᕐᓯᐅᕐᑐᐊᓘᑎᑕᐅᒐᑦᓯ.”

¹³ ᐊᖑᑎᓪᓗ ᑖᒃᑯᐊ ᐊᒃᓱᕈᕐᓗᑎᒃ ᐃᐳᓐᓇᓱᐊᕐᐳᑦ ᓄᓈᕋᓱᐊᕈᒪᓪᓗᑎᒃ, ᓴᐱᓕᕐᐳᓪᓕ ᒪᓪᓕᓕᕐᐸᓪᓕᐊᓂᖓ ᐱᑦᔪᑎᒋᓪᓗᒍ, ᐊᒡᒍᕋᕋᒥᒃ.

¹⁴ ᑐᒃᓯᐊᕐᕕᒋᕚᓪᓗ ᐊᑕᓂᖅ ᐅᖃᕐᓗᑎᒃ: “ᐊᑕᓃᖅ ᐊᓯᐅᓐᖏᑲᓚᐅᕐᑕᑐᖅ ᐃᓅᑉ ᐆᒪ ᐃᓅᓯᖓ ᐱᑦᔪᑎᒋᓪᓗᒍ; ᐊᐅᒡᓗ ᐸᓯᔭᒃᓴᐅᖏᑦᑐᖅ ᐃᓕᓂᐊᕐᓇᒍ ᐅᕙᑦᑎᓐᓄᑦ, ᐃᕝᕕᑦ ᐊᑕᓃᖅ ᖁᕕᐊᒋᔭᕐᓂᒃ ᐱᓂᐊᕋᕕᑦ.”

¹⁵ ᑐᒃᓯᐊᕇᕋᒥᒡᓗ, ᔫᓇ ᑎᒍᓪᓗᓂᑦᔪᒃ ᐃᒋᑉᐹᑦ ᐃᒫᓄᑦ, ᐃᒪᖅ ᑕᕝᕙ ᐃᒃᑑᓕᔮᕈᓐᓃᕐᐳᖅ.

¹⁶ ᐊᖑᑎᓪᓗ ᑖᒃᑯᐊ ᐊᑕᓂᕐᒥᒃ ᓯᕘᕋᒻᒪᕆᓕᕐᐳᑦ, ᑐᓂᕐᕈᓯᕐᕕᒋᓪᓗᒍᓗ; ᐊᑕᓂᖅ ᐊᖏᒻᒪᕆᒃᕕᒋᕚᑦ.

¹⁷ ᐊᑕᓂᐅᓪᓗ ᐱᖁᔨᓂᖓᒍᑦ ᐃᒪᕐᒥᐅᑕᕐᔪᐊᖅ ᔫᓇᒥᒃ ᐄᓯᖁᕚ, ᔫᓇᓗ ᐃᒪᕐᒥᐅᑕᐅᑉ ᐊᕿᐊᕈᐊᓃᓚᐅᕐᐳᖅ ᐅᓪᓗᑦ ᐱᖓᓱᑦ ᐅᓐᓄᐊᓪᓗ ᐱᖓᓱᑦ ᓈᓪᓗᒋᑦ.