ᔪᐃᓕᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐃᓅᖃᑎᒋᒡᔪᐊᑦ ᐃᖅᑲᕐᑐᕈᒫᕐᐰᑦ

¹ “ᑕᑯᒋᑦᓯ ᐅᓪᓗᐃᑦ ᑍᒃᑯᐊ ᓇᓪᓕᐅᑎᒃᐸᑕ, ᔨᕉᓴᓕᒥᑦ ᔫᑕᒥᓪᓗ ᐊᓯᐅᔨᔭᐅᓯᒪᔪᑦ ᐅᑎᕐᑎᑦᓱᒫᕐᐸᒃᑲ.

² ᐃᓅᖃᑎᒌᒡᔪᐊᑦ ᐊᓯᖏᑦ ᑲᑎᑎᑦᓱᒫᕐᐸᒃᑲ, ᔨᕼᐆᓴᐸᐅᓪᓗ ᓇᕐᓴᖓᓄᐊᕈᑎᔪᒫᕐᐸᒃᑲ, ᑍᑲᓂᓗ ᐃᖅᑲᕐᑐᕈᒫᕐᐸᒃᑲ, ᐃᓄᖁᑎᒃᑲ ᐃᓴᕆᐊᓕᐅᑉ ᑭᖑᕚᖏᑦ ᐱᓪᓗᒋᑦ, ᑖᒃᑯᐊ ᐃᓄᖁᑎᓐᓂᒃ ᓯᐊᒻᒪᕐᑎᑦᓯᓚᐅᕐᑐᑦ ᐃᓅᖃᑎᒌᒡᔪᐊᓄᑦ; ᓄᓇᖁᑎᓐᓂᒡᓗ ᐊᕕᒃᑐᐃᓚᐅᕐᒪᑕ.

³ ᐃᓄᖁᑎᓐᓂᒡᓗ ᓇᓚᐅᑦᑖᕈᑎᒃᑯᑦ ᓂᐅᕐᕈᑎᖃᓚᐅᕐᑐᑦ, ᓄᑲᑉᐱᐊᒥᒡᓗ ᐊᑭᓕᐅᑎᖃᓚᐅᕐᐳᑦ ᐊᕐᓇᒧᑦ ᓄᓕᐊᒐᕐᒧᑦ, ᓂᕕᐊᕐᓵᒥᒡᓗ ᓂᐅᕐᕈᑎᖃᓚᐅᕐᐳᑦ ᕔᓂᒧᑦ, ᐃᒥᕈᒪᓪᓗᑎᒃ.

⁴ “ᓱᓇᒦᒃ ᐊᑭᕋᕐᑑᑎᒃᓴᖃᕐᐲᑦ ᐅᕙᓐᓄᑦ? ᑍᕆ, ᓮᑐᓂᓗ ᐱᓕᔅᑎᐊᒥᐅᓪᓗ ᐃᒪᐅᑉ ᓯᓈᓃᑦᑐᑦ ᐅᕙᓐᓄᑦ ᐊᑭᒋᐊᕈᒪᕕᓰ? ᐊᑭᒋᐊᕈᑦᓯ, ᑕᕝᕔᓐᓇᖅ ᑐᐊᕕᕐᓗᖓ ᐊᑭᒋᐊᕐᓂᓯ ᐃᓕᓯᓐᓄᑦ ᐱᑎᓐᓂᐊᕐᐸᕋ.

⁵ ᑎᒍᓯᓚᐅᕋᑦᓯ ᓯᐅᕕᕆᖁᑎᓐᓂᒃ ᒎᓗᖁᑎᓐᓂᒡᓗ, ᐊᐅᓪᓚᕈᑦᔨᓚᐅᕋᑦᓯᓗ ᐱᐅᓂᕐᐹᖁᑎᓐᓂᒃ ᑐᒃᓯᐊᕐᕕᓯᓐᓄᑦ.

⁶ ᔫᑕᐅᑉ ᔨᕉᓴᓕᐅᓪᓗ ᐃᓄᖏᓐᓂᒃ ᓂᐅᕐᕈᑎᖃᓚᐅᕋᑦᓯ ᒍᕇᑭᓄᑦ, ᐊᐅᓪᓚᐅᑎᔪᒪᓪᓗᒋᑦ ᐅᖓᓯᒃᑐᒧᑦ ᓄᓇᖁᑎᖏᑕ ᓯᓚᑖᓄᑦ.

⁷ ᑕᑯᒋᑦ, ᒪᑭᑎᑦᓱᕙᒃᑲ ᓄᓇᓂᑦ ᓂᐅᕐᕈᑎᖃᕐᕕᒋᓚᐅᕐᑕᑦᓯᓐᓂᑦ, ᐱᓂᐊᕐᓂᕆᓚᐅᕐᑕᓯᓗ ᐃᓕᓯᓐᓄᑦ ᐱᑎᓐᓂᐊᕐᐸᕋ.

⁸ ᐃᕐᓂᓯᓗ ᐸᓂᓯᓗ ᓂᐅᕐᕈᑎᒋᔪᒫᕐᐸᒃᑲ, ᔫᑕᐅᑉ ᐃᓄᖏᓐᓄᑦ, ᓂᐅᕐᕈᑎᒋᔪᒫᕐᐰᓪᓗ ᓴᐱᐊᓂᒥᐅᓄᑦ ᐃᓅᖃᑎᒌᒡᔪᐊᓄᑦ ᐅᖓᓯᒃᑐᒦᑦᑐᓄᑦ; ᐊᑕᓂᖅ ᐅᖃᕐᐳᖅ.

⁹ ᐃᓅᖃᑎᒌᒡᔪᐊᑦ ᐅᖃᐅᑎᓯᒋᑦ: ‘ᐸᕐᓁᓕᕆᑦᓯ ᐅᓇᑕᕐᓂᕐᒧᑦ! ᐊᖑᑏᑦ ᐅᓇᑕᕈᓐᓇᕐᑐᑦ ᐸᕐᓇᖁᓯᒋᒃ, ᐊᖑᑎᓕᒫᑦ ᐅᓇᑕᕐᑐᒃᓮᑦ ᕾᖁᓯᒋᒃ ᐅᓇᑕᕆᐊᓕᕐᓗᑎᒡᓗ.

¹⁰ ᓴᕕᕋᔧᑦ ᓄᓇᒥᒃ ᒪᒃᐱᕐᑎᕆᑦᔪᑏᑦ ᑲᓱᐊᕐᓗᒋᑦ ᓴᕕᒡᔪᐊᓕᐊᕆᓯᒋᑦ, ᓇᐹᕐᑑᓪᓗ ᐊᕙᓚᖓᔪᖏᓐᓂᒃ ᓇᑲᑎᕆᑦᔪᑏᑦ ᖃᓗᒋᐊᕈᕐᑎᓯᒋᑦ, ᓴᓐᖐᑦᑐᑦ ᐅᖃᓕᕐᓕᑦ, “ᐅᓇᑕᕐᑐᒃᓴᐅᕗᖓ.”

¹¹ ᑲᑎᓗᓯ ᕾᓕᕆᑦᓯ ᐃᓅᖃᑎᒌᒡᔪᐊᓕᒫᖑᔪᓯ, ᓇᓂᑐᐃᓐᓈᕐᑐᑦ ᑲᑎᓕᕐᓕᑦ.’” ᐅᓇᑕᕐᑐᒃᓴᖁᑎᑎᓪᓗ ᑕᐅᓄᖓ ᐅᓇᑕᕆᐊᖁᒃᑭᑦ, ᐊᑕᓃᖅ!

¹² ᐃᓅᖃᑎᒌᒡᔪᐊᑦ ᐸᕐᓇᓕᕐᓕᑦ ᕾᓗᑎᒡᓗ, ᔨᕼᐆᓴᐸᐅᑉ ᓇᕐᓴᖓᓄᑦ. ᑍᑲᓂ ᐃᓅᖃᑎᒋᒡᔪᐊᑦ ᐊᕙᑖᓃᑦᑐᑦ ᐃᖅᑲᕐᑐᕈᒫᐸᒃᑲ.

¹³ ᐱᕈᕐᑐᓂᒃ ᑭᓪᓗᐃᑦᔪᑏᑦ ᑎᒍᓕᕐᓯᒋᒃ, ᐱᕈᕐᑐᑦ ᐱᕈᕇᕐᒪᑕ ᑲᑎᕐᓱᐃᕕᒃ ᓇᓪᓕᐅᑎᖕᒪᑦ. ᕾᓗᓯ, ᐱᓇᓱᐊᕆᐊᕐᑐᓕᕆᑦᓯ ᐸᐅᕐᖎᑦ ᐃᑦᑏᔭᕐᓗᒋᑦ, ᕔᓂᓕᐅᕐᕕᒃ ᑕᑕᒻᒪᑦ ᐃᒻᒥᕐᓱᕐᕕᖏᓪᓗ ᖄᒥᒻᒪᑕ, ᐃᓅᖃᑎᒌᒡᔪᐊᑦ ᐊᔪᕐᑐᓕᓂᖏᑦ ᐊᖏᓗᐊᕐᒪᑕ.

¹⁴ ᐃᓄᒋᐊᒡᑐᕐᔪᐊᕌᓗᐃᑦ ᓇᕐᓴᒦᑉᐳᑦ ᐃᖅᑲᕐᑐᕐᑕᐅᕕᖕᒥ. ᑍᑲᓂ ᐊᑕᓂᐅᑉ ᐅᓪᓗᖓ ᖃᒡᓕᖕᒪᑦ ᓇᕐᓴᒥ ᐃᖅᑲᕐᑐᕐᑕᐅᕕᖕᒥ.

¹⁵ ᓯᕿᓂᕐᓗ ᑕᖅᑭᕐᓗ ᑖᕐᓯᔪᒫᕐᐴᒃ, ᐅᓪᓗᕆᐊᓪᓗ ᖃᐅᒪᔪᓐᓁᕐᓗᑎᒃ.

ᒎᑎᐅᑉ ᓮᒻᒪᕐᑎᑦᓯᔪᒫᕐᓂᖓ ᐃᓄᖁᑎᒥᓂᒃ

¹⁶ ᐊᑕᓂᖅ ᐃᕐᓯᓵᕆᔪᑎᑐᑦ ᓂᓪᓕᐊᔪᒫᕐᐳᖅ ᓮᐅᓂᒥ, ᓂᐱᖓᓗ ᑐᓴᕐᓴᐅᔪᒫᕐᐳᖅ ᔨᕉᓴᓕᒥᑦ; ᕿᓚᒡᓗ ᓄᓇᓗ ᓴᔪᒍᒫᕐᐴᒃ; ᐊᑕᓂᕐᓕ ᕿᒫᕕᒃᓴᐅᔪᒫᕐᐳᖅ ᐃᓄᖁᑎᒥᓄᑦ, ᐃᓴᕆᐊᓕᒥᐅᓄᓪᓗ ᑭᖑᕚᖑᖃᑎᒌᓄᑦ ᓴᓐᖏᑦᔪᑕᐅᔪᒫᕐᐳᖅ.

¹⁷ “ᖃᐅᔨᖁᓪᓗᓯ ᐅᕙᖓ ᐊᑕᓂᐅᒐᒪ ᒎᑎᓯ. ᐃᓂᖃᕐᐳᖓ ᓮᐅᓂᒥ ᖃᖅᑲᖁᑎᓐᓂ ᐃᑦᔪᕐᓁᑦᑐᒥ. ᔨᕉᓴᓕᒻ ᐃᑦᔪᕐᓁᑦᑑᔪᒫᕐᐳᖅ ᓄᓇᖃᕐᑐᑐᖃᐅᖏᑦᑐᑦ ᑎᑭᓪᓗᑎᒃ ᓵᓚᖃᓚᐅᕐᓯᒪᓂᐊᕈᓐᓁᕐᐳᑦ.

¹⁸ ᐅᓪᓗᒥ ᑍᑦᓱᒪᓂ ᓇᓪᓕᐅᑎᔪᒫᕐᐳᖅ ᖃᖅᑬᑦ ᑰᒐᕈᒫᕐᒪᑕ ᕔᓂᒥᒃ ᓄᑖᒥᒃ, ᐱᖑᐃᓪᓗ ᑰᓕᕈᒫᕐᐳᑦ ᐃᒻᒧᖕᒥᒃ, ᔫᑕᐅᓪᓗ ᑰᒐᓛᖏᑦ ᐃᓘᓐᓇᑎᒃ ᐃᒪᕐᒥᒃ ᑕᑕᑦᓱᒫᕐᐳᑦ; ᐃᒥᖅ ᐳᐊᓚᕕᒃ ᑰᓕᕈᒫᕐᐳᖅ ᐊᑕᓂᐅᑉ ᐃᒡᓗᖓᓂᑦ ᓯᑎᒻᒥᐅᑉ ᓇᕐᓴᖓ ᖃᐅᓯᕐᑎᓪᓗᒍ.

¹⁹ ᐄᑦᔨᑉᑎᓗ ᐃᓄᖃᕈᓐᓁᕈᒫᕐᐳᖅ, ᐄᑐᒥᓗ ᓱᓇᖃᖏᓪᓗᓂ ᐃᓄᖃᔪᐃᑦᑑᓕᕈᒫᕐᐳᖅ, ᑲᑉᐱᐊᓱᑦᑎᑦᓯᓚᐅᕐᓂᖏᓐᓄᑦ ᔫᑕᐅᑉ ᐃᓄᖏᓐᓂᒃ, ᑐᖁᕅᓚᐅᕐᓂᖏᓐᓂᒃ ᐸᓯᔭᒃᓴᐅᖏᑦᑐᓂᒃ ᓄᓇᖏᓐᓂ.

²⁰ ᔫᑕ ᐃᓄᕾᓐᓇᐅᔭᕐᓂᐊᕐᐳᖅ ᐃᓱᖃᖏᑦᑐᒧᑦ, ᔨᕉᓴᓕᓗᑦᑕᐅᖅ ᐃᓄᕾᓐᓇᕐᓂᐊᕐᐳᖅ ᑭᖑᕚᕇᓂᑦ ᑭᖑᕚᕇᓄᑦ.

²¹ ᐊᑭᓂᐊᕈᒫᕐᐸᒃᑲ ᑐᖁᑦᓯᓚᐅᕐᑐᑦ ᐸᓯᔭᒃᓴᐅᔪᓐᓃᓐᓂᐊᓐᖏᓚᓪᓗ, ᐅᕙᖓ ᐊᑕᓂᐅᒐᒪ ᓮᐅᓂᒥ ᐃᓂᖃᕐᑐᖅ.”