ᔪᐃᓕᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᒡᓕᕐᑕᐅᔮᕐᑐᑦ ᓇᓗᓁᒃᑯᑕᐅᓂᖏᑦ ᐊᑕᓂᐅᑉ ᐅᓪᓗᖓᓄᑦ

¹ ᑎᑦᑐᓚᐅᑏᑦ ᓂᓪᓕᕐᑎᓯᒋᑦ ᓮᐅᓂᒥ, ᐊᑕᓂᐅᑉ ᖃᖅᑲᖓᓂ ᐃᑦᔪᕐᓁᑦᑐᒥ, ᓄᓇᓕᓕᒫᓪᓗ ᓴᔪᒡᓕᑦ, ᐊᑕᓂᐅᑉ ᐅᓪᓗᖓ ᑎᑭᓕᕐᒪᑦ, ᖃᓂᑦᑑᓕᕐᓗᓂ.

² ᐅᓪᓗᖅ ᑖᕐᓯᔪᒫᕐᒪᑦ ᑲᑉᐱᐊᓇᕐᓗᓂᓗ, ᐅᓪᓗᖅ ᑖᕐᓯᔪᒫᕐᒪᑦ ᓄᕗᔭᓗᓂᓗ. ᐱᒡᓕᕐᑕᐅᔮᕐᑐᑦ ᐅᓄᕐᑐᕐᔪᐊᑦ ᑖᕐᓯᑎᑦᓯᔪᒫᕐᐳᑦ ᖃᖅᑲᒥᒃ, ᐊᔪᖏᑦᑐᕐᔪᐊᑦ ᐱᔪᓐᓇᕐᑐᕐᔪᐊᓪᓗ ᐊᑭᕅᑦ ᑎᑭᑦᓱᒫᕐᐳᑦ, ᑍᒫᒃ ᐱᔪᖃᓚᐅᕐᓯᒪᓐᖏᓚᖅ ᑍᒤᑦᑐᖃᓚᐅᕐᓯᒪᓂᐊᕋᓂᓗ ᒪᑐᒪ ᑭᖑᓂᐊᒍᑦ.

³ ᐃᑯᒪᒧᑦ ᓄᖑᑕᐅᕗᑦ ᓯᕗᓂᐊᓃᑦᑐᑦ ᑭᖑᓂᐊᓃᑦᑐᓪᓗ ᐃᑯᐊᓚᕗᑦ; ᓄᓇᓗ ᓯᕗᓂᐊᓃᑦᑐᖅ ᐱᕈᕐᓰᕕᒃ ᐄᑕᓂᒥᐅᖑᔮᕐᑐᖅ, ᑭᖑᓂᐊᓂᓗ ᓄᓇ ᐃᓄᖃᔪᐃᑦᑐᑐᑦ ᑍᒤᓕᕐᐳᖅ, ᑭᓇᓘᓐᓃᑦ ᕿᒫᔪᓐᓇᕐᓂᐊᓐᖏᓚᖅ.

⁴ ᕿᒻᒥᕐᔪᐊᑎᑐᑦ ᑕᑯᒃᓴᐅᕗᑦ, ᕿᒻᒥᕐᔪᐊᑎᑐᑦ ᐅᓇᑕᕐᑐᕐᓯᐅᑎᑐᑦ ᓱᑲᑦᑑᑎᒋᕗᑦ.

⁵ ᐅᓇᑕᐅᑎᑐᑦ ᐊᒃᓴᓗᐊᓕᒃᑎᑐᑦ ᑍᒫᒃ ᓂᐱᖅᑯᕐᑐᑎᒋᕗᑦ, ᒥᓯᒃᑕᕐᐳᑦ ᖃᖅᑲᐅᑉ ᖄᖏᑎᒍᑦ; ᐃᕕᒃᑎᑐᑦ ᐃᑯᒪᔪᑐᑦ ᓂᓪᓕᐊᕗᑦ, ᓯᐊᒻᒪᒃᐳᑦ ᐅᓇᑕᕐᑐᒃᓴᕐᔪᐊᑎᑐᑦ ᐅᓇᑕᕆᐊᕐᑐᕐᑐᑎᑐᑦ.

⁶ ᐃᓄᐃᑦ ᓯᕗᓂᐊᓃᑦᑐᑦ ᓴᔪᒃᐳᑦ ᑲᑉᐱᐊᓱᖕᓂᕐᒧᑦ, ᑮᓇᖏᓪᓗ ᐊᐅᖏᕈᑎᕗᑦ.

⁷ ᐅᓪᓚᒃᐳᑦ ᐊᔪᖏᑦᑐᕐᔪᐊᑎᑐᑦ ᐅᓇᑕᕐᑎᑎᑐᑦ, ᐊᑭᓐᓇᒃᑯᑦ ᒪᔪᕋᕐᐳᑦ ᐊᖑᑎᑎᑐᑦ ᐅᓇᑕᕆᐊᕐᑐᕐᑐᑎᑐᑦ; ᐱᓱᒃᐳᑦ ᑐᑭᓕᐊᕐᓗᑎᒃ ᓴᖑᐃᕋᑎᒡᓗ.

⁸ ᐃᒻᒥᖕᓄᑦ ᐱᖑᔭᐅᑎᓐᖏᓚᑦ, ᐱᓱᒃᐳᑦ ᐃᒻᒥᖕᓂᒃ ᐊᑐᕆᐊᓕᑎᒃ ᐊᑐᕐᓗᒍ, ᐅᓇᑕᐅᑎᓄᑦ ᐱᒋᐊᕐᑕᐅᒐᓗᐊᕈᑎᒃ ᓄᖅᑲᕐᑎᑕᐅᓂᐊᓐᖏᓚᑦ.

⁹ ᑐᐊᕕᕐᓗᑎᒃ ᐃᒡᓗᒐᓴᖕᓄᐊᕐᐳᑦ, ᐊᕙᓗᕐᔪᐊᒃᑯᑦ ᐅᓪᓚᒃᐳᑦ; ᒪᔪᕋᕐᐳᓪᓗ ᐃᒡᓗᓄᑦ, ᐃᒐᓛᑎᒍᑦ ᐃᑎᕐᐳᑦ ᑎᒡᓕᒃᑎᑐᑦ.

¹⁰ ᓄᓇᕐᔪᐊᕐᓗ ᓴᔪᒃᑎᑉᐹᑦ, ᕿᓔᓪᓗ ᓴᔪᒃᐳᑦ; ᓯᕿᓂᕐᓗ ᑕᖅᑭᕐᓗ ᑖᕐᓯᕘᒃ, ᐅᓪᓗᕆᐊᓪᓗ ᖃᐅᒪᔫᓐᓃᕐᐳᑦ.

¹¹ ᐊᑕᓂᐅᑉ ᓂᐱᒥᓄᑦ ᐅᓇᑕᕐᑐᒃᓴᖁᑎᓂ ᐊᐅᓚᑉᐰᑦ, ᐅᓇᑕᕐᑐᒃᓴᖁᑎᖏᑦ ᐅᓄᕐᑐᕐᔪᐊᖑᕗᑦ; ᓂᐱᖓᓂᒃ ᓈᓚᒃᑐᖅ ᓲᖑᔪᕐᔪᐊᖑᕗᖅ. ᐊᑕᓂᐅᑉ ᐅᓪᓗᖓ ᑲᑉᐱᐊᓇᕐᐳᖅ; ᑭᓇᓖ ᑕᒪᑐᒥᖓ ᐊᓂᒍᐃᔪᓐᓇᕐᐹ?

ᖃᕿᐊᓕᖁᔨᓂᖅ

¹² ᐊᑕᓂᖅ ᐅᖃᕐᐳᖅ, “ᒫᓐᓇ ᑍᒤᒻᒪᑦ, ᐃᓗᖏᕐᑐᕐᓗᓯ ᐅᕙᓐᓄᑦ ᐅᑎᓕᕆᑦᓯ, ᓂᕆᑦᑍᓕᓗᓯ, ᕿᐊᓗᓯ, ᕿᒃᓵᒡᓗᓯᓗ.”

¹³ ᐆᒻᒪᑎᓯ ᐊᓕᒃᓯᒋᑦ, ᐊᓐᓄᕌᓯ ᐱᓇᒋᑦ; ᐊᑕᓂᕐᒧᑦ ᒎᑎᑦᓯᓐᓄᑦ ᐅᑎᓕᕆᑦᓯ, ᑖᓐᓇ ᐱᑦᓯᐊᕐᓂᖃᕐᒪᑦ ᓂᑲᒍᓱᒡᓗᓂᓗ, ᓂᓐᖓᒃᓴᕅᖏᑦᑐᖅ ᓇᓪᓕᒍᓱᒃᑐᕐᔪᐊᖑᓂᕐᒥᓄᓪᓗ ᓱᒋᐊᕐᓯᔪᒪᓐᖏᓚᖅ.

¹⁴ ᐃᒻᒪᖄᓕ ᐃᓱᒪᓂ ᐊᓯᑦᔨᕐᓂᐊᕐᐹ ᓮᒻᒪᕐᑎᓪᓗᓯᓗ, ᓂᐊᖂᔭᒃᓴᒥᒃ ᕔᓂᒥᒡᓗ ᑐᓂᕐᕈᓯᕈᑎᒃᓴᖃᓕᕐᓗᓯ ᐊᑕᓂᕐᒧᑦ ᒎᑎᑦᓯᓐᓄᑦ.

¹⁵ ᑎᑦᑐᓚᐅᑎᓯ ᓂᓪᓕᕐᑎᓯᒋᑦ ᓮᐅᓂᒥ, ᓂᕆᑦᑍᓕᖁᔨᒋᑦᓯ, ᐃᓄᐃᓪᓗ ᑲᑎᖁᓗᒋᑦ.

¹⁶ ᐃᓄᐃᑦ ᑲᑎᖁᓯᒋᑦ, ᐃᑦᔪᕐᓁᓕᑎᓪᓗᒋᓪᓗ; ᐃᓄᑐᖃᐅᔪᑦ, ᓱᕈᓰᓪᓗ ᐊᒫᒪᒃᑎᑕᐅᔪᓪᓗ; ᓄᓕᐊᓂᕋᑖᕐᑐᑦ ᐅᐃᓂᕋᑖᕐᑐᓪᓗ ᐊᖏᕐᕋᒥᖕᓂᒃ ᕿᒤᓕᕐᓕᑦ ᑲᑎᖃᑕᐅᖕᒥᓗᑎᒃ.

¹⁷ ᑐᓂᕐᕈᓯᕐᑎᑦᓯᔩᑦ ᐱᔨᑦᓯᕐᐸᒃᑐᑦ ᑭᒡᒐᕐᑐᕐᓗᑎᒃ ᐊᑕᓂᕐᒥᒃ, ᕿᐊᓕᕐᓕᑦ ᑐᒃᓯᐊᕐᕕᒡᔪᐊᑉ ᑐᕐᓲᖓᑕ ᑐᓂᕐᕈᓯᕐᕕᐅᓪᓗ ᐊᑯᓐᓂᖓᓂ; ᐅᖃᕐᓗᑎᒡᓗ, “ᐃᓄᖁᑎᑎᑦ ᓂᑲᒋᓚᐅᒃᑭᑦ, ᐊᑕᓃᖅ; ᐃᓅᖃᑎᒌᒡᔪᐊᓄᑦ ᔫᑎᐅᖏᑦᑐᓄᑦ ᓇᕐᕈᓇᕐᓯᑎᑕᐅᖁᓇᒋᑦ ᒥᑕᐅᑎᒋᔭᐅᖁᓇᒋᓪᓗ ᐅᖃᖁᓇᒋᓪᓗ, ‘ᓇᐅᒡᓕ ᒎᑎᖓᑦ?’”

ᒎᑎᐅᑉ ᐅᑎᕐᑎᑦᓯᓂᖓ ᓄᓇᒥᒃ ᐱᕈᕐᑐᖃᑦᓯᐊᓕᕐᑎᓪᓗᒍ

¹⁸ ᑕᕝᕙ ᐊᑕᓂᐅᑉ ᓯᕐᓈᕐᓂᐊᕐᐹ ᓄᓇᖁᑎᓂ, ᐃᓄᖁᑎᓂᓗ ᐃᓚᑦᓱᒋᓕᕐᓂᐊᕐᐰᑦ.

¹⁹ ᐊᑕᓂᐅᓪᓗ ᐃᓄᖁᑎᓂ ᑭᐅᔪᒫᕐᐰᑦ ᐅᖃᐅᑎᓗᒋᓪᓗ, “ᑕᑯᒋᑦ, ᑐᓂᓯᕕᒋᓂᐊᕐᐸᑦᓯ ᓂᐊᖂᔭᒃᓴᒥᒃ ᕔᓂᒥᒡᓗ ᓄᑖᒥᒃ ᐸᐅᕐᖎᓪᓗ ᐅᕐᓱᖏᓐᓂᒃ, ᓈᒻᒪᒃᓯᓂᐊᕐᐳᓯ ᐃᓅᖃᑎᒌᒡᔪᐊᓄᓪᓗ ᓇᕐᕈᒋᔭᐅᓂᐊᕈᓐᓁᕐᐳᓯ.

²⁰ ᐅᓇᑕᕐᑐᒃᓮᑦ ᐅᓐᓄᐊᑉ ᓇᓛᓂᑦ ᐱᔪᑦ ᐅᖓᓯᒋᔭᑦᓯᓐᓄᑦ ᐊᐅᓪᓚᕐᑎᑦᓱᒫᕐᐸᒃᑲ, ᓯᖏᓪᓗᒋᑦ ᐃᓄᖃᔪᐃᑦᑐᒧᑦ ᓯᐅᕅᓐᓇᕐᒧᑦ, ᓯᕗᓪᓖᑦ ᐃᒪᕐᔪᐊᕐᒧᑦ ᓯᕿᓂᐅᑉ ᓄᐃᕕᐊᓄᑦ ᐂᑎᓐᓂᐊᕐᐸᒃᑲ, ᑭᖑᓪᓖᑦ ᐃᒪᕐᔪᐊᕐᒧᑦ ᓯᕿᓂᐅᑉ ᓂᐱᕕᐊᓄᑦ ᐂᑎᓪᓗᒋᑦ. ᑕᕝᕙᓂᓗ ᐃᒍᓇᕈᒫᕐᐳᑦ ᑎᐹᕿᓗᑎᒃ ᐱᐅᖏᑦᑐᐊᓗᖕᒥᒃ ᐃᓕᑦᓯᓐᓄᑦ ᐱᓂᐊᓚᐅᕐᓂᖏᑦ ᐱᓪᓗᒋᑦ.

²¹ ᓄᓈ ᑲᑉᐱᐊᓱᖕᓂᐊᕐᓇᒃ ᖁᕕᐊᓱᓕᕆᑦ ᓯᕆᓗᑎᓪᓗ, ᐊᑕᓂᖅ ᐱᓂᐊᕐᓂᖃᕐᒪᑦ ᑲᒪᓇᕐᑐᓂᒃ!

²² ᓯᕘᕋᓂᐊᕋᓯ ᐆᒪᔪᐃᑦ ᓄᔪᐊᕐᑐᑦ ᐱᕈᕐᑐᐃᑦ ᓇᑎᕐᓇᒦᑦᑐᑦ ᑐᖑᔪᕐᓯᓕᕐᒪᑕ; ᓇᐹᕐᑐᓪᓗ ᐸᐅᕐᖓᕐᑖᓕᕐᒪᑕ, ᓇᐹᕐᑐᐃᑦ ᐱᒋᓕᒃᓮᑦ ᕔᓂᒃᓮᓪᓗ ᐸᐅᕐᖓᖏᑦ ᐱᕈᑦᓯᐊᓕᕐᒪᑕ.

²³ ᖁᕕᐊᓱᒋᑦᓯ, ᓮᐅᓂᐅᑉ ᕿᑐᕐᖓᖏᑦ, ᖁᕕᐊᓱᒋᑦᓯ ᐊᑕᓂᖅ ᒎᑎᓯ ᐃᓕᑦᓯᓐᓄᑦ ᐱᓂᐊᕐᓯᒪᓂᖓ ᐱᑦᔪᑎᒋᓗᒍ, ᓯᓚᓗᒡᕕᐅᑎᒻᒪᓯ ᓯᕗᓪᓕᕐᓯᐅᒻᒥᒃ ᓱᖁᓯᔪᐃᑦᑑᓂᕐᒥᓄᑦ, ᓯᓚᓗᒡᕕᐅᑎᓕᕐᒪᓯ ᓯᕗᓪᓕᕐᓯᐅᒻᒥᒃ ᑭᖑᓪᓕᕐᓯᐅᒻᒥᒡᓗ ᓲᕐᓗ ᑍᑦᓱᒪᓂᑐᑦ.

²⁴ ᓂᐊᑰᔭᒃᓮᑦ ᐃᕖᔭᕐᑕᐅᕕᖏᑦ ᑕᑕᓐᓂᐊᕐᐳᑦ ᓂᐊᖂᔭᒃᓴᓂᒃ, ᐴᒃᓮᑦ ᕔᓂᒧᑦ ᐸᐅᕐᖎᓪᓗ ᐅᕐᓱᖏᓐᓄᑦ ᑕᑕᑦᓱᒫᕐᐳᖅ ᖄᒥᓪᓗᑎᒃ.

²⁵ ᐅᑎᕐᑎᑦᓯᕕᒋᓂᐊᕐᐸᑦᓯ ᐊᕐᕌᒍᓂᒃ ᐊᓯᐅᔨᓚᐅᕐᑕᑦᓯᓐᓂᒃ ᐱᒡᓕᕐᑕᐅᔮᕐᑐᑦ ᐅᓄᕐᑐᕐᔪᐊᑦ ᓂᕆᓚᐅᕐᑕᖏᓐᓂᒃ, ᐱᒡᓕᕐᑕᐅᔮᕐᑐᑦ ᐹᕐᖑᕐᑐᑦ, ᓄᖒᑦᓯᔪᓪᓗ, ᑕᒧᐊᔪᓪᓗ ᑎᓕᓚᐅᕋᒃᑭᑦ ᐅᓇᑕᕐᑐᒃᓴᕐᔪᐊᑎᑐᑦ ᐊᑯᓐᓇᑦᓯᓐᓄᑦ.

²⁶ ᐊᒥᒐᖏᑦᑐᒥᒃ ᓂᕆᔪᒫᕐᐳᓯ ᐊᕿᐊᑦᑐᕐᓗᓯᓗ, ᓂᕐᑐᕈᒫᕐᐸᓯ ᐊᑕᓂᐅᑉ ᒎᑎᐅᑉ ᐊᑎᖓ. ᑲᒪᓇᕐᑐᓂᒃ ᐱᓂᐊᕐᓯᒪᓂᖓ ᐃᓕᑦᓯᓐᓄᑦ ᐱᓪᓗᒍ, ᐃᓄᖁᑎᒃᑲ ᑲᓐᖑᓱᒃᑎᑕᐅᓚᐅᕐᓯᒪᓂᐊᕈᓐᓁᕐᐳᑦ.

²⁷ ᖃᐅᔨᔪᒫᕐᐳᓯᓗ ᐃᓴᕆᐊᓕᒥᐅᑦ ᐊᑯᓐᓂᖓᓃᓐᓇᒪ: ᐅᕙᖓ ᐊᑕᓂᐅᕗᖓ ᒎᑎᓯ ᐊᓯᓐᓂᒃ ᐱᑕᖃᓐᖏᓚᖅ. ᐃᓄᖁᑎᒃᑲ ᖃᖓᓕᒫᖅ ᑲᓐᖑᓱᒃᑎᑕᐅᓚᐅᕐᓯᒪᓂᐊᕈᓐᓁᕐᐳᑦ.”

ᐊᑕᓂᐅᑉ ᐅᓪᓗᖓ

²⁸ “ᓇᓪᓕᐅᑎᔪᒫᕐᐳᖅ ᒪᑐᒪ ᑭᖑᕐᖓᒍᑦ ᐊᓂᕐᓂᕋ ᑯᕕᔪᒫᕋᒃᑯ ᐃᓄᓕᒫᓄᑦ; ᐃᕐᓂᓯ ᐸᓂᓯᓗ ᐅᖃᐅᓯᖃᖃᑦᑕᕈᒫᕐᐳᑦ ᐅᖃᐅᓯᐅᖁᔭᓐᓂᒃ, ᐃᓄᑐᖃᓯ ᓯᓐᓇᒃᑑᒪᖃᑦᑕᕈᒫᕐᐳᑦ, ᐃᓅᓱᒃᑐᓯᓗ ᑕᑯᑎᑦᔪᑎᓂᒃ ᑕᑯᖃᑦᑕᕈᒫᕐᐳᑦ.

²⁹ ᑭᒡᒐᓐᓄᓪᓗ ᐊᖑᑎᓄᑦ ᐊᕐᓇᓄᓪᓗ ᐊᓂᕐᓂᕋ ᑯᕕᔪᒫᕐᐸᕋ, ᐅᓪᓗᓂ ᑍᒃᑯᓇᓂ.

³⁰ ᑲᒪᓇᕐᑐᓂᒃ ᓇᓗᓇᕐᑐᓂᒡᓗ ᑕᑯᒃᓴᐅᑎᑦᓯᔪᒫᕐᐳᖓ ᕿᓚᖕᒥ ᓄᓇᒥᓗ, ᐊᐅᖕᒥᒃ ᐃᑯᒪᒥᒃ ᐃᓯᕐᓗᒡᔪᐊᒥᒡᓗ.

³¹ ᓯᕿᓂᕐᓗ ᑖᕐᓯᔪᒫᕐᐳᖅ, ᑕᖅᑭᕐᓗ ᐊᐅᒃᑎᑐᑦ ᐊᐅᐸᕐᓯᓗᓂ, ᐊᑕᓂᐅᑉ ᐅᓪᓗᕐᔪᐊᖓ ᑲᒪᓇᕐᑐᕐᔪᐊᖅ ᓇᓪᓕᐅᑎᖅᑳᕐᑎᓐᓇᒍ.

³² ᒪᑐᒪ ᑭᖑᕐᖓᒍᑦ ᓇᓪᓕᐊᑦ ᐊᑕᓂᐅᑉ ᐊᑎᖓᓂ ᑐᒃᓯᐊᕐᑐᖅ ᐱᐅᓕᔭᐅᓛᕐᐳᖅ. ᖃᖅᑲᒥ ᓮᐅᓂᒥ ᔨᕉᓴᓕᒥᓗ ᓴᐳᑦᔭᐅᕕᒃᓴᖃᕈᒫᕐᐳᖅ. ᐊᑕᓂᖅ ᐅᖃᓚᐅᕐᒪᑦ, ᑍᒤᑦᓱᒫᕐᐳᖅ ᐃᓄᖁᑎᖏᓐᓂ ᐊᒥᐊᒃᑰᔪᓂ ᐊᑕᓂᐅᑉ ᕾᖁᔭᖏᓐᓂ.”