ᔪᐃᓕᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᑕᓂᖅ ᐅᖃᕐᐳᖅ ᔪᐃᓕᒧᑦ ᐱᑐᐃᓕᐅᑉ ᐃᕐᓂᖓᓄᑦ.

ᐃᓄᐃᑦ ᕿᒃᓵᖕᓂᖏᑦ ᓂᐊᖂᔭᒃᓮᑦ ᐊᓯᕈᕐᑕᐅᓂᖏᓐᓄᑦ

² ᒪᑐᒥᖓ ᑐᓴᕆᑦᓯ, ᐃᓕᑦᓯ ᐊᖓᔪᒃᓯᐅᔪᓯ; ᔫᑕᒥᐅᑕᐅᔪᓯ ᐃᓘᓐᓇᓯ ᓈᓚᒋᑦᓯ! ᑍᒤᑦᑐᒦᒃ ᓇᓪᓕᐅᑎᔪᖃᓚᐅᕐᓯᒪᕚ ᐃᓅᑎᓪᓗᓯ, ᐅᕝᕙᓘᓐᓃᑦ ᐊᑖᑕᒋᓚᐅᕐᑕᓯ ᐃᓅᑎᓪᓗᒌᑦ?

³ ᕿᑐᕐᖓᓯ ᐅᓂᒃᑲᐅᑎᓯᒋᑦ ᑕᒪᑐᒥᖓ; ᕿᑐᕐᖓᒥᖕᓄᑦ ᐅᓂᒃᑳᖁᓪᓗᒋᑦ, ᕿᑐᕐᖓᖏᑕᓗ ᑭᖑᕚᖏᓐᓄᑦ.

⁴ ᐅᓄᕐᑐᕐᔪᐊᑦ ᓂᕆᔩᑦ ᐱᒡᓕᕐᑕᐅᔮᕐᑐᑦ ᓂᕆᓂᐊᕐᐳᑦ ᐱᕈᕐᑐᓂᒃ, ᐊᒥᐊᒃᑯᖏᑦ ᓂᕆᔭᐅᓂᐊᕐᐳᑦ ᐱᒡᓕᕐᑕᐅᔮᕐᑐᓄᑦ ᐹᕐᖑᕐᑐᓄᑦ ᐅᓄᕐᑐᕐᔪᐊᓄᑦ, ᐱᒡᓕᕐᑕᐅᔮᕐᑐᓪᓗ ᐹᕐᖑᕐᑐᑦ ᐊᒥᐊᒃᑯᖏᑦ, ᓂᕆᔭᐅᓂᐊᕐᐳᑦ ᓄᖑᕅᔨᓄᑦ ᐱᒡᓕᕐᑕᐅᔮᕐᑐᓄᑦ.

⁵ ᑐᐸᓕᕆᑦᓯ, ᐃᓕᑦᓯ ᐋᖓᔮᕐᑎᐅᔪᓯ, ᕿᐊᓗᓯᓗ; ᓂᐹᓕᕆᑦᓯ ᐃᓕᑦᓯ ᕔᓂᑐᕐᑎᐅᔪᓯ, ᕔᓂᐅᑉ ᐃᑦᓯᒃᓴᖏᑦ ᓄᑖᑦ ᐊᓯᕈᕐᑕᐅᖕᒪᑕ.

⁶ ᐱᒡᓕᕐᑕᐅᔮᕐᑐᑦ ᐃᓅᖃᑎᒌᒡᔪᐊᑎᑐᑦ ᐊᓯᕈᐃᒋᐊᕐᑐᕐᒪᑕ ᓄᓇᖁᑎᑦᑎᓐᓂᒃ, ᐅᓄᓗᐊᕐᒪᑕ ᐊᔪᖏᑦᑑᓗᐊᕐᓗᑎᒡᓗ ᓈᓴᒐᒃᓴᐅᖏᑦᑐᑦ; ᑭᒍᑎᖃᕐᐳᑦ ᓛᔭᑎᑐᑦ, ᑐᓗᕆᐊᖏᑦ ᓛᔭᐅᑉ ᐊᕐᓇᓪᓗᖏᑎᑐᑦ ᑍᒤᑉᐳᑦ.

⁷ ᕔᓂᓕᐅᕐᕕᕗᑦ ᐊᓯᕈᕐᑕᐅᖕᒪᑕ, ᓇᐹᕐᑐᐃᓪᓗ ᐸᐅᕐᖓᓖᑦ ᐱᒋᓕᖕᓂᒃ ᓂᕆᔭᐅᖕᒪᑕ, ᓇᐹᕐᑐᐃᑉ ᐊᒥᕅᔭᑦᓯᐊᕐᓗᒋᑦ ᐃᒋᑕᐅᕗᑦ; ᐊᕙᓚᖓᔪᖏᓪᓗ ᖃᑯᕐᓯᓪᓗᑎᒃ.

⁸ ᕿᐊᒋᑦᓯ, ᐃᓕᑦᓯ ᐃᓅᔪᓯ, ᐊᕐᓇᑐᑦ ᐃᓅᓱᒃᑑᓪᓗᓂ ᕿᒃᓵᒍᑎᖃᕐᑐᑐᑦ ᐅᐃᑖᕆᓂᐊᓚᐅᕐᑕᖓ ᑐᖁᖕᒪᑦ.

⁹ ᓂᐊᖂᔭᒃᓴᒥᒃ ᕔᓂᒥᒡᓘᓐᓃᑦ ᑐᓂᕐᕈᓯᕈᑎᒃᓴᖃᕈᓐᓁᕐᒪᑦ ᐊᑕᓂᐅᑉ ᐃᒡᓗᖓᓂ; ᑐᓂᕐᕈᓯᕐᑎᑦᓯᔩᑦ ᐱᓇᓱᐊᕐᐸᒃᑐᑦ ᕿᒃᓵᓕᕐᐳᑦ ᑐᓂᕐᕈᑎᒃᓴᕐᑕᖃᕈᓐᓁᕐᒪᑦ ᐊᑕᓂᕐᒧᑦ.

¹⁰ ᐱᕈᕐᓰᕖᑦ ᐊᑐᕈᓐᓁᕐᐳᑦ; ᓄᓇᓗ ᕿᒃᓵᒃᐳᖅ, ᓂᐊᑰᔭᒃᓮᑦ ᐊᓯᕈᕐᑕᐅᓂᖏᓐᓄᑦ, ᐸᐅᕐᖎᓪᓗ ᐸᓂᕐᐳᑦ ᕔᓂᒃᓮᑦ, ᓇᐹᕐᑐᐃᓪᓗ ᐅᕐᓱᒃᓴᕐᑕᓖᑦ ᑐᖁᓕᕗᑦ.

¹¹ ᐅᒡᒍᐊᓕᕆᑦᓯ ᐃᓕᑦᓯ ᐱᕈᕐᓰᕕᓕᕆᔨᐅᔪᓯ, ᕿᐊᓕᕆᑦᓯ ᐃᓕᑦᓯ ᕔᓂᓕᐅᕐᑎᐅᔪᓯ, ᕿᒃᓵᒍᑎᒋᓕᕐᓯᒋᒃ ᐃᕖᑦ ᓂᐊᑰᔭᒃᓮᓪᓗ ᐱᕈᕐᓰᕕᖕᒥ ᐊᓯᕈᕐᑕᐅᖕᒪᑕ.

¹² ᕔᓂᒃᓮᑦ ᐸᓂᕐᒪᑕ, ᓇᐹᕐᑐᐃᓪᓗ ᐸᐅᕐᖓᒃᓴᓖᑦ ᑐᖁᓕᖕᒪᑕ; ᓇᐹᕐᑐᐃᑦ ᐱᕈᕐᑐᓖᑦ ᐃᓘᓐᓇᑎᒃ ᑐᖁᓕᖕᒪᑕ, ᐃᓄᐃᑦ ᖁᕕᐊᓱᖕᓂᖏᑦ ᐊᓯᐅᕗᑦ.

¹³ ᐊᓐᓄᕌᓕᕆᑦᓯ ᐊᕐᔭᓂᓕᕐᑎᕐᓯᒪᔪᓂᒃ ᕿᐊᓗᓯᓗ, ᐃᓕᑦᓯ ᑐᓂᕐᕈᓯᕐᑎᑦᓯᔨᐅᔪᓯ, ᕿᒃᓵᒋᑦᓯ ᐃᓕᑦᓯ ᐱᔨᑦᓯᕐᑎᐅᔪᓯ ᑐᓂᕐᕈᓯᕐᕕᖕᒥ, ᕾᒋᑦᓯ, ᐅᓐᓄᐊᓕᒫᖅ ᐊᓐᓄᕌᕐᓯᒪᓗᓯ ᐊᕐᔭᓂᓕᕐᑎᕐᓯᒪᔪᓂᒃ, ᐃᓕᑦᓯ ᐊᔪᕆᕐᑐᐃᕙᒃᑐᓯ! ᑐᓂᕐᕈᓯᕈᑎᒃᓴᖃᕈᓐᓁᕐᒪᑦ ᓂᐊᖂᔭᒃᓴᓂᒃ ᕔᓂᒥᒡᓘᓐᓃᑦ ᒎᑎᒧᑦ.

¹⁴ ᓂᕆᑦᑍᓕᖁᔨᒋᑦᓯ, ᑲᑎᖁᔨᓗᓯ ᐃᓄᓕᒫᓂᒃ; ᓯᕗᓕᕐᑏᑦ ᑲᑎᖁᓯᒋᑦ ᔫᑕᐅᓪᓗ ᐃᓄᓕᒫᖏᑦ, ᐊᑕᓂᐅᑉ ᒎᑎᓯ ᐃᒡᓗᖓᓄᑦ, ᑐᒃᓯᐊᕐᓗᓯ ᕿᓄᒋᑦᓯ ᐊᑕᓂᕐᒧᑦ.

¹⁵ ᐊᑕᓂᐅᑉ ᐅᓪᓗᖓ ᖃᒡᓕᕗᖅ; ᑎᑭᓐᓂᐊᕐᐳᖅ ᐊᓯᕈᐃᔭᕐᑐᕐᑐᑐᑦ ᐊᔪᒐᖃᖏᑦᑐᕐᔪᐊᕐᒥᓐᖔᕐᓗᓂ.

¹⁶ ᓂᕿᒃᓴᕗᑦ ᐊᓯᕈᕐᑕᐅᕗᑦ ᑕᑯᓐᓇᑐᐃᓐᓇᕐᑎᓪᓗᑕ, ᖁᕕᐊᓱᖕᓂᕐᑕᖃᕉᓐᓁᕐᐳᖅ ᒎᑎᑦᑕ ᐃᒡᓗᖓᓂ.

¹⁷ ᐱᕈᕐᓯᐊᒃᓮᑦ ᑐᖁᕗᑦ ᓄᓇᐅᑉ ᐸᓂᕐᓂᖓᓄᑦ, ᓯᕐᓗᐊᑦ ᓱᕋᒃᑎᕐᐳᑦ ᐃᓗᓕᖃᖏᓐᓇᒥᒃ ᓂᐊᖂᔭᒃᓴᓂᒃ.

¹⁸ ᐃᒻᒧᒃᓯᐅᒊᑦ ᓂᓪᓕᐊᖏᓐᓇᓕᕐᐳᑦ ᑳᖕᓂᕐᒧᑦ, ᕿᑲᕈᓐᓁᓪᓕᕗᑦ ᓂᕆᔭᒃᓴᖃᖏᓐᓇᒥᒃ, ᓰᐲᓪᓗ ᐱᕐᓕᓕᕐᐳᑦ.

¹⁹ ᐃᓕᖕᓄᑦ ᐊᑕᓃᖅ ᐃᓗᖏᕐᓱᕐᓗᖓ ᑐᒃᓯᐊᕐᐳᖓ, ᐃᑯᒪᒧᑦ ᓄᓇᐅᑉ ᐱᕈᕐᑐᖏᑦ ᐊᓯᕈᕐᑕᐅᖕᒪᑕ, ᓇᐹᕐᑐᐃᓪᓗ ᐃᑯᒪᒧᑦ ᓄᖑᑕᐅᖕᒪᑕ.

²⁰ ᐆᒪᔪᐃᑦ ᓄᔪᐊᕐᑐᑦ ᐊᒡᓛᑦ ᕾᒐᓛᓕᕐᐳᑦ ᐃᓕᖕᓄᑦ, ᑰᑦ ᐸᓂᕐᒪᑕ, ᐃᑯᒪᒧᓪᓗ ᓄᓇᐅᑉ ᐱᕈᕐᑐᖏᑦ ᐊᓯᕈᕐᑕᐅᖕᒪᑕ.