ᔫᐱᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᐅᓪᑖᑦ

¹ ᑕᕝᕙ ᐱᐅᓪᑖᑦ ᓲᕼᐂᑎᒥᐅᑕᖅ ᑭᐅᕗᖅ:

² “ᐅᖃᐅᓯᒃᓮᕈᑎᑍᓐᓇᕐᐲᑦ ᐅᖃᐅᓯᕐᑎᑦ ᐊᓄᕌᕐᕙᓗᑐᐃᓐᓇᐅᔮᓕᕐᑎᓪᓗᒋᑦ?

³ ᒎᑎ ᒧᒥᒃᑎᑦᓯᓲᖑᕚ ᓈᒻᒪᓈᕐᓯᒪᓂᕐᒥᒃ; ᐅᕝᕙᓗ ᐊᔪᒐᖃᖏᑦᑐᖅ ᓈᒻᒪᓈᕐᑐᒥᒃ ᒧᒥᒃᑎᑦᓯᓲᖑᕙ?

⁴ ᕿᑐᕐᖓᑎᑦ ᒎᑎᒧᑦ ᐊᔪᕐᑐᓕᓯᒪᓐᓂᕐᐸᑕ, ᐱᐅᖏᑦᑐᓕᓂᖏᓐᓄᑦ ᑐᓂᓯᒪᕔᑦ ᑍᒤᑕᐅᔭᕆᐊᖃᕐᓂᖏᓐᓄᑦ.

⁵ ᒫᓐᓇᓕ ᒎᑎᒥᒃ ᕿᓂᕐᓂᐊᕈᕕᑦ ᕿᓄᕕᒋᓂᐊᕈᕕᐅᒡᓗ ᐊᔪᒐᖃᖏᑦᑐᖅ,

⁶ ᐃᑦᔪᕐᓁᒃᑯᕕᑦ ᐸᓯᔭᒃᓴᐅᓂᖃᖏᒃᑯᕕᓪᓗ, ᑕᕝᕙ ᑖᑦᓱᒪ ᒪᑭᓪᓗᓂ ᐅᐸᖕᓂᐊᕐᐹᑎᑦ ᐊᑭᓕᕐᓂᐊᕐᐹᑎᓪᓗ ᓈᒻᒪᓈᕐᓯᒪᓂᕐᓄᑦ.

⁷ ᓯᕗᕐᖓᓂᓗ ᐱᒋᓚᐅᕐᑕᑎᑦ ᒥᑭᔫᓚᐅᕋᓗᐊᕐᐸᑕ, ᑭᖑᓂᖓᒍᑦ ᐊᖏᓕᔪᕐᔪᐊᖑᔪᒫᕐᐳᑦ.

⁸ ᐊᐱᕐᓱᓚᐅᕆᑦ ᕿᓄᕕᒋᕙᒋᑦ, ᓯᕗᓪᓕᐅᓚᐅᕐᑐᓂᒃ, ᖃᐅᔨᓇᓱᒡᓗᑎᓪᓗ ᓯᕗᓕᕆᓚᐅᕐᑕᑦᑕ ᖃᐅᔨᓯᒪᔭᖏᓐᓂᒃ.

⁹ ᐃᓅᓯᕗᑦ ᓁᑦᑐᑯᓘᖕᒪᑦ, ᖃᐅᔨᒪᓇᑕᓗ, ᓄᓇᒦᓐᓂᕗᑦ ᑕᕐᕋᑐᐃᓐᓇᕐᑎᑐᑦ ᑍᒤᒻᒪᑦ.

¹⁰ ᓯᓚᑐᔫᓚᐅᕐᑐᓄᑦ ᐊᔪᕆᕐᑐᕐᑕᐅᓚᐅᕆᑦ, ᐅᖃᐅᑦᔭᐅᓂᐊᕋᕕᑦ ᑐᑭᓯᓯᒪᔭᖏᓐᓂᑦ:

¹¹ ᐅᖃᐅᔭᕐᔪᐊᑦ ᐱᕈᓲᖑᕚᑦ ᐃᒪᕐᓱᖃᖏᑦᑐᒥ? ᐃᕕᒃᓱᒊᑦ ᐱᕈᕈᓐᓇᕐᐹᑦ ᐃᒪᖃᖏᑦᑐᒥ?

¹² ᓱᓕ ᐃᕕᒃᓱᒊᑦ ᓱᓪᓗᓖᑦ ᓇᑲᑕᐅᓚᐅᕋᑎᒃ, ᑐᖁᓕᓲᖑᕗᑦ ᐊᓯᖏᓐᓂᑦ ᐸᓂᖅᑳᕐᓂᕐᐸᐅᓪᓗᑎᒃ.

¹³ ᒎᑎᒥᒃ ᐳᐃᒍᕐᑐᑦ ᑕᒪᒃᑯᑎᑐᓇᖅ ᑍᒤᑉᐳᑦ; ᒎᑎᖃᖏᑦᑑᑉ ᓂᕆᐅᖕᓂᖓ ᐊᓯᐅᔪᒫᕐᐳᖅ.

¹⁴ ᓴᐱᖏᓐᓂᖓ ᐃᕙᓗᒃᓴᑎᑐᑦ ᑍᒤᑉᐳᖅ, ᑕᑎᖃᕐᓂᖓᓗ ᐋᓯᕙᐅᑉ ᓄᓗᐊᖏᑎᑐᑦ ᑍᒤᓪᓗᓂ.

¹⁵ ᓄᓗᐊᖏᓐᓄᑦ ᐄᒐᕈᑎᒃ, ᒪᑭᑕᔪᓐᓇᕋᔭᓐᖏᓚᑦ; ᓄᓗᐊᖏᓐᓂᒃ ᑎᒍᓯᒍᑎᒃ, ᓇᖏᕈᓐᓇᕋᔭᓐᖏᓚᑦ.

¹⁶ ᐅᖃᐅᔭᕐᔪᐊᑎᑐᑦ ᓯᕿᓐᓂᕐᑎᓪᓗᒍ ᐃᑦᑎᖃᕋᓗᐊᕐᐳᑦ ᐱᕈᕐᓰᕕᖕᒥ ᐃᓯᕕᖓᔪᑎᑐᑦ ᐆᒻᒪᐅᑦᓯᐊᕐᓗᑎᒃ.

¹⁷ ᐊᒫᖏᑦ ᐅᔭᕋᖕᓂᒃ ᓂᒦᓯᒪᕗᑦ; ᐅᔭᕅᑦ ᐊᑯᕐᖓᓐᓂ ᐱᕈᕐᓯᒪᒐᒥᒃ.

¹⁸ ᐃᓂᒥᓂᓪᓕ ᐊᒧᔭᐅᓗᓂ ᐄᔭᐅᒍᓂ, ᖃᐅᔨᒪᔭᐅᓂᐊᓐᖏᓚᖅ, ᐅᖃᕐᓗᓂ, ‘ᑕᒫᓂ ᑕᑯᓚᐅᕐᓯᒪᓐᖏᓚᒋᑦ.’

¹⁹ ᑕᑯᒋᑦ, ᑕᕝᕙ ᑍᒫᒃ ᖁᕕᐊᓲᑎᑐᐊᖃᕐᐳᖅ; ᐊᓯᖏᑦ ᓄᓇᒥᑦ ᓄᐃᓂᐊᕐᐳᑦ ᑖᑦᓱᒥᖓ ᐃᓇᖐᓗᑎᒃ.

²⁰ ᑕᑯᒋᑦ, ᒎᑎ ᐃᒋᑦᓯᓂᐊᓐᖏᓚᖅ ᐸᓯᔭᒃᓴᐅᖏᑦᑐᒥᒃ, ᐱᐅᖏᑦᑐᓕᔪᓪᓗ ᐊᒡᒐᖏᑦ ᑎᒍᒥᐊᕐᓂᐊᓐᖏᓔᑦ.

²¹ ᖃᓂᓯ ᐃᔪᕈᓐᓇᕐᓯᑎᑦᓱᒫᕆᕔᑦ, ᖃᓂᑦᓯᒍᓪᓗ ᐃᒡᒋᐊᖅᑰᕐᒥᔮᕐᓂᕐᒥᒃ ᓴᖅᑭᑎᑦᓯᔪᒫᕆᕗᖅ.

²² ᐃᓕᑦᓯᓐᓂᒃ ᐆᒥᓱᒃᑐᑦ ᑲᓐᖑᓱᖕᓂᕐᒥᒃ ᐊᓐᓄᕌᕐᑎᑦᓱᒫᕐᐰᑦ, ᐱᐅᖏᑦᑐᓕᔪᓪᓗ ᐊᖏᕐᕋᖏᑦ ᓄᖑᑦᓱᒫᕐᐰᑦ ᐊᓯᐅᑎᓪᓗᒋᑦ.”