ᔫᐱᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐃᓄᒃ ᐅᓇᑕᕐᑐᒃᓴᑐᑦ ᐊᒃᓱᕈᕐᑎᑕᐅᔪᑎᑐᑦ ᑍᒤᓐᖏᓛᖅ ᓄᓇᒥ, ᐅᓪᓗᖏᓪᓗ ᐱᓇᓱᐊᕐᑎᑕᐅᔪᑎᑐᑦ ᑍᒤᑦᑑᓐᖏᓛᑦ?

² ᓯᐊᓛᕆᔭᐅᔪᑐᑦ ᑖᓪᓕᓂᐅᑉ ᓂᒡᓚᑖᕐᓇᕐᑑᑉ ᓴᓂᐊᓃᑦᓱᒪᔪᑎᑐᑦ, ᐱᓇᓱᐊᕐᑎᑕᐅᔪᑎᑐᓪᓗ ᐊᑭᓕᕐᑕᐅᓂᐊᕐᓂᕐᒥᓂᒃ ᐅᑕᖅᑭᔪᑎᑐᑦ,

³ ᑕᖅᑭᓂᒃ ᐊᓂᒍᐃᑎᑕᐅᓇᓱᐊᖃᑦᑕᕐᐳᖓ ᓱᓇᓱᒐᒃᓴᖃᖏᑦᑐᓂᒃ, ᐅᓐᓄᑕᒫᓪᓗ ᕿᒃᓵᖕᓇᕐᑐᓄᑦ ᑎᑭᑎᑕᐅᖃᑦᑕᕐᓱᖓ.

⁴ ᐃᓂᓪᓚᒑᖓᒪ ᐅᖃᕐᐳᖓ, ‘ᖃᖓ ᒪᑭᓛᕐᐳᖓ?’ ᐅᓐᓄᐊᖅ ᓯᕕᑐᔫᕗᖅ, ᓇᓪᓕᐊᓐᓄᑦ ᓵᖃᑦᑕᕐᓂᕐᒧᑦ ᑕᖃᕗᖓ ᖃᐅᒻᒪᓕᕐᓂᖓᓄᑦ ᑎᑭᓪᓗᒍ.

⁵ ᑎᒥᓕᒫᕋ ᐅᓕᒃᑕᐅᓯᒪᕗᖅ ᖁᐱᕐᕈᓄᑦ ᑯᒪᖕᓄᓪᓗ; ᐅᕕᓂᒐ ᓯᑎᔪᕈᕐᓯᒪᕗᖅ, ᐊᔪᐊᒃᑲᓗ ᐃᒻᒪᒃᓯᒪᓪᓗᑎᒃ.

⁶ ᐅᓪᓗᒃᑲ ᓱᒃᑲᓂᕐᓴᐅᕗᑦ ᓄᕕᕐᓴᐅᑎᐅᑉ ᓱᑲᑎᕈᑎᖓᑕ ᓇᓕᐊᖕᓄᕋᐅᑎᖓᓂᑦ, ᐃᓱᓕᑉᐸᓪᓕᐊᕗᓪᓗ ᓂᕆᐅᖕᓂᕐᑕᖃᓚᐅᕋᑎᒃ.

⁷ ᐃᖅᑲᐅᒪᓚᐅᕆᑦ ᐃᓅᓯᕋ ᐊᓂᕐᓂᑐᐃᓐᓇᐅᖕᒪᑦ; ᐃᔩᒃᑲᒡᓗ ᐱᐅᔪᒥᒃ ᑕᑯᓚᐅᕐᓯᒪᓂᐊᕈᓐᓃᕐᓗᑎᒃ.

⁸ ᐅᕙᓐᓂᒃ ᑕᑯᖃᑦᑕᕐᑐᑦ ᑕᑯᖃᑦᑕᕐᓂᐊᕈᓐᓃᕐᐹᖓ; ᐅᕙᓐᓂᒃ ᑕᑯᓐᓇᕐᑎᓪᓗᒋᑦ, ᐱᑕᖃᕈᓐᓁᕈᒫᕐᐳᖓ.

⁹ ᓄᕗᔭᐅᑉ ᓄᖑᑉᐸᓪᓕᐊᓪᓗᓂ ᑕᑯᒃᓴᐅᔪᓐᓃᕐᐸᖕᓂᖓᑎᑐᑦ, ᑍᒫᒃᑕᐅᖅ ᑖᓐᓇ ᑐᖁᖓᔪᒃᑯᕕᖕᒧᐊᕐᑐᖅ ᐅᑎᕐᐸᓐᖏᓚᖅ;

¹⁰ ᐃᒡᓗᒥᓄᑦ ᐅᑎᖃᑦᑕᕈᓐᓃᕐᐸᒃᐳᖅ, ᐃᓂᒋᕙᓚᐅᕐᑕᖓᓂᓗ ᑕᑯᔭᐅᖃᑦᑕᕈᓐᓃᕐᐸᒃᓗᓂ.

¹¹ ᑍᒤᒻᒪᑦ, ᓂᐰᑦᑑᓂᐊᓐᖏᓚᖓ; ᐅᖃᓪᓚᖕᓂᐊᕐᐳᖓ ᓂᓐᖓᐅᒪᓪᓚᕆᒃᑲᒪ ᐊᓂᕐᓂᒃᑯᑦ; ᐊᑲᐅᒃᓴᓐᖏᓚᖓ ᐋᓐᓂᕐᓯᒪᓪᓚᕆᒃᑲᒪ ᑕᕐᓂᒃᑯᑦ.

¹² ᓱᖕᒪᑦ ᑲᒪᒌᓐᓇᕋᓱᒃᐱᖔ? ᐃᒪᕐᒥᐅᑕᑎᑐᑦ ᐆᒪᔪᕐᓗᒃᑎᑐᑦ ᑍᒤᓐᓇᓱᒋᕕᖔ?

¹³ ᓇᓪᓚᕐᓗᖓ ᐊᑲᐅᓯᑦᑎᕋᓱᒃᑲᓗᐊᕋᒪ, ᐋᓐᓂᐊᕈᓐᓁᕐᔫᒥᑦᔪᑎᒃᓴᓐᓂᒃ ᕿᓂᕋᓱᐊᕐᓗᖓ.

¹⁴ ᑕᕝᕙ ᓯᓐᓇᒃᑑᒪᑎᓪᓗᖓ ᑲᑉᐱᐊᓱᐊᑎᖃᑦᑕᕐᐸᕐᒪ ᑕᑕᒥᓐᓇᕐᑐᓂᒃ ᑕᑯᑎᓪᓗᖓ ᐅᖁᒪᖏᕐᑎᓪᓗᖓᓗ,

¹⁵ ᑕᕝᕙ ᕿᒥᑕᐅᒐᓗᐊᕈᒪ ᖃᓄᐃᒃᓴᕈᓐᓁᕐᐳᖓ ᑐᖁᓗᖓ ᑎᒥᒦᒍᓐᓃᖔᕐᓗᖓ.

¹⁶ ᐃᓅᓯᓐᓂᒃ ᓴᐱᓕᕐᐳᖓ; ᐃᓅᖏᓐᓇᕐᓂᐊᖏᓐᓇᒪ. ᑲᒪᒋᔪᓐᓁᓐᖓ, ᐃᓅᓯᕋ ᐊᓂᕐᓂᑐᐃᓐᓇᐅᖕᒪᑦ.

¹⁷ ᐃᓄᒃ ᓱᖕᒪᑦ, ᐱᓪᓚᕆᐊᓘᑎᑉᐱᐅᒃ? ᓱᖕᒪᓪᓗ ᐃᓄᒃ ᐃᓱᒪᒋᕕᐅᒃ?

¹⁸ ᐅᓪᓛᑕᒫᑦ ᐅᐸᖃᑦᑕᕋᕕᐅᒃ, ᖃᐅᔨᓴᖃᑦᑕᕐᓗᒍᓗ ᐃᑲᕐᕋᑕᒫᑦ.

¹⁹ ᖃᓄᖅ ᐊᑯᓂᐅᑎᒋᔪᖅ ᐊᓚᐅᒪᑬᓐᓇᕈᓐᓇᕐᐱᖔ? ᓄᕙᓐᓂᒃ ᐄᖅᑭᒋᐊᕋᓱᖕᓂᓐᓂ?

²⁰ ᐊᔪᕐᑐᓕᒍᒪ, ᐃᓕᖕᓅᑦ ᓱᕗᖓ, ᐃᓄᖕᓂᒃ ᖃᐅᔨᓴᕐᑎᐅᔪᑎᑦ? ᓱᖕᒪᑦ ᐱᒋᐊᖃᑦᑕᕐᕕᒋᓲᕐᓄᑦ ᐱᓕᒻᒪᒃᓴᐅᑎᒃᓴᓕᐊᕆᓯᒪᕕᖔ? ᓱᖕᒪᓪᓗ ᐃᓕᖕᓄᑦ ᐅᖁᒤᒃᓴᕈᑎᒃᓴᐅᕗᖔ?

²¹ ᐊᔪᕐᑐᓕᓂᒃᑲ ᐃᓱᒪᒋᔪᓐᓁᕈᓐᓁᓪᓕᕕᒌᑦ? ᐱᐅᖏᑦᑐᓕᓂᒃᑲᓗ ᐲᕈᓐᓁᓪᓕᕕᒌᑦ? ᒫᓐᓇᓗ ᓄᓇᒥ ᓇᓪᓚᖓᔪᒫᓕᕐᐳᖓ; ᐅᕙᓐᓂᒃ ᕿᓂᓕᕋᓗᐊᕈᕕᑦ, ᐱᑕᖃᕈᓐᓁᕈᒫᕐᐳᖓ.”