ᔫᐱᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱ

¹ ᑕᕝᕙ ᔫᐱ ᑭᐅᕗᖅ:

² “ᐊᑲᐅᖏᑦᔪᑎᒃᓴᖃᐅᕐᓂᕆᔭᒃᑲ ᕿᒃᓵᖕᓂᕆᔭᒃᑲᓗ ᐅᖁᒤᓐᓂᕐᓯᐅᑎᓄᑦ ᐅᖁᒤᓐᓂᕐᓂᐊᕐᑕᐅᒐᔭᕐᐸᑕ,

³ ᐅᖁᒤᓐᓂᕐᓴᐅᒐᔭᕐᐳᑦ ᓯᐅᕋᕐᓂᑦ ᐃᒪᐅᑉ ᓯᓈᓃᑦᑐᓂᑦ; ᑍᒤᒻᒪᑦ ᐅᖃᐅᓯᕆᔭᒃᑲ ᑐᓴᓕᒪᓇᖏᑦᑐᑦ ᑲᒪᓂᐊᕈᑎᒋᓂᐊᕐᓇᒋᑦ.

⁴ ᒎᑎᐅᑉ ᐊᔪᒐᖃᖏᑦᑑᑉ ᖃᕐᔪᖏᑕ ᐃᓗᒃᑯᑦ ᑲᐱᓯᒪᖕᒪᖓ; ᑐᖁᓐᓇᕐᑐᖏᓐᓂᒡᓗ ᑎᒥᒐ ᐃᒥᕐᓯᒪᓕᕐᓗᓂ; ᒎᑎᐅᑉ ᑲᑉᐱᐊᓱᒃᑎᑦᓯᓂᕐᒥᓄᑦ ᑎᑭᕝᕕᐅᑎᓯᒪᖕᒪᖓ.

⁵ ᓯᐅᑎᖅᑯᕐᑐᔪᖅ ᓂᑦᔮᓲᖑᕚ ᐃᕕᖕᓂᒃ ᓂᕆᓕᕌᖓᒥ? ᐃᒻᒧᒃᓯᐅᒐᐅᓪᓗ ᐸᖕᓂᖓ ᓂᑦᔮᓲᖑᖏᓐᓂᕗᖅ ᐃᕕᖕᓂᒃ ᓂᕆᓪᓗᓂ.

⁶ ᑭᓇ ᓂᕆᔪᓐᓇᕐᐹ ᑎᐱᖃᖏᑦᑐᓂᒃ ᑕᕆᐅᖃᖏᑦᑐᓂᒡᓗ? ᐅᕝᕙᓗ ᑎᐱᖃᓲᖑᕚ ᒪᓐᓂᐅᑉ ᖃᑯᕐᓂᖓ?

⁷ ᑍᒤᑦᑐᓂᒃ ᓂᕿᓂᒃ ᓂᕆᔪᒪᖏᑦᓯᐊᕐᐳᖓ; ᑕᒪᒃᑯᐊ ᓂᕆᑐᐊᕈᒃᑭᑦ ᒥᕆᐊᓐᖑᓕᕐᑎᑕᒐᔭᕐᐳᖓ.

⁸ ᖃᓄᕐᑐᖅ ᑐᒃᓯᐊᕐᓂᕋ ᑭᐅᔭᐅᓚᐅᕐᓕ, ᒎᑎᐅᓪᓗ ᐱᔪᒪᔭᓐᓂᒃ ᑐᓂᓯᕕᒋᓗᓂᖓ;

⁹ ᒎᑎᐅᑉ ᓱᕋᒐᓱᐊᕈᒪᓗᓂᖓ ᐱᓇᓱᐊᕈᒪᒍᓂ, ᐱᐅᓂᕐᓴᐅᓕᕋᔭᕐᐳᖅ ᓴᒃᑯᓪᓗᓂᖓ ᑐᖁᑦᓯᐊᒻᒪᕆᒃᑯᓂᖓ!

¹⁰ ᑍᒤᑐᐊᕐᐸᑦ ᖁᕕᐊᓱᖕᓂᕐᒧᑦ ᓯᕆᒐᔭᕐᐳᖓ ᐋᓐᓂᐊᕋᓗᐊᕈᒪ; ᐃᑦᔪᕐᓁᑦᑑᑉ ᐅᖃᐅᓯᖏᓐᓂᒃ ᓈᓚᖏᑦᑑᓚᐅᕐᓯᒪᖏᓐᓇᒪ.

¹¹ ᓱᓇᒥᒃ ᓴᓐᖏᔫᑦᔪᑎᒃᓴᖃᓕᕐᐳᖔ ᐃᓅᒃᑲᓐᓂᕋᓱᐊᕈᑎᒃᓴᒥᒃ? ᓱᖕᒪᓪᓗ ᓱᓕ ᐃᓅᔪᒃᓴᐅᕗᖓ ᓂᕆᐅᒋᔭᒃᓴᖃᕈᓐᓁᕐᓗᖓ?

¹² ᓴᓐᖏᓂᕋ ᐅᔭᕋᒃᑎᑐᑦ ᓯᑎᔫᓪᓗᓂ ᓴᓇᔭᐅᓯᒪᕚ? ᑎᒥᒐᓗ ᑲᓐᓄᔭᑎᑐᑦ ᑍᒤᑉᐹ?

¹³ ᓄᑭᖃᕈᓐᓁᕋᒪ ᐅᕙᓐᓂᒃ ᐃᑲᔪᕈᓐᓁᓪᓕᕗᖓ, ᓇᓪᓕᐊᓐᓄᓪᓘᓐᓃᑦ ᐃᑲᔪᕐᑕᐅᔪᓐᓁᓪᓕᕗᖓ.

¹⁴ ᑍᒤᑦᑑᑎᓪᓗᖓ ᐱᑦᓯᐊᕐᑎᒋᔭᓐᓂᒃ ᐱᖃᓐᓇᕆᔭᖃᕆᐊᖃᕐᐳᖓ, ᒎᑎᒥᒃ ᐊᔪᒐᖃᖏᑦᑐᒥᒃ ᕿᒤᓯᒪᒐᓗᐊᕈᒪ ᕿᒤᓯᒪᖏᒃᑯᒪᓘᓐᓃᑦ.

¹⁵ ᐃᓚᒃᑲ ᐅᕙᓐᓂᒃ ᓴᓂᖅᑯᐃᓐᓁᓯᒪᕗᓯ, ᑰᒃᑎᑐᑦ ᐃᖏᕐᕋᔪᑎᑐᑦ.

¹⁶ ᑰᒃᑎᑐᑦ ᓯᒥᒃᑕᐅᓯᒪᔪᑎᑐᑦ ᐊᐳᒻᒧᑦ ᓂᓚᖕᒧᓪᓗ.

¹⁷ ᐅᖅᑰᓯᖕᒪᑦ ᐃᒪᖃᕈᓐᓃᖃᑦᑕᕐᑐᑎᑐᑦ, ᑰᕕᓂᐅᓪᓗ ᐃᖅᑲᕕᓂᖓᑐᑦ ᓴᖅᑭᔮᓕᕐᑐᑐᑦ ᐸᓂᕐᓯᒪᓕᕐᑐᑎᑐᓪᓗ.

¹⁸ ᐅᖓᓯᒃᑐᒧᑦ ᐃᖏᕐᕋᕙᒃᑐᑦ ᐃᒪᕐᓯᐅᕐᓗᑎᒃ ᐊᓯᐅᕗᑦ; ᓇᒧᑐᐃᓐᓇᖅ ᑐᑮᕈᑎᒐᒥᒃ ᑐᖁᕗᑦ, ᐃᓄᖃᖏᑦᑐᒥ.

¹⁹ ᐅᖓᓯᒃᑐᒧᑦ ᐃᖏᕐᕋᕙᒃᑐᑦ ᓰᐸᒥᑦ ᑏᒪᒥᓪᓗ ᐱᔪᑦ ᕿᓂᕆᐊᓕᕐᐳᑦ.

²⁰ ᓇᓂᓯᓂᐊᕆᐊᒥᓂᒃ ᓂᕆᐅᖕᓂᖃᕈᓐᓁᕐᐳᑦ; ᑰᒐᓛᕕᓂᐅᑉ ᐸᓂᕐᓯᒪᓕᕐᑑᑉ ᓴᓂᐊᓄᐊᕋᒥᒃ.

²¹ ᐃᓕᑦᓯ ᒫᓐᓇ ᑰᒐᓛᑎᑐᑦ ᑍᒤᑦᑑᕗᓯ ᐅᕙᓐᓄᑦ; ᖃᓄᐃᓐᓂᕆᔭᒃᑲ ᑕᑯᒐᑦᓯᐅᒃ ᐅᖓᕙᕆᐊᕐᐳᓯ ᓯᕘᕋᓂᕐᒧᑦ.

²² ᑐᓂᓯᕕᐅᔪᒪᓪᓗᖓ ᐱᔪᒪᓚᐅᕐᓯᒪᕗᖔ ᐃᓕᑦᓯᓐᓂᑦ? ᐱᖁᑎᑦᓯᓐᓂᒃ ᐊᑭᓖᓗᖓ ᓯᓔᕐᕆᒃᓯᓂᒃᑯᑦ ᐱᔪᒪᓚᐅᕐᓯᒪᕗᖔ?

²³ ᐅᕝᕙᓗ ᐊᑭᕋᕐᑐᕐᑎᓐᓂᑦ ᐃᓕᑦᓯᓐᓄᑦ ᓴᐳᑎᔭᐅᔪᒪᓚᐅᕐᓯᒪᕗᖔ? ᐅᕝᕙᓗ ᐅᖁᒤᒃᓴᕐᑎᑦᓯᔨᓐᓂᑦ ᓂᐅᕕᐊᕆᓗᓯᓐᖓ ᐲᕐᑎᓚᐅᕐᓯᒪᕕᓯᓐᖔ?

²⁴ ᐊᑏ, ᐊᔪᕆᕐᑐᓚᐅᕐᓯᓐᖓ ᓂᐱᖃᕐᓂᐊᓐᖏᓚᖓ; ᖃᓄᖅ ᐸᓯᔭᒃᓴᐅᓂᖃᕐᒪᖔᕐᒪ ᑐᑭᓯᑎᓚᐅᕐᓯᓐᖓ.

²⁵ ᓱᓕᔪᑦ ᐅᖃᐅᓰᑦ ᓱᖅᑯᐃᕐᓯᑎᑦᓯᔪᓐᓇᕐᐳᑦ! ᐃᓕᑦᓯᓕ ᐅᖃᓪᓚᖃᑦᑕᕐᐳᓯ ᑐᑭᖃᖏᑦᓯᐊᕐᑐᓂᒃ.

²⁶ ᐅᖃᓪᓚᒐᓱᒋᕕᓯᓐᖔ ᑐᑭᖃᖏᑦᑐᓂᒃ ᐊᓄᕆᑎᑐᑦ ᑍᒤᑦᑐᓂᒃ; ᓱᖕᒪᓪᓕ ᐅᖃᐅᓯᒃᑲ ᑭᐅᖃᑦᑕᕐᐱᓯᐅᒃ ᓂᕆᐅᖕᓂᖃᖏᑦᓯᐊᕐᓗᓯ?

²⁷ ᐊᒡᓛᑦ ᐃᓕᐊᕐᔪᖕᓂᒃ ᓇᓛᐅᑦᓵᕈᑎᑎᒍᑦ ᓯᐊᓛᕐᑖᕋᓱᐊᕐᐸᒃᐳᓯ, ᐊᔪᕐᓴᕈᓐᓃᕐᑎᓯᒪᓪᓗᓯᓗ ᐱᖃᓐᓇᕆᔭᑦᓯᓐᓂᒃ ᓯᓔᕐᕆᓯᖃᑦᑕᕐᓂᒃᑯᑦ!

²⁸ ᐅᕙᓐᓄᑦ ᑕᑯᓴᑦᓯᐊᓚᐅᕆᑦᓯ; ᐃᓕᑦᓯᓐᓄᑦ ᓴᒡᓗᑦᔮᖏᑦᑐᖓ.

²⁹ ᐱᓕᕆᓇᓱᐊᕐᓂᓯ ᓈᒻᒪᓕᕐᐳᖅ ᐱᑦᓯᐊᖏᓐᓇᓱᐊᕈᓐᓁᕆᑦᓯ. ᓯᕗᓂᕐᓗᖁᔪᓐᓁᕐᓯᓐᖓ, ᓈᒻᒪᓈᕐᓯᒪᒐᒪ.

³⁰ ᓱᓕ ᓴᒡᓗᓇᓱᒋᕕᓯᓐᖔ? ᑕᒻᒪᕐᑐᒥᒃ ᖃᐅᔨᔪᓐᓇᕋᓱᒋᓐᖏᓚᑦᓯᓐᖔ?”