ᔫᐱᐅᑉ ᐊᒡᓚᖏᑦ 42 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱᐅᑉ ᖃᕿᐊᓕᕐᓂᖓ ᐋᖅᑭᒃᑕᐅᒃᑲᓐᓂᕐᓂᖓᓗ ᔫᐱ

¹ ᑕᕝᕙ ᔫᐱᐅᑉ ᐊᑕᓂᖅ ᑭᐅᕚ ᐅᖃᕐᓗᓂ:

² “ᖃᐅᔨᒪᕗᖓ ᖃᓄᓕᒫᑦᓯᐊᖅ ᐱᔪᓐᓇᕋᕕᑦ, ᐃᓱᒪᒋᓯᒪᔭᑎᓪᓗ ᐊᓯᖕᓄᑦ ᐊᐅᓚᑕᐅᔪᓐᓇᕋᑎᒃ.

³ ᐅᖃᕐᓯᒪᕗᑎᑦ ᓯᓚᑐᓂᕐᓂᒃ ᖁᓚᕈᑎᖃᖁᓇᖓ ᓇᓗᑦᓯᐊᕐᑕᓐᓂᒃ ᐅᖃᐅᓯᖃᕐᓯᒪᒐᒪ, ᑍᒤᒻᒪᑦ ᐅᖃᐅᓯᖃᓚᐅᕐᐳᖓ ᖃᐅᔨᒪᓐᖏᑕᓐᓂᒃ, ᓂᕐᑐᕐᓇᕐᓃᑦ ᐊᖏᓗᐊᕐᒪᑦ ᑐᑭᓯᔭᕆᐊᖓ.

⁴ ᐅᖃᓪᓚᒃᑎᓪᓗᑎᑦ ᓈᓚᖁᓚᐅᕐᐸᕐᒪ; ᐊᐱᖅᑯᓯᕆᔭᑎᓪᓗ ᑭᐅᓇᓱᐊᕐᑕᐅᖁᓪᓗᒋᑦ.

⁵ ᑕᕝᕙ ᑐᓵᓚᐅᕐᐸᒋᑦ ᓯᐅᑎᓐᓄᑦ ᑐᓵᑦᓯᐊᕐᓗᑎᑦ, ᒫᓐᓇᓕ ᐃᔨᓐᓄᑦ ᓇᖕᒥᓂᖅ ᑕᑯᕙᒋᑦ;

⁶ ᑍᒤᒻᒪᑦ ᑲᓐᖑᓱᓕᕐᐳᖓ ᐸᓯᔭᒃᓴᐅᓕᕐᓗᖓᓗ, ᖃᕿᐊᓕᕐᓗᖓᓗ ᐳᔪᕋᒥᑎᕐᓂᐊᕐᐳᖓ ᐊᕐᔭᓕᓂᕐᑎᕐᓗᖓᓗ.”

ᐅᖃᐅᓰᑦ ᓄᖅᑲᐅᑎᐅᓕᕐᑐᑦ

⁷ ᑕᕝᕙ ᐊᑕᓂᖅ ᐅᖃᐅᓯᕐᓂᒃ ᑕᒪᒃᑯᓂᖓ ᐅᖃᕇᕋᒥ ᔫᐱᒧᑦ, ᐃᓕᐹᓯᒧᑦ ᑎᒪᓁᑎᒥᐅᑕᕐᒧᑦ ᐊᑕᓂᖅ ᐅᖃᓕᕐᐳᖅ, “ᐃᓕᖕᓄᑦ ᓂᓐᖓᓕᕐᐳᖓ ᐃᓚᓐᓇᕆᔭᕐᓄᓪᓗ ᒪᕐᕉᖕᓄᑦ; ᓱᓕᖏᑦᑐᒥᒃ ᐅᕙᓐᓂᒃ ᐅᖃᐅᑎᖃᓚᐅᕋᓯ, ᔫᐱᐅᓪᓕ ᐅᖃᐅᓯᕆᓯᒪᕚᖓ ᓱᓕᔪᒥᒃ.

⁸ ᑍᒤᒻᒪᑦ ᒫᓐᓇ ᐊᖑᓴᓪᓗᕐᓂᒃ 7ᓂᒃ ᓰᐲᓪᓗ ᐊᖑᓴᓪᓗᖏᓐᓂᒃ 7ᓂᒃ ᐊᑐᐃᓐᓇᕈᐃᓕᕆᑦ, ᔫᐱᒧᓪᓗ ᐱᔨᓐᓄᐊᕐᓗᑎᑦ, ᑐᓂᕐᕈᓯᕐᓗᑎᓪᓗ ᐃᕝᕕᑦ ᐱᑦᔪᑎᒋᓗᑎᑦ ᑐᓂᕐᕈᑎᒃᓴᓄᑦ ᐃᑯᐊᓚᔭᒃᓴᓄᑦ; ᔫᐱᒧᓪᓗ ᑐᒃᓯᐅᑦᔭᐅᖁᓪᓗᑎᑦ, ᑖᑦᓱᒪ ᑐᒃᓯᐊᕐᓂᖓ ᐃᓚᓕᐅᕐᓂᐊᕋᒃᑯ ᓯᓔᑦᑐᒥᒃ ᐱᓂᐊᓚᐅᕐᓂᑦᓯᓐᓄᑦ ᓱᒋᐊᕐᑕᐅᑦᔪᑎᖃᖁᓇᓯ; ᓱᓕᔪᒥᒃ ᐅᕙᓐᓂᒃ ᐅᖃᐅᓯᖃᓚᐅᖏᓐᓇᑦᓯ, ᑖᑦᓱᑐᓇᖅ ᐱᔨᑦᑐᑦ ᔫᐱᑐᑦ.”

⁹ ᑕᕝᕙ ᐃᓕᐹᓯ ᑎᒪᓁᑎᒥᐅᑕᖅ ᐱᐅᓪᑖᓗ ᓲᕼᐂᑎᒥᐅᑕᖅ ᔪᐸᕆᓗ ᓁᒪᑍᑎᒥᐅᑕᖅ ᐱᓇᓱᐊᓚᐅᕐᐳᑦ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᓐᓂᒃ; ᐊᑕᓂᐅᓪᓗ ᔫᐱᐅᑉ ᑐᒃᓯᐅᑦᔨᓂᖓ ᐃᓚᓕᐅᓚᐅᕐᐹ.

¹⁰ ᔫᐱᓕ ᑐᒃᓯᐅᑦᔨᔭᕇᕐᓯᒪᓕᕐᑎᓪᓗᒍ ᐃᓚᓐᓇᕆᔭᒥᓂᒃ, ᐊᑕᓂᐅᑉ ᒪᑭᑎᒃᑲᓐᓂᓕᓚᐅᕆᕚ ᐱᖁᑎᒋᓚᐅᕐᑕᖏᑕᓗ ᒪᕐᕈᐃᕐᑑᑎᓪᓗᐊᖏᓐᓂᒃ ᐱᑖᕐᑎᒃᑲᓐᓂᕐᓗᒍ.

¹¹ ᖃᑕᓐᖑᑎᓕᒫᖏᓪᓗ, ᓇᔭᓕᒫᖏᓪᓗ, ᖃᐅᔨᒪᓚᐅᕐᑕᓕᒫᖏᓪᓗ ᔫᐱᒧᑦ ᐳᓛᕆᐊᓚᐅᕐᐳᑦ ᓂᕆᖃᑎᒋᓪᓗᒍᓗ ᐊᖏᕐᕋᖓᓂ; ᓇᒡᓕᒍᓱᖕᓂᕐᒥᖕᓂᒃ ᐃᓚᑦᓱᒍᓱᖕᓂᕐᒥᓂᒡᓗ ᓇᓗᓁᕐᓯᓚᐅᕐᐳᑦ ᓮᒻᒪᕐᓴᕐᓗᒍᓗ ᐊᑕᓂᐅᑉ ᐅᖁᒤᑦᑐᓕᒫᓂᒃ ᑎᑭᑕᐅᑎᑦᓯᓯᒪᓂᕆᓚᐅᕐᑕᖏᓐᓂᒃ ᑖᑦᓱᒧᖓ; ᐊᑐᓂᓪᓗ ᑮᓇᐅᔭᒥᖕᓂᒃ ᑐᓂᓯᓚᐅᕐᐳᑦ ᒎᓗᓂᒡᓗ ᓇᒡᒍᐊᕐᒥᖕᓂᒃ ᑐᓂᓯᕕᒋᓪᓗᒍ.

¹² ᐊᑕᓂᐅᓪᓗ ᔫᐱᐅᑉ ᐃᓅᓯᖓ ᐃᓱᐊᓄᑦ ᑎᑭᓪᓗᒍ ᓮᒻᒪᕐᑎᓚᐅᕐᐹ ᓯᕗᓂᖓᓂ ᐱᒋᓚᐅᕐᑕᖏᓐᓂᑦ ᐊᖏᓂᕐᓴᒻᒪᕆᐊᓗᖕᓂᒃ; ᓰᐱᖁᑎᖃᓕᓚᐅᕐᐳᖅ 14,000ᓂᒃ, ᑳᒥᓕᖁᑎᖃᓕᕐᓗᓂᓗ 6,000ᓂᒃ, ᐃᒻᒧᓕᐅᕐᑏᓪᓗ ᐊᖑᓴᓪᓗᖏᓐᓂᒃ ᕿᒧᒃᓯᐅᑎᓴᓂᒃ 2,000ᓂᒃ, ᓯᐅᑎᖅᑯᑐᔪᖁᑎᖃᓕᕐᓗᓂᓗ ᐊᕐᓇᓪᓗᖕᓂᒃ 1,000ᓂᒃ.

¹³ ᐃᕐᓂᕐᑖᓚᐅᕐᐳᕐᓗ 7ᓂᒃ ᐸᓂᒃᑖᕐᓗᓂᓗ ᐱᖓᓱᓂᒃ.

¹⁴ ᐸᓂᖏᓐᓂᑦ ᐊᖓᔪᒃᓯᕐᐹ ᔨᒤᒪᒥᒃ ᐊᑦᓯᕐᐹ; ᑐᖓᓕᖓ ᑭᔨᐊᒥᒃ; ᐱᖓᔪᖓᑦ ᑭᕆᓐ-ᕼᐊᐳᒃᒥᒃ.

¹⁵ ᓄᓇᕐᔪᐊᓕᒫᒥ ᐃᓂᖁᓇᕐᓂᕐᓴᕐᑕᖃᓚᐅᓐᖏᓚᖅ ᔫᐱᐅᑉ ᐸᓂᖏᓐᓂᑦ; ᐊᑖᑕᖓᑦᑕᓗ ᐱᖁᑎᒥᓂᒃ ᑭᖑᕐᖑᑦᔨᔪᒃᓴᓐᖑᕐᑎᓚᐅᕐᐰᑦ ᐃᕐᓂᖏᓐᓄᑦ ᐃᓚᒋᔭᐅᑎᓪᓗᒋᑦ.

¹⁶ ᑕᒪᑐᒪ ᑭᖑᓂᖓᒍᑦ ᔫᐱ ᐃᓅᒃᑲᓐᓂᓚᐅᕐᐳᖅ ᐊᕐᕌᒍᓂᒃ 140ᓂᒃ, ᐃᕐᖑᑕᒥᓂᒃ ᑕᑯᔪᓐᓇᕐᓯᓚᐅᕐᐳᖅ ᐃᓗᓕᕐᒥᓂᒡᓗ.

¹⁷ ᔫᐱᓗ ᐃᓄᑐᖃᐅᓕᕐᓗᓂ ᑐᖁᓚᐅᕐᐳᖅ, ᐃᓅᓯᒃᓴᒥᓂᒃ ᐃᓱᓕᑦᑎᑦᓯᐊᕐᓗᓂ.