ᔫᐱᐅᑉ ᐊᒡᓚᖏᑦ 40 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᑕᓂᕐᓗ ᐅᖃᒃᑲᓐᓂᕐᐳᖅ ᔫᐱᒧᑦ ᐅᖃᕐᓗᓂ:

² “ᐊᔪᒐᖃᖏᑦᑐᒥᒃ ᓈᒻᒪᖏᑦᔪᑎᒃᓴᕐᓯᐅᕐᓗᑎᑦ ᐊᑭᒪᔪᒪᕖᑦ? ᒎᑎᒥᒃ ᐂᕙᖃᑎᖃᕈᒪᔫᑉ, ᑕᒪᓐᓇ ᑭᐅᓕᕐᓕᐅᒃ.”

ᔫᐱ

³ ᑕᕝᕙ ᔫᐱᐅᑉ ᐊᑕᓂᖅ ᑭᐅᕚ:

⁴ “ᑕᑯᒋᑦ, ᓯᓔᑦᑐᐊᓘᓪᓗᖓ ᐅᖃᓪᓚᓚᐅᕐᐳᖓ; ᖃᓄᖅ ᑭᐅᔪᒃᓴᐅᕗᖓ? ᖃᓂᕋ ᐊᒡᒐᓐᓄᑦ ᒪᑐᕙᕋ ᐅᖃᒃᑲᓐᓂᖁᓇᖓ.

⁵ ᐅᖃᓪᓚᒌᓚᐅᕋᒪ, ᑭᐅᓂᐊᕈᓐᓁᕐᐳᖓ; ᐂᑉᐸᖓᓂᒡᓗ, ᐅᖃᓪᓚᓗᐊᕐᓯᒪᓕᕇᕐᐳᖓ.”

ᐊᑕᓂᐅᑉ ᔫᐱᒧᑦ ᐅᖃᓪᓚᖕᓂᖓᑕ ᐂᑉᐸᖓ

⁶ ᑕᕝᕙ ᐊᑕᓂᐅᑉ ᔫᐱ ᑭᐅᕚ ᐊᓄᕆᕐᔪᐊᕐᒦᓪᓗᓂ, ᐅᖃᕐᐳᖅ:

ᐊᑕᓂᖅ

⁷ “ᒫᓐᓇ ᐅᐸᓗᖎᔭᓕᕆᑦ ᐊᖑᑎᓪᓚᕆᒃᑎᑐᑦ; ᐊᐱᕐᓱᕈᒪᒐᒃᑭᑦ, ᑭᐅᖃᑦᑕᕐᑎᓪᓗᑎᑦ.

⁸ ᓈᒻᒪᓈᕐᓯᒪᖏᓐᓂᕋ ᓇᓗᓁᕈᓐᓇᕐᐱᐅᒃ? ᑕᒻᒪᕐᓯᒪᓂᕋᕈᓐᓇᕐᐱᖔ ᐃᓕᖕᓂᒃ ᑕᒻᒪᕐᓯᒪᖏᓐᓂᕋᕐᓗᑎᑦ?

⁹ ᒎᑎᑐᑦ ᓲᖑᓂᖃᕐᑎᒋᕖᑦ? ᓂᐱᖅᑯᕐᑐᔪᓐᓇᕐᐲᑦ ᑖᑦᓱᑐᓇᖅ ᑲᓪᓕᕐᕙᓗᒃᑐᑎᑐᑦ?

¹⁰ ᓇᓗᓁᔭᓕᕆᑦ ᐊᔪᖏᑦᑐᕐᔪᐊᖑᓂᕐᓂᒃ ᖃᓄᐃᑦᑑᓂᕐᓂᒡᓗ; ᐅᐱᓐᓇᕐᓯᑎᓪᓗᑎᑦ ᓂᕐᑐᕐᓇᕐᓯᑎᓪᓗᑎᓪᓗ;

¹¹ ᑕᑯᓚᐅᒃᑭᑦ ᒪᑯᐊ ᐱᐅᔪᕆᓃᑦ, ᓂᓐᖓᒡᕕᒋᓚᐅᒃᑭᑦ ᓂᑲᒋᖏᓪᓗᒋᑦ, ᒥᑭᒡᓕᑎᓕᖁᓪᓗᒋᑦ.

¹² ᑕᑯᓚᐅᒃᑭᑦ ᐱᐅᔪᕆᔪᓕᒫᑦ, ᐅᕐᕈᑎᓪᓗᒋᓪᓗ; ᐱᐅᖏᑦᑐᓕᔪᓪᓗ ᑐᓐᖓᕕᖏᑦ ᑐᓪᓕᕋᕐᓗᒋᑦ.

¹³ ᓄᓇᒧᑦ ᐃᔨᓚᐅᒃᑭᑦ ᐊᑕᖏᕐᓗᒋᑦ ᐊᑕᐅᑦᓯᒃᑯᑦ; ᑕᓕᑎᓪᓗᒋᑦ ᑮᓇᖏᑦ ᓄᓇᐅᑉ ᐊᑖᓄᑦ.

¹⁴ ᑕᕝᕙ ᐅᕙᖓᑦᑕᐅᖅ ᓇᓗᓁᕐᓂᐊᕐᐸᒋᑦ ᐅᐱᓐᓇᕐᓯᑎᓪᓗᑎᑦ, ᐱᔪᓐᓇᕐᓂᕐᓄᑦ ᓇᖕᒥᓂᖅ ᓵᓚᖃᕈᓐᓇᕐᓯᓂᕐᓂᒃ.

¹⁵ ᑕᑯᒍᒃ ᓂᕐᔪᑎᐊᓗᒃ ᐱᕼᐃᒧᓯᒥᒃ ᐊᑎᓕᒃ, ᑖᓐᓇᑦᑕᐅᖅ ᓴᓇᓚᐅᕐᐸᕋ ᐃᓕᒃᑐᑦ ᓴᓇᓚᐅᕋᒃᑭᑦ; ᐃᕕᒃᓱᒐᕐᓂᒃ ᓂᕆᕙᒃᐳᖅ ᐃᒻᒧᒃᓯᐅᒊᑦ ᐊᖑᓴᓪᓗᖏᑎᑐᑦ.

¹⁶ ᑕᑯᒋᑦ, ᑖᑦᓱᒪ ᓴᓐᖏᓐᓂᖓ ᖁᒃᑐᕋᖏᓐᓃᑉᐳᖅ, ᐱᔪᓐᓇᕐᓂᖓᓗ ᓈᖓᑕ ᓄᑭᖏᓐᓃᑉᐳᖅ.

¹⁷ ᐸᒥᐅᖓ ᓯᑎᕗᖅ ᓇᐹᕐᑐᑎᑐᑦ ᓰᑕᕆᑐᑦ ᓯᑕᒃᑕᑎᑐᑦ; ᖁᒃᑐᕋᖏᒃᑕ ᓄᑭᖏᑦ ᓴᓐᖏᕗᑦ ᕿᓚᒃᓱᕐᓯᒪᔪᑎᑐᑦ.

¹⁸ ᓴᐅᓂᖏᑦ ᑲᓐᓄᔭᑎᑐᑦ ᓯᑎᑎᒋᕗᑦ, ᓂᐅᖏᓪᓗ ᓴᕕᕋᔭᒃᑎᑐᑦ ᑍᒤᓪᓗᑎᒃ.

¹⁹ ᑕᒪᒃᑯᐊ ᒎᑎᐅᑉ ᓴᓇᔭᖏᓐᓄᑦ ᓯᕗᓪᓕᕐᐸᐅᓯᒪᕗᑦ; ᑖᑦᓱᒪᑐᐊᕐᓗ ᓴᓇᓚᐅᕐᑑᑉ ᓵᓚᒋᔪᓐᓇᕐᓗᓂᒋᑦ.

²⁰ ᖃᖅᑬᑦ ᐱᕈᕐᑎᑦᓯᕗᑦ ᑖᒃᑯᐊ ᓂᕿᒃᓴᖏᓐᓂᒃ ᑕᕝᕙᓂ ᐆᒪᔪᓕᒫᑦ ᓄᔪᐊᕐᑐᑦ ᐱᓐᖑᐊᖃᑎᒌᒃᐸᒃᐳᑦ.

²¹ ᐃᓂᓪᓚᖓᕙᒃᐳᖅ ᐅᕐᐱᐅᔮᕐᑐᑦ ᓇᐹᕐᑐᑦ ᑕᕐᕋᓕᓂᖏᓐᓂ, ᐃᕕᐅᔧᓪᓗ ᑕᑭᔫᑎᑦ ᐅᕐᔪᐃᓪᓗ ᐊᑖᓂ ᐃᔨᕐᓯᒪᕙᒃᓗᑎᒃ.

²² ᐅᕐᐱᐅᔮᕐᑐᓄᑦ ᓇᐹᕐᑐᓄᑦ ᐅᓕᒃᑕᐅᓯᒪᕙᒃᐳᑦ; ᐅᕐᐱᖕᓄᓪᓗ ᑰᖕᒥᐅᑕᓄᑦ ᑕᑭᔫᑎᓄᑦ ᐊᕙᓗᔭᐅᓯᒪᕙᒃᓗᑎᒃ.

²³ ᑕᑯᒋᑦ, ᑰᒑᓗᒃ ᑰᓪᓚᕆᓕᕋᓗᐊᕐᐸᑦ ᑲᑉᐱᐊᓱᓕᕐᐸᓐᖏᓚᑦ; ᔪᐊᕐᑕᓂᐅᓪᓗ ᑰᖓ ᑰᓕᕋᓗᐊᕐᐸᑦ ᑮᓇᖓᓄᑦ ᐅᐃᒪᔭᓕᕈᑎᒋᕙᓐᖏᓛ.

²⁴ ᑭᐊ ᐱᔭᕆᔪᓐᓇᕐᐸᐅᒃ ᓂᒃᓯᖃᕐᑎᓪᓗᓂᐅᒃ? ᕿᖓᖓᒍᓪᓗ ᐳᑐᔭᐅᔪᓐᓇᕐᐹ ᓂᒐᕐᑎᑕᐅᓗᓂ?”