ᔫᐱᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᕗᓪᓕᕐᐹᖅ ᐅᖃᖃᑎᒌᖕᓂᖅ 4:1—14:22 ᐃᓕᐹᓯ

¹ ᑕᕝᕙ ᐃᓕᐹᓯ ᑎᒪᓁᑎᒥᐅᑕᖅ ᑭᐅᕗᖅ ᐅᖃᕐᓗᓂ:

² “ᔫᐲ, ᐊᑲᐅᒃᓴᕋᔭᓐᖏᓚᑏᑦ ᐅᖃᓪᓚᒡᕕᒋᒍᒃᑭᑦ? ᓂᐱᖃᖏᑦᑕᕆᐊᒃᓴᖅ ᐊᔪᓕᕋᒪ.

³ ᑕᑯᒋᑦ, ᐅᓄᕐᑐᓂᒃ ᐃᓕᓐᓂᐊᕐᑎᑦᓯᓯᒪᕗᑎᑦ, ᓴᓐᖐᑦᑐᓂᒡᓗ ᓄᑭᒃᑖᕐᑎᑦᓯᖃᑦᑕᕐᓯᒪᓪᓗᑎᑦ.

⁴ ᐹᓪᓚᒃᑐᖃᕌᖓᑦ ᐅᖃᐅᓯᒃᑯᑦ ᓂᑯᕕᑎᑦᓯᖃᑦᑕᕐᓯᒪᕗᑎᑦ, ᓴᓐᖐᓕᓯᒪᔪᓂᒡᓗ ᒪᑭᑎᑦᓯᖃᑦᑕᕐᓯᒪᓪᓗᑎᑦ.

⁵ ᒫᓐᓇᓕ ᐊᑲᐅᖏᑦᑐᒧᑦ ᑎᑭᑕᐅᒐᕕᑦ, ᕿᓄᐃᓵᕈᓐᓁᓪᓕᕗᑎᑦ; ᑕᒪᑐᒧᖓᓗ ᐊᒃᑐᕐᑕᐅᒐᕕᑦ, ᖁᐊᕐᓵᖓᓕᕐᐳᑎᑦ.

⁶ ᒎᑎᒥᒃ ᓯᕘᕋᓃᑦ ᑕᒪᓐᓇ ᒪᓂᒍᕈᑎᒋᖏᑉᐱᐅᒃ? ᐃᓅᓯᕐᐱᓪᓗ ᐸᓯᔭᒃᓴᐅᓂᖃᖏᓐᓂᖓ ᓂᕆᐅᖕᓂᖃᕈᑎᒋᖏᑉᐱᐅᒃ?

⁷ ᒫᓐᓇ ᐃᓱᒪᓚᐅᕆᑦ, ᐸᓯᔭᒃᓴᐅᖏᑦᑐᒥᒃ ᐊᓯᕈᕐᑕᐅᔪᖃᓚᐅᕐᓯᒪᕚ? ᐅᕝᕙᓗ ᐃᓱᐊᕐᑐᓕᔪᒥᒃ ᑐᖁᑕᐅᔪᖃᓚᐅᕐᓯᒪᕚ?

⁸ ᑕᑯᖃᑦᑕᕐᓯᒪᕗᖓ ᐱᐅᖏᑦᑐᓂᒃ ᑲᓐᖓᕐᓱᐃᓯᒪᔪᓂᒃ ᐊᑲᐅᖏᑦᑐᓂᒡᓗ ᑲᓐᖓᕐᓱᐃᔪᑦ ᑍᒤᑦᑐᓂᒃᑕᐅᖅ ᑲᑎᕐᓱᐃᓕᕐᐸᖕᒪᑕ.

⁹ ᒎᑎᐅᑉ ᐊᓂᕐᓂᖓᓄᑦ ᐊᓯᕈᕐᑕᐅᓯᒪᕗᑦ, ᓂᓐᖓᐅᓯᖓᑕᓗ ᐊᓂᕐᓵᕐᕕᒋᖕᒪᒋᑦ ᓄᖑᑕᐅᕗᑦ.

¹⁰ ᖃᓕᖑᐊᕐᐳᑦ ᓛᔭᑎᑐᑦ, ᐃᕐᓯᓵᕐᓗᑎᒡᓗ ᓛᔭᑎᑐᑦ ᐃᕐᓯᓇᕐᑐᑐᑦ, ᒎᑎᐅᓪᓕ ᓂᐸᖏᕐᑎᑉᐰᑦ ᐃᓅᓱᒃᑐᓪᓗ ᓛᔭᑦ ᑭᒍᑎᖏᑦ ᓱᕋᒃᑎᕐᐰᑦ.

¹¹ ᓛᔭᑎᑐᑦ ᑍᒤᑉᐳᑦ ᓂᕆᔭᒃᓴᖃᖏᓐᓂᕐᒧᑦ ᐱᕐᓕᕐᑐᑐᑦ, ᑐᖁᖕᒪᑕ ᕿᑐᕐᖓᖏᑦ ᓇᒧᑐᐃᓐᓇᖅ ᓯᐊᒻᒪᒃᐳᑦ.

¹² ᐅᖃᐅᓯᖅ ᓂᐱᑭᑦᑐᒻᒪᕆᐅᓪᓗᓂ ᐅᕙᓐᓄᑦ ᑎᑭᓚᐅᕐᐳᖅ, ᓂᐱᑭᓐᓂᖓᓄᑦ ᐊᒡᓛᑦ ᑐᓵᔪᓐᓇᑦᓯᐊᓐᖏᓚᕋ.

¹³ ᑕᑯᑎᑦᔪᑎᒥᒃ ᕿᒥᕐᕈᐊᓚᐅᕐᐳᖓ ᐅᓐᓄᐊᒥ, ᐅᖁᒪᖏᐅᖅᑲᔪᑎᑐᑦ ᓯᓂᖕᓂᕋ ᑎᑭᑕᐅᓚᐅᕐᐳᖅ.

¹⁴ ᓴᔪᓕᕐᓗᖓ ᓯᕘᕋᓂᕐᒧᑦ ᕿᑲᕈᓐᓁᓪᓕᕗᖓ, ᓴᐅᓂᒃᑲᓗ ᓯᕘᕋᓂᕐᒧᑦ ᖁᐊᕐᓵᖓᓕᕐᓗᑎᒃ.

¹⁵ ᑮᓇᕋ ᐊᓂᕐᓂᕐᒧᑦ ᓴᓂᖅᑯᑕᐅᖕᒪᑦ; ᑕᕝᕙ ᑎᒥᓕᒫᓐᓃᑦᑐᑦ ᒥᖅᑯᐃᑦ ᓄᔮᓐᖒᒥᕗᑦ.

¹⁶ ᑕᕝᕙ ᑕᑯᓕᕐᐳᖓ ᓯᕗᕋᓐᓂ ᓇᖏᕐᑑᔮᕐᑐᒥᒃ, ᑕᑯᓐᓇᕋᓗᐊᕋᒃᑯ ᓱᖅᑯᐃᕈᓐᓇᓐᖏᓚᕋ ᓱᓇᐅᖕᒪᖔᑦ. ᑕᕝᕙ ᓂᐱᖃᕐᑐᖃᕐᑎᓐᓇᒍ, ᓂᐱᒥᒃ ᑐᓴᕐᐳᖓ:

¹⁷ ‘ᒎᑎᐅᑉ ᓵᖓᓂ ᐃᓄᑐᐃᓐᓇᕐᒥᒃ ᓇᓛᒎᕐᑐᖃᕈᓐᓇᕐᐹ? ᐃᓄᒃ ᐃᑦᔪᕐᓁᓐᓂᕐᓴᐅᔪᓐᓇᕐᐹ ᐱᓐᖑᕐᑎᑎᖓᑕ ᓵᖓᓂ?

¹⁸ ᒎᑎ ᐱᔨᒥᓂᒃ ᐊᒡᓛᑦ ᕿᓚᖕᒦᑦᑐᓂᒃ ᑕᑎᖃᕈᓐᓇᓐᖏᓚᖅ, ᐂᖏᓕᖁᑎᓂ ᐊᒡᓛᑦ ᓈᒻᒪᓈᖏᓐᓂᖏᑦ ᖃᐅᔨᔪᓐᓇᕐᐰᑦ.

¹⁹ ᐊᖏᓂᕐᓴᒥᒡᓕ ᒪᕐᕋᕐᓂ ᐃᒡᓗᖃᕐᑐᓂᒃ ᑕᑎᖃᕈᓐᓇᓐᖏᓚᖅ, ᐳᔪᕋᑐᐃᓐᓇᕐᒥᒃ ᑐᓐᖓᕕᖃᕐᓗᑎᒃ ᐃᓅᔪᓂᒃ, ᖁᐱᕐᕈᑎᑐᑦ ᖃᓪᓗᓈᕐᑕᒥᒃ ᓂᕆᓲᑎᑐᑦ ᖄᕐᑕᐅᔪᓐᓇᕐᑐᓂᒃ.

²⁰ ᐅᓪᓛᑉ ᐅᓐᓅᓪᓗ ᐊᑯᓐᓂᖓᓂ ᑐᖁᑕᐅᕗᑦ; ᐱᑕᖃᕈᓐᓃᓪᓚᕆᒃᐳᑦ ᖃᐅᔨᔭᐅᓇᑎᒃ ᒪᓗᒋᔭᐅᓇᑎᒡᓘᓐᓃᑦ.

²¹ ᐱᓯᒪᔭᓕᒫᑦᓯᐊᖏᓪᓗ ᓄᖑᑕᐅᖃᑕᐅᕗᑦ; ᑐᖁᕗᑦ, ᓱᓕ ᓯᓚᑐᓂᕐᒥᒃ ᐱᓚᐅᕋᑎᒃ.’”