ᔫᐱᐅᑉ ᐊᒡᓚᖏᑦ 39 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᒎᑦᓰᑦ ᖃᖅᑲᒥᐅᑍᑦ ᐃᕐᓂᐅᕐᕕᒋᓲᖏᑦ ᖃᐅᔨᒪᕕᒌᑦ? ᐅᕝᕙᓗ ᑐᑐᖓᔪᑦ ᐃᕐᓂᓕᕐᑎᓪᓗᒋᑦ ᑕᑯᓐᓇᓚᐅᕐᓯᒪᕕᑦ?

² ᖃᓄᖅ ᐊᑯᓂᐅᑎᒋᔪᖅ ᓇᑦᔨᓲᖑᖕᒪᖔᑕ ᖃᐅᔨᒪᕕᒌᑦ? ᖃᖓᒃᑯᓪᓗ ᐃᕐᓂᐅᓲᖑᖕᒪᖔᑕ ᖃᐅᔨᒪᕕᒋᑦ?

³ ᖃᖓᒃᑯᑦ ᐊᖁᑉᐸᓲᖑᕙᑦ, ᐃᕐᓂᓂᐊᕐᓗᑎᒃ ᐱᐊᕋᒃᓴᒥᖕᓂᒃ, ᐃᕐᓂᓪᓗᑎᒡᓗ ᑭᖑᕚᒃᓴᒥᖕᓂᒃ.

⁴ ᕿᑐᕐᖓᕐᑖᖏᑦ ᓴᓐᖏᒃᑎᑉᐳᑦ, ᐱᕈᕐᐸᓪᓕᐊᕗᑦ ᒪᓂᕋᑐᐃᓐᓇᕐᒥ; ᐊᐅᓪᓚᕋᒥᒃ, ᑕᕝᕗᖓ ᐅᑎᕈᓐᓁᕐᐳᑦ.

⁵ ᑭᐊ ᓯᐅᑎᖅᑯᕐᑐᔪᖅ ᓄᔪᐊᑐᖅ ᐃᓱᒪᕐᓱᓕᕐᑎᑉᐸᐅᒃ? ᑭᐊᓗ ᓯᐅᑎᖅᑯᕐᑐᔫᑉ ᐱᑐᒃᓯᒪᐅᑎᖓ ᐲᕐᑎᑉᐸᐅᒃ?

⁶ ᐅᕙᖓ ᐃᓄᖃᖏᑦᑐᒥ ᐊᖏᕐᕋᕐᑖᕐᑎᓚᐅᕐᐸᒃᑲ, ᓄᓇᒥᓗ ᑕᕆᐅᓕᖕᒥ ᐃᓂᒃᓴᖃᕐᑎᓪᓗᒋᑦ.

⁷ ᐃᒡᓗᒐᓮᑦ ᓂᐱᐊᓗᖏᓐᓂᑦ ᐅᖓᓯᒃᑎᑉᐰᑦ; ᓇᓪᓕᐊᓐᓄᓪᓘᓐᓃᑦ ᐊᔪᕆᓴᕐᑕᐅᔪᓐᓇᓐᖏᓚᑦ ᐱᓇᓱᐊᖁᓪᓗᒋᑦ.

⁸ ᖃᖅᑲᓂ ᓂᕿᒃᓴᕐᑕᓕᖕᓂ ᓂᕆᕙᒃᐳᑦ, ᑐᖑᔪᕐᑐᓂᒃ ᖃᓄᐃᑦᑐᑐᐃᓐᓇᓂᒃ ᕿᓂᕐᐸᒃᐳᑦ ᓂᕆᔭᒃᓴᒥᖕᓂᒃ.

⁹ ᐃᒻᒧᒃᓯᐅᒐᐅᑉ ᐸᖕᓂᖓ ᐃᓕᖕᓄᑦ ᐱᓇᓱᐊᕈᒪᒐᔭᕐᐹ? ᓂᕐᔪᑎᓄᓪᓗ ᓂᕐᕆᕕᖁᑎᖕᓂ ᐅᓐᓄᐊᒥ ᓯᓂᒃᑕᕈᓐᓇᕋᔭᕐᐹ?

¹⁰ ᐊᒃᓱᓈᒥᒃ ᕿᓚᒃᓯᕕᒋᔪᓐᓇᕐᐱᐅᒃ ᓄᓇᒥᒃ ᒪᒃᐱᕐᑎᕆᑦᔪᑎᒃᓴᖓᓂᒃ? ᐅᕝᕙᓗ ᓇᕐᓴᒥ ᒪᒃᐱᕐᑎᕆᓗᓂ ᒪᓕᒃᑎᑦᓱᓐᓇᕐᐱᐅᒃ?

¹¹ ᓴᓐᖏᓂᖓ ᐊᔪᖏᓐᓂᖓᓗ ᑕᑎᒋᓕᕋᔭᕐᐱᐅᒃ? ᐱᓇᓱᐊᒐᒃᓴᑎᓪᓗ ᑖᑦᓱᒧᖓ ᐱᓇᓱᐊᕐᑕᐅᑎᓕᕋᔭᕐᐱᒋᑦ?

¹² ᐱᕈᕐᑐᓂᒃ ᑲᑎᕐᓯᔪᓐᓇᕐᓯᓛᓕᕐᓂᕐᓄᑦ ᑕᑎᒋᓕᕋᔭᕐᐱᐅᒃ? ᓂᐊᖂᔭᒃᓴᓂᒡᓗ ᐃᕖᔧᕕᖕᓄᑦ ᑲᑎᕐᓱᐃᓛᓕᕆᐊᒥᒃ?

¹³ ᑎᖕᒥᐊᕐᔪᐊᑦ ᑎᖏᔪᓐᓇᖏᑦᑐᑦ ᐃᓴᕈᕐᓱᓲᖑᕗᑦ ᐅᐱᒪᓪᓗᑎᒃ; ᖃᖓᑕᔪᓐᓇᓐᖏᓚᓪᓕ ᓯᑐᐊᕆᒃᑎᑐᑦ ᑕᑎᒡᒐᕐᔪᐊᖑᔮᕐᑐᑎᑐᑦ.

¹⁴ ᒪᓐᓂᖕᒥᖕᓂᒡᓕ ᕿᒤᕙᒃᐳᑦ ᓄᓇᑐᐃᓐᓇᕐᒧᑦ, ᓯᓚᐅᑉ ᐅᖅᑰᓂᖓᓄᑦ ᓄᓇᒥ ᐆᓇᕐᑎᑕᐅᖁᓪᓗᒋᑦ.

¹⁵ ᐳᐃᒍᖃᑦᑕᕐᐳᓪᓕ ᑐᑎᔭᐅᓗᑎᒃ ᖄᕐᑕᐅᑐᐃᓐᓇᕆᐊᖃᕐᓂᖏᓐᓂᒃ, ᐆᒪᔪᓄᓪᓗ ᓄᔪᐊᕐᑐᓄᑦ ᓯᖁᒥᑕᐅᑐᐃᓐᓇᕆᐊᖃᕐᓂᖏᓐᓂᒃ.

¹⁶ ᐱᐊᕋᕐᒥᖕᓂᒃ ᐱᒋᓐᖏᑕᒥᒃᑎᑐᑦ ᓂᑲᒍᓱᖃᑦᑕᓐᖏᓚᑦ; ᐃᕐᓂᐊᕆᓚᐅᕐᑕᖏᑦ ᑕᒪᐅᖎᓐᓈᕐᑐᑎᑐᑦ, ᑲᒪᒋᖃᑦᑕᓐᖏᓔᑦ.

¹⁷ ᒎᑎᐅᑉ ᓯᓚᑐᓂᕐᒥᒃ ᐳᐃᒍᕐᑎᒻᒪᒋᑦ, ᖃᐅᔨᒪᓂᕐᒥᒡᓗ ᐱᖃᑕᐅᑎᓐᓇᓂᒋᑦ.

¹⁸ ᑕᒪᒃᑯᐊ ᕿᒪᒃᓯᓪᓗᑎᒃ ᐅᓪᓚᒃᓯᔭᕌᖓᒥᒃ, ᕿᒻᒥᕐᔪᐊᓂᒃ ᐃᑭᒪᔪᓂᒡᓗ ᐃᔪᕿᑕᐅᑎᖃᑐᐃᓐᓇᕈᓐᓇᕐᐳᑦ.

¹⁹ ᕿᒻᒥᕐᔪᐊᑦ ᓲᖑᓂᕐᑖᕐᑎᓯᒪᕕᒌᑦ? ᖁᖓᓯᖏᑦ ᑕᑯᒥᓇᕐᓯᑎᓪᓗᒋᑦ ᑕᑭᔫᑎᓂᒃ ᒥᖅᑯᓕᕐᓗᒋᑦ?

²⁰ ᒥᓯᒃᑎᑦᓱᓐᓇᕐᐱᐅᒃ ᐱᒡᓕᕐᑕᐅᔮᕐᑐᑎᑐᑦ? ᐃᓄᖕᓂᒃ ᑲᑉᐱᐊᓱᒃᑎᑦᓯᑎᓪᓗᒋᑦ ᓱᐳᐊᕐᕙᓗᖕᓂᖓᓄᑦ?

²¹ ᓇᕐᓴᒥ ᓄᓇᒥᒃ ᑐᒃᑲᕐᐳᖅ, ᓴᓐᖏᓂᕐᒥᓂᒃ ᖁᕕᐊᓲᑎᖃᕐᓗᓂ; ᐅᓇᑕᐅᑎᓕᔭᕐᑐᓂᒃ ᐅᐸᒍᑎᕗᖅ ᓱᑲᑦᑑᓪᓗᓂ.

²² ᑲᑉᐱᐊᓱᖕᓂᖅ ᒥᑕᐅᑎᒋᕚ, ᖁᐊᕐᓵᖓᔪᓐᓇᕋᓂᓗ; ᓴᕕᒡᔪᐊᒧᑦ ᐅᑎᕆᐊᕐᑎᑕᐅᔪᓐᓇᓐᒋᓚᖅ.

²³ ᐱᑎᒃᓯᒧᑦ ᖃᕐᔪᖃᐅᑏᑦ ᐊᕕᓗᕋᕋᓗᐊᕐᐸᑕ, ᖃᓗᒋᐊᓪᓗ ᓇᐅᒃᑯᑏᓪᓗ ᕿᓪᓛᒡᒋᔭᕋᓗᐊᕐᐸᑕ.

²⁴ ᐱᔪᒃᓴᐅᔮᕐᓂᕐᒧᑦ ᓴᔪᓕᕐᐳᖅ ᓄᓇᒥᒡᓗ ᑐᒃᑲᕐᓗᓂ; ᑎᑦᑐᓚᐅᑎᐅᑉ ᓂᐱᖓᓄᑦ ᓄᖅᑲᖓᑦᓯᐊᕈᓐᓁᓪᓕᕙᒃᐳᖅ.

²⁵ ᑎᑦᑐᓚᐅᑎᐅᑉ ᓂᐱᖓ ᓂᓪᓕᕌᖓᑦ ᓱᐳᐊᖃᑦᑕᕐᐳᖅ; ᐅᓇᑕᕐᓂᐅᑉ ᑎᐱᖓ ᓁᒪᓕᖃᑦᑕᕐᐹ ᐅᖓᓯᒃᑎᓪᓗᒍ ᓱᓕ, ᐅᓇᑕᕐᑏᑦ ᐊᖓᔪᖅᑳᖏᑕ ᐱᖁᔨᓂᖏᓐᓂᒃ ᑐᓵᓕᖃᑦᑕᕐᐳᑦ.

²⁶ ᓯᓚᑐᓂᕐᓄᑦ ᑭᒡᒐᕕᐅᔮᕐᑐᑦ ᐃᓕᑦᓯᑎᑉᐱᐅᒃ ᐊᐅᕐᓵᕐᓂᕐᒥᒃ? ᐃᓴᕈᒥᓂᒡᓗ ᐃᓵᒃᑎᑦᓯᖃᑦᑕᕐᐹᑦ ᓯᕿᓂᐅᑉ ᓇᓛᓄᑦ ᓵᓪᓗᑎᒃ?

²⁷ ᓇᒃᑐᕋᓖᑦ ᐱᖁᔨᓂᕐᓂᒃ ᓈᓚᒡᓗᑎᒃ ᖁᑦᓯᒃᑐᒧᐊᓲᖑᕚᑦ ᐅᓪᓗᓕᐅᕐᓗᑎᒡᓗ ᑕᑉᐹᓂᐊᓗᒃ ᐳᕐᑐᔪᓂ?

²⁸ ᕾᕐᑐᓂ ᐃᓂᖃᖃᑦᑕᕐᐳᑦ ᐊᖏᕐᕋᕆᓪᓗᒍ, ᐃᓐᓈᕈᐃᑦ ᐳᕐᑐᓂᖏᓐᓂ ᓄᕗᖃᓪᓚᕆᒃᑐᓂᓗ.

²⁹ ᑕᕝᕙᓐᖓᑦ ᕿᓂᖃᑦᑕᕐᐳᑦ ᓂᕆᔭᒃᓴᒥᖕᓂᒃ; ᑕᑯᓐᓇᖃᑦᑕᕐᐳᑦ ᐅᖓᓯᒃᑐᒦᑦᑐᓂᒃ.

³⁰ ᐱᐊᕋᖏᑦ ᐊᐅᓕᖕᓄᑦ ᐊᕙᑕᖏᕐᑕᐅᓯᒪᕙᒃᐳᑦ; ᑐᖁᖓᔪᓂᓗ, ᐃᓂᖃᖃᑦᑕᕐᐳᑦ.”