ᔫᐱᐅᑉ ᐊᒡᓚᖏᑦ 35 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙ ᐃᓕᕼᐅ ᐅᖃᕆᕗᖅ:

² “ᓈᒻᒪᓈᕋᓱᒋᕖᑦ ᐅᖃᕐᓗᑎᑦ, ‘ᓇᓛᒎᕐᓂᕋ ᐊᖏᓂᕐᓴᐅᕗᖅ ᒎᑎᐅᑉ ᓇᓛᒎᕐᓂᖓᓂᑦ.’

³ ᒎᑎ ᐊᐱᕆᖕᒥᒐᕕᐅᒃ, ‘ᐊᔪᕐᑐᓕᓂᒃᑲ ᐃᓕᖕᓂᒃ ᖃᓄᖅ ᐊᐅᓚᑦᔧᒐᔭᕐᐹᑦ? ᓱᓇᒥᒃ ᐱᕙᓪᓕᐅᑎᖃᕐᐳᖔ ᐊᔪᕐᑐᓕᑦᑍᓕᒪᓂᕐᒧᑦ?’

⁴ ᑕᒪᑐᒧᖓ ᑭᐅᓂᐊᕐᐸᒋᑦ ᐃᓚᓐᓇᕆᔭᑎᓪᓗ ᐃᓚᒋᓗᒋᑦ.

⁵ ᕿᓚᖕᒧᑦ ᑕᑯᓴᓚᐅᕆᑦ, ᑕᑯᒋᑦ ᓄᕗᔭᑦ, ᐃᓕᖕᓂᑦ ᖁᑦᓯᖕᓂᕐᓴᐅᕗᑦ.

⁶ ᐊᔪᕐᑐᓕᓯᒪᓐᓂᕈᕕᑦ, ᓱᓇᒥᒃ ᐊᑭᕋᕐᑐᕈᑎᒃᓴᕐᑖᕐᐲᑦ ᑖᑦᓱᒧᖓ? ᐊᔪᕐᑐᓕᓂᑎᓪᓗ ᐅᓄᕐᓯᕙᓪᓕᐊᒃᐸᑕ, ᑖᓐᓇ ᐊᐅᓚᑦᔭᒃᑕᐅᒐᔭᕐᐹ?

⁷ ᓇᓛᒎᕈᕕᓪᓕ, ᓱᓇᒥᒃ ᒎᑎᒧᑦ ᑐᓂᔭᒃᓴᖃᕐᐲᑦ? ᐅᕝᕙᓗ ᓱᓇᒥᒃ ᐃᓕᖕᓂᑦ ᐱᑖᕐᑎᑕᐅᒐᔭᕐᐸ?

⁸ ᐊᔪᕐᑐᓕᓂᕐᓄᑦ ᐃᓕᖕᓂᒃ ᐃᓱᒫᓗᓇᕐᑐᒦᑎᑉᐳᑎᑦ, ᓇᓛᒎᕐᓂᕐᓄᓪᓗ ᐃᓅᖃᑏᑦ ᐃᑲᔪᕐᑕᐅᕗᖅ.

⁹ ᐃᓄᐃᑦ ᐅᖁᒤᒃᓴᕐᓂᖏᑦ ᐅᓄᕐᓯᔭᕌᖓᑕ ᓂᐹᓕᕐᐸᒃᐳᑦ; ᐊᔪᒐᖃᖏᑦᑐᒧᑦ ᐃᑲᔪᕐᑕᐅᔪᒪᓪᓗᑎᒃ ᓂᓪᓕᐊᓕᖃᑦᑕᕐᐳᑦ.

¹⁰ ᓇᓪᓕᐊᓐᓂᒡᓕ ᐅᖃᕐᑐᖃᓐᖏᓚᖅ, ‘ᓇᐅᒡᓕ ᒎᑎ ᐱᓐᖑᕐᑎᑎᒋᓚᐅᕐᑕᕋ, ᑖᕐᓯᐅᓕᕐᑎᓪᓗᑕ ᐃᓐᖏᕈᓯᕐᑖᕐᑎᑦᓯᕙᒃᑐᖅ.

¹¹ ᐊᔪᕆᕐᑐᕐᓯᒪᓂᕐᓴᕆᕚᑎᒍᑦ ᓂᕐᔪᑎᓂᑦ ᓄᓇᒦᑦᑐᓂᑦ, ᓯᓚᑐᓂᕐᓴᐅᑎᓪᓗᑕᓗ ᑎᖕᒥᐊᓂᑦ ᖃᖓᑕᕙᒃᑐᓂᑦ.’

¹² ᑕᕝᕙ ᓂᓪᓕᐊᒐᓗᐊᕐᐳᑦ, ᒎᑎᐅᓪᓕ ᑭᐅᓐᖏᓔᑦ, ᐱᐅᔪᕆᓂᖃᕐᒪᑕ ᐱᐅᖏᑦᑐᓕᓪᓗᑎᒡᓗ.

¹³ ᒎᑎᐅᑉ ᐱᓪᓚᕆᖏᓪᓗᓂ ᐅᖃᓪᓚᒃᑐᖅ ᑐᓴᕐᓂᐊᖏᒻᒪᒍ, ᐊᔪᒐᖃᖏᑦᑑᓪᓗ ᐃᒃᐱᒋᓂᐊᓐᖏᓔᑦ.

¹⁴ ᐅᖃᕋᓗᐊᕐᑐᑎᑦ ᒎᑎ ᑕᑯᔪᓐᓇᖏᓐᓂᕋᕐᓗᒍ, ᓱᓕᓕ ᑕᒪᓐᓇ ᑖᑦᓱᒪ ᓵᖓᓃᑉᐳᖅ, ᕿᓄᐃᓵᕐᓗᑎᑦ ᐅᑕᖅᑭᑦᓯᐊᑐᐃᓐᓇᕈᒃ.

¹⁵ ᒫᓐᓇᓕ ᓂᓐᖓᖕᓂᕐᒧᑦ ᓱᒋᐊᕐᓯᖏᒻᒪᑦ, ᐊᔪᕐᑐᓕᓂᕐᒥᒡᓗ ᐃᒃᐱᒍᓱᓗᐊᕐᑑᔮᖏᒻᒪᑦ,

¹⁶ ᔫᐲ ᐅᖃᓪᓔᓐᓇᕋᓱᒃᑲᓗᐊᕈᕕᑦ ᐊᑑᑎᖃᖏᑦᓯᐊᕐᐳᖅ, ᓇᓗᓇᕈᓐᓁᑐᐃᓐᓇᕐᒪᑦ ᐅᖃᓪᓚᐅᓯᕆᔭᑎᑦ ᖃᐅᔨᒪᖏᓐᓇᕕᒋᑦ.”