ᔫᐱᐅᑉ ᐊᒡᓚᖏᑦ 34 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙ ᐃᓕᕼᐅ ᐅᖃᕐᐳᖅ:

² “ᐃᓕᓯᒪᔪᓯ; ᐅᖃᐅᓯᕆᔭᒃᑲ ᑐᓴᓚᐅᕐᓯᒋᒃ, ᓈᓚᒡᓗᓯᓗ, ᓯᓚᑐᔫᔪᓯ;

³ ᓯᐅᑎᓖᑦ ᐅᖃᐅᓯᕐᓂᒃ ᖃᐅᔨᓴᕐᐸᖕᒪᑕ; ᓂᖀᓪᓗ ᒪᒪᕐᑐᑦ ᖃᐅᔨᕙᒃᑲᑦᓯᐅᒃ ᐆᒃᑐᕐᓗᒋᑦ.

⁴ ᓇᖕᒥᓂᖅ ᓂᕈᐊᓚᐅᕐᑕ ᓈᒻᒪᓈᕐᑐᒥᒃ; ᑐᑭᑖᖃᑎᒌᓚᐅᕐᑕ ᐅᕙᑦᑎᓐᓄᑦ ᓱᓇ ᐱᐅᔫᖕᒪᖔᑦ.

⁵ ᔫᐱ ᐅᖃᓚᐅᕐᒪᑦ, ‘ᐸᓯᔭᒃᓴᐅᓂᖃᓐᖏᓚᖓ, ᒎᑎᐅᓪᓕ ᐱᑦᓯᐊᕐᕕᒋᓯᒪᓐᖏᓛᖓ.’

⁶ ᐊᐱᕆᓚᐅᕆᕗᖅ, ‘ᖃᓄᕐᓕ ᓴᒡᓗᓗᖓ ᑕᒻᒪᕐᓯᒪᓂᕋᕈᓐᓇᕐᐳᖓ? ᐋᓐᓂᐊᓂᕋ ᐋᖅᑭᒃᑕᐅᔪᓐᓁᓪᓕᕗᖅ, ᐱᐅᖏᑦᑐᓕᓚᐅᖏᒃᑲᓗᐊᕋᒪ.’

⁷ ᖃᓄᐃᑦᑐᐊᓗᖑᓇ ᔫᐱ? ᒥᑕᐅᑎᒃᓴᕐᓂᕐᒥᒃ ᐃᒥᕐᑐᑎᑐᑦ ᑍᒤᑦᑐᖅ,

⁸ ᐱᐅᖏᑦᑐᓕᔪᓂᒃ ᐃᓚᖃᖃᑦᑕᕐᑐᖅ, ᐊᔪᕐᑐᓕᔪᓂᒡᓗ ᐃᓅᖃᑎᖃᕐᐸᒃᓗᓂ.

⁹ ᐅᖃᓚᐅᕐᒪᑦ, ‘ᐃᓄᒃ ᐱᕙᓪᓕᐅᑎᖃᖏᑦᓯᐊᕐᐳᖅ ᒎᑎᐅᑉ ᐱᔪᒪᔭᖓᓂᒃ ᒪᓕᒃᑲᓗᐊᕈᓂ.’

¹⁰ ᑍᒤᒻᒪᑦ, ᓈᓚᓚᐅᕐᓯᓐᖓ ᑐᑭᓯᓯᒪᔪᓯ, ᒎᑎ ᐱᐅᖏᑦᑐᓕᔪᓐᓇᕐᐹ? ᑕᒪᓐᓇ ᑐᑭᖃᖏᑦᓯᐊᕐᐳᖅ, ᐊᔪᒐᖃᖏᑦᑐᖅ ᑕᒻᒪᕈᓐᓇᕐᐹ?

¹¹ ᑖᑦᓱᒪ ᐃᓄᒃ ᐱᓂᐊᕐᓂᖓ ᒪᓕᒡᓗᒍ ᐊᑭᓕᖃᑦᑕᕐᐹ, ᐱᓇᓱᐊᕐᕕᒋᖃᑦᑕᕐᐹᓗ ᐃᓅᓯᖓ ᒪᓕᒡᓗᒍ.

¹² ᒎᑎ ᓇᓗᓇᓐᖏᓚᖅ ᐱᐅᖏᑦᑐᒥᒃ ᐱᓇᓱᐊᕐᓂᐊᖏᒻᒪᕆᒃᑐᖅ, ᐊᔪᒐᖃᖏᑦᑐᖅ ᓈᒻᒪᓈᕐᑐᒥᒃ ᒧᒥᒃᑎᑦᓯᓂᐊᖏᓚᖅ ᓈᒻᒪᖏᑦᑐᒧᑦ.

¹³ ᑭᐊ ᓄᓇᕐᔪᐊᕐᒥ ᐱᔪᓐᓇᕐᓂᕐᑖᕐᑎᓚᐅᕐᐸᐅᒃ? ᑭᐊᓗ ᓄᓇᕐᔪᐊᓕᒫᒧᑦ ᐊᖓᔪᖅᑳᕈᕐᑎᓚᐅᕐᐸᐅᒃ?

¹⁴ ᑖᑦᓱᒪ ᐃᓱᒪᕐᓲᑎᒋᑦᓯᐊᕐᐹ, ᐅᑎᕐᑎᑦᓱᒪᒍᓂᒋᒃ ᐊᓂᕐᓂᓂ ᐃᓅᓯᖁᑎᓂᓗ,

¹⁵ ᑕᕝᕙ ᑎᒥᖃᕐᑐᓕᒫᑦ ᑐᖁᔪᐃᓐᓇᐅᒐᔭᕐᐳᑦ, ᐃᓄᒡᓗ ᓄᓇᒧᑦ ᐅᑎᕋᔭᕐᓗᓂ.

¹⁶ ᑐᑭᓯᓂᖃᕈᕕᑦ ᒫᓐᓇ, ᑐᓵᓚᐅᓐᖓ; ᐅᖃᐅᓯᕆᔭᒃᑲ ᓈᓚᒡᓗᒋᑦ.

¹⁷ ᓇᓛᒎᕐᓂᕐᒥᒃ ᐆᒥᓱᒃᑐᖅ ᑲᒪᔨᐅᔪᓐᓇᕋᓗᐊᕐᐹ? ᐸᓯᔭᒃᓴᐅᓂᕋᕈᓐᓇᕐᐱᐅᒃ ᓇᓛᒎᕐᑐᑐᐊᖅ ᐊᔪᒐᖃᖏᑦᑐᖅ?

¹⁸ ᐃᓄᒃ ᓈᒻᒪᓈᕋᔭᕐᐹ ᐊᖓᔪᖅᑳᕐᔪᐊᕐᒧᑦ ᐅᖃᕐᐸᑦ, ‘ᐊᑑᑎᖃᓐᖏᓚᑎᑦ,’ ᐊᐅᓚᑦᓯᔨᐅᔪᓄᓪᓗ, ‘ᐱᐅᖏᑦᑐᓕᔨᐅᕗᓯ’;

¹⁹ ᐊᖓᔪᖅᑳᓪᓕ ᓇᓪᓕᐊᓐᓂᒃ ᐱᑦᓯᐊᕐᓂᕐᓴᖃᕐᐸᓐᖏᓚᖅ, ᐊᒃᓱᐃᑦᑐᓪᓗ ᐱᑦᓯᐊᕐᓂᕐᓴᕆᕙᓐᖏᓔᑦ ᐊᒃᓱᔪᓂᑦ, ᑕᒪᒃᑯᐊᓕᒫᑦ ᑖᑦᓱᒪ ᓴᓇᓯᒪᔧᓐᓇᕆᖕᒪᒋᑦ.

²⁰ ᑕᕝᕔᓐᓇᖅ ᑐᖁᕙᒃᐳᑦ; ᐅᓐᓄᐊᑉ ᕿᑎᕋᕐᓂᖓᓂ ᐃᓄᐃᑦ ᐊᐅᓚᑎᑕᐅᒐᒥᒃ ᑐᖁᕗᑦ, ᐊᔪᖏᑦᑐᕐᔪᐊᓪᓗ ᐊᐅᓪᓚᕈᑦᔭᐅᕗᑦ ᐃᓄᖕᓄᑦ ᑎᒍᔭᐅᓚᐅᕋᑎᒃ.

²¹ ᑖᑦᓱᒪ ᐃᓄᓕᒫᑦ ᑕᑯᓐᓇᕐᒪᒋᑦ ᐃᓕᖅᑯᓯᖏᑦ, ᖃᓄᐃᓕᐅᕐᓂᓕᒫᖏᓪᓗ ᑕᑯᓐᓇᕆᕔᑦ.

²² ᑖᕐᓂᕐᑕᖃᓐᖏᓚᖅ ᑐᖂᓪᓘᓐᓃᑦ ᐃᓂᖓᓂ ᐱᐅᖏᑦᑐᓕᔪᓄᑦ ᐃᔨᕐᕕᐅᔪᓐᓇᕋᔭᕐᑐᒥᒃ.

²³ ᓇᓪᓕᐊᓐᓄᓪᓘᓐᓃᑦ ᐃᓄᖕᒧᑦ ᐋᖅᑭᒃᓲᑦᔭᐅᔭᕆᐊᖃᓐᖏᓚᖅ ᐱᕕᒃᓴᒥᒃ ᐃᖅᑲᕐᑐᐃᕕᖕᒥ ᐃᖅᑲᕐᑐᕐᑕᐅᖁᓪᓗᒍ ᒎᑎᐅᑉ ᓵᖓᓂ.

²⁴ ᐊᔪᖏᑦᑐᕐᔪᐊᑦ ᓄᖅᑲᕐᑎᖃᑦᑕᕐᐰᑦ ᖃᐅᔨᓴᕐᑕᐅᓚᐅᕋᑎᒃ, ᐊᓯᖏᓐᓄᓪᓗ ᐃᓇᖏᕐᑕᐅᑎᓪᓗᒋᑦ.

²⁵ ᐃᓛᒃ ᖃᐅᔨᒪᑦᓯᐊᕐᒪᒋᑦ ᐱᓂᐊᕐᓂᕆᔭᖏᑦ, ᐅᓐᓄᐊᒃᑯᑦ ᓵᓚᒋᕔᑦ, ᑕᕝᕙ ᓯᖁᒥᓪᓚᕆᒃᐳᑦ.

²⁶ ᐊᔪᕐᑐᓕᔪᑦ ᓱᒋᐊᕐᐰᑦ ᐃᓄᐃᑦ ᖃᐅᔨᑎᓪᓗᒋᑦ,

²⁷ ᒎᑎᒥᒃ ᕿᒤᓯᒪᓂᖏᑦ ᐱᑦᔪᑎᒋᓪᓗᒋᑦ, ᑖᑦᓱᒪᓗ ᐊᑐᕐᑕᐅᖁᔭᖏᓐᓂᒃ ᓇᓪᓕᐊᓐᓂᒡᓘᓐᓃᑦ ᑲᒪᖏᒻᒪᑕ.

²⁸ ᐊᒃᓱᔪᑦ ᐃᑲᔪᕐᑕᐅᔪᒪᓕᖁᓪᓗᒋᑦ ᑖᑦᓱᒧᖓ, ᐋᓐᓂᐊᓇᕐᑐᒦᑦᑐᑦ ᓂᓪᓕᐊᓕᕐᒪᑕ ᑕᕝᕙ ᑐᓴᓚᐅᕐᐰᑦ.

²⁹ ᒎᑎ ᓂᐱᖃᕈᓐᓁᕐᐸᑦ, ᑭᐊ ᐸᒡᕕᓴᕈᓐᓇᕐᐸᐅᒃ? ᑖᑦᓱᒪᓗ ᑮᓇᓂ ᑕᓕᑎᑉᐸᒍ, ᑭᐊ ᑕᑯᔪᓐᓇᕐᐸᐅᒃ? ᐃᓅᖃᑎᒌᒡᔪᐊᓄᑦ ᐅᕝᕙᓗ ᐃᓄᑐᐊᒧᑦ?

³⁰ ᒎᑎᖃᖏᑦᑐᖅ ᐊᐅᓚᑦᓯᔨᐅᓕᖁᓇᒍ, ᐃᓄᐃᑦ ᓂᒐᕐᑎᑕᐅᓯᒪᔪᑎᑐᑦ ᐱᖁᓇᒋᑦ.

³¹ ᒎᑎᒧᑦ ᐅᖃᕐᑐᖃᓚᐅᕐᓯᒪᕚ, ‘ᐋᖅᑭᒋᐊᕐᑕᐅᓯᒪᓕᕋᒪ; ᐱᐅᖏᑦᑐᓕᒃᑲᓐᓂᕐᓂᐊᕈᓐᓁᕐᐳᖓ;

³² ᐊᔪᕆᕐᑐᓚᐅᓐᖓ ᑕᑯᓐᓇᓐᖏᑕᓐᓂᒃ; ᐊᔪᕐᑐᓕᓚᐅᕐᓂᕈᒪ, ᑍᒤᓕᐅᕐᓂᐊᕈᓐᓁᕐᐳᖓ.’

³³ ᑕᕝᕙ ᒎᑎᐅᑉ ᐱᖁᓚᐅᕐᑕᖓᓂᒃ ᐱᓯᒪᓐᖏᑎᓪᓗᑎᑦ, ᐱᓇᓱᐊᕐᕕᐅᓂᐊᕋᓱᒋᕖᑦ ᐃᓱᒪᒋᔧᑦ ᒪᓕᒡᓗᒍ? ᓇᖕᒥᓂᖅ ᓂᕈᐊᕆᐊᖃᕐᐳᑎ, ᐅᕙᖓᐅᖏᑦᑐᖅ; ᐊᑏ ᖃᐅᔨᒪᔭᕐᓂᒃ ᐅᖃᓕᕆᑦ.

³⁴ ᐃᓄᐃᑦ ᑐᑭᓯᓯᒪᔪᑦ ᐅᕙᓐᓄᑦ ᐊᖏᖃᑕᐅᒐᔭᕐᐳᑦ, ᓯᓚᑐᔪᓪᓗ ᐅᕙᓐᓂᒃ ᑐᓵᔪᑦ ᐅᖃᕋᔭᕐᐳᑦ:

³⁵ ‘ᔫᐱ ᐅᖃᓪᓚᓚᐅᕐᐳᖅ ᖃᐅᔨᒪᓐᖏᑕᒥᓂᒃ, ᐅᖃᐅᓯᕆᔭᖏᑦ ᓯᓚᑐᓂᒃᑰᕐᓯᒪᓐᖏᓚᑦ.’

³⁶ ᐃᓱᒪᒋᓚᐅᕐᓯᒋᒃ ᔫᐱᐅᑉ ᐅᖃᐅᓯᕆᓚᐅᕐᑕᓕᒫᖏᑦ, ᑕᕝᕙ ᑕᑯᔪᓐᓇᕐᐳᓯ ᐱᐅᖏᑦᑐᓕᔪᑎᑐᑦ ᐅᖃᓪᓚᒡᓯᒪᖕᒪᑦ.

³⁷ ᐊᔪᕐᑐᓕᓂᓂ ᐃᓚᓯᒪᕔᑦ ᐊᑭᕋᕐᑐᕐᓂᕐᒥᒃ; ᑐᓵᑎᓪᓗᑕ ᒎᑎᒥᒃ ᒥᑕᐅᑎᖃᕐᓯᒪᕗᖅ ᐅᖃᓪᓚᖕᓂᕐᒥᒍᑦ.”