ᔫᐱᐅᑉ ᐊᒡᓚᖏᑦ 33 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᔫᐲ ᐅᖃᐅᓯᕆᔭᒃᑲ ᓈᓚᑦᓯᐊᓚᐅᒃᑭᑦ, ᐅᖃᐅᓯᓕᒫᒃᑲᓗ ᐃᒃᐱᒋᑦᓯᐊᕐᓗᒋᑦ.

² ᑕᑯᒋᑦ, ᖃᓂᕋ ᐂᑦᑕᕐᐸᕋ; ᐅᖃᕋ ᐅᖃᓪᓚᖁᓪᓗᒍ ᐅᖃᐅᓯᕐᓂᒃ,

³ ᐅᖃᐅᓯᒃᑲ ᓇᓗᓁᕐᓯᕗᑦ ᐆᒻᒪᑎᒪ ᓇᓛᒎᕐᓂᖓᓂᒃ, ᖃᓂᕋᓗ ᓱᓕᑦᓯᐊᕐᑐᒥᒃ ᐅᖃᐅᓯᖃᕐᓂᐊᕐᐳᖅ.

⁴ ᒎᑎᐅᑉ ᐊᓂᕐᓂᖓᑕ ᓴᓇᓚᐅᕐᐹᖓ, ᐊᔪᒐᖃᖏᑦᑑᓪᓗ ᐊᓂᕐᓂᖓᑕ ᐃᓅᓯᕐᑖᕐᑎᓚᐅᕐᐹᖓ.

⁵ ᑕᒪᑐᒧᖓ ᑭᐅᑦᔪᑎᒃᓴᖃᕈᕕᑦ ᑭᐅᓐᖓ; ᐅᖃᐅᓯᒃᓴᑎᑦ ᐋᖅᑭᒃᓱᓕᒃᑭᑦ; ᐃᓕᖕᓂᒃ ᓴᐳᓐᓂᐊᕐᓗᑎᑦ.

⁶ ᒎᑎᐅᑦᑕᐅᖅ ᓵᖓᓂ ᐃᓕᒃᑐᑦ ᑍᒤᒻᒥᒐᒪ; ᓄᓇᒥᑦᑕᐅᖅ ᓴᓇᔭᐅᓯᒪᖕᒥᒐᒪ.

⁷ ᑍᒤᒻᒪᑦ ᐅᕙᓐᓂᒃ ᑲᑉᐱᐊᓱᒋᐊᖃᓐᖏᓚᑎᑦ; ᐃᓕᖕᓄᓪᓗ ᐅᖁᒤᑦᑐᓂᒃ ᐅᖃᐅᓯᖃᕐᓂᐊᕐᓇᖓ.

⁸ ᐃᓛᒃ ᑐᓵᑎᓪᓗᖓ ᐅᖃᓪᓚᓚᐅᕋᕕᑦ, ᐅᖃᐅᓯᕆᔭᑎᑦ ᑐᓵᓚᐅᕐᐸᒃᑲ, ᐅᖃᓚᐅᕋᕕᑦ,

⁹ ‘ᐃᑦᔪᕐᓁᑦᑑᕗᖓ, ᐱᐅᖏᑦᑐᓕᓚᐅᕐᓇᖓᓗ; ᐸᓯᔭᒃᓴᐅᓐᖏᓚᖓ, ᐊᔪᕐᑐᓕᓚᐅᕐᓇᖓᓗ.

¹⁰ ᒎᑎᓕ ᐱᑦᔪᑎᒃᓴᕐᓯᒐᒥ ᐅᕙᓐᓂᒃ ᐊᑭᕋᕐᑐᓕᓚᐅᕐᐳᖅ, ᐆᒥᒋᔨᒥᑐᓪᓗ ᐱᓇᓱᐊᕐᕕᒋᓚᐅᕐᐹᖓ.

¹¹ ᐃᑎᒐᒃᑲ ᐊᕐᓵᕐᑑᔭᓄᑦ ᕿᓚᓚᐅᕐᐰᑦ, ᐊᓪᓗᕐᓂᓕᒫᒃᑲᓗ ᖃᐅᔨᓴᓕᕐᓗᒋᑦ.’

¹² ᑕᑯᒋᑦ, ᔫᐲ ᑍᒤᓕᑎᓪᓗᑎᑦ ᑕᒻᒪᓚᐅᕐᐳᑎᑦ. ᒎᑎ ᐊᖏᓂᕐᓴᐅᖕᒪᑦ ᐃᓄᖕᓂᑦ.

¹³ ᓱᖕᒪᑦ ᒎᑎ ᐊᑭᕋᕐᑐᕋᓱᓚᐅᕐᐱᐅᒃ? ᐅᖃᕐᓗᑎᑦ, ‘ᐅᖃᐅᓯᓐᓂᒡᓘᓐᓃᑦ ᓇᓪᓕᐊᓐᓂᒃ ᑭᐅᔪᓐᓇᓐᖏᓚᖅ.’

¹⁴ ᒎᑎᓕ ᐅᖃᓪᓚᖃᑦᑕᕋᓗᐊᕐᐳᖅ, ᐊᑦᔨᒌᖏᑦᑐᑎᒍᑦ, ᑭᓯᐊᓂᓕ ᐅᖃᐅᓯᖏᓐᓂᒃ ᓈᓚᒃᑐᖃᕐᐸᓐᖏᓚᖅ.

¹⁵ ᐅᓐᓄᐊᒃᑯᑦ ᐃᓄᐃᑦ ᓯᓂᒃᑎᓪᓗᒋᑦ, ᓯᓐᓇᒃᑑᒪᒃᑯᑦ ᒎᑎ ᐅᖃᓪᓚᖃᑦᑕᕐᐳᖅ ᑕᑯᑎᑦᓯᕙᒡᓗᓂᓗ.

¹⁶ ᑍᒫᒃ ᐅᖃᓪᓚᒡᕕᒋᔪᓐᓇᕐᓯᖃᑦᑕᕐᐰᑦ ᓈᓚᒃᑎᓪᓗᒋᑦ, ᑲᑉᐱᐊᓱᓕᖃᑦᑕᕐᐳᓪᓕ ᐅᓗᕆᐊᓇᕐᑐᓂᒃ ᐅᖃᐅᑎᓕᑐᐊᕐᒪᒋᑦ.

¹⁷ ᒎᑎ ᐅᖃᓪᓚᖃᑦᑕᕐᐳᖅ ᐊᔪᕐᑐᓕᓂᖏᓐᓂᑦ ᓄᖅᑲᖁᓪᓗᒋᑦ, ᓴᐳᑎᔪᒪᓪᓗᒋᓪᓗ ᐱᐅᔪᕆᓂᕐᒧᑦ ᑎᑭᐅᑎᓕᖁᓇᒋᑦ.

¹⁸ ᑕᕐᓂᖏᑦ ᓴᐳᑎᓗᒋᑦ ᐃᑎᕐᓴᒧᑦ ᑲᑕᖕᓂᕐᒥᑦ, ᐃᓅᓯᖏᓪᓗ ᐱᐅᓕᓪᓗᒋᑦ ᑐᖁᒥᑦ.

¹⁹ ᒎᑎ ᐋᖅᑭᒋᐊᕐᓯᕙᒃᑭᕗᖅ ᐃᓄᒃ ᖃᓂᒪᓂᒃᑰᕐᑎᓪᓗᒍ, ᑎᒥᖓᓗ ᐋᓐᓂᐊᓂᕐᒧᑦ ᑎᑭᑕᐅᑎᓪᓗᒍ;

²⁰ ᐃᓄᒃ ᖃᓂᒪᓕᕈᓂ ᓂᕆᔪᒪᔪᓐᓁᕈᓐᓇᖁᓪᓗᒍ, ᐊᒡᓛᑦ ᓂᕿᑦᓯᐊᕙᐅᓂᕐᐹᖑᒐᓗᐊᑦ ᓂᕆᔪᒥᓇᕆᔪᓐᓁᕐᓗᓂᒋᑦ.

²¹ ᑎᒥᖓ ᓴᓗᒃᑎᓐᓂᕐᒧᑦ ᒥᑭᒡᓕᖁᓪᓗᒍ; ᓴᐅᓂᖏᓪᓗ ᐅᕕᓂᖓᓄᑦ ᑕᕐᕆᓯᒪᑐᐃᓐᓇᕐᑑᔭᓕᕐᑎᓪᓗᒋᑦ.

²² ᑕᕐᓂᖓ ᐃᑎᕐᓴᒧᑦ ᖃᒡᓕᑎᓪᓗᓂᐅᒃ, ᐃᓅᓯᖓᓗ ᑐᖁᒧᑦ ᑎᑭᐅᑎᑎᓪᓗᓂᐅᒃ.

²³ ᐂᖏᓕᒧᑦ ᐅᐸᒃᑕᐅᓗᓂ ᐃᑲᔪᕐᑕᐅᔪᓐᓇᕐᓯᖁᓪᓗᒍ, ᒎᑎᐅᑉ ᐂᖏᓕᖁᑎᒐᓴᒡᔪᐊᖏᑕ ᐃᓚᖓᓐᓄᑦ, ᐃᓄᖕᒧᑦ ᓇᓗᓁᕐᓯᔪᒪᓪᓗᓂ ᓱᓇ ᐊᑲᐅᔫᖕᒪᖔᑦ ᑖᑦᓱᒧᖓ;

²⁴ ᑖᓐᓇ ᓂᑲᒋᓗᒍ ᐅᖃᕐᕕᒋᔪᒪᓪᓗᓂᐅᒃ, ᐅᖃᕐᓗᓂ, ‘ᓴᒃᑯᓕᕈᒃ! ᐅᓇ ᑐᖁᖓᔪᑦ ᐃᓂᖓᓄᐊᕐᓂᐊᖏᑦᑐᖅ, ᑕᓱᕐᑕᐅᑦᔪᑎᒃᓴᖓᓂᒃ ᓇᒡᕚᕐᐳᖓ;

²⁵ ᑎᒥᖓ ᐅᑎᕐᑎᓕᕈᒃ ᓄᑕᕋᐅᓂᕆᓚᐅᕐᑕᖓᑐᑦ; ᓲᖑᓯᑦᓯᐊᕐᒥᓗᓂ ᐃᓅᓱᒃᑑᓪᓗᓂ ᓴᓐᖏᓂᕆᓚᐅᕐᑕᒥᑐᑦ’;

²⁶ ᑕᕝᕙ ᑐᒃᓯᐊᓕᕐᓂᐊᕐᐳᖅ ᒎᑎᒧᑦ ᑖᑦᓱᒪᓗ ᑐᓴᕐᓂᐊᕐᐹ, ᒎᑎᐅᑉ ᓇᔪᕐᑕᖓᓄᐊᕐᓂᐊᕐᐳᖅ ᖁᕕᐊᓱᒡᓗᓂ; ᑕᕝᕙ ᒎᑎᐅᑉ ᐅᑎᕐᑎᓐᓂᐊᕐᐹ ᐱᐅᓕᓗᓂᐅᒡᓗ.

²⁷ ᐃᓄᐃᓪᓗ ᓵᖏᓐᓂ ᐅᖃᕆᒃᓴᐅᑎᒋᓂᐊᕐᐹ, ᐅᖃᕐᓗᓂ, ‘ᐊᔪᕐᑐᓕᓚᐅᕐᐳᖓ, ᓇᓛᒎᕐᓂᕐᒥᓗ ᐃᓅᓚᐅᕐᓇᖓ, ᒎᑎᐅᓪᓕ ᓂᑲᒋᓪᓗᖓ ᓴᐳᑎᓚᐅᕐᐹᖓ.

²⁸ ᑖᑦᓱᒪ ᑕᕐᓂᕋ ᐱᐅᓕᓚᐅᕐᐹ ᑐᖁᖓᔪᑦ ᐃᓂᖓᓄᐊᕐᓂᕐᒥᑦ, ᐃᓅᓯᕋᓗ ᑕᑯᖁᓪᓗᒍ ᖃᐅᒪᔪᒥᒃ ᐃᓅᒃᑲᓐᓂᕈᓐᓇᖁᓪᓗᖓ.’

²⁹ ᑕᑯᒋᑦ, ᒎᑎ ᑕᒪᒃᑯᓂᖓᓕᒫᖅ ᐱᓇᓱᐊᖃᑦᑕᕐᐳᖅ, ᐃᓄᖕᒧᑦ ᒪᕐᕈᐃᕐᑐᕐᓗᓂ, ᐱᖓᓱᐃᕐᑐᕐᓗᓂᓘᓐᓃᑦ.

³⁰ ᑕᕐᓂᖓ ᐅᑎᕐᑎᑦᓱᒪᓪᓗᒍ ᑐᖁᑉ ᓇᕐᓴᖓᓂᑦ, ᑕᑯᔪᓐᓇᕐᓯᖁᓪᓗᒍ ᐃᓅᓯᐅᑉ ᖃᐅᒪᓂᖓᓂᒃ.

³¹ ᔫᐲ, ᒫᓐᓇ ᐅᖃᐅᓯᕆᔭᒃᑲ ᓈᓚᑦᓯᐊᒃᑭᑦ; ᓂᐱᖃᖏᓪᓗᑎᑦ, ᐅᖃᓪᓚᒍᓐᓇᕐᑎᓚᐅᓐᖓ.

³² ᐅᖃᐅᓯᒃᓴᖃᕈᕕᑦ ᖃᓄᑐᐃᓐᓇᖅ, ᐅᖃᐅᑎᓂᐊᕐᐸᕐᒪ; ᖁᕕᐊᓱᒡᓗᖓ ᓱᓕᓂᕐᓂᒃ ᓇᓗᓁᕐᓯᔪᒪᒐᒪ.

³³ ᐅᖃᐅᓯᒃᓴᖃᖏᒃᑯᕕᓪᓕ, ᓈᓚᑦᓯᐊᓚᐅᓐᖓ; ᓈᓚᑦᓯᐊᕐᓗᑎᑦ, ᑕᕝᕙ ᓯᓚᑐᓂᕐᒥᒃ ᐊᔪᕆᕐᑑᑎᓂᐊᕐᐸᒋᑦ.”