ᔫᐱᐅᑉ ᐊᒡᓚᖏᑦ 32 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓕᕼᐆᑉ ᐅᖃᓪᓚᖕᓂᖓ

¹ ᑕᕝᕙ ᑖᒃᑯᐊ ᐊᖑᑎᑦ ᐱᖓᓱᑦ ᔫᐱᒧᑦ ᑭᐅᓇᓱᐊᕈᓐᓁᕐᐳᑦ, ᑐᑭᓯᒐᒥᒃ ᔫᐱᐅᑉ ᐸᓯᔭᒃᓴᐅᓂᖃᖏᓐᓂᖓᓂᒃ.

² ᑕᕝᕙ ᐃᓕᕼᐅ ᐸᕌᑭᐅᑉ ᐃᕐᓂᖓ ᐳᔾᔧᑎᒥᐅᖅ, ᕌᒥᒃᑯᑦ ᑭᖑᕚᖏᓐᓂᑦ ᐱᓯᒪᔪᖅ, ᔫᐱᒧᑦ ᓂᓐᖓᒃᐳᖅ ᐃᒻᒥᓂᒃ ᐸᓯᔭᒃᓴᐅᔪᓐᓁᕐᑎᓐᓇᓱᖕᒪᑦ ᒎᑎᒥᒃ ᐸᓯᒃᓯᖔᕐᓗᓂ.

³ ᔫᐱᐅᑉ ᐃᓚᓐᓇᕆᔭᖏᓐᓄᑦ ᐱᖓᓱᓄᑦ ᓂᓐᖓᓚᐅᕆᕗᖅ, ᑭᒡᒍᓯᒃᓴᖃᕈᓐᓁᓚᐅᕐᒪᑕ ᔫᐱᒧᑦ, ᐸᓯᔭᒃᓴᐅᓇᓱᒋᒃᓯᑐᐃᓐᓇᕐᓗᑎᒃ ᑖᑦᓱᒥᖓ.

⁴ ᐃᓕᕼᐅᓕ ᑖᒃᑯᓇᓐᖓᑦ ᓄᑲᕐᓯᕐᐸᐅᒐᒥ ᑕᕝᕙᓃᑦᑐᓂᑦ, ᐅᑕᖅᑭᓚᐅᕐᐳᖅ ᐅᖃᕇᕐᓯᐊᕆᓪᓗᒋᑦ ᔫᐱᒧᑦ ᐅᖃᕈᒪᓪᓗᓂ.

⁵ ᐃᓕᕼᐅᓕ ᖃᐅᔨᓕᕋᒥ ᑖᒃᑯᐊ ᐱᖓᓱᑦ ᑭᐅᔪᓐᓁᓪᓕᓂᖏᓐᓂᒃ, ᑕᕝᕙ ᓂᓐᖓᓕᕐᐳᖅ.

ᐃᓕᕼᐅ

⁶ ᐃᓕᕼᐅᓗ, ᐸᕌᑭᐅᑉ ᐃᕐᓂᖓ ᐳᔾᔧᑎᒥᐅᖅ ᐅᖃᓕᕐᐳᖅ: “ᐃᓅᓱᒃᑑᒐᒪ, ᐃᓕᑦᓯᓕ ᐃᓄᑐᖃᐅᕗᓯ; ᑍᒤᒻᒪᑦ ᐃᓕᕋᓱᓚᐅᕐᐳᖓ ᐃᓱᒪᒋᔭᓐᓂᒃ ᐅᖃᕆᐊᒃᓴᖅ.

⁷ ᐃᓱᒪᖃᓚᐅᕋᒪ, ᐊᖓᔪᒃᓰᑦ ᐅᖃᓪᓚᖔᕐᑐᒃᓴᐅᕗᑦ, ᐃᓄᑐᖃᐅᓂᕐᓴᐅᔪᓯ ᐊᔪᕆᕐᑐᐃᔪᒃᓴᐅᒐᑦᓯ ᓯᓚᑐᓂᕐᒥᒃ.

⁸ ᒎᑎᐅᓪᓕ ᐊᔪᒐᖃᖏᑦᑑᑉ ᐊᓂᕐᓂᖓᑕ ᐃᓄᖕᒦᑦᑑᑉ, ᓇᔫᑎᓂᖓᓄᑦ ᐃᓄᒃ ᑐᑭᓯᔪᓐᓇᕐᑎᑕᐅᔪᓐᓇᕐᐳᖅ.

⁹ ᐃᓄᑐᖃᐅᓂᕐᒧᑦ ᐃᓄᒃ ᓯᓚᑐᔪᕈᕐᑎᑕᐅᕙᓐᖏᓚᖅ, ᐊᖓᔪᒃᓯᐅᓂᕐᒥᓄᓪᓗ ᑐᑭᓯᑎᑕᐅᕙᓐᖏᓚᖅ ᓱᓇ ᓇᓚᐅᑦᓯᖕᒪᖔᑦ.

¹⁰ ᑍᒤᒻᒪᑦ ᒫᓐᓇ ᓈᓚᑬᓐᓇᓚᐅᕐᓯᓐᖓ, ᐃᓱᒪᒋᔭᓐᓂᒡᓕ ᐅᖃᕐᕕᖃᑬᓐᓇᓚᐅᕐᓚᖓ.

¹¹ ᕿᓄᐃᓵᕐᓗᖓ ᓈᓚᓚᐅᕐᐸᑦᓯ ᐅᖃᓪᓚᒃᑎᓪᓗᓯ, ᐅᖃᐅᓯᕆᔭᓯᓗ ᓯᓚᑐᓂᕐᒥᒃ ᓇᓗᓁᕐᓯᓚᐅᕐᐳᑦ, ᖃᓄᖅ ᐅᖃᐅᓯᖃᕆᐊᖃᕐᒪᖔᑦᓯ ᐃᓱᒪᒃᓴᕐᓯᐅᕐᑎᓪᓗᓯ.

¹² ᐃᒃᐱᒍᓱᑦᓯᐊᕐᓗᖓ ᓈᓚᑦᓯᐊᓚᐅᕐᐸᑦᓯ; ᑭᓯᐊᓂᓕ ᐅᖃᐅᓯᕆᔭᑦᓯᓐᓄᑦ ᔫᐱ ᓇᓚᐅᑕᐅᓚᐅᓐᖏᓚᖅ, ᐅᖃᐅᓯᕆᔭᖏᓪᓗ ᐃᓕᑦᓯᓐᓄᑦ ᑭᐅᔭᐅᓚᐅᕋᑎᒃ.

¹³ ᓱᖕᒪᑦ ᐃᓕᓯᒪᓂᕐᒥᒃ ᖃᐅᔨᓯᒪᓂᕋᖃᑦᑕᓚᐅᕐᐱᓯ? ᒎᑎᐅᑉ ᑭᓯᒥ ᑖᓐᓇ ᑭᐅᔪᓐᓇᐹ, ᐃᓄᖕᓂᐅᖏᑦᑐᖅ.

¹⁴ ᔫᐱ ᐅᕙᓐᓄᑦ ᐅᖃᓪᓚᓚᐅᖏᒻᒪᑦ, ᐃᓕᑦᓯᓗ ᑭᐅᒪᓂᕆᓚᐅᕐᑕᑦᓯᑐᑦ ᑭᐅᒪᓂᐊᓐᖏᓚᕋ.

¹⁵ ᐃᓕᖕᓄᑦ ᐅᖃᐅᓯᒃᓴᖃᕈᓐᓁᕐᐳᑦ, ᑭᒡᒍᓯᒃᓴᖃᕈᓐᓁᕐᓗᑎᒡᓗ.

¹⁶ ᓱᓕ ᐅᑕᖅᑭᔭᕆᐊᖃᕐᐳᖔ ᑖᒃᑯᐊ ᓂᐱᖃᓐᖏᑎᓪᓗᒋᑦ? ᑕᕝᕙᓂ ᓇᖏᑐᐃᓐᓇᓕᕐᒪᑕ, ᐅᖃᐅᓯᒃᓴᖃᕈᓐᓁᕐᓗᑎᒃ.

¹⁷ ᑕᕝᕙ ᑭᐅᓂᐊᓕᕐᐳᖓ ᒫᓐᓇ; ᐅᖃᐅᑎᓗᑎᓪᓗ ᐃᓱᒪᒋᔭᓐᓂᒃ.

¹⁸ ᐅᖃᐅᓯᒃᓴᓕᐊᓘᓕᕋᒪ, ᐊᓂᕐᓂᐅᑉ ᐃᓗᓐᓃᑦᑑᑉ ᓄᖅᑲᖓᑎᑦᑐᓐᓁᓪᓕᖕᒪᖓ.

¹⁹ ᑕᑯᒋᑦ, ᓈᕋ ᕔᓂᑎᑐᑦ ᐳᓪᓚᒃᑐᑎᑑᓕᕐᐳᖅ; ᕔᓂᖃᐅᑎᒧᑦ ᕿᓯᖕᒧᑦ ᐴᕐᓯᒪᓪᓗᓂ ᖄᓕᒑᓕᕐᑐᑎᑐᑦ.

²⁰ ᐅᖃᕐᓗᖓ ᑭᓯᐊᓂᐅᓕᕐᐳᖅ, ᐸᓚᕐᓯᔪᓐᓇᖁᓪᓗᖓ; ᓂᓪᓕᕐᓗᖓ ᑭᓯᐊᓂᐅᓕᕐᐳᖅ ᑭᐅᓗᖓᓗ.

²¹ ᓇᓪᓕᐊᓐᓂᒡᓘᓐᓃᑦ ᑕᑉᐱᕐᓱᐃᓗᖓ ᐅᖃᕐᓂᐊᓐᖏᓚᖓ ᓇᓪᓕᐊᓐᓂᒡᓗ ᐱᐅᓯᑎᑦᓯᓂᕐᓴᐅᓗᖓ ᐱᓂᐊᓐᖏᓚᖓ.

²² ᓇᓪᓕᐊᓐᓂᒃ ᐱᐅᓯᑎᑦᓯᓂᕐᓴᐅᔭᕆᐊᒃᓴᖅ ᖃᐅᔨᒪᖏᓐᓇᒪ, ᑍᒤᑐᐊᕈᒪ ᐱᓐᖑᕐᑎᑎᒪ ᓱᒋᐊᑦᓴᐅᑎᒋᒐᔭᕐᐹᖓ ᑐᖁᑎᓪᓗᓂᖓ.”