ᔫᐱᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱᐅᑉ ᒎᑎᒥᒃ ᓈᒻᒪᒃᓴᖏᓐᓂᖓ

¹ ᑕᒪᑐᒪ ᑭᖑᓂᖓᒍᑦ ᔫᐱ ᓂᓪᓕᕐᐳᖅ ᐃᓅᓕᕐᕕᓂ ᐅᖃᕐᓂᕐᓘᑎᒋᓪᓗᓂᐅᒃ.

ᔫᐱ

² ᔫᐱᓗ ᐅᖃᕐᐳᖅ:

³ “ᐅᓪᓗᖅ ᐃᕐᓂᐊᖑᕕᒋᓚᐅᕐᑕᕋ ᐊᓯᐅᓕᕐᓕ, ᐅᓐᓄᐊᒃᑯᓪᓗ ᐅᖃᓚᐅᕐᑐᖅ, ‘ᐊᖑᑕᐅᕗᖅ.’ ᐊᓯᐅᓕᕐᓕ.

⁴ ᐅᓪᓗᖅ ᑍᓐᓇ ᑖᕐᑑᓕᕐᓕ! ᒎᑎᐅᓪᓗ ᑖᓐᓇ ᕿᓂᕐᑍᓕᓕᐅᒃ, ᖃᐅᒪᔪᒧᓪᓗ ᖃᐅᒻᒥᑕᐅᑦᑍᓕᓕ.

⁵ ᐅᓪᓗᖅ ᑍᓐᓇ ᓄᒫᓇᕐᓯᓗᓂ ᑖᕐᓯᒻᒪᕆᓕᕐᓕ. ᓄᕗᔭᓄᑦ ᐅᓕᒃᑕᐅᓕ; ᕿᕐᓈᖓᔪᓄᑦ ᑲᑉᐱᐊᓵᕐᑕᐅᓕ.

⁶ ᐅᓐᓄᒃ ᑍᓐᓇ ᓄᕗᑦᑕᕆᒃᑐᒧᑦ ᕿᕐᓂᕐᑕᒧᑦ ᕿᒫᑎᑕᐅᓕ, ᖁᕕᐊᓲᑕᐅᑦᑍᓕᓕ ᐊᕐᕌᒎᑉ ᐅᓪᓗᖏᓐᓂ, ᓈᓴᖃᓯᐅᑦᔭᐅᓯᒪᑦᑍᓕᓕ ᑕᖅᑭᓂ.

⁷ ᐅᓐᓄᒃ ᑍᓐᓇ ᓱᓇᖃᖏᑦᑑᓕᕐᓕ; ᐅᓐᓄᐊᖓᓗ ᖁᕕᐊᓇᕐᑐᕐᑕᖃᓚᐅᕐᓯᒪᖏᑦᑐᑎᑐᑦ ᑍᒤᓕᕐᓕ.

⁸ ᐱᔪᓐᓇᐅᑎᓖᑦ ᐅᓪᓗᒥᒃ ᑍᑦᓱᒥᖓ ᐅᖃᕐᓂᕐᓘᑦᔨᓕᕐᓕᑦ, ᑖᒃᑯᐊ ᐆᒪᔪᐊᓗᖕᒥᒃ ᓕᕔᐊᑕᓂᒥᒃ ᑐᐸᒃᑎᑦᓯᔪᓐᓇᕐᑐᑦ.

⁹ ᐅᓪᓗᕆᐊᖅ ᖃᐅᓯᐅᑦ ᑕᕝᕗᖓ ᑕᕐᕆᑎᒍᒃ; ᖃᐅᓂᐊᕐᑐᒥᒃ ᓂᕆᐅᖕᓂᖅ, ᑕᒪᐅᖎᓐᓈᕐᓕ, ᖃᐅᕙᓪᓕᐊᔫᑉ ᐊᐅᐸᕐᓂᖓᑕ ᖃᓪᓗᖏᑦ ᑕᑯᒃᓴᐅᔪᓐᓃᕐᓕᑦ.

¹⁰ ᐊᓈᓇᒪ ᐃᒡᓕᐊᖓᑕ ᐅᒃᑯᐊᖓ ᐅᒃᑯᐊᓚᐅᖏᒻᒪᒍ, ᐊᑲᐅᖏᑦᔪᑎᒃᓴᖃᕐᓃᓪᓗ ᐃᔨᓚᐅᖏᒻᒪᒋᑦ ᐃᔨᓐᓄᑦ ᑕᑯᖁᓇᖓ.

¹¹ ᓱᖕᒪᓪᓕ ᑐᖁᓐᓂᓐᖏᓚᖓ ᐃᕐᓂᐊᖑᕋᑖᕐᓗᖓ? ᐊᓈᓇᒪ ᐃᒡᓕᐊᖓᓂᑦ ᐊᓂᓕᕐᓗᖓ ᑐᖁᔪᒃᓴᕕᓂᐅᒐᓗᐊᕐᑐᖓ.

¹² ᓱᖕᒪᓪᓕ ᐊᓈᓇᒪ ᓴᕐᓕᐊᕐᓂᕐᐹᖓ ᐃᕿᒻᒥᓪᓗᓂᖓ? ᓱᖕᒪᓪᓗ ᐊᒫᒪᒃᑎᓚᐅᕐᐹᖓ ᐃᕕᐊᖏᕐᒥᓂᑦ?

¹³ ᑍᒪᓕ ᓇᓪᓚᖓᓕᕋᔭᕐᐳᖓ ᓂᐱᖃᖏᓪᓗᖓ; ᓯᓂᓕᕋᔭᕐᐳᖓ; ᑕᕾᕐᓯᑐᐃᓐᓇᓕᕐᓗᖓᓗ,

¹⁴ ᐊᖓᔪᖅᑳᕐᔪᐊᖑᓯᒪᔪᑦ ᐃᑲᔪᕐᑎᖏᓪᓗ ᐃᓚᒋᓗᒋᑦ ᑍᒃᑯᐊ ᓴᓇᓯᒪᔪᑦ ᓱᕋᒃᓯᒪᔪᓂᒃ ᐊᖓᔪᖅᑳᕐᔪᐊᒃᑯᕕᖕᓂᒃ.

¹⁵ ᐊᖓᔪᖅᑳᕐᔪᐊᑉ ᐃᕐᓂᖏᑦ ᐃᓚᒋᓗᒋᑦ ᒎᓗᖁᑎᓕᑦ, ᐃᒡᓗᒥᖕᓂᒃ ᑕᑍᓯᒪᔪᑦ ᓯᐅᓪᕕᕆᓂᒃ,

¹⁶ ᐅᕝᕙᓗ ᓱᖕᒪᑦ ᐃᓅᕋᑖᕐᑎᓪᓗᖓ ᐃᔨᕐᑕᐅᑐᐃᓐᓇᓚᐅᕐᓂᓐᖏᓚᖓ, ᑕᒪᐅᓁᓐᓇᖅ ᐃᕐᓂᐊᖑᔪᑐᑦ ᖃᐅᒪᔪᒥᒃ ᑕᑯᓚᐅᕐᓯᒪᖏᑦᑐᑐᑦ.

¹⁷ ᑕᕝᕙᓂ ᐊᔪᕐᑐᓕᔩᑦ ᐊᑲᐅᓐᖏᓕᐅᕐᑎᑦᓯᓂᖏᑦ ᓄᖅᑲᕐᐸᖕᒪᑕ, ᑕᕝᕙᓂᓗ ᑕᖃᓯᒪᔪᖅ ᓴᓇᓂᕐᒥᖕᓂᑦ ᑕᕾᕐᓯᓕᕐᐸᒃᓱᑎᒃ.

¹⁸ ᑕᕝᕙᓂ ᐊᓄᓪᓚᒃᓯᐊᕕᓃᑦ ᐃᒻᒥᖕᓄᑦ ᓮᒪᖃᑎᒌᓕᕐᐸᒃᐳᑦ; ᕾᒐᓛᕐᑕᐅᓂᕐᒥᒃ ᓱᐊᒃᑕᐅᓂᕐᒥᒡᓗ ᓂᐱᒥᒃ ᑐᓴᕐᐸᒍᓐᓃᕐᓗᑎᒃ.

¹⁹ ᑕᕝᕙᓃᑉᐳᑦ ᖃᐅᔨᒪᔭᐅᔪᑦ ᖃᐅᔨᒪᔭᐅᓗᐊᖏᑦᑐᓪᓗ, ᓯᐊᓛᕕᓃᓪᓗ ᐊᖓᔪᖅᑳᒥᖕᓄᑦ ᕿᓚᒃᑕᐅᓯᒪᔪᓐᓃᕐᓗᑎᒃ.

²⁰ ᓱᖕᒪᑦ ᐃᓄᒃ ᐃᓅᑎᑉᐸᒃᐱᐅᒃ ᖁᕕᐊᓇᖏᑦᑐᒥ? ᓱᖕᒪᓪᓗ ᐃᓅᓯᖃᕐᑎᑉᐱᒋᑦ ᑕᕐᓂᕐᓄᑦ ᕿᒃᓵᖕᓇᕐᑐᓂᒃ?

²¹ ᑐᖁᔪᒪᒐᓗᐊᕐᐳᑦ, ᑐᖁᓚᐅᓐᖏᓚᓪᓕ, ᐃᓗᕕᕐᑕᐅᔪᒪᓂᕐᓴᐅᕗᑦ ᑮᓇᐅᔭᓂᒃ ᓴᐅᓯᒪᔪᓂᒃ ᕿᓂᕋᔭᕐᓂᕐᒥᖕᓂᑦ.

²² ᖁᕕᐊᓱᒻᒪᕆᒃᑲᔭᕐᐳᑦ ᐊᓕᐊᓁᒍᓱᒡᓗᑎᒡᓗ, ᓯᕆᒐᔭᕐᐳᓪᓗ, ᐃᓗᕕᕐᑕᐅᕕᒃᓴᒥᖕᓂᒃ ᓇᒡᕚᕈᑎᒃ.

²³ ᓱᖕᒪᑦ ᐃᓅᓯᖃᕐᑎᑕᐅᕙ ᐱᐅᓯᕐᒥᓂᒃ ᐃᔨᕐᓯᓯᒪᔪᖅ? ᒎᑎᐅᑉ ᐊᕙᑕᖏᕐᓯᒪᑎᓪᓗᓂᒋᑦ ᐊᕙᑎᓕᒫᖏᓐᓂᑦ.

²⁴ ᓂᕆᓂᐊᓕᕌᖓᒪ ᐊᓂᕐᓴᐅᒥᖃᑦᑕᕐᐳᖓ, ᕿᒃᓵᖕᓂᒃᑲᓗ ᐅᕙᓐᓄᑦ ᑯᕕᔭᐅᕗᑦ ᐃᒥᕐᑎᑐᑦ.

²⁵ ᑲᑉᐱᐊᒋᔭᓐᓄᑦ ᐅᐸᒃᑕᐅᕗᖓ, ᓯᕘᕋᒋᔭᓐᓄᓪᓗ ᑎᑭᑕᐅᓪᓗᖓ.

²⁶ ᐱᓐᓇᔮᓕᕈᓐᓁᓪᓕᕗᖓ, ᓂᐰᑦᑑᔪᓐᓇᕐᓇᖓᓗ; ᑕᕾᕐᓯᕈᓐᓇᓐᒋᓚᖓ; ᐊᑲᐅᖏᑦᔪᑎᒃᑲᓕ ᑎᑭᖃᑦᑕᕐᐳᑦ.”