ᔫᐱᐅᑉ ᐊᒡᓚᖏᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱᐅᑉ ᓴᐳᓐᓂᐊᕐᓂᖓ ᓁᓕᑎᕐᓯᒪᔪᖅ ᔫᐱ

¹ ᑕᕝᕙ ᔫᐱ ᐅᖃᓯᒋᕗᖅ, ᐅᖃᕐᓗᓂᓗ:

² “ᑕᕝᕙᑐᖅ ᐃᓅᓯᕋ ᐅᑎᓚᐅᕐᒥᓕ ᐃᓅᕋᑖᕐᓂᕕᓂᓐᓄᑦ, ᑍᑦᓱᒪᓂᒧᑦ ᒎᑎᒧᑦ ᑲᒪᒋᔭᐅᑦᓯᐊᕐᓂᕆᓚᐅᕐᑕᓐᓄᑦ;

³ ᑍᑦᓱᒪᓂ ᒎᑎᐅᑉ ᖃᐅᒪᓂᖓᓄᑦ ᓇᔪᕐᑕᐅᖏᓐᓇᕐᐸᓚᐅᕋᒪ, ᑖᕐᑐᒃᑰᓕᕌᖓᒪᓗ ᑖᑦᓱᒪ ᖃᐅᒪᓂᖓᓄᑦ ᑕᓯᐅᕐᑕᐅᕙᓚᐅᕐᐳᖓ;

⁴ ᑍᑦᓱᒪᓂ ᐱᕈᕐᐸᓪᓕᐊᑎᓪᓗᖓ ᐃᓅᓱᒃᑑᓕᕐᑎᓪᓗᖓ, ᒎᑎᐅᑉ ᐃᓚᓐᓈᖃᕐᓂᖓᑕ ᐊᖏᕐᕋᕋ ᓇᔪᓚᐅᕐᒪᒍ;

⁵ ᐊᔪᒐᖃᖏᑦᑑᑉ ᓱᓕ ᑍᑦᓱᒪᓂ ᓇᔪᓚᐅᕐᒪᖓ, ᕿᑐᕐᖓᓕᒫᒃᑲᓗ ᐊᕙᑎᓐᓃᑎᓪᓗᒋᑦ;

⁶ ᐆᒪᔪᖁᑎᒃᑲ ᐃᒻᒧᓕᐅᑦᓯᐊᕐᐸᓚᐅᕐᐳᑦ ᐊᒥᒐᖏᑦᑐᒥᒃ, ᓇᐹᕐᑐᖁᑎᒃᑲᓗ ᐅᕐᓱᒃᓴᓂᒃ ᐱᕈᕐᑎᑦᓯᑦᓯᐊᖃᑦᑕᓚᐅᕐᐳᑦ!

⁷ ᐃᒡᓗᒐᓴᖕᓂ ᐊᖓᔪᖅᑳᕆᔭᐅᔪᓄᑦ ᐅᐸᒍᑎᔭᕌᖓᒪ, ᐃᓚᒋᓪᓗᒋᑦ ᐃᒃᓯᕙᖃᑎᒋᕙᓚᐅᕐᐸᒃᑲ ᑲᑎᒪᑎᓪᓗᒋᑦ,

⁸ ᐃᓅᓱᒃᑐᑦ ᐅᕙᓐᓂᒃ ᑕᑯᔭᕌᖓᒥᒃ ᐊᖅᑯᑎᒥᑦ ᐊᒡᕔᕐᐸᓚᐅᕐᐳᑦ, ᐃᓄᑐᕾᓪᓗ ᓂᑯᕕᑉᐸᓚᐅᕐᐳᑦ ᐅᕙᓐᓂᒃ ᐅᐱᒍᓱᖕᓂᕐᒧᑦ;

⁹ ᐊᖓᔪᖅᑳᑦ ᐅᖃᖃᑎᒌᖕᓂᕐᒥᖕᓂᑦ ᓄᖅᑲᕐᐸᓚᐅᕐᐳᑦ, ᐊᒡᒐᖕᒥᓄᓪᓗ ᖃᓂᓂ ᒪᑐᕙᒃᓗᒋᑦ;

¹⁰ ᐊᖑᑎᑦ ᐱᓪᓚᕆᖁᑕᐅᔪᑦ ᓂᐸᖏᕐᐸᓚᐅᕐᐳᑦ, ᐅᖃᖏᑦ ᐊᒡᓛᑦ ᕿᓚᖏᓐᓄᑦ ᓂᐱᓪᓗᑎᒃ.

¹¹ ᓇᐅᓕᒫᓄᑦ ᑐᓴᕐᑕᐅᔭᕌᖓᒪ, ᓮᒻᒪᕐᑎᑕᐅᓯᒪᓂᕋᕐᑕᐅᕙᓚᐅᕐᐳᖓ, ᑕᑯᔭᐅᔭᕌᖓᒪᓗ, ᑕᑯᔪᓄᑦ ᖁᕕᐊᒋᔭᐅᕙᓚᐅᕐᐳᖓ;

¹² ᐊᒃᓱᔪᑦ ᐃᑲᔪᕐᑕᐅᔪᒪᔭᕌᖓᑕ ᐃᑲᔪᕐᐸᓚᐅᕋᒃᑭᑦ, ᐃᓕᐊᕐᔪᐃᓪᓗ ᐃᑲᔪᕐᑎᒃᓴᖃᖏᑦᑐᑦ ᐃᑲᔪᕐᐸᓚᐅᕆᕙᒃᑲ.

¹³ ᑐᖁᓕᒑᔪᑦ ᓮᒻᒪᕐᑎᑦᓯᓂᖏᓐᓄᑦ ᑐᕝᕕᐅᕙᓚᐅᕐᐳᖓ, ᐅᐃᒡᒐᕐᓃᑦ ᐆᒻᒪᑎᖏᑦ ᖁᕕᐊᓱᖕᓂᕐᒧᑦ ᐃᓐᖏᕈᓐᓇᕐᓯᑎᓚᐅᕐᐸᒃᑲ.

¹⁴ ᐱᑦᓯᐊᕐᓂᕐᒥᒃ ᐱᓂᐊᕐᓂᖃᓚᐅᕐᐳᖓ, ᐱᐅᓯᕆᓪᓗᒍᓗ; ᐊᑦᔨᒌᒃᑎᑦᓯᓂᖅ ᐊᓐᓄᕌᑎᑐᑦ ᐊᑐᓚᐅᕐᐸᕋ ᓇᓴᕆᓪᓗᒍᓗ.

¹⁵ ᑕᐅᑐᖏᑦᑐᒧᑦ ᐃᔨᒋᔭᐅᓚᐅᕐᐳᖓ, ᑐᓯᐊᑦᑐᒧᓪᓗ ᐃᑎᒐᒋᔭᐅᓪᓗᖓ.

¹⁶ ᐊᒃᓱᔪᓄᑦ ᐊᑖᑕᒋᔭᐅᓚᐅᕐᐳᖓ, ᖃᐅᔨᒪᓐᖏᑕᓐᓂᒃ ᓈᒻᒪᓐᖏᓕᐅᕐᑐᖃᓕᕐᑎᓪᓗᒍ ᖃᐅᔨᓴᕈᑦᔨᕙᓚᐅᕐᐳᖓ.

¹⁷ ᐃᓱᐃᑦᑐᓕᔪᑦ ᐱᔪᓐᓇᕐᓂᖏᑦ ᓵᓚᒋᕙᓚᐅᕐᐸᒃᑲ, ᓱᒃᑯᔨᐊᕆᔭᖏᓪᓗ ᓴᒃᑯᑕᐅᑎᓪᓗᒋᑦ ᓴᐳᑎᕙᒃᓗᒋᑦ.

¹⁸ ᐃᓱᒪᖃᓚᐅᕐᐳᖓ, ᑐᖁᓛᕋᓱᒋᓪᓗᖓ ᐊᖏᕐᕋᕐᓯᒪᑦᓯᐊᕐᓗᖓ, ᐅᓪᓗᒃᑲᓗ ᓯᐅᖅᑲᑎᑐᑦ ᐅᓄᕐᑎᒋᓗᑎᒃ ᐊᑯᓂ ᐃᓅᓂᐊᕋᓱᒋᓪᓗᖓ.

¹⁹ ᓇᐹᕐᑐᑎᑐᑦ ᐊᒫᒃᑲ ᓯᐊᒻᒪᕐᓯᒪᓚᐅᕐᐳᑦ ᐃᒫᓄᑦ, ᐊᕙᓚᖓᔪᒃᑲᓗ ᖃᐅᓯᕐᑎᑕᐅᓯᒪᓪᓗᑎᒃ ᓄᓇᐅᑉ ᐂᔪᖓᓂᖓᓄᑦ.

²⁰ ᓂᕐᑐᕐᑕᐅᓂᕋ ᓄᑖᖑᐃᓐᓇᓚᐅᕐᐳᖅ ᐅᕙᓐᓂ, ᓄᑭᖃᑦᓯᐊᕐᓂᕋᓗ ᐱᑎᒃᓯᑎᑐᑦ ᓴᖏᔫᑦᓯᐊᕐᓗᓂ.

²¹ ᐃᓄᐃᑦ ᐅᖃᓪᓚᓕᕌᖓᒪ ᓈᓚᑦᓯᐊᕐᐸᓚᐅᕐᐳᑦ, ᓂᐱᖃᖏᑦᓯᐊᕐᓗᑎᒃ ᑐᑭᓯᓇᓱᑦᓯᐊᕐᓗᑎᒡᓗ.

²² ᐅᖃᓪᓚᒌᕅᒐᒪ ᐅᖃᐅᓯᕆᔭᒃᑲ ᐃᓚᔭᐅᒋᐊᒃᑲᓐᓂᕐᐸᓚᐅᓐᖏᓚᑦ, ᐅᖃᐅᓯᒃᑲ ᓯᓚᓗᒃᑎᑐᑦ ᑯᕕᕙᓚᐅᕐᐳᑦ ᐅᖃᓪᓚᒡᕕᒋᔭᓐᓄᑦ.

²³ ᐅᕙᓐᓂᒃ ᐅᑕᖅᑭᕙᓚᐅᕐᐳᑦ ᐱᕈᕐᓰᕕᓕᕆᔨᑎᑐᑦ; ᐅᐱᕐᖔᒃᑯᑦ ᓯᓚᓗᖕᒥᒃ ᐃᒥᕐᑐᑎᑐᑦ ᑐᓐᖓᓱᒃᑎᑦᓯᓪᓗᑎᒃ.

²⁴ ᐃᒻᒥᖕᓂᒃ ᐱᔪᓐᓇᕋᓱᒋᔪᓐᓁᕐᑐᑦ ᖁᖓᑉᐸᓚᐅᕐᐸᒃᑲ; ᑮᓇᓐᓂᒃ ᖁᖓᑦᑐᒥᒃ ᑕᑯᔭᕌᖓᒥᒃ ᐱᕙᓪᓕᕐᑎᑕᐅᕙᓚᐅᕐᐳᑦ.

²⁵ ᐊᖓᔪᖅᑳᕆᔭᐅᕙᓚᐅᕐᐳᖓ, ᐃᓱᒻᒥᕐᑐᐃᕙᒡᓗᖓᓗ ᑖᒃᑯᓂᖓ; ᐊᖓᔪᖅᑳᕐᔪᐊᑉ ᑕᓯᐅᕐᓯᓂᖓᑎᑐᑦ ᐅᓇᑕᕐᑐᒃᓴᖁᑎᒥᓂᒃ, ᕿᒃᓵᒃᑐᓂᒡᓗ ᓮᒻᒪᕐᓮᔪᑎᑐᑦ ᑍᒤᓚᐅᕐᐳᖓ.”