ᔫᐱᐅᑉ ᐊᒡᓚᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱ

¹ ᑕᕝᕙ ᔫᐱᐅᑉ ᑭᐅᕚ:

² “ᐅᖃᐅᓯᕆᔭᒃᑲ ᓈᓚᑦᓯᐊᕐᓯᐅᒃ, ᑕᒪᓐᓇ ᑕᕝᕙ ᓮᒻᒪᕐᑎᑕᐅᑦᔪᑎᒋᔪᒪᔭᕋ ᐃᓕᑦᓯᓐᓂᑦ.

³ ᐅᖃᕐᕕᒃᓴᖃᕐᑎᓚᐅᕐᓯᓐᖓ, ᐅᑕᖅᑭᑦᓯᐊᕐᓗᓯ, ᐅᖃᕇᕈᒪ ᑭᖑᓂᖓᒍᑦ, ᒥᑕᐅᑎᒋᓂᐊᕆᕙᑦᓯᓐᖓ.

⁴ ᓈᒻᒪᒃᓴᖏᑦᔪᑎᒋᔭᒃᑲ ᐃᓄᖕᒧᑦ ᑐᕌᖓᓐᖏᓚᑦ; ᐱᑦᔪᑎᖃᑦᓯᐊᕐᓗᖓ ᕿᓄᐃᓵᕈᓐᓁᓪᓕᕗᖓ.

⁵ ᑕᑯᑦᓯᐊᓚᐅᕐᓯᓐᖓ, ᓱᓕ ᖃᓄᐃᓕᐅᕐᑕᐅᒃᑲᓐᓂᕆᐊᖃᕐᐳᖓ; ᑕᑯᑦᓱᐊᖕᓂᕐᒧᑦ ᐅᖃᐅᓯᒃᓴᖃᕈᓐᓁᑐᐃᓐᓇᕐᓂᐊᕐᐱᓰ?

⁶ ᖃᓄᐃᓯᒪᓂᓐᓂᒃ ᐃᓱᒪᓕᕋᒪ ᑕᕝᕙ ᖁᐊᕐᓵᖓᕗᖓ, ᓴᔪᓕᕐᓗᖓᓗ ᑎᒥᒐᓗ ᕿᑲᕈᓐᓁᓪᓕᕗᖅ.

⁷ ᓱᖕᒪᓪᓕᑭᐊᖅ ᐱᐅᖏᑦᑐᓕᔪᑦ ᐆᒪᑯᑖᒃᑎᑕᐅᕙᑦ? ᐃᓄᑐᖃᓐᖑᕐᐸᒃᐳᑦ, ᐊᔪᖏᑦᑑᓕᕐᓗᑎᒃ ᐱᔪᓐᓇᕐᓂᖃᕐᓗᑎᒡᓗ.

⁸ ᕿᑐᕐᖓᖏᑦ ᐱᕈᕐᐸᓪᓕᐊᑎᓪᓗᒋᑦ ᑕᑯᓐᓇᖃᑦᑕᕐᐳᑦ, ᐃᕐᖑᑕᖏᓪᓗ ᐱᕈᕐᐸᓪᓕᐊᑎᓪᓗᒋᑦ ᑕᑯᓐᓇᖅᑲᑦᑕᕆᓪᓗᑎᒃ.

⁹ ᐊᖏᕐᕋᖏᑦ ᖃᓄᐃᑦᑐᖃᖏᑦᓯᐊᕐᐳᑦ ᓯᕘᕋᓇᕐᑐᖃᕋᑎᒡᓗ, ᒎᑎᐅᓪᓗ ᓱᒋᐊᕐᓯᓂᖓᓄᑦ ᑎᑭᑕᐅᓯᒪᓇᑎᒃ.

¹⁰ ᐃᒻᒧᓕᐅᕐᑎᖁᑎᖏᑕ ᐸᖕᓂᖏᑦ ᑭᖑᕚᒃᓴᓕᐅᑦᓯᐊᕐᐳᑦ; ᐃᒻᒧᓕᐅᕐᑏᓪᓗ ᕿᑐᕐᖓᕐᑖᑦᓯᐊᖃᑦᑕᕐᐳᑦ ᐃᕐᓂᔪᓐᓁᓪᓕᓚᐅᕐᓯᒪᓇᑎᒃ.

¹¹ ᕿᑐᕐᖓᕐᑖᒥᖕᓂᒃ ᐊᓂᑎᑦᓯᖃᑦᑕᕐᐳᑦ ᓰᐱᑎᑐᑦ, ᐱᓐᖑᐊᖃᑎᒌᖁᓪᓗᒋᑦ ᒥᓯᒃᑕᕐᓗᑎᒡᓗ.

¹² ᐃᓐᖏᖃᑦᑕᕐᐳᑦ ᓯᕙᓂᕋᐅᑎᓄᑦ ᑯᑭᑦᑕᐸᐅᑎᐅᔭᓄᓪᓗ, ᖁᕕᐊᓱᒡᓗᑎᒃ ᑎᑦᑐᓚᐅᑏᑦ ᓂᐱᖏᑦ ᒪᓕᒡᓗᒋᑦ.

¹³ ᐃᓅᓂᕐᒥᖕᓂ ᐊᔪᕐᓴᖏᑦᓯᐊᕐᓗᑎᒃ ᐃᓅᕙᒃᐳᑦ, ᐃᓱᒫᓘᑎᖃᖏᑦᓯᐊᕐᓗᑎᒡᓗ ᑐᖁᕙᒃᓗᑎᒃ.

¹⁴ ᒎᑎᒧᓪᓗ ᐅᖃᕐᐸᒃᐳᑦ, ‘ᑲᒪᒋᓐᖏᓚᐅᕐᑎᒍᑦ! ᐊᖅᑯᓯᓂᕆᔭᕐᓂᒃ ᖃᐅᔨᔪᒪᓐᖏᓚᒍᑦ.

¹⁵ ᖃᓄᐃᑦᑑᖕᒪᑦ ᐊᔪᒐᖃᖏᑦᑐᖅ, ᓱᖕᒪᑦ ᐱᔨᑦᓯᕆᐊᖃᕐᐸᕘᑦ? ᖃᓄᕐᓗ ᐱᕙᓪᓕᕈᑎᖃᕋᔭᕐᐱᑕ ᑐᒃᓯᐊᕐᕕᒋᒍᑦᑎᒍ?’

¹⁶ ᑕᑯᒋᑦ, ᐃᒻᒥᖕᓂᒃ ᐱᔪᓐᓇᕐᓂᕐᒥᖕᓄᑦ ᒪᑭᓯᒪᓂᕋᕐᐳᑦ, ᐱᐅᖏᑦᑐᓕᔪᓪᓕ ᐃᓱᒪᒋᔭᖏᑦ ᐊᖏᖃᑎᒋᔪᓐᓇᓐᖏᓚᒃᑲ.

¹⁷ ᖃᓄᖅ ᐊᑯᓔᑎᒋᔪᒥᒃ ᓇᓂᕈᐊᖏᑦ ᖃᒥᑎᑕᐅᖃᑦᑕᕐᓯᒪᕚᑦ? ᓇᓪᓕᐊᓪᓘᓐᓃᑦ ᐊᓯᕈᕐᑕᐅᓇᕐᑐᒧᑦ ᑎᑭᑕᐅᓚᐅᕐᓯᒪᕚ? ᒎᑎᐅᓪᓗ ᓂᓐᖓᒡᕕᒋᓗᓂᒋᑦ ᓱᒋᐊᓚᐅᕐᓯᒪᕙᒌᑦ?

¹⁸ ᐃᕕᒃᑎᑐᑦ ᐊᓄᕆᒧᑦ ᐊᐅᓚᑕᐅᔪᑎᑐᑦ ᑍᒤᓐᖏᓛᑦ, ᐅᕝᕙᓗ ᓴᓂᕐᑎᑐᑦ ᐊᓄᕆᒧᑦ ᑎᒃᑕᐅᔪᑎᑐᑦ ᑍᒤᓐᖏᓚᑦ?

¹⁹ ᐅᖃᕐᐸᒃᐳᓯ, ‘ᒎᑎ ᑭᖑᕚᖏᓐᓂᒃ ᓱᒋᐊᕐᓯᕙᒃᐳᖅ ᐊᑖᑕᒃᑯᖏᑕ ᐊᔪᕐᑐᓕᓂᕕᓂᖏᑦ ᐱᑦᔪᑎᒋᓪᓗᒋᑦ.’ ᒎᑎ ᐊᔪᕐᑐᓕᔪᓂᒃ ᓱᒋᐊᕐᓯᔪᒃᓴᐅᕗᖅ ᑐᕅᓐᓇᕐᓗᒋᑦ ᖃᐅᔨᖁᓪᓗᒋᑦ ᐊᔪᕐᑐᓕᓂᕐᒧᑦ ᓱᒋᐊᕐᑕᐅᓂᕐᒥᖕᓂᒃ.

²⁰ ᓇᖕᒥᓂᖅ ᑕᑯᔪᒃᓴᐅᕗᑦ ᓱᒋᐊᕐᑕᐅᑦᔪᑎᒥᖕᓂᒃ, ᐃᒥᕐᑐᒃᓴᐅᕗᓪᓗ ᐊᔪᒐᖃᖏᑦᑑᑉ ᓂᓐᖓᐅᓯᖓᓂᒃ.

²¹ ᐃᓅᑉ ᐃᓅᓯᖓ ᐃᓱᓕᓯᒪᓕᕐᑎᓪᓗᒍ, ᓱᓕ ᐃᒃᐱᒍᓱᒃᑲᔭᕐᐹ ᐃᓚᒋᔭᖏᑕ ᖃᓄᐃᓐᓂᖏᓐᓂᒃ?

²² ᓇᓪᓕᐊᑦ ᒎᑎᒥᒃ ᐊᔪᕆᕐᑐᐃᔪᓐᓇᕐᐹ? ᐊᖓᔪᖅᑳᖑᓂᕐᐹᓂᒃ ᐊᒡᓛᑦ ᐃᖅᑲᕐᑐᐃᔪᓐᓇᕐᑎᓪᓗᒍ?

²³ ᐃᓄᐃᑦ ᐃᓚᖏᑦ ᑐᖁᕙᒃᐳᑦ ᐊᔪᕐᓴᖏᑦᓯᐊᕐᓗᑎᒃ, ᖃᓄᐃᓐᓇᕐᑐᒦᖏᑦᓯᐊᕐᓗᑎᒃ ᐱᔭᕐᓂᖏᑦᑐᒃᑰᓚᐅᕋᑎᒡᓗ,

²⁴ ᑎᒥᖏᑦ ᖁᐃᓃᓐᓇᕐᓗᑎᒃ ᐃᓅᔪᓐᓃᕐᐸᒃᐳᑦ ᓴᐅᓐᓇᕆᑦᓯᐊᕐᓗᑎᒃ ᐸᑎᖏᓪᓗ ᖃᓄᐃᕈᔪᖏᑦᓯᐊᕐᓗᑎᒃ.

²⁵ ᐃᓚᖏᓪᓕ ᖁᕕᐊᓇᕐᑐᒃᑰᓚᐅᕐᓯᒪᓇᑎᒃ ᑐᖁᕙᒃᐳᑦ, ᖁᕕᐊᒋᔭᒥᖕᓂᒃ ᐱᔪᓐᓇᕐᓯᓚᐅᕐᓯᒪᓇᑎᒃ.

²⁶ ᑐᖁᕙᒃᐳᑦ ᓴᓂᓕᕇᒃᓗᑎᒃ ᐃᓗᕕᕐᓯᒪᓪᓗᑎᒃ, ᓄᓇᐅᓪᓗ ᖁᒡᓗᒋᐊᖏᓐᓄᑦ ᐅᓕᒃᑕᐅᕙᒃᐳᑦ.

²⁷ ᖃᓄᖅ ᐃᓱᒪᖃᕐᒪᖔᑦᓯ ᖃᐅᔨᒪᕙᑦᓯ, ᐅᕙᓐᓂᒡᓗ ᐱᑦᓯᐊᕈᒪᓇᓯ ᐃᓱᒪᖃᑎᒌᒃᓯᒪᕗᓯ.

²⁸ ᐅᖃᕐᓗᓯᓗ, ‘ᓇᐅᒡᓕ ᐊᖓᔪᖅᑳᕐᔪᐊᑉ ᐃᒡᓗᖓ? ᐱᐅᖏᑦᑐᓕᔫᓪᓗ ᐊᖏᕐᕋᕆᓚᐅᕐᑕᖓ?’

²⁹ ᐃᖏᕐᕋᖃᑦᑕᕐᑐᓂᒃ ᐊᐱᕆᓚᐅᕐᓯᒪᓐᖏᓚᓰ? ᐅᓂᒃᑳᕆᔭᖏᓪᓗ ᐅᒃᐱᕆᖏᑉᐱᓯᐅᒃ?

³⁰ ᐃᓄᒃ ᐱᐅᖏᑦᑐᓕᔪᖅ ᐊᓯᕈᕐᑕᐅᓇᕐᑐᒧᑦ ᑎᑭᑕᐅᖏᑉᐸᑦ, ᓂᓐᖓᐅᓯᐅᔪᒫᕐᑑᑉ ᐅᓪᓗᖓᓂ ᓴᐳᑎᔭᐅᔪᓐᓇᕋᔭᕐᐹ?

³¹ ᑭᐊ ᐊᑭᕋᕐᑐᕐᓗᒍ ᐅᖃᐅᑎᔪᓐᓇᕋᔭᕐᐸᐅᒃ? ᑭᐊᓗ ᐱᓇᓱᐊᕐᓂᕆᓯᒪᔭᖓ ᒪᓕᒡᓗᒍ ᐊᑭᓂᐊᕈᓐᓇᕐᐸᐅᒃ?

³² ᐃᓗᕕᖃᕐᕕᖕᒧᑦ ᐊᒡᔭᕐᑕᐅᒐᒥ, ᖃᐅᔨᓴᕐᑎᓄᑦ ᐃᓗᕕᖓ ᖃᐅᔨᓴᕐᑕᐅᓕᕐᐳᖅ.

³³ ᓇᑎᕐᓇᒥ ᓂᐊᖁᑦᑍᑦ ᒪᒪᕐᑑᕗᑦ ᑖᑦᓱᒧᖓ; ᐃᓄᓕᒫᓂᑦ ᑭᖑᓂᖓᓂᑦ ᒪᓕᒃᑕᐅᕗᖅ, ᑖᑦᓱᒪᓗ ᓯᕗᓂᖓᓃᑦᑐᑦ ᓈᓴᒐᒃᓴᐅᓇᑎᒃ.

³⁴ ᓱᖕᒪᑦ ᑐᑭᖃᖏᑦᑐᓄᑦ ᓮᒻᒪᕐᓴᕋᓱᒃᐱᓯᓐᖓ? ᑭᐅᑦᔪᑎᒋᔭᓕᒫᓯ ᓱᓕᓂᕐᑕᖃᓐᖏᓚᑦ.”