ᔫᐱᐅᑉ ᐊᒡᓚᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᔪᐸᕆ

¹ ᑕᕝᕙ ᔪᐸᕆ ᓁᒪᑍᑎᒥᐅᑕᖅ ᑭᐅᕗᖅ:

² “ᐃᓱᒫᓗᓕᕋᒪ ᑭᐅᔪᒪᓕᕐᐳᖓ, ᐃᓗᒃᑯᑦ ᐊᑯᓂᒍᓱᒻᒪᕆᓕᕋᒪ ᑭᐅᔪᒪᓪᓗᖓ.

³ ᐅᖃᐅᓯᕆᔭᕐᓄᑦ ᒥᑕᐅᑎᒋᔭᐅᓂᓐᓂᒃ ᑐᓵᒐᒪ, ᑐᑭᓯᓂᕋᓕ ᒪᓕᒡᓗᒍ ᑭᐅᓂᐊᕐᐸᒋᑦ.

⁴ ᖃᐅᔨᒪᑦᓯᐊᕐᐳᑎᑦ ᑍᑦᓱᒪᓂᐊᓗᖕᓂᑦ, ᐃᓄᖃᕆᐊᓕᕐᓂᖓᓂᑦ ᓄᓇᕐᔪᐊᕐᒥ,

⁵ ᐱᐅᖏᑦᑐᓕᔫᑉ ᖃᓄᐃᓐᖏᑬᓐᓇᕐᓂᖓ ᓁᑦᑑᕗᖅ, ᒎᑎᖃᖏᑦᑑᓪᓗ ᖁᕕᐊᓱᑬᓐᓇᕐᓂᖓ ᓯᕕᑭᑦᑑᓪᓗᓂ.

⁶ ᐊᔪᖏᑦᑐᕐᔪᐊᖑᓂᖓ ᕿᓚᖕᒧᑦ ᑎᑭᐅᑎᓯᒪᓕᕋᓗᐊᕈᓂ, ᓂᐊᖁᖓᓗ ᓄᕗᔭᓄᑦ ᑎᑭᐅᑎᓯᒪᓕᕋᓗᐊᕐᐸᑦ,

⁷ ᐊᓯᐅᔪᒫᕐᐳᖅ ᐃᓱᖃᖏᑦᑐᒧᑦ ᐊᓇᕐᑕᕕᓂᕐᒥᑐᑦ; ᑖᑦᓱᒥᖓᓗ ᑕᑯᕙᒃᑐᕕᓃᑦ ᐅᖃᕈᒫᕐᐳᑦ, ‘ᓇᒧᓐᖓᕐᑐᕐᓖᓐᓇ?’

⁸ ᓯᓐᓇᒃᑐᑎᑐᑦ ᐊᓯᐅᔪᒫᕐᐳᖅ, ᓇᓂᔭᐅᔪᓐᓁᕐᓗᓂᓗ; ᐅᓐᓄᐊᒃᑯᑦ ᑕᑯᑎᑕᐅᑦᔪᑎᑐᑦ ᓄᖑᔪᒫᕐᐳᖅ.

⁹ ᑕᑯᔭᐅᖃᑦᑕᓚᐅᕐᓗᓂ ᑕᑯᔭᐅᖃᑦᑕᕈᓐᓁᕈᒫᕐᐳᖅ, ᐃᓂᒋᕙᓚᐅᕐᑕᖓᑕᓗ ᑕᑯᖃᑦᑕᕈᓐᓁᕈᒫᕐᐹ.

¹⁰ ᕿᑐᕐᖓᖏᑦ ᐱᑦᓯᐊᕋᓱᓕᕈᒫᕐᐳᑦ ᐊᒃᓱᔪᓂᒃ, ᐊᒡᒐᖏᑕᓗ ᐱᓂᐊᕐᓂᖏᑎᒍᑦ ᐊᔪᕐᓴᖏᑦᔪᑎᓂᒃ ᐅᑎᕐᕕᐅᔪᒫᕐᐳᑦ.

¹¹ ᓴᐅᓂᖏᑦ ᐃᓅᓱᒃᑑᓪᓗᓂ ᐊᔪᕐᑐᓕᓂᕕᓂᖏᓐᓂᒃ ᑕᑕᑉᐳᑦ, ᐊᑯᓂᐅᖏᑦᑐᕐᓕ ᓇᓪᓚᖓᖃᑎᒋᓕᕈᒫᕐᐰᑦ ᓄᓇᒥ.

¹² ᐱᐅᖏᑦᑐᓕᓂᖅ ᖃᓂᕐᒥᓂ ᒪᒪᕆᒐᓗᐊᕐᐹ, ᐃᔨᕐᓯᒪᒐᓗᐊᕐᐹ ᐅᖃᖓᑕ ᐊᑖᓂ,

¹³ ᐊᓐᓂᕆᓗᒍ ᖁᔭᓈᕈᒪᖏᒃᑲᓗᐊᕐᐸᒍ; ᐱᓯᒤᓐᓇᕈᒪᒐᓗᐊᕐᐸᒍᓗ ᖃᓂᕐᒥᓂ,

¹⁴ ᓂᕆᔭᖏᓪᓕ ᐊᑭᐊᕈᖓᓂ ᖃᓯᓕᓇᕐᓯᓂᐊᕐᐳᑦ; ᖁᒡᓗᒋᐊᓪᓗ ᑐᖁᓐᓇᕐᑐᖏᑎᑐᑦ ᓱᖓᕐᑎᑐᓪᓗ ᑍᒤᓕᕐᓗᑎᒃ ᐃᓗᖓᓂ.

¹⁵ ᐊᔪᕐᓴᖏᑦᔪᑎᓂᒃ ᐄᓯᓯᒪᕗᖅ ᒥᕆᐊᕐᓂᐊᕆᕔᓪᓕ; ᒎᑎᐅᑉ ᒥᕆᐊᕐᑎᓐᓂᐊᕐᒪᒍ ᐊᕿᐊᕈᕐᒥᐅᑕᖏᓐᓂᒃ.

¹⁶ ᖁᒡᓗᒋᐊᑉ ᑐᖁᓐᓇᕐᑐᖓᓂᒃ ᐄᓯᓂᐊᕐᐳᖅ; ᖁᒡᓗᒋᐊᓪᓗ ᑐᖁᓐᓇᕐᑐᓕᐅᑉ ᑮᓯᓂᖓᓄᑦ ᑐᖁᑕᐅᓂᐊᕐᐳᖅ.

¹⁷ ᑰᖕᓂᒃ ᑕᑯᔪᓐᓇᕐᓯᓂᐊᓐᖏᓚᖅ, ᖄᒥᑉᐸᓪᓕᐊᔪᒥᒃ ᑰᒐᓛᓂᒃ, ᕼᐊᓂᓂᒃ ᐃᒻᒧᖕᓂᒡᓗ.

¹⁸ ᐱᓇᓱᐊᕐᓯᒪᔭᖏᑕ ᐱᕈᕐᑎᑕᖏᑦ ᐅᑎᕐᑎᑦᓱᒫᕐᐰᑦ, ᑕᐅᕐᓰᓂᒃᑯᑦ ᖄᖏᕐᓂᑯᓕᐅᕈᑎᓂ ᖁᕕᐊᓲᑎᒋᓗᒋᑦ ᐊᑐᕈᓐᓇᕐᓯᓂᐊᓐᖏᓔ.

¹⁹ ᐊᒃᓱᔪᓂᒃ ᐅᖁᒤᒃᓴᕐᑎᑦᓯᓚᐅᕐᒪᑦ ᑲᒪᒋᔪᒪᓇᓂᒋᓪᓗ, ᐃᒡᓗᒥᒡᓗ ᐊᕐᓵᕐᓯᓪᓗᓂ ᐃᒡᓗᖃᓕᓚᐅᕐᐳᖅ ᓴᓇᓚᐅᓐᖏᑕᒥᓂᒃ.

²⁰ ᐱᔪᒪᕕᒡᔪᐊᕐᓂᖓ ᓈᒻᒪᒃᓯᔪᓐᓇᖏᒻᒪᑦ, ᖁᕕᐊᒋᔭᒥᓂᒃ ᓇᓪᓕᐊᓐᓂᒡᓘᓐᓃᑦ ᐱᐅᓕᒃᓯᔪᓐᓇᕐᓂᐊᓐᖏᓚᖅ.

²¹ ᓂᕆᓕᕌᖓᒥ ᓂᕿᓂᒃ ᐊᒥᐊᒃᑯᖃᕐᐸᓐᖏᓚᖅ; ᑍᒤᒻᒪᑦ ᐊᔪᕐᓴᖏᑦᔪᑎᒃᓴᖏᑦ ᐃᓱᖃᕐᓂᐊᕐᐳᑦ.

²² ᐊᔪᕐᓴᓐᖏᕕᒡᔪᐊᓕᕐᑎᓪᓗᒍ ᐅᖁᒤᑦᑐᒧᑦ ᓵᓚᐅᓂᐊᕐᐳᖅ; ᐊᒃᓱᕈᕐᓇᕐᑐᕐᔪᐊᕐᒧᑦ ᓱᓇᑐᐃᓐᓇᕐᓄᑦ ᑎᑭᑕᐅᔪᒫᕐᒪᑦ.

²³ ᓂᕆᓗᓂ ᐊᕿᐊᑦᑐᓕᕐᑎᓪᓗᒍ, ᒎᑎᐅᑉ ᓂᓐᖓᐅᓯᖓᑕ ᑎᑭᕝᕕᒋᔪᒫᕐᐹ, ᓱᒋᐊᕈᒫᕐᐹᓗ ᓯᓚᓗᒡᕕᐅᔪᑎᑐᑦ ᓱᓕ ᓂᕆᑎᓪᓗᒍ.

²⁴ ᓴᕕᒡᔪᐊᒥᑦ ᓴᕕᕋᔭᖕᒥᑦ ᕿᒫᔪᒪᕐᐳᖅ; ᖃᕐᔪᒧᓪᓕ ᑲᓐᓄᔭᒧᑦ ᑲᐱᔭᐅᓪᓗᓂ ᐳᑐᔭᐅᔪᒫᕐᐳᖅ.

²⁵ ᖃᕐᔪᖅ ᑎᒥᖓᓂᒃ ᐳᑐᒥᓵᕐᓯᓪᓗᓂ ᐊᓂᒎᑎᕗᖅ, ᓇᖅᑯᖓ ᕿᓪᓕᕐᑐᖅ ᓱᖓᕐᒥᒃ ᑯᑐᒃᐳᖅ; ᑲᑉᐱᐊᓱᖕᓂᕐᒧᑦ ᑕᕝᕙ ᑎᑭᑕᐅᕗᖅ.

²⁶ ᑕᕝᕙ ᑖᕐᑐᕐᔪᐊᕐᒧᑦ ᑲᑎᕐᓱᓚᐅᕐᑕᖏᑦ ᐅᓕᒃᑕᐅᕗᑦ; ᐃᑯᒪᒧᑦ ᐃᑭᑎᑕᐅᖏᑦᑐᒧᑦ ᓄᖑᑕᐅᔪᒫᕐᐳᖅ; ᐊᒥᐊᒃᑯᓕᒫᓪᓗ ᐃᒡᓗᖓᓃᑦᑐᑦ ᓄᖑᑕᐅᔪᒪᕐᐳᑦ.

²⁷ ᕿᓚᖕᒥᑦ ᓇᓗᓁᕐᑕᐅᔪᒫᕐᐳᖅ ᐱᐅᖏᑦᑐᓕᓯᒪᓂᖓ, ᓄᓇᕐᔪᐊᕐᓗ ᒪᑭᓪᓗᓂ ᑖᑦᓱᒥᖓ ᐊᑭᕋᕐᑐᓕᕈᒫᕐᐳᖅ.

²⁸ ᐃᒡᓗᒥᐅᑕᕆᔭᖏᑦ ᐊᓐᓂᑦᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ, ᐅᓂᐊᕐᑕᐅᔪᒫᕐᐳᑦ ᒎᑎᐅᑉ ᓂᓐᖓᐅᓯᖓᑕ ᐅᓪᓗᖓᓂ.

²⁹ ᑕᕝᕙ ᐱᐅᖏᑦᑐᓕᔪᖅ ᐃᓄᒃ ᑍᒫᒃ ᒎᑎᒧᑦ ᐱᓇᓱᐊᕐᕕᐅᔪᒫᕐᐳᖅ, ᑭᖑᕐᖑᑎᔭᒃᓴᖃᕐᑎᑕᐅᓗᓂᓗ ᑍᒤᑦᑐᒥᒃ ᒎᑎᒥᑦ ᐱᔪᒥᒃ.”