ᔫᐱᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᓵᑖᓇᓯᐅᑉ ᐆᒃᑐᕐᓗᐃᒃᑲᓐᓂᕐᓂᖓ ᔫᐱᒥᒃ

¹ ᐅᓪᓗᕐᓕ ᓇᓪᓕᐅᑎᖕᒥᖕᒪᑦ ᕿᓚᖕᒥᐅᑍᑦ ᐊᑕᓂᐅᑉ ᓵᖓᓄᐊᕐᕕᒃᓴᖓᑦ, ᓵᑖᓇᓯᑦᑕᐅᖅ ᐃᓚᒋᔭᐅᒋᕗᖅ.

² ᐊᑕᓂᐅᓪᓕ ᐊᐱᕆᕚ, “ᓇᑭᓐᖔᕐᐱᑦ?” ᓵᑖᓇᓯᐅᑉ ᑭᐅᕚ, “ᓇᓂᑐᐃᓐᓇᖅ ᐊᕙᒻᒧᒐᕐᓯᒪᕗᖓ ᓄᓇᕐᔪᐊᓕᒫᒥ.”

³ ᐊᑕᓂᐅᑉ ᐊᐱᕆᕚ, “ᐱᔨᒐ ᔫᐱ ᐃᒃᐱᒋᓯᒪᕕᐅᒃ? ᓄᓇᕐᔪᐊᓕᒫᒥ ᑖᑦᓱᑐᓇᖅ ᓱᖁᓯᔪᐃᑦᑑᑎᒋᔪᒥᒃ ᐱᑕᖃᓐᖏᓚᖅ ᐃᓄᑦᓯᐊᕙᐅᑎᒋᔪᖃᕋᓂᓗ, ᑖᑦᓱᒪ ᑐᒃᓯᐊᕐᕕᒋᖃᑦᑕᕐᐹᖓ ᑲᒪᑦᓯᐊᕋᓱᐊᕐᓗᓂᓗ ᐱᐅᖏᑦᑐᒥᒃ ᖃᓄᑐᐃᓐᓇᑦᓯᐊᖅ ᐊᑐᕐᑍᓕᒪᓪᓗᓂ. ᐊᖏᕐᑎᓐᓇᓱᓚᐅᕐᐸᕐᒪ ᑖᑦᓱᒥᖓ ᐱᓂᕐᓗᐃᓇᓱᒍᒪᓪᓗᑎᑦ ᓱᓇᒥᒡᓘᓐᓃᑦ ᐱᑦᔪᑎᒃᓴᖃᖏᑦᓯᐊᕐᓗᑎᑦ, ᔫᐱᓕ ᓱᓕ ᐅᒃᐱᕐᓂᕐᒥᒍᑦ ᑲᔪᓯᓯᒪᑦᓯᐊᕐᐳᖅ ᑍᒪᓐᖓᓕᒫᖅ.”

⁴ ᓵᑖᓇᓯᓕ ᑭᐅᕗᖅ, “ᐊᖑᑦ ᑖᓐᓇ ᓱᓇᓕᒫᓂᒃ ᓄᖅᑲᐅᑦᔨᓂᐊᕐᐳᖅ ᐃᓅᖔᕈᒪᓂᕐᒧᑦ.

⁵ ᑎᒥᖓᒍᑦ ᐋᓐᓂᐊᓕᕐᑎᒃᑯᕕᐅᒃ ᐅᖃᕐᓂᕐᓘᑎᒋᓗᓂᑎᑦ ᓇᕐᕈᒋᓕᕐᓂᐊᕐᐹᑎᑦ!”

⁶ ᐊᑕᓂᕐᓕ ᐅᖃᕐᐳᖅ ᓵᑖᓇᓯᒧᑦ, “ᑕᑯᒋᑦ, ᐱᔪᓐᓇᕐᓂᕐᓄᑦ ᑐᓂᕙᕋ; ᑭᓯᐊᓂᓕ ᑐᖁᑦᑍᓕᒍᒃ.”

⁷ ᑕᕝᕙ ᓵᑖᓇᓯ ᐊᑕᓂᐅᑉ ᓇᔪᕐᑕᖓᓂᑦ ᕿᒪᕉᑎᕗᖅ, ᔫᐱᓗ ᓇᐅᒃᑯᑐᐃᓐᓇᖅ ᐊᔪᐊᓕᕐᑎᑉᐹ ᑎᒥᓕᒫᖓ ᐃᑎᒐᖏᑕ ᐊᓗᖏᖕᓂᑦ ᐱᒋᐊᕐᓗᒍ ᑲᑦᔨᖓᓄᑦ ᑎᑭᓪᓗᒍ.

⁸ ᑕᕝᕙ ᔫᐱ ᒪᕐᕋᕕᓂᕐᓂᒃ ᐃᒋᑦᓯᕕᖕᒧᑦ ᐃᖏᑦᓴᕐᑐᕐᐳᖅ ᑕᕝᕙᓂᓗ ᓯᖁᒥᓯᒪᔪᒥᒃ ᐱᓪᓗᓂ ᐊᔪᐊᓂ ᑖᑦᓱᒧᖓ ᑭᓕᐅᕐᑐᓕᕐᐰᑦ.

⁹ ᑕᕝᕙ ᓄᓕᐊᖓᑕ ᐅᖃᐅᑎᕚ, “ᓱᓕ ᐅᒃᐱᕐᓂᕐᓂᒃ ᓱᕐᕋᒐᓱᐊᓐᖏᓚᑏᑦ? ᒎᑎ ᐅᖃᕐᓂᕐᓘᑎᒋᓗᒍ ᑐᖁᔪᒪᓚᐅᕆᑦ.”

¹⁰ ᔫᐱᐅᓪᓕ ᑭᐅᕚ, “ᓯᓔᑦᑐᑐᑦ ᐊᕐᓇᑐᑦ ᐅᖃᓪᓚᓕᕐᐳᑎᑦ. ᒎᑎ ᐅᕙᑦᑎᓐᓄᑦ ᐱᐅᔪᒥᒃ ᑐᓂᓯᖃᑦᑕᕐᐳᖅ, ᓱᖕᒪᓪᓕ ᓈᒻᒪᒃᓴᖏᓪᓗᑕ ᐅᖃᕐᕕᒋᒐᔭᕐᐸᕗᑦ ᐱᐅᖏᑦᑐᒧᑦ ᐱᑎᑉᐸᑎᒎᑦ?” ᔫᐱᓕ ᑕᒪᐅᓈᕋᓗᐊᕋᒥ ᐊᔪᕐᑐᓕᓚᐅᓐᖏᓚᖅ ᐅᖃᐅᓯᕐᒥᒍᑦ.

ᔫᐱᐅᑉ ᐱᖃᓐᓇᕆᔭᖏᑕ ᐳᓛᕆᐊᕐᓂᖓᑦ

¹¹ ᔫᐱᐅᑉ ᐱᖃᓐᓇᕆᔭᖏᑦ ᐱᖓᓱᑦ ᐃᓕᐹᓯ ᑎᒪᓁᑎᒥᐅᑕᖅ, ᐱᐅᓪᑖᓗ ᓲᕼᐂᑎᒥᐅᑕᖅ, ᔪᐸᕆᓗ ᓁᒪᑍᑎᒥᐅᑕᖅ. ᑐᓴᕋᒥᒃ ᔫᐱᐅᑉ ᐊᖏᔪᒥᒃ ᐋᓐᓂᐊᓂᖓᓂᒃ ᑕᑯᔭᕐᑐᕐᐳᑦ ᓮᒻᒪᕐᓮᔪᒪᓪᓗᑎᒃ ᑖᑦᓱᒥᖓ.

¹² ᓱᓕᓕ ᐅᖓᓯᒃᑐᒦᓪᓗᑎᒃ ᔫᐱᒥᒃ ᑕᑯᒐᒥᒃ, ᐃᓕᑕᕆᓐᖏᓛᑦ; ᐃᓕᑕᕆᓕᕋᒥᑦᔪᒡᓗ ᕿᐊᓕᕐᐳᑦ; ᐊᓐᓄᕌᑎᒡᓗ ᐊᓕᒃᑐᕐᐰᑦ ᐳᔪᕋᕐᒥᒡᓗ ᖁᒻᒧᐊᒃᑎᑦᓯᓪᓗᑎᒃ ᓂᐊᖁᒥᖕᓂᒃ ᑕᒪᑐᒧᖓ ᑲᑕᒑᕕᐅᑎᑉᐳᑦ.

¹³ ᒪᓂᖅᑲᒥᓗ ᔫᐱ ᐃᒃᓯᕙᖃᑎᒋᓕᕐᐹᑦ ᐅᓪᓗᓂᒃ ᐅᓐᓄᐊᓂᒡᓗ 7ᓂᒃ ᓂᓪᓕᕐᑐᖃᓚᐅᕋᑎᒃ, ᐋᓐᓂᐊᕐᑐᐊᓘᓂᖓᓂᒃ ᑕᑯᓐᓇᕋᒥᒃ.