ᔫᐱᐅᑉ ᐊᒡᓚᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱ

¹ ᑕᕝᕙ ᔫᐱ ᑭᐅᕗᖅ ᐅᖃᕐᓗᓂ:

² “ᖃᓄᖅ ᐊᑯᓂᐅᑎᒋᔪᖅ ᐋᓐᓂᕐᓯᕐᓂᐊᕐᐱᓯᓐᖔ ᓯᖁᒥᒐᓱᐊᕐᓗᖓᓗ ᖃᓄᓕᒫᑦᓯᐊᖅ ᐅᖃᐅᓯᕐᓄᑦ?

³ ᖁᓖᕐᑐᕐᓗᓯ ᐅᕙᓐᓂᒃ ᓵᓐᖓᓯᓯᒪᓕᕐᐳᓯ; ᑲᓐᖑᓱᓐᖏᓚᓰ ᐅᕙᓐᓂᒃ ᓱᒃᑯᔨᐊᖃᕋᓱᐊᕐᓂᑦᓯᓐᓂᒃ?

⁴ ᐊᒡᓛᑦ ᑕᒻᒪᕐᓯᒪᒐᓗᐊᕐᓂᕈᒪ, ᑕᒻᒪᕈᑎᒋᓯᒪᔭᒃᑲ ᐅᕙᓐᓄᑐᐊᖅ ᐃᓱᒫᓗᓇᕐᑐᑑᕗᑦ.

⁵ ᐅᕙᓐᓂᑦ ᐱᐅᓂᕐᓴᐅᓇᓱᒋᕕᓰᑦ, ᑕᒪᒃᑯᐊᓗ ᐊᑲᐅᓐᖏᓕᐅᕈᑎᒃᑲ ᐸᓯᔭᒃᓴᐅᓂᓐᓄᑦ ᓇᓗᓁᕈᑕᐅᓇᓱᒋᓪᓗᒋᑦ,

⁶ ᖃᐅᔨᔪᓐᓇᓐᖏᓚᓰ ᒎᑎᐅᑉ ᐅᕙᓐᓄᑦ ᑍᒤᓕᐅᕐᓂᖓᓂᒃ? ᐱᓇᓱᐊᕐᓗᓂᖓ ᓄᓗᐊᕐᑎᑕᒥᑐᑦ ᑍᒤᓯᒪᖕᒪᖓ.

⁷ ᑕᑯᒋᑦ. ᓂᓪᓕᓚᐅᕐᐳᖓ, ‘ᐱᑦᓯᐊᕐᓯᒪᓐᖏᓚᖅ!’ ᑭᐅᔭᐅᓐᖏᓚᖓᓕ; ᕾᒐᓛᕐᓗᖓ ᐃᑲᔪᕐᑕᐅᔪᒪᓚᐅᕐᐳᖓ, ᐃᑲᔪᕋᓱᐊᕐᑐᖃᓐᖏᓚᕐᓕ.

⁸ ᒎᑎᐅᑉ ᐊᖅᑯᑎᒋᓂᐊᕐᑕᕋ ᒪᑐᓚᐅᕐᒪᒍ, ᑕᕝᕙ ᐊᓂᒎᑎᔪᓐᓁᓪᓕᕗᖓ, ᐊᖅᑯᑎᒋᓂᐊᕐᑕᕋᓗ ᑖᕐᑐᕐᔪᐊᒧᑦ ᑕᑯᒃᓴᐅᔪᓐᓁᕐᑎᓚᐅᕐᐹ.

⁹ ᐅᐱᒋᔭᐅᑦᔪᑎᒃᓴᓕᒫᒃᑲ ᑖᑦᓱᒪ ᐲᔭᓚᐅᕐᐰᑦ, ᓂᐊᖂᑎᒐᓗ ᐲᓚᐅᕐᐹ ᓂᐊᖁᓐᓂᑦ.

¹⁰ ᑖᑦᓱᒪ ᓯᖁᒥᓚᐅᕐᒪᖓ ᐊᕙᑎᓕᒫᓐᓂᑦ, ᓱᓇᐅᔪᓐᓃᕐᐳᖓ, ᓂᕆᐅᖕᓂᕋᓗ ᓄᓱᓚᐅᕐᐹ ᓇᐹᕐᑐᑎᑐᑦ.

¹¹ ᓂᓐᖓᐅᒪᓂᓂ ᐅᕙᓐᓄᑦ ᑐᕌᕐᑎᓯᒪᕚ, ᐊᑭᕋᕐᑐᑎᒥᑐᓪᓗ ᑍᒤᑎᓕᕐᓗᖓ.

¹² ᑖᑦᓱᒪ ᐅᓇᑕᕐᑐᒃᓴᖁᑎᓂ ᐅᕙᓐᓄᑦ ᐅᓇᑕᕆᐊᕐᑐᖁᕔᑦ; ᓴᐴᓗᑕᓕᐅᕐᓯᒪᓕᕐᐳᑦ, ᐊᕙᓗᓯᓯᒪᓕᕐᓗᑎᒡᓗ ᑐᐱᓐᓂᒃ.

¹³ ᖃᑕᓐᖑᑎᒃᑲ ᐅᕙᓐᓂᒃ ᖁᔭᓈᕐᓯᑎᑉᐰᑦ, ᖃᐅᔨᒪᔭᒃᑲᓗ ᐅᕙᓐᓂᒃ ᐃᓕᑕᕐᓯᕙᒍᓐᓃᕐᐳᑦ.

¹⁴ ᓇᖕᒥᓂᒃᑲ ᐅᕙᓐᓂᒃ ᐊᕕᑦᓯᕗᑦ; ᐃᓚᓐᓇᕆᔭᒃᑲᓗ ᐅᕙᓐᓂᒃ ᕿᒤᓪᓗᑎᒃ.

¹⁵ ᑐᔪᕐᒥᐊᑦᑕ ᐊᒡᓛᑦ ᐳᐃᒍᕐᓯᒪᓕᕐᐹᖓ; ᐊᕐᓁᑦ ᐊᖏᕐᕋᓐᓂ ᐱᔨᒪ ᑕᑯᓕᒪᓇᖏᑦᑐᑎᑐᑦ ᐱᓕᕐᐹᖓ; ᓂᐅᕐᕈᐊᑎᑐᓪᓗ ᐱᓇᓱᐊᕐᕕᒋᖃᑦᑕᓕᕐᓗᖓ.

¹⁶ ᐱᔨᓐᓂᒃ ᓂᓪᓕᐅᑦᔨᒐᓗᐊᕋᒪ, ᑕᕝᕙ ᑭᐅᔭᐅᓐᖏᓚᖓ, ᐊᒡᓛᑦ ᓂᐱᓐᓄᑦ ᐊᒃᓱᕈᕐᓗᖓ ᕿᓄᔭᕆᐊᖃᓚᐅᕐᐳᖓ.

¹⁷ ᓄᓕᐊᒪ ᐊᒡᓛᑦ ᐊᓂᕐᓂᕋ ᓁᒪᔪᒪᔪᓐᓁᕐᐹ, ᖃᑕᓐᖑᑎᒪᓗ ᐊᓈᓇᖃᑎᒪ ᐊᒡᓛᑦ ᖃᒡᓕᔪᒪᔪᓐᓁᕐᐹᖓ.

¹⁸ ᐊᒡᓛᑦ ᓱᕈᓯᕐᓄᑦ ᒥᑕᐅᑎᒋᔭᐅᖃᑦᑕᕐᐳᖓ; ᓂᑯᕕᑐᐊᕋᒪᓗ ᑕᕝᕙ ᐅᖃᕐᓂᕐᓘᑎᓕᕐᐹᖓ.

¹⁹ ᐊᒡᓛᑦ ᐃᓚᓐᓇᕆᓂᕐᐹᓐᓄᑦ ᓇᕐᕈᒋᔭᐅᓕᕐᐳᖓ, ᓇᒡᓕᒋᔭᓐᓄᓪᓗ ᐊᑭᕋᕐᑐᕐᑕᐅᓕᕐᓗᖓ.

²⁰ ᓴᐅᓂᒃᑲ ᐅᕕᓂᓐᓄᑦ ᐊᑕᑎᑕᐅᑐᐃᓐᓇᓕᕐᐳᑦ, ᐆᒪᓱᖔᕐᔪᑐᐃᓐᓇᓕᕐᐳᖓᓗ ᓯᕐᓚᑦᓯᐊᖅ.

²¹ ᐃᓚᓐᓇᕆᔭᒃᑳ, ᓈᒃᑭᒋᓚᐅᕐᓯᓐᖓ, ᓈᒃᑭᒋᓚᐅᕐᓯᓐᖓ, ᒎᑎᐅᑉ ᐊᒡᒐᖕᒥᓄᑦ ᐊᒃᑐᕐᓯᒪᖕᒪᖓ!

²² ᓱᖕᒪᑦ ᐊᑭᕋᕐᑐᕐᐱᓯᓐᖓ ᒎᑎᒥᑦ ᐊᑭᕋᕐᑐᕐᑕᐅᖕᒥᑎᓪᓗᖓ? ᓱᖕᒪᑦ ᑎᒥᒪ ᐅᖁᒤᒃᓴᕐᓂᖓ ᓱᓕ ᓈᒻᒪᒋᓕᖏᑉᐱᓯᐅᒃ?

²³ ᑕᕝᕙᑐᖅ ᐅᖃᐅᓯᒃᑲ ᑎᑎᕋᕐᑕᐅᑦᓴᓚᐅᕐᓕᑦ! ᐅᖃᓕᒫᒐᓄᓪᓗ ᐃᓕᔭᐅᓗᑎᒃ!

²⁴ ᐅᕝᕙᓗ ᐅᓗᕐᓯᓯᒧᑦ ᑎᑎᕋᕐᑕᐅᓗᑎᒃ ᐅᔭᕋᒃᑯᑦ, ᓄᖑᓐᓂᐊᖏᓪᓗᑎᒃ ᑎᑎᕋᕐᓯᒪᓕᕐᓂᐊᕐᒪᑕ ᐃᓱᖃᖏᑦᑐᒧᑦ!

²⁵ ᖃᐅᔨᒪᕗᖓ ᓴᐳᑦᔨᔨᒐ ᐃᓅᖕᒪᑦ, ᑭᖑᓪᓕᕐᐹᒥᒡᓗ ᓄᓇᕐᔪᐊᕐᒥ ᓇᖏᓕᕈᒫᕐᒪᑦ ᓴᓂᓐᓂ.

²⁶ ᐅᕕᓂᒐᓗ ᐋᓐᓂᐊᓇᕐᑐᒧᑦ ᓄᖑᑕᐅᒐᓗᐊᕐᐸᑦ, ᓱᓕ ᑎᒥᓐᓃᓪᓗᖓ ᒎᑎ ᑕᑯᔪᒫᕐᐸᕋ,

²⁷ ᓇᖕᒥᓂᓪᓚᕆᒃ ᑕᑯᔪᒫᕐᐸᕋ ᓴᓂᓐᓃᑎᓪᓗᒍ, ᐊᓯᐊᓂᒃ ᑕᑯᓐᓇᖏᓪᓗᖓ, ᐃᔨᓐᓄᑦ ᑕᑯᔪᒪᕐᐸᕋ. ᐆᒻᒪᑎᒐᓕ ᓄᑮᓕᕐᐳᖅ ᐃᓗᓐᓂ!

²⁸ ᐅᖃᕋᔭᕈᑦᓯ, ‘ᖃᓄᕐᖑᓇ ᐋᓐᓂᕐᓯᒃᑲᓐᓂᕈᓐᓇᕐᑕᕗᑦ? ᕿᓂᕋᑦᓯ ᓱᓕ ᐅᕙᓐᓂᒃ ᐱᒋᐊᒃᑲᓐᓂᕈᑎᒃᓴᒥᒃ’;

²⁹ ᒫᓐᓇ ᓯᕘᕋᔪᒃᓴᐅᕗᓯ ᓴᕕᒡᔪᐊᒥᒃ, ᓂᓐᖓᐅᓯᒃᑯᑦ ᓴᕕᒡᔪᐊᖅ ᓱᒋᐊᕐᓯᑦᔪᑕᐅᖕᒪᑦ, ᖃᐅᔨᖁᓪᓗᓯ ᓱᒋᐊᕐᑕᐅᓂᕐᒥᒃ.”