ᔫᐱᐅᑉ ᐊᒡᓚᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᐅᓪᑖᑦ

¹ ᑕᕝᕙ ᐱᐅᓪᑖᑦ ᓲᕼᐂᑎᒥᐅᑕᖅ ᑭᐅᕗᖅ:

² “ᖃᖓᓕ ᐅᖃᓪᓚᒍᓐᓃᕐᓂᐊᕋᓗᐊᕐᐲᑦ? ᐃᓱᒪᖃᓚᐅᕆᑦ, ᐅᖃᕈᓐᓇᕐᓯᓂᐊᕋᑦᑕᑦᑕᐅᖅ.

³ ᓱᖕᒪᑦ ᐃᒻᒧᒃᓯᐅᒐᑎᑐᑦ ᐃᓱᒪᒋᕕᑎᒎᑦ? ᓱᖕᒪᓪᓗ ᓯᓔᑦᑑᕕᑕ ᓵᖕᓂ?

⁴ ᓂᓐᖓᐅᒪᓂᕐᓄᑦ ᐃᒻᒥᓂᒃ ᐋᓐᓂᕐᓯᑐᐃᓐᓇᕐᐳᑎᑦ, ᓄᓇᕐᔪᐊᖅ ᓂᓐᖓᐅᒪᓂᕐᓄᑦ ᐃᓕᖕᓂᑦ ᕿᒫᓂᐊᕋᓱᒋᕕᐅᒃ? ᐅᕝᕙᓗ ᐅᔭᖅᑲᑦ ᐃᓂᒥᖕᓂᑦ ᐲᕐᑕᐅᔭᕆᐊᖃᕋᓱᒋᕕᒌᑦ?

⁵ ᐱᐅᖏᑦᑑᑉ ᖃᐅᒻᒪᖅᑯᑎᖓ ᖃᒥᑕᐅᓂᐊᕐᐳᖅ, ᐃᑯᒪᑎᑕᖓᓗ ᐊᐅᒤᕈᑎᓗᓂ ᐃᑭᒃᑲᓐᓂᕐᓂᐊᕈᓐᓃᕐᐳᖅ.

⁶ ᑐᐱᖓᓂ ᖃᐅᒻᒪᖅᑯᑎᖓ ᑖᕐᓯᓂᐊᕐᐳᖅ, ᓇᓂᕈᐊᖓᓗ ᖁᓛᓃᑦᑐᖅ ᖃᒥᑕᐅᓂᐊᕐᐳᖅ.

⁷ ᐊᓪᓗᕋᕐᓂᖓ ᓴᓐᖐᓕᓂᐊᕐᐳᖅ; ᓇᖕᒥᓂᖅ ᐊᔪᕆᕐᑐᐃᑦᔪᑎᒥᓄᑦ ᑲᑕᒃᑎᑕᐅᓂᐊᕐᐳᖅ.

⁸ ᓇᖕᒥᓂᖅ ᐃᑎᒐᒥᓄᑦ ᓄᓗᐊᕐᐳᖅ, ᓂᒐᕐᓄᓪᓗ ᐱᓱᒡᓗᓂ ᐅᐸᒍᑎᕗᖅ.

⁹ ᑭᖕᒥᖕᒥᒍᑦ ᒥᑭᒋᐊᕐᑎᑕᐅᕗᖅ; ᓂᒐᕐᒧᑦ ᐃᑎᒐᖏᑦ ᓂᒐᕐᑎᑕᐅᓪᓗᑎᒃ.

¹⁰ ᒪᓂᖅᑲᒥ ᐊᒃᓱᓈᑦ ᓂᒐᕐᑎᑦᓯᒍᑕᐅᓇᓱᐊᕐᑐᑦ ᐃᔨᕐᓯᒪᕗᑦ, ᒥᑭᒋᐊᑦ ᐊᖅᑯᑎᒋᓂᐊᕐᑕᖓᓂ ᐅᑕᖅᑭᕗᑦ.

¹¹ ᖁᐊᕐᓵᕐᓇᕐᑐᒧᑦ ᑲᑉᐱᐊᓱᒃᑎᑕᐅᓂᐊᕐᐳᖅ ᐊᕙᑎᓕᒫᖓᓂᑦ; ᑭᖕᒥᖓᓄᑦ ᐊᒃᑐᐊᔪᒥᒃ ᒪᓕᒃᑕᐅᖏᓐᓇᕐᓂᐊᕐᐳᖅ.

¹² ᐊᔪᕐᓴᖏᑦᑑᕙᓚᐅᕐᐳᖅ, ᒫᓐᓇᓕ ᑳᓕᕐᐳᖅ; ᐊᓯᕈᕐᑕᐅᓂᕐᒧᑦ ᐅᑕᖅᑭᐊᖑᕗᖅ ᐊᖅᑯᑎᖏᓂᐊᕐᑕᖓᓂ.

¹³ ᑎᒥᓕᒫᖓ ᐋᓐᓂᐊᓇᕐᑐᒧᑦ ᐅᕕᓃᕈᑦᔭᐅᓕᕐᐳᖅ; ᐊᕙᑎᖏᑦ ᑐᖂᑉ ᐃᕐᓂᐊᕆᖅᑳᑕᖓᓄᑦ ᓄᖑᑕᐅᓕᕐᐳᑦ.

¹⁴ ᐊᓕᒃᑐᕐᑕᐅᓯᒪᕗᖅ ᑐᐱᕐᒥᑦ ᐅᒃᐱᕆᔭᒥᓂᑦ, ᐅᓂᐊᕐᑕᐅᕗᖅ ᑲᑉᐱᐊᓱᒃᑎᑦᓯᔩᑦ ᐊᖓᔪᖅᑳᕐᔪᐊᖓᓐᓄᑦ.

¹⁵ ᑐᐱᖓᓃᑦᑐᖃᕐᐳᖅ ᑖᑦᓱᒪ ᐱᒋᓐᖏᑕᖓᓂᒃ; ᐃᑯᐊᓪᓚᕆᒃᑐᒥᒃ ᓯᐊᒻᒪᕐᑎᑦᓯᕕᐅᕗᖅ ᓇᔪᕐᑕᖓ.

¹⁶ ᐊᒫᖏᑦ ᓄᓇᐅᑉ ᐃᓗᐊᓃᑦᑐᑦ ᐸᓂᕐᐳᑦ, ᐊᕙᓚᖓᔪᖏᓪᓗ ᓴᖅᑭᔮᕐᑐᑦ ᑐᖁᓕᕗᑦ.

¹⁷ ᑖᑦᓱᒪ ᐃᖅᑲᐅᒪᔭᐅᓂᖓ ᓄᓇᒥ ᓄᖑᑉᐳᖅ, ᐊᑎᖓᓗ ᐳᐃᒍᕐᑕᐅᕗᖅ ᓄᓇᓕᖕᓂ.

¹⁸ ᖃᐅᒪᔪᒥᑦ ᑖᕐᑐᒧᐊᕐᑎᑕᐅᕗᖅ, ᓄᓇᕐᔪᐊᕐᒥᓗ ᐃᓅᔪᓂᑦ ᐊᓂᑎᑕᐅᕗᖅ.

¹⁹ ᐃᕐᓂᖃᓐᖏᓚᖅ ᑭᖑᕚᖃᕋᓂᓗ ᐃᓅᖃᑎᒥᓂ, ᓄᓇᒋᓯᒪᔭᖓᓂ ᐊᓐᓇᒃᓯᒪᔪᖃᓐᖏᓚᖅ.

²⁰ ᓯᕿᓂᐅᑉ ᓂᐱᕕᐊᓂᑦ ᐱᔪᑦ ᑖᑦᓱᒥᖓ ᑐᓴᕐᑐᑦ ᓴᔪᓕᕐᐳᑦ, ᓯᕿᓂᐅᑉ ᓄᐃᕕᐊᓂᑦ ᐱᔪᑦ ᖁᐊᕐᓵᖓᓕᕐᐳᑦ ᑲᑉᐱᐊᓱᖕᓂᕐᒧᑦ.

²¹ ᑕᕝᕙ ᒎᑎᖃᖏᑦᑑᑉ ᐊᖏᕐᕋᖓᓂ ᑍᒤᑦᑑᕗᖅ, ᑍᒤᑦᑐᐃᓐᓇᐅᕗᑦ ᑕᕝᕙ ᒎᑎᒥᒃ ᖃᐅᔨᓯᒪᖏᑦᑐᑦ.”