ᔫᐱᐅᑉ ᐊᒡᓚᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱ

¹ ᑕᕝᕙ ᔫᐱᐅᑉ ᑭᐅᕚ:

² “ᑕᒪᒃᑯᓂᖓ ᐅᓄᕐᑐᐃᓱᕐᓗᖓ ᑐᓴᖃᑦᑕᕐᓯᒪᕗᖓ; ᑕᒪᑦᓯ ᓮᒻᒪᕐᓮᓇᓱᐊᓐᖑᐊᓲᖑᒐᑦᓯ ᓱᓕᓇᓯ.

³ ᑖᕗᖓᑐᐃᓐᓇᖅ ᑐᑭᖃᖏᑦᑐᓂᒃ ᐅᖃᓪᓚᖕᓂᐊᕐᐱᓰ? ᐅᕝᕙᓗ ᑍᒪᓐᖓᑦ ᑭᐅᔪᓐᓇᕐᑐᑑᕕᓰ?

⁴ ᐃᓕᑦᓯᑐᑦᑕᐅᖅ ᐅᖃᓪᓚᒍᓐᓇᕋᓗᐊᕐᑐᖓ, ᐃᓂᒋᔭᓐᓃᖔᕋᔭᕈᑦᓯ; ᓂᐊᖁᕋ ᐃᓕᕿᑕᒫᕐᓗᒍ ᐃᓕᑦᓯᓐᓂᒃ ᓱᓇᐅᒃᓴᖏᓐᓂᕐᒧᑦ ᐅᖃᓪᓚᒡᕕᒋᔪᓐᓇᕋᔭᕆᕙᑦᓯ.

⁵ ᖃᓂᑐᐃᓐᓇᓐᓄᑦ ᐱᕙᓪᓕᕐᑎᒐᓱᐊᕈᓐᓇᕋᔭᕆᕙᑦᓯ, ᐅᖃᓪᓚᒡᕕᒋᓗᓯ ᓮᒻᒪᕐᓴᕋᓱᐊᕈᓐᓇᕋᔭᕆᕙᑦᓯ.

⁶ ᐅᖃᓪᓚᖕᓂᓐᓄᑦ, ᐋᓐᓂᐊᓂᕋ ᐃᑲᔪᕐᑕᐅᖏᑦᓯᐊᕐᐳᖅ; ᓂᐱᖃᖏᒃᑲᓗᐊᕈᒪᓗ ᐋᓐᓂᐊᓂᕋ ᐃᑯᓪᓚᐅᒥᑎᑕᐅᑦᔮᓇᓂ.

⁷ ᒎᑎᐅᓪᓕ ᒫᓐᓇ ᑕᖃᑎᑦᓯᐊᓕᕐᐹᖓ; ᐃᒡᓗᒥᐅᖃᑎᓕᒫᒃᑲ ᓄᖑᑎᓯᒪᓕᕐᒪᒋᑦ.

⁸ ᐊᑦᓱᖏᐅᑎᓯᒪᕚᖓ, ᑕᒪᓐᓇᓗ ᓇᓗᓁᒃᑯᑕᐅᕗᖅ ᐊᑭᕋᕐᑐᕐᑕᐅᓂᓐᓄᑦ; ᓴᓪᓗᐊᓘᓕᕐᐳᖓ ᓴᐅᓃᓐᓇᐅᓕᕐᓗᖓᓗ, ᖁᓚᖏᑦᔪᑕᐅᓕᕐᐳᕐᓗ ᐸᓯᔭᒃᓴᐅᓂᓐᓄᑦ ᑍᒤᓐᓂᕋᕐᑕᐅᓪᓗᖓ.

⁹ ᒎᑎᐅᑉ ᓂᓐᖓᐅᑎᓪᓗᓂᖓ, ᐆᒥᒋᓕᕐᐹᖓ; ᑕᑯᓴᕐᓗᓂᖓ ᐃᔨᒃᑭᐅᒥᕚᖓ, ᑮᒻᒥᕗᕐᓗ ᐆᒥᓱᖕᓂᕐᒧᑦ.

¹⁰ ᐃᓄᐃᑦ ᐅᕙᓐᓂᒃ ᓇᕐᕈᓂᕐᒧᑦ ᐂᑦᑕᖃᑦᑕᕐᐳᑦ; ᒥᑕᐅᑎᒋᓪᓗᖓ ᐅᓗᐊᒃᑯᑦ ᐸᑎᒃᑕᐅᕗᖓ, ᑲᑐᑦᔨᓪᓗᑎᒃ ᐊᑭᕋᕐᑐᕐᐹᖓ.

¹¹ ᒎᑎᐅᑉ ᑐᓂᕐᕈᑎᒋᕚᖓ ᐅᒃᐱᖏᑦᑐᓄᑦ, ᐂᑦᑑᑎᒋᓪᓗᓂᖓᓗ ᐱᐅᖏᑦᑐᓕᔪᓄᑦ.

¹² ᖃᓄᐃᖏᑦᓯᐊᕐᑎᓪᓗᖓ, ᑖᑦᓱᒪ ᓯᖁᑦᑎᓚᐅᕐᐹᖓ; ᑐᖅᑯᔮᒃᑯᑦ ᑎᒍᓪᓗᖓ ᐋᓐᓂᕐᓯᓚᐅᕐᐹᖓ ᓯᖃᓪᓕᓪᓗᖓ; ᓇᑉᐸᐅᑎᓚᐅᕐᐹᖓᓗ ᐱᒋᐊᖃᑦᑕᕋᒃᓴᕆᔪᒪᓪᓗᓂᖓ,

¹³ ᐊᕙᑎᓕᒫᓐᓂᑦ ᐱᓯᒋᐊᖃᑦᑕᓕᓚᐅᕐᐹᖓ ᖃᕐᔪᒥᓄᑦ, ᑲᐱᓚᐅᕐᐹᖓ ᑕᕐᑑᒃᑲᒃ ᑎᑭᓪᓗᒋᒃ ᓂᑲᒋᓚᐅᓐᖏᓛᖓ; ᓱᖓᕋ ᑯᕕᑎᓚᐅᕐᐹ ᒪᓂᖅᑲᒧᑦ.

¹⁴ ᑖᑦᓱᒪ ᑲᐳᓚᐅᕐᐹᖓ ᑭᖑᓕᕇᒃᑕᑦᓯᐊᑐᐃᓐᓇᕐᑐᓂᒃ; ᐅᓇᑕᕐᑎᑐᑦ ᓂᓐᖓᒃᓯᒪᔪᑐᑦ ᐱᒋᐊᖃᑦᑕᕐᓗᖓ.

¹⁵ ᕿᒃᓵᖕᓂᕐᒧᑦ ᐊᓐᓄᕌᓕᐅᓚᐅᕐᐳᖓ ᐳᑐᕐᓛᒥᒃ, ᐳᔪᕋᕐᒥᓗ ᐃᒃᓯᕚᓕᕐᓗᖓ ᓱᓇᐅᔪᓐᓁᕐᓂᕐᒧᑦ.

¹⁶ ᑮᓇᕋ ᐊᐅᐸᕐᓯᕗᖅ ᕿᐊᖓᔭᖕᓂᕐᒧᑦ, ᐃᔩᒃᑲᒃ ᐳᓪᓕᓕᕐᐴᒃ ᐊᑖᒍᓪᓗ ᕿᕐᓂᕐᓯᓪᓗᑎᒃ;

¹⁷ ᐋᓐᓂᕐᓯᕆᓇᓱᐊᕐᓯᒪᓐᖏᓚᖓᓕ ᐊᒡᒐᓐᓄᑦ, ᑐᒃᓯᐊᕐᓂᕋᓗ ᐃᑦᔪᕐᓁᑦᑑᕗᖅ.

¹⁸ ᓄᓇᕐᔪᐊᖑᔪᑎᑦ, ᐊᐅᒐ ᑕᓕᑎᓪᓗᒍ ᐅᓕᖕᓂᐊᕐᓇᒍ; ᐱᑦᓯᐊᖁᔨᓪᓗᖓᓗ ᓂᓪᓕᐊᓂᕋ ᓄᖅᑲᕐᑎᓐᓂᐊᕐᓇᒍ.

¹⁹ ᐊᒡᓛᑦ ᒫᓐᓇ, ᑕᑯᒋᑦ ᖃᐅᔨᒪᔨᒃᑲ ᕿᓚᖕᒦᑉᐳᑦ, ᐃᑲᔪᕐᑎᒃᓴᕋᓗ ᖁᑦᓯᒃᑐᒦᓪᓗᓂ.

²⁰ ᐱᖃᓐᓇᕆᔭᒪ ᓱᐊᒃᐹᖓ; ᐃᔩᒃᑲᒃ ᖁᕝᕕᐅᕐᐴᒃ ᒎᑎᒧᑦ.

²¹ ᐃᓄᖕᒧᑦ ᐃᑲᔪᕐᑕᐅᔪᒪᒐᓗᐊᕐᐳᖓ ᒎᑎᒧᑦ ᓂᓪᓕᐊᓂᐊᕐᑐᒧᑦ, ᐃᓅᑉ ᐃᓅᖃᑎᒥᓂᒃ ᐃᑲᔪᕐᐸᖕᓂᖓᑐᑦ.

²² ᐅᓄᖏᑦᑐᓂᒃ ᐊᕐᕌᒍᓂᒃ ᓱᓕ ᐃᓅᓂᐊᕐᐳᖓ, ᑭᖑᕐᖓᒍᓪᓕ ᐊᐅᓪᓚᕈᒫᕐᐳᖓ ᐅᑎᕐᓂᐊᕈᓐᓁᕐᓗᖓ.”