ᔫᐱᐅᑉ ᐊᒡᓚᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐃᓄᒃ ᐊᕐᓇᒥᑦ ᐃᕐᓂᐊᖑᓯᒪᔪᖅ ᐅᓪᓗᖃᕐᐳᖅ ᓁᑦᑐᓂᒃ, ᐊᑲᐅᖏᑦᔪᑎᒃᓴᓂᒡᓗ ᑕᑕᓪᓗᓂ.

² ᐱᕈᕐᓯᐊᑎᑐᑦ ᐱᕈᕐᐳᖅ, ᑐᖁᓕᓗᓂᓗ; ᑕᕐᕋᑎᑐᑦ ᕿᒫᕗᖅ, ᐱᑕᖃᕈᓐᓁᕐᓗᓂᓗ.

³ ᒎᑏ, ᓱᖕᒪᑦ ᑍᒤᑦᑐᒥᒃ ᑕᑯᓐᓇᕋᓱᐊᕐᐱᑦ? ᓵᖕᓄᐊᕐᑎᑉᐱᐅᒃ ᐃᖅᑲᕐᑐᕈᒪᓪᓗᒎ?

⁴ ᑭᓇ ᓴᓗᒪᔪᒥᒃ ᓴᖅᑭᑎᑦᓯᔪᓐᓇᕐᐹ ᓴᓗᒪᖏᑦᑐᒥᑦ? ᐃᓄᓕᒫᑦ ᐃᑦᔪᕐᓁᑦᑐᖃᖏᒻᒪᑕ.

⁵ ᐃᓅᓯᖓᑕ ᑕᑭᓂᒃᓴᖓ ᓯᕗᓂᖓᒍᑦ ᐋᖅᑭᒃᓱᕐᑕᐅᔭᕇᕐᓯᒪᕗᖅ, ᑕᖅᑮᓪᓗ ᐃᓅᕕᒋᓂᐊᕐᑕᖏᑦ ᐃᓕᖕᓃᑉᐳᑦ, ᑕᒪᓐᓇ ᐋᖅᑭᒃᓱᕇᕐᓯᒪᒐᕕᐅᒃ ᑭᓇᒧᓪᓘᓐᓃᑦ ᐊᓯᑦᔨᕐᑕᐅᔪᓐᓇᓐᖏᓚᖅ.

⁶ ᐃᓄᒃ ᑕᑯᓐᓇᕈᓐᓁᕈᒃ, ᓱᖁᑎᒋᔪᓐᓁᑬᓐᓇᕐᓗᒍᓗ, ᖁᕕᐊᒋᔭᒥᓂᒃ ᐃᓅᑬᓐᓇᖁᓪᓗᒍ, ᐃᓅᓯᕐᒥᓂ ᐃᓅᑬᓐᓇᕐᓂᕐᒥᓂ.

⁷ ᓇᐹᕐᑐᖅ ᓱᓕ ᐊᑐᕈᓐᓇᕐᐳᖅ ᓇᑲᑕᐅᓯᒪᓕᕐᓗᓂ; ᐆᒻᒪᕈᒃᑲᓐᓂᕐᓗᓂ ᐆᒻᒪᕈᓐᓇᕐᒪᑦ ᐱᕈᕐᕕᐅᓕᕐᓗᓂᓗ.

⁸ ᐊᒫᖏᑦ ᐱᑐᖃᐅᓕᕋᓗᐊᕐᓗᑎᒃ ᓄᓇᐅᑉ ᐃᓗᐊᓃᑦᑐᑦ, ᓇᑲᑕᐅᓂᕕᓂᖓᑕᓗ ᐃᓂᕕᓂᖓ ᑐᖁᖓᓕᕋᓗᐊᕐᑎᓪᓗᒍ.

⁹ ᐃᒫᓃᓕᕈᓂᓕ ᐊᒫᕐᑖᓕᕈᓐᓇᕐᐳᖅ ᐊᕙᓚᖓᔪᕐᑖᓕᕐᓗᓂᓗ ᐱᕈᕐᑎᑦᓯᓕᕋᔭᕐᐳᖅ.

¹⁰ ᐃᓄᒡᓕ ᑐᖁᒍᓂ, ᑕᕝᕙ ᐃᓱᓕᑉᐳᖅ; ᐃᓄᒃ ᐊᓂᕐᓂᖃᕈᓐᓁᕈᓂ, ᑍᒪ ᓇᒧᓐᖓᕐᐸ?

¹¹ ᑰᒃᑎᑐᑦ ᑕᓯᕐᒥᑦ ᑰᒎᓐᓃᕐᑐᑎᑐᑦ, ᑕᓯᕐᑎᑐᓪᓗ ᐃᒪᖃᕈᓐᓁᕐᑐᑎᑐᑦ ᐸᓂᕐᓯᒪᓕᕐᑐᑎᑐᑦ,

¹² ᐃᓄᐃᑦ ᑐᖁᖃᑦᑕᕐᐳᑦ, ᒪᑭᓐᓂᐊᕈᓐᓁᕐᓗᑎᒃ; ᓯᓚᖃᕐᓂᓕᒫᖓᓂ ᑐᐸᖕᓂᐊᕈᓐᓁᕐᓗᑎᒃ, ᐅᕝᕙᓗ ᑐᐹᕐᑕᐅᓂᐊᕈᓐᓁᕐᓗᑎᒃ ᓯᓂᖕᓂᕐᒥᖕᓂᑦ.

¹³ ᑕᕝᕙᑐᖅ ᐃᔨᕐᓯᒪᑎᓚᐅᓐᖓ ᑐᖁᖓᔪᑦ ᓄᓇᖓᓂ; ᑕᕝᕙᓂᓗ ᐃᔨᕐᓯᒪᑎᓪᓗᖓ ᓂᓐᖓᐅᒪᓃᑦ ᐊᓂᒍᓚᐅᖏᓐᓂᖓᓂ, ᐱᕕᒃᓴᒥᒡᓗ ᐋᖅᑭᒃᓯᓗᑎᑦ, ᐃᖅᑲᕐᑕᐅᔪᓐᓇᖁᓪᓗᖓ ᓈᒻᒪᒃᓯᒃᐸᑦ.

¹⁴ ᐃᓄᒃ ᑐᖁᒍᓂ, ᑭᖑᓂᖓᒍᑦ ᐃᓅᓕᒃᑲᓐᓂᕈᓐᓇᕐᐹ? ᐅᑕᖅᑭᔪᒪᖔᕐᐳᖓᓕ ᐅᓪᓗᓂᒃ ᐱᐅᓂᕐᓴᐅᓕᕐᓂᐊᕐᑐᓂᒃ, ᑕᒪᓐᓇ ᐊᓂᒍᕐᓯᐊᕆᓗᒍ.

¹⁵ ᐅᕙᓐᓄᑦ ᓂᓪᓕᐊᓕᕈᕕᑦ, ᑭᐅᓂᐊᕐᐸᒋᑦ, ᕿᓚᓈᕆᓕᕐᓂᐊᕐᐸᕐᒪᓗ, ᓴᓇᓯᒪᒐᕕᖓ.

¹⁶ ᑕᕝᕙ ᐊᐅᓚᓂᕆᔭᓕᒫᒃᑲ ᖃᐅᔨᓴᕈᓐᓇᕐᓂᐊᕐᐸᑎᑦ, ᐊᔪᕐᓂᓐᓂᒡᓕ ᖃᐅᔨᓴᑦᓮᓐᓇᕐᑐᒃᓴᐅᓐᖏᓚᑎᑦ.

¹⁷ ᐱᐅᖏᑦᑐᓕᓂᒃᑲ ᐃᒃᐱᐊᕐᔪᖕᒧᑦ ᐴᕐᓯᒪᔪᒃᓴᐅᕗᑦ, ᐊᔪᕐᑐᓕᓂᒃᑲᓗ ᒪᑦᑐᑎᔭᒃᓴᕆᕙᑎᑦ.

¹⁸ ᖃᖅᑬᑦᑕᐅᖅ ᓯᖁᒥᑦᓱᒫᕐᐳᑦ ᐊᓯᐅᓗᑎᒡᓗ, ᕾᕐᓱᐃᓪᓗ ᐃᓂᖕᒥᖕᓂᑦ ᐊᐅᓚᑕᐅᔪᒫᕆᕗᑦ;

¹⁹ ᐃᒪᕐᒧᑦ ᐅᔭᕅᑦ ᓄᖑᑕᐅᔪᓐᓇᕐᐳᑦ; ᓯᓚᓗᒡᔪᐊᓕᕐᐸᓪᓗ ᑰᖕᒧᑦ ᐃᑦᔪᖅ ᓄᖑᑕᐅᔪᓐᓇᕐᐳᖅ; ᑍᒫᒃᑕᐅᖅ ᐃᓅᑉ ᓂᕆᐅᖕᓂᖓ ᓄᖑᑎᓯᒪᕙᑦ.

²⁰ ᐃᓄᒃ ᓵᓚᒋᓪᓗᒍ ᐊᓯᐅᑎᓯᒪᕙᑦ ᐃᓱᖃᖏᑦᑐᒧᑦ; ᑮᓇᖓᑕᓗ ᑕᑯᒃᓴᐅᓂᖓ ᐊᓯᑦᔨᕐᐸᑦ, ᐊᐅᓪᓚᕐᑎᓪᓗᒍᓗ.

²¹ ᑖᑦᓱᒪ ᐃᕐᓂᖏᑦ ᐅᐱᓐᓇᕐᑎᑕᐅᕗᑦ, ᑖᑦᓱᒪᓕ ᖃᐅᔨᓐᖏᓛ; ᐅᖃᐅᑦᔭᐅᓯᒪᓐᖏᓚᓪᓗ ᑲᓐᖑᓇᕐᑐᒦᑎᑕᐅᓂᕐᒥᖕᓂᒃ.

²² ᑎᒥᒥᒍᓪᓕ ᐋᓐᓂᐊᓂᕐᒥᓂᒃ ᐃᒃᐱᒋᒐᓗᐊᕐᐳᖅ, ᐃᒻᒥᓂᒡᓗ ᓇᖕᒥᓂᑐᐊᖅ ᕿᒃᓵᒍᑎᒋᓪᓗᓂ.”