ᔫᐱᐅᑉ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐅᖃᐅᓯᕆᔭᓕᒫᑎᑦ ᑕᒪᒃᑯᐊ ᑕᑯᓯᒪᕙᒃᑲ, ᑐᓴᓚᐅᕐᓯᒪᓪᓗᒋᓪᓗ ᑐᑭᓯᓯᒪᕙᒃᑲ.

² ᖃᐅᔨᒪᔭᑎᑦ ᖃᐅᔨᒪᖕᒥᒐᒃᑭᑦ; ᐃᓕᖕᓂᑦ ᖃᐅᔨᒪᖏᓐᓂᕐᓴᐅᖏᓐᓇᒪ.

³ ᓈᒻᒪᒃᓴᖏᑦᔪᑎᒋᔭᓐᓂᒡᓕ ᐅᖃᐅᓯᖃᕈᒪᕗᖓ ᒎᑎᒧᑦ ᐊᔪᒐᖃᖏᑦᑐᒧᑦ, ᒎᑎ ᐂᕙᖃᑎᒋᔪᒪᕙᕋ ᐊᑐᕐᑕᒃᑲ ᐱᑦᔪᑎᒋᓗᒋᑦ.

⁴ ᓇᓗᓂᕆᔧᑦ ᑕᓕᑎᓯᒪᓇᓱᐊᑐᐃᓐᓇᕋᕕᐅᒃ ᓴᒡᓗᓂᒃᑯᑦ; ᐋᓐᓂᐊᓯᐅᑎᒻᒪᕆᒃᑎᑐᑦ ᑭᓇᒥᒡᓘᓐᓃᑦ ᐋᖅᑭᒃᓯᔪᓐᓇᖏᑦᑐᑎᑐᑦ.

⁵ ᓂᐱᖃᖏᑦᓯᐊᒻᒪᕆᒃᑯᕕᑦ ᐱᐅᓂᕐᓴᐅᕗᖅ, ᑍᒤᒃᑯᕕᑦ ᓯᓚᑐᔪᑎᑐᑦ ᐱᓂᐊᕐᐳᑎᑦ!

⁶ ᒫᓐᓇᓕ ᐱᑦᔪᑎᒋᔭᓐᓂᒃ ᑐᓵᓚᐅᕆᑦ, ᐅᖃᐅᓯᕆᔭᒃᑲᓗ ᐊᒃᓱᕉᑎᒋᔭᒃᑲ ᓈᓚᒡᓗᒋᑦ.

⁷ ᓱᖕᒪᑦ ᓴᒡᓗᓪᓗᑎᑦ ᒎᑎᒧᑦ ᐅᖃᓪᓚᒃᐲᑦ? ᓴᒡᓗᓂᒃᑯᑦ ᒎᑎᒧᑦ ᐱᑦᓯᐊᕐᑕᐅᓚᕿᓂᐊᕐᑐᕆᕖᑦ?

⁸ ᒎᑎᒥᒃ ᓴᐳᓐᓂᐊᕋᓱᐊᕐᐲᑦ? ᐃᖅᑲᕐᑐᐃᕕᖕᒥ ᐊᑭᓴᕐᑐᐃᔪᒪᕖᑦ ᑖᑦᓱᒥᖓ?

⁹ ᒎᑎᒧᑦ ᕿᓂᕐᕕᐅᓕᕈᕕᑦ ᐱᐅᔪᒥᒃ ᓇᓂᓯᒐᔭᕐᐹ? ᐅᕝᕙᓗ ᓴᒡᓗᕿᑦᓱᓐᓇᕐᑐᕆᕕᐅᒃ, ᐃᓄᖕᓂᒃ ᓴᒡᓗᕿᑦᓯᖃᑦᑕᕐᓂᕐᑐᑦ?

¹⁰ ᐃᓅᖃᑎᖕᓂᒃ ᐊᑦᔨᒌᓐᖏᑎᑦᓯᓃᑦ ᐃᓗᖕᓂ ᐃᔨᕐᓯᒪᒐᓗᐊᕐᐸᑦ, ᑖᑦᓱᒪ ᖃᐅᔨᒪᑦᓯᐊᕋᒥᑎᑦ ᓱᒋᐊᕋᔭᕐᐹᑎᑦ.

¹¹ ᑖᑦᓱᒪ ᐱᓐᓇᕐᓇᕐᓂᕐᔪᐊᖓᓄᑦ ᑲᑉᐱᐊᓱᒃᑎᑕᐅᒐᔭᓐᖏᓛᑏᑦ? ᓯᕘᕋᓇᕐᓂᕐᔪᐊᖓᑕᓗ ᑎᑭᕝᕕᒋᓕᑐᐊᕐᐸᑎᑦ?

¹² ᐅᖃᐅᓯᕆᒐᔪᒃᑕᑎᑦ ᐊᕐᔭᓕᐅᕐᓂᑎᑐᑦ ᐊᑑᑎᖃᓐᖏᑎᒋᕗᑦ, ᓴᐳᓐᓂᐊᕈᑎᒋᓇᓱᐊᕐᑕᑎᑦ ᒪᕐᕋᑎᑐᑦ ᓴᐳᓐᓂᐊᕈᑎᒃᓴᐅᓐᖏᓚᑦ.

¹³ ᓂᐱᖃᓐᖏᑬᓐᓇᕐᓗᑎᑦ, ᐅᖃᕐᕕᒃᓴᖃᕐᑎᑬᓐᓇᓚᐅᓐᖓ, ᐅᖃᐅᓯᕆᔭᓐᓂᑦ ᐃᓱᒪᑖᕈᓐᓇᕐᓂᐊᕋᕕᑦ.

¹⁴ ᐅᕙᓐᓂᒃ ᓂᕆᔭᐅᑎᑦᑐᑎᑐᑦ ᑍᒤᓐᓂᐊᕐᐳᖓ, ᐃᓅᓯᕋ ᑐᓂᕐᕈᑎᒋᔭᑦᑐᑦ ᑍᒤᑕᐅᑎᓪᓗᒍ.

¹⁵ ᑕᑯᒋᑦ, ᑖᑦᓱᒪ ᓱᒋᐊᕐᐸᖓ; ᓂᕆᐅᒋᔭᒃᓴᖃᓐᖏᓚᖓ; ᐃᓅᓯᕆᔭᓐᓂᒡᓕ ᓴᐳᓐᓂᐊᕐᓂᐊᕐᐳᖓ ᑖᑦᓱᒧᖓ.

¹⁶ ᓯᕘᕋᑐᐃᑦᑑᓂᕋ ᐱᐅᓕᔭᐅᑦᔪᑎᒃᓴᑐᐊᕆᓕᕋᒃᑯ, ᒎᑎᒧᑦ ᐅᒃᐱᖏᑦᑐᒥᒃ ᑖᑦᓱᒧᖓ ᓵᓐᖓᓯᔪᖃᕈᒪᓚᐅᕐᓯᒪᖏᒻᒪᑦ.

¹⁷ ᐅᖃᐅᓯᕆᔭᒃᑲ ᓈᓚᑦᓯᐊᒃᑭᑦ, ᓇᓗᓁᕐᓯᓇᓱᐊᕐᓂᕆᔭᒃᑲᓗ ᑐᓵᑦᓯᐊᕐᓗᒋᑦ.

¹⁸ ᑕᑯᒋᑦ, ᐅᕙᓐᓂᒃ ᓇᓗᓁᕋᓱᐊᓕᕐᐳᖓ; ᖃᐅᔨᒪᒐᒪ ᐃᓱᐊᕐᓂᕋᕐᑕᐅᓂᐊᕋᒪ.

¹⁹ ᑭᓇ ᐅᕙᓐᓂᒃ ᐊᑭᒪᓇᓱᖕᓂᐊᕐᐸ? ᑍᒤᑕᐅᓂᐊᕈᒪ ᓂᐸᖏᕐᓗᖓ ᑐᖁᓂᐊᕐᐳᖓ.

²⁰ ᒪᕐᕉᖕᓂᒃ ᐊᐱᖅᑯᑎᖃᕈᓐᓇᕐᑎᓚᐅᓐᖓ, ᑕᕝᕙ ᐅᕙᓐᓂᒃ ᐃᔨᕐᓯᒪᓂᐊᓐᖏᓚᖓ ᐃᓕᖕᓄᑦ,

²¹ ᓱᒋᐊᕐᓯᓃᑦ ᐅᕙᓐᓂᒃ ᓄᖅᑲᕐᑎᓚᐅᕈᒃ, ᑲᑉᐱᐊᓵᕆᓂᕐᓄᓪᓗ ᖁᐊᕐᓵᕐᑎᓐᓂᐊᕐᓇᖓ.

²² ᒎᑏᒃ, ᐅᕙᓐᓄᑦ ᐅᖃᓚᐅᕆᑦ, ᑕᕝᕙ ᑭᐅᓂᐊᕐᐸᒋᑦ; ᐅᕝᕙᓗ ᐅᖃᓪᓚᒃᑎᓚᐅᓐᖓ, ᐅᕙᓐᓄᑦ ᑭᐅᖔᕐᓂᐊᕋᕕᑦ.

²³ ᖃᓄᖅ ᐃᓱᐃᑦᑐᓕᓯᒪᒐᒪ ᐊᔪᕐᓂᖃᕐᓗᖓᓗ? ᖃᐅᔨᑎᓚᐅᓐᖓ ᑕᒻᒪᕐᓯᒪᓂᓐᓂᒃ ᐊᔪᕐᑐᓕᓂᓐᓂᒡᓗ.

²⁴ ᓱᖕᒪᑦ ᑮᓁᑦ ᐅᕙᓐᓄᑦ ᐃᔨᕐᓯᒪᕕᐅᒃ? ᓱᖕᒪᓪᓗ ᐊᑭᕋᕐᑎᑐᑦ ᐱᓇᓱᐊᕐᕕᒋᕕᖓ?

²⁵ ᑲᑉᐱᐊᓱᒃᑎᑦᓯᓇᓱᐊᕐᐲᑦ? ᐅᖃᐅᔭᑎᑐᑦ ᑲᑕᖕᓂᑯᒥᒃ ᐱᒋᐊᕋᓱᒃᓗᑎᓪᓗ ᐃᕕᒐᕐᑎᑐᑦ ᐸᓪᓕᐅᓕᕐᑐᒥᒃ?

²⁶ ᐅᕙᓐᓄᑦ ᖃᓯᓕᓇᕐᑐᓂᒃ ᑎᑎᕋᓚᐅᕐᐳᑎᑦ, ᐃᓅᓱᒃᑑᑎᓪᓗᖓ ᐊᔪᕐᑐᓕᓂᕆᓚᐅᕐᑕᒃᑲ ᐱᑦᔪᑎᒋᓪᓗᒋᑦ.

²⁷ ᐃᑎᒐᒃᑯᑦ ᕿᔪᕐᔪᐊᓄᑦ ᐊᑦᓱᖏᕐᓯᒪᕙᕐᒪ, ᐊᓪᓗᕐᓂᕆᔭᓕᒫᒃᑲᓗ ᖃᐅᔨᓴᕐᐸᑎᑦ; ᑐᒥᒃᑲ ᐊᒡᓛᑦ ᖃᐅᔨᓴᖃᑦᑕᕐᐸᑎᑦ.

²⁸ ᓄᖑᑕᒃᓴᐅᓕᕐᐳᖓ ᕿᔪᒃᑎᑐᑦ ᐊᐅᓂᕐᑎᑐᑦ, ᐅᓕᒡᔪᐊᑎᑐᓪᓗ ᓂᐊᖁᕙᓗᖕᓄᑦ ᖃᓪᓗᓈᕐᑕᕐᑐᓲᓄᑦ ᓂᕆᔭᐅᓯᒪᔪᑎᑐᑦ.”