ᔫᐱᐅᑉ ᐊᒡᓚᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱ

¹ ᑕᕝᕙ ᔫᐱ ᑭᐅᕗᖅ:

² “ᖁᓚᕐᓇᓐᖏᓚᖅ ᐃᓄᖕᓂᑦ ᐱᓪᓚᕆᖁᑕᐅᒐᕕᑦ, ᑐᖁᒍᕕᓪᓕ, ᓯᓚᑐᓂᖅ ᑐᖁᖃᑕᐅᓂᐊᕆᕗᖅ.

³ ᖃᐅᔨᒪᔭᕐᓂᒡᓕ ᖃᐅᔨᒪᒋᕗᖓ; ᐃᓕᖕᓂᓪᓗ ᖃᐅᔨᒪᖏᓐᓂᕐᓴᐅᓇᖓ. ᐅᖃᐅᓯᕆᔭᑎᓪᓗ ᖃᐅᔨᒪᔭᐅᓪᓗᑎᒃ ᐃᓘᓐᓁᓐᓄᑦ.

⁴ ᒫᓐᓇᓕ ᐊᒡᓛᑦ ᐱᖃᓐᓇᕆᔭᓐᓄᑦ ᐃᔪᕿᑕᐅᑕᐅᓕᕐᐳᖓ; ᓱᓕᓕ ᑐᒃᓯᐊᕐᓂᒃᑲ ᒎᑎᐅᑉ ᑐᓴᖃᑦᑕᕐᐰᑦ, ᓇᓛᒎᑦᓯᐊᕐᑎᓪᓗᖓ ᐸᓯᔭᒃᓴᐅᑎᓐᓇᖓᓗ, ᐃᔪᕿᑕᒍᑕᐅᕗᖓ.

⁵ ᐊᑲᐅᓐᖏᓕᐅᕈᑎᖃᓐᖏᓐᓇᑦᓯᓕ ᐅᕙᓐᓂᒃ ᒥᑕᐅᑎᖃᕐᐳᓯ; ᓱᓕᓕ ᐊᖑᒻᒥᒃ ᐋᓐᓂᕐᓯᕆᕗᓯ ᐅᕐᕈᓕᒑᓕᕐᑐᒥᒃ.

⁶ ᑎᒡᓕᒃᑏᑦ ᒎᑎᖃᖏᑦᑐᓪᓗ ᐃᓱᒫᓗᓇᖏᑦᓯᐊᕐᑐᒃᑯᑦ ᐃᓅᕗᑦ, ᓇᖕᒥᓂᖅ ᐱᔪᓐᓇᕐᓂᕐᒥᖕᓂᒃ ᒎᑎᑐᐊᖃᕐᑐᑦ.

⁷ ᐆᒪᔪᑦ ᐊᐱᕆᒍᕕᒋᑦ, ᑖᒃᑯᓇᓐᖓᑦ ᐃᓕᓐᓂᐊᕐᑎᑕᐅᔪᓐᓇᕐᐳᑎᑦ; ᑎᖕᒥᐊᓄᓪᓗ ᖃᖓᑕᕙᒃᑐᓄᑦ, ᑖᒃᑯᓄᖓᑦ ᐅᖃᐅᑦᔭᐅᔪᓐᓇᕐᐳᑎᑦ;

⁸ ᐅᕝᕙᓗ ᓄᓇᒥ ᐱᕈᕐᑐᓄᑦ, ᐃᓕᓐᓂᐊᕐᑎᑕᐅᔪᓐᓇᕐᐳᑎᑦ; ᐃᒪᕐᒥᐅᑕᓄᓪᓗ ᐃᖃᓗᖕᓄᑦ ᐅᖃᐅᑎᔭᐅᔪᓐᓇᕐᐳᑎᑦ.

⁹ ᑕᒪᒃᑯᐊᓕᒫᑦ ᖃᐅᔨᒪᕗᑦ ᐊᑕᓂᐅᑉ ᐊᒡᒐᖏᓐᓄᑦ ᓴᓇᔭᐅᓯᒪᓂᕐᒥᖕᓂᒃ.

¹⁰ ᑖᓐᓇ ᐱᓐᖑᕐᑎᓯᒪᔭᓕᒫᒥ ᐃᓅᓯᖏᓐᓂᒃ ᐊᐅᓚᑦᓯᕗᖅ; ᐊᓂᕐᓂᖃᕐᑐᓕᒫᑦ ᐃᓅᓯᖏᑦ ᑖᑦᓱᒪ ᐱᔪᓐᓇᕐᓂᖓᓃᑉᐳᑦ.

¹¹ ᐅᖃᕐᓄᑦ ᓂᕿᐅᑉ ᒪᒪᕐᓂᖓᓂᒃ ᖃᐅᔨᕙᒃᑲᕕᑦ, ᓯᐅᑏᒃᑭᒃᑕᐅᖅ ᐅᖃᐅᓯᕐᓂᒃ ᑐᓵᔭᕆᐊᒃᓴᖅ ᖁᕕᐊᓱᒃᑭᕘᒃ.

¹² ᐃᓄᑐᕾᑦ ᓯᓚᑐᓂᖃᕐᐳᑦ, ᖃᐅᔨᒪᓂᖃᕐᓗᑎᒡᓗ ᐊᑯᓂ ᐃᓅᓯᒪᓂᕐᒥᖕᓄᑦ.

¹³ ᒎᑎᓕ ᓯᓚᑐᓂᖃᕐᐳᖅ ᐱᔪᓐᓇᕐᓂᖃᕐᓗᓂᓗ; ᑖᑦᓱᒪ ᐃᓕᓯᒪᓂᖅ ᑐᑭᓯᒪᓂᕐᓗ ᐱᒋᖕᒪᒋᑦ.

¹⁴ ᒎᑎ ᓯᖁᑦᑎᕆᒃᐸᑦ, ᓇᓪᓕᐊᓐᓄᑦ ᓴᓇᔭᐅᒃᑲᓐᓂᕈᓐᓇᓐᖏᓚᖅ; ᐃᓄᒡᓗ ᐊᑦᓱᖏᐅᑎᒃᐸᒍ, ᑭᓇᒧᓪᓘᓐᓃᑦ ᐊᓂᑎᑕᐅᔪᓐᓇᓐᖏᓚᖅ.

¹⁵ ᒎᑎ ᓯᓚᓗᒃᑎᑦᓯᔪᓐᓁᕐᐸᑦ, ᑕᕝᕙ ᓄᓇ ᐸᓂᕐᐳᖅ; ᐃᒪᕐᒥᒡᓕ ᒪᑐᐃᕐᓯᑐᐊᕐᐸᑦ, ᓄᓇ ᐊᑕᖏᕐᓗᓂ ᖄᒥᑉᐳᖅ.

¹⁶ ᑖᑦᓱᒪᓂ ᐱᔪᓐᓇᕐᓂᕐᑕᖃᕐᐳᖅ ᓯᓚᑐᓂᕐᑕᖃᕐᓗᓂᓗ; ᑕᒻᒪᕐᑎᑕᐅᔪᑦ ᑕᒻᒪᕐᑎᑦᓯᔪᓪᓗ ᑖᑦᓱᒪ ᐱᔪᓐᓇᕐᓂᖓᓃᑉᐳᑦ.

¹⁷ ᑖᑦᓱᒪ ᓯᓚᑐᔪᑦ ᓯᓚᑐᓂᖃᕈᓐᓁᕐᑎᑉᐰᑦ, ᐃᖅᑲᕐᑐᐃᔩᓪᓗ ᓯᓔᑦᑐᑎᑐᑦ ᐱᓇᓱᐊᕐᑎᓪᓗᒋᑦ.

¹⁸ ᐊᖓᔪᖅᑳᕐᔪᐊᑦ ᕿᓚᒃᓱᕐᓯᒪᔭᖏᑦ ᐲᕐᑎᑉᐰᑦ, ᕿᑎᖏᑎᒍᓪᓗ ᕿᓚᒃᓯᒪᔭᐅᓕᕐᓗᑎᒃ ᑎᒍᔭᐅᑎᑉᐰᑦ.

¹⁹ ᑐᓂᕐᕈᓯᕐᑎᑦᓯᔩᑦ ᐱᓇᓱᐊᕐᕕᖏᓐᓂᑦ ᐊᐅᓪᓚᕈᑦᔭᐅᑎᑉᐰᑦ, ᐱᔪᓐᓇᕐᓂᕐᔪᐊᖃᕐᑐᓪᓗ ᓵᓚᒋᓪᓗᒋᑦ ᐊᕐᓵᕐᐰᑦ.

²⁰ ᐅᒃᐱᕆᔭᐅᑦᓯᐊᕐᑐᑦ ᐅᖃᓪᓚᒍᓐᓁᓪᓕᑎᑉᐰᑦ, ᐃᓄᑐᕾᓪᓗ ᖃᐅᔨᒪᓂᖏᑦ ᐲᕐᑎᑉᐰᑦ.

²¹ ᐊᖓᔪᖅᑳᑦ ᑲᓐᖑᓇᕐᑐᒦᑎᑉᐰᑦ, ᐊᐅᓚᑦᓯᔩᓪᓗ ᐱᔪᓐᓇᕐᓂᖏᑦ ᓄᖑᑎᓪᓗᒋᑦ.

²² ᐃᑎᔪᒦᑦᑐᑦ ᑖᕐᑐᕐᔪᐊᕐᒥ ᒪᑐᐃᕈᑎᕔᑦ; ᑖᕐᑐᕐᔪᐊᒦᑦᑐᑦ ᖃᐅᒪᔪᒧᑦ ᖃᐅᒻᒥᑕᐅᑎᓪᓗᒋᑦ.

²³ ᐃᓅᖃᑎᒌᒡᔪᐊᑦ ᐃᓄᒐᓴᒡᔪᐊᕈᕐᑎᑉᐰᑦ, ᑭᖑᓂᖓᒍᓪᓗ ᓄᖑᑎᑉᐰᑦ; ᐃᓄᒋᐊᒃᑐᕐᔪᐊᓐᖑᕐᑎᑦᓯᓚᐅᕐᓗᓂ, ᐊᐅᓪᓚᕐᑎᑦᓯᕙᒃᑭᕗᖅ.

²⁴ ᓄᓇᕐᔪᐊᕐᒥᐅᑦ ᐊᖓᔪᖅᑳᖏᑕ ᑐᑭᓯᓯᒪᓂᖏᑦ ᐲᔭᕐᐰᑦ, ᓇᓗᓕᕐᑎᓪᓗᒋᓪᓗ ᐃᓄᖃᖏᑦᑐᒥ ᐊᓯᐅᑎᑉᐰᑦ.

²⁵ ᑖᕐᑐᒥ ᑲᑎᓐᖓᓪᓗᑎᒃ ᖃᐅᒪᖃᖏᑦᑐᒦᑉᐳᑦ; ᑕᕝᕙᓂᓗ ᐅᕐᕈᔮᕐᑎᑉᐰᑦ ᐋᖓᔮᕐᑐᑎᑐᑦ.”