ᔫᐱᐅᑉ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᔪᐸᕆ

¹ ᑕᕝᕙ ᔪᐸᕆ ᓁᒪᑍᑎᒥᐅᖅ ᑭᐅᕗᖅ:

² “ᒪᑯᐊ ᐅᖃᐅᓯᐅᔪᓕᒫᑦ ᑭᐅᔭᐅᔪᓐᓇᓐᖏᓚᑦ, ᐃᓄᒃ ᐅᖃᓪᓚᒃᑐᐊᓘᓗᓂ ᐃᒻᒥᓂᒃ ᐱᐅᓯᑎᑦᓱᓐᓇᕐᐹ?

³ ᑕᒪᒃᑯᓄᖓ ᐅᖃᐅᓯᕐᓄᑦ ᑭᐅᔪᓐᓇᕋᓱᒋᓐᖏᓚᑦᑎᒎᑦ? ᒪᑯᐊ ᒥᑕᐅᑎᖃᕐᓂᑎᑦ ᑲᓐᖑᓱᒃᑎᑕᐅᑦᑍᓕᑦᔪᑎᒋᔭᑏᑦ?

⁴ ᐅᖃᖅᑲᐅᒐᕕᑦ, ᐅᖃᐅᓯᕆᔭᑎᑦ ᓱᓕᓂᕋᕐᓗᒋᑦ, ᐅᖃᕐᓗᑎᓪᓗ ᒎᑎᐅᑉ ᓵᖓᓂ ᐸᓯᔭᒃᓴᐅᖏᓐᓂᕋᕐᓗᑎᑦ.

⁵ ᑍᒪᑐᖅ ᒎᑎ ᓇᖕᒥᓂᖅ ᐅᖃᓪᓚᓚᐅᕐᓕ, ᓇᖕᒥᓂᖅ ᖃᓂᕐᒥᓄᑦ ᐅᖃᓪᓚᒡᕕᒋᓗᑎᑦ,

⁶ ᑖᑦᓱᒪ ᐅᖃᐅᑎᔪᓐᓇᕋᔭᕐᒪᑎᑦ ᓯᓚᑐᓂᖓᑕ ᐃᔨᕐᓯᒪᔭᖏᓐᓂᒃ! ᐃᓚᖏᑦ ᐃᓄᑐᐃᓐᓇᕐᒧᑦ ᑐᑭᓯᔭᐅᔭᕆᐊᖏᑦ ᐃᑎᓗᐊᕐᒪᑕ. ᒎᑎᐅᓪᓕ ᓱᒋᐊᕐᓯᒪᕚᑎᑦ ᓱᒋᐊᕐᑕᐅᔭᕆᐊᖃᕐᓂᕐᐱᑦ ᒥᒃᓯᑦᑎᓐᓃᑦᑐᒧᑦ.

⁷ ᖃᐅᔨᔪᓐᓇᕋᓱᒋᕖᑦ ᒎᑎᐅᑉ ᖃᐅᔨᒪᓂᕐᔪᐊᖓᓂᒃ? ᐊᔪᒐᖃᖏᑦᑐᕐᔪᐊᖑᓂᖓᓗ ᐃᓱᓕᓪᓗᒍ ᖃᐅᔨᔪᓐᓇᕋᓱᒋᕕᐅᒃ?

⁸ ᕿᓚᖕᒥᑦ ᖁᕝᕙᓯᖕᓂᕐᓴᐅᕗᖅ, ᖃᓄᐃᓕᐅᕈᓐᓇᕐᐱᓪᓕ? ᐃᑎᓂᕐᓴᐅᕗᖅ ᑐᖁᖓᔪᑦ ᐃᓂᖓᓂᑦ, ᖃᓄᕐᓕ ᖃᐅᔨᔪᓐᓇᕐᐱᑦ?

⁹ ᐊᖏᔪᕐᔪᐊᖑᓂᖓ ᓄᓇᕐᔪᐊᕐᒥᑦ ᐊᖏᓂᕐᓴᐅᕗᖅ, ᐃᒪᕕᖕᒥᓪᓗ ᑕᕆᐅᒥᑦ ᓯᓕᖕᓂᕐᓴᐅᓪᓗᓂ.

¹⁰ ᒎᑎᐅᑉ ᑎᒍᓗᓂᑎᑦ, ᐃᖅᑲᕐᑐᒐᒃᓴᓕᐊᕆᒃᐸᑎᑦ, ᑭᓇᒧᓪᓕ ᐊᒡᕕᐊᕐᑕᐅᔪᓐᓇᕋᔭᕐᐹ?

¹¹ ᐃᓄᐃᑦ ᖃᐅᔨᒪᕔᑦ ᓇᓪᓕᖏᑦ ᐊᑑᑎᒃᓴᖃᖏᒻᒪᖔᑕ; ᐱᐅᖏᑦᑐᓕᓂᖏᑦ ᑕᑯᓐᓇᕐᒪᒋᑦ, ᑕᒪᓐᓇᓕ ᐃᓱᒪᒋᔪᓐᓇᓐᖏᓚᐅᒃ?

¹² ᐊᖑᑦ ᓯᓔᑦᑐᖅ ᓯᓚᑦᑐᕈᓐᓇᕐᐳᖅ, ᓯᐅᑎᖅᑯᕐᑐᔫᑉ ᓄᔪᐊᕐᑑᑉ ᐃᓕᓐᓂᐊᕐᑎᑕᐅᔪᓐᓇᕐᓂᖓᑐᑦ.

¹³ ᐃᓱᒪᑖᑦᓯᐊᕈᕕᑦ ᐆᒻᒪᑎᒃᑯᑦ, ᒎᑎᒧᑦ ᐃᓴᒻᒥᓕᕐᓂᐊᕐᐳᑎᑦ.

¹⁴ ᐱᐅᖏᑦᑐᓕᓯᒪᒍᕕᑦ, ᐃᒡᓗᖕᓂᑦ ᐲᔭᓚᐅᒃᑭᑦ, ᐱᐅᖏᑦᑐᓕᓂᕐᓗ ᐃᓕᖕᓂ ᐃᓂᖃᕈᓐᓃᕐᑎᓪᓗᒍ.

¹⁵ ᑕᕝᕙ ᒪᑭᑕᑦᓯᐊᕈᓐᓇᕐᓯᓂᐊᕆᕗᑎᑦ ᑲᓐᖑᓲᑎᖃᖏᓪᓗᑎᑦ, ᒪᕐᕈᒍᓯᖏᑦᓯᐊᕐᓗᑎᑦ, ᓯᕘᕋᖏᓪᓗᑎᓪᓗ.

¹⁶ ᑕᕝᕙ ᖁᕕᐊᓇᖏᑦᑐᒃᑰᕐᓂᕆᓯᒪᔭᑎᑦ ᐃᖅᑲᐅᒪᔪᓐᓁᕐᓂᐊᕐᐸᑎᑦ, ᐅᓕᕕᒃᔪᐊᖅ ᐊᓂᒍᕐᓯᒪᓕᕐᒪᑦ ᐃᖅᑲᐅᒪᔭᐅᔪᓐᓁᕐᓯᒪᓂᖓᑐᑦ.

¹⁷ ᐃᓅᓰᓪᓗ ᖃᐅᒪᓯᐅᓕᕐᓂᐊᕐᐳᖅ ᐅᓪᓗᓪᓗᐊᑉ ᖃᐅᒪᓂᖓᑐᑦ, ᑖᕐᓯᐅᕐᓂᕐᓗ ᖃᐅᒻᒪᓕᕐᓗᓂ ᐅᓪᓛᒃᑯᑦ ᖃᐅᕙᓪᓕᐊᔪᑎᑐᑦ.

¹⁸ ᖁᓚᖏᑦᓯᐊᓕᕐᓂᐊᕐᐳᑎᑦ, ᓂᕆᐅᖕᓂᖃᕐᓗᑎᓪᓗ; ᓴᐳᑦᔭᐅᓯᒪᓂᐊᕐᐳᑎᑦ ᐃᓱᒫᓗᖏᓪᓗᑎᓪᓗ ᐃᓂᓪᓚᖓᑦᓯᐊᕐᓂᐊᕐᐳᑎᑦ.

¹⁹ ᓯᓂᒐᓱᐊᓕᕋᔭᕐᐳᑎᑦ, ᓱᓇᒥᒡᓘᓐᓃᑦ ᓯᕘᕋᖏᓪᓗᑎᑦ; ᐅᓄᕐᑐᓄᓪᓗ ᐅᐱᒋᔭᐅᑦᓯᐊᕐᓗᑎᑦ.

²⁰ ᐱᐅᖏᑦᑐᓕᔪᓪᓕ ᐃᔨᖏᑦ ᑕᑯᓂᐊᓐᖏᓚᑦ; ᐊᓐᓇᒡᕕᒃᓴᒥᓂᒡᓗ ᓇᒡᕚᕐᓂᐊᓐᖏᓚᑦ, ᓂᕆᐅᒋᔭᒃᓴᑐᐊᕆᓕᕐᓂᐊᕐᐹᑦ ᑐᖁᔪᒫᕐᓂᑎᒃ.”