ᔫᐱᐅᑉ ᐊᒡᓚᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐃᓅᓯᕋ ᐃᕿᐊᓐᖑᕋᒃᑯ; ᓈᓚᓚᐅᓐᖓ ᓈᒻᒪᒃᓴᖏᓐᓂᕆᔭᓐᓂᒃ;

² ᒎᑏ ᐅᖃᕈᒪᕗᖓ, ᓱᒋᐊᕐᓂᐊᕐᓇᖓ; ᖃᐅᔨᑎᓚᐅᓐᖓ ᓱᓇᒥᒃ ᓵᓐᖓᔭᐅᑦᔪᑎᖃᕐᒪᖔᕐᒪ.

³ ᐅᖁᒤᒃᓴᕐᑎᑦᓯᔭᕆᐊᒃᓴᖅ ᓈᒻᒪᓈᕐᓯᒪᔪᕆᕖᑦ? ᐊᒡᒐᖕᓄᑦ ᓴᓇᓯᒪᔭᕐᓂᒃ ᓇᕐᕈᔪᒃᓴᐅᕖᑦ? ᖁᕕᐊᒋᔭᖃᖔᕐᓗᑎᓪᓗ ᐱᐅᖏᑦᑐᓕᔪᑦ ᐱᓇᓱᐊᕐᓂᖏᓐᓂᒃ?

⁴ ᐅᕕᓂᖃᕐᑐᑎᑐᑦ ᐃᔨᖃᕆᕖᑦ? ᐃᓅᑉ ᑕᑯᓐᓇᕐᑕᖓᑐᑦ ᑕᑯᓐᓇᕆᕖᑦ?

⁵ ᐃᓅᓰᑦ ᐃᓅᑉ ᐃᓅᓯᖓᑐᑦ ᓁᑦᑑᑎᒋᕚ? ᐊᕐᕌᒍᑎᓪᓗ ᐃᓅᑉ ᐊᕐᕌᒍᖏᑦᑐᑦ ᑍᒤᑎᒋᕚᑦ?

⁶ ᓱᖕᒪᑦ ᐊᔪᕐᑐᓕᓂᒃᑲ ᖃᐅᔨᒪᔧᓐᓇᕆᓇᓱᒃᐱᒌᑦ? ᓈᒻᒪᖏᑦᔪᑎᒃᓴᕐᓯᐅᕐᓗᑎᓪᓗ ᐅᕙᓐᓂᒃ ᓇᐅᒃᑯᑐᐃᓐᓇᖅ,

⁷ ᖃᐅᔨᒪᒐᓗᐊᕐᐳᑎᑦ ᐸᓯᔭᒃᓴᐅᖏᓐᓂᓐᓂᒃ, ᓇᓪᓕᐊᓐᓄᓪᓘᓐᓃᑦ ᓴᐳᑦᔭᐅᔪᓐᓇᕐᓇᖓ ᐊᒡᒐᖕᓂᑦ.

⁸ ᐊᒡᒐᒃᐱᑦ ᓴᓇᓪᓗᓂᖓ ᐋᖅᑭᒃᓱᓚᐅᕐᐹᖓ; ᒫᓐᓇᓗ ᑖᒃᑯᓄᖓᑦᓮᓐᓇᖅ ᐊᓯᕈᕐᑕᐅᓕᕐᐳᖓ.

⁹ ᐃᖅᑬᓚᐅᕆᑦ ᒪᕐᕋᕐᒥᑦ ᓴᓇᓯᒪᒐᕕᖓ; ᓯᖃᓪᓕᓗᖓ ᐳᔪᕋᓐᖑᕐᑎᑦᓱᒪᓕᕆᕕᖔ?

¹⁰ ᐃᒻᒧᒃᑐᑦ ᑯᕕᔭᐅᑎᓚᐅᓐᖏᓚᕐᒫ ᑭᓂᕐᓯᑎᓪᓗᖓᓗ ᓰᓯᓐᖑᕐᑐᑎᑐᑦ?

¹¹ ᑎᒥᒐ ᐋᖅᑭᒃᓱᓚᐅᕐᐸᑦ ᓴᐅᓂᖃᕐᓗᒍ ᓂᕿᖃᕐᓗᒍᓗ, ᓴᐅᓂᒃᑲᓗ ᑕᓕᑎᓚᐅᕐᐸᑎᑦ ᓄᑭᖕᓄᑦ ᐅᕕᓂᖕᒧᓪᓗ.

¹² ᐃᓅᓯᕐᒥᒃ ᑐᓂᓯᕕᒋᓚᐅᕐᐸᕐᒪ ᓇᒡᓕᒋᑦᓯᐊᕐᓗᖓᓗ; ᑲᒪᑦᓯᐊᕐᓂᕐᓄᓪᓗ ᐊᓂᕐᓂᕋ ᐃᓅᔪᓐᓇᕐᑎᓚᐅᕐᐸᑦ.

¹³ ᒫᓐᓇᓕ ᑐᑭᓯᕗᖓ ᓱᓇᐅᕝᕙ ᑕᒪᒃᑯᐊ ᐃᔨᕐᓯᒪᓚᐅᕐᐸᑎᑦ ᐅᕙᓐᓄᑦ ᑕᒪᐅᓈᕐᑎᓐᓂᐊᕐᓂᕋᕕᖓ.

¹⁴ ᖃᐅᔨᓮᓐᓇᕐᓯᒪᔪᑎᑦ ᓇᐅᒃᑯᑦ ᐊᔪᕐᑐᓕᓂᐊᕐᒪᖔᕐᒪ, ᐱᐅᖏᑦᑐᓕᓂᓐᓂᒡᓗ ᐃᓱᒪᒋᔪᓐᓁᕕᖃᕈᒪᓇᑎᑦ.

¹⁵ ᐊᔪᕐᑐᓕᓐᓂᕈᒪ, ᑲᑉᐱᐊᓐᓇᒦᖑᕗᖓ! ᐃᓱᐊᕐᑐᓕᓚᐅᕈᒪᓕ, ᑕᕝᕙ ᐱᕙᓪᓕᐅᑎᒃᓴᕐᑖᓐᖏᓚᖓ, ᑲᓐᖑᓇᕐᑐᕐᔪᐊᕐᒦᓕᕐᐳᖓ ᐋᓐᓂᐊᑎᑕᐅᓂᒃᑲᓗ ᑕᑯᒃᓴᐅᓪᓗᑎᒃ.

¹⁶ ᐱᕙᓪᓕᐊᑦᓯᐊᕐᑐᕕᓂᐅᓕᑐᐊᕈᒪᓕ ᓱᓇᑐᐃᓐᓇᕐᒥᒃ, ᑕᕝᕙ ᐅᕙᓐᓂᒃ ᐱᓇᓱᐊᓕᕐᐳᑎᑦ ᓛᔭᑎᑐᑦ, ᐋᓐᓂᕈᒪᓪᓗᖓ ᐊᒡᓛᑦ ᑲᒪᓇᕐᑐᑎᒍᑦ;

¹⁷ ᖃᐅᔨᓴᕐᑎᖁᑎᕾᓐᓇᕐᐳᑎᑦ ᐅᕙᓐᓂᒃ ᖃᐅᔨᓇᓱᒃᑐᓂᒃ, ᓂᓐᖓᐅᒪᓃᓪᓗ ᐅᕙᓐᓄᑦ ᐱᕙᓪᓕᐊᑐᐃᓐᓇᕐᓗᓂ ᑍᒪᓐᖓᑦ; ᐃᓱᒪᒃᓴᕐᓯᐅᕐᐳᑎᑦ ᖃᓄᒃᑲᓐᓂᖅ ᐅᕙᓐᓂᒃ ᐊᑭᕋᕐᑐᕆᐊᒃᓴᖅ.

¹⁸ ᓱᖕᒪᑦ, ᐃᒡᓕᐊᒥᑦ ᐃᕐᓂᐊᖑᑎᓚᐅᕐᓯᒪᕕᖔ? ᑐᖁᔪᒃᓴᐅᓚᐅᕋᓗᐊᕐᑐᖓ ᓇᓪᓕᐊᓐᓄᑦ ᑕᑯᔭᐅᓚᐅᕐᓯᒪᖅᑳᕐᑎᓐᓇᖓ,

¹⁹ ᐃᒡᓕᐊᒥᑦ ᐊᓂᓗᖓ ᐃᓗᕕᕐᒧᑦ ᑐᕅᓐᓇᑲᐅᑎᒋᓗᖓ ᑕᒪᓐᓇ ᐱᐅᓂᕐᓴᐅᒐᔭᓚᐅᕐᐳᖅ ᐃᓅᓚᐅᕐᓂᓐᓂᑦ.

²⁰ ᐃᓅᓯᕋ ᓈᔭᕆᐊᒃᓯᓕᓐᖏᓛᖅ? ᑲᒪᒋᓐᖏᓚᐅᓐᖓ! ᐃᓅᓱᖓᕐᓂᓐᓂ ᖁᕕᐊᓱᒍᓐᓇᑬᓐᓇᓚᐅᕐᓚᖓ.

²¹ ᒫᓐᓇᕈᓗᒃ ᑕᕝᕙᐅᔪᓐᓃᓛᓕᕋᒪ ᐅᑎᒃᑲᓐᓂᕐᓂᐊᕈᓐᓃᕐᓗᖓ, ᓄᓇᒧᑦ ᑖᕐᑐᒧᑦ ᑕᑯᒃᓴᐅᓇᕐᑐᕐᑕᖃᖏᑦᑐᒧᑦ,

²² ᓄᓇᒧᑦ ᑖᕐᑐᕐᔪᐊᒧᑦ ᓇᓗᓕᕐᓇᕐᑐᒧᓪᓗ, ᑕᕝᕙᓂ ᖃᐅᒪᔪᖅ ᑖᕐᑐᕐᔪᐊᑎᑐᑦ ᑍᒤᑉᐳᖅ.”