ᔫᐱᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᓵᑖᓇᓯᐅᑉ ᐆᒃᑐᕐᓗᐃᓂᖓ ᔫᐱᒥᒃ

¹ ᐊᖑᑎᑕᖃᓚᐅᕐᐳᖅ ᔫᐱᒥᒃ ᐊᑎᓕᖕᒥᒃ, ᓄᓇᒥ ᐅᔾᒥ ᐊᑎᓕᖕᒥ, ᐊᖑᓪᓗ ᑖᓐᓇ ᐸᓯᔭᒃᓴᐅᓂᖃᓚᐅᓐᖏᓚᖅ ᒪᑭᑕᑦᓯᐊᕐᓗᓂᓗ, ᒎᑎᒧᓪᓗ ᑐᒃᓯᐊᕐᕕᖃᖃᑦᑕᕐᓗᓂ, ᐱᐅᖏᑦᑐᓕᓂᕐᒥᒡᓗ ᐊᑐᕐᑍᓕᒪᓪᓗᓂ.

² ᐃᕐᓂᖃᓚᐅᕐᐳᖅ 7ᓂᒃ ᐱᖓᓱᓂᒡᓗ ᐸᓂᖃᕐᓗᓂ.

³ ᓰᐱᖁᑎᖃᓚᐅᕐᐳᓪᓗ 7,000ᓂᒃ, ᑳᒥᓕᖁᑎᖃᕐᓗᓂᓗ 3,000ᓂᒃ, 1,000ᓂᒡᓗ ᐃᒻᒧᒃᓯᐅᒐᖁᑎᖃᕐᓗᓂ, 500ᓂᒡᓗ ᓯᐅᑎᖅᑯᕐᑐᔪᖁᑎᖃᕐᓗᓂ ᐊᕐᓇᓪᓗᖕᓂᒃ, ᐅᓄᕐᑐᓂᒡᓗ ᐱᔨᖃᕐᓗᓂ; ᐊᔪᕐᓴᖏᓐᓂᕐᐹᖑᓚᐅᕐᐳᕐᓗ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓕᒫᓂᑦ.

⁴ ᔫᐱᐅᓪᓗ ᐃᕐᓂᖏᑦ ᓇᓪᓕᐅᑎᔭᕌᖓᒥᒃ ᐊᑐᓂᑦ ᓇᓪᓕᒃᑭᓪᓗᑎᒃ ᓂᕆᕕᒡᔪᐊᕐᑎᑦᓯᖃᑦᑕᓚᐅᕐᐳᑦ; ᐃᓚᓕᒫᖏᓪᓗ ᐅᐸᒃᐸᒃᑭᓪᓗᑎᒃ, ᑍᒪᓐᖓᓕᒫᕐᓗ ᓇᔭᑎᒃ ᐱᖓᓱᑦ ᐃᓚᐅᑎᑉᐸᒃᓱᒋᑦ ᓂᕆᖃᑎᒋᔪᒪᓪᓗᒋᑦ ᐃᒥᖃᑎᒋᔪᒪᓪᓗᒋᓪᓗ.

⁵ ᐅᓪᓛᑕᒫᓪᓗ ᓂᕆᕕᒡᔪᐊᕐᓂᐅᑉ ᑭᖑᓂᖓᒍᑦ, ᔫᐱ ᐅᓪᓛᕌᕐᔪᒃᑯᑦ ᑐᐸᒃᐸᓚᐅᕐᐳᖅ ᑐᓂᕐᕈᓯᕈᒪᓪᓗᓂ ᑐᖁᑕᒃᓴᒥᒃ ᕿᑐᕐᖓᓂ ᐊᑐᓂᑦ ᐱᑦᔪᑎᒋᓪᓗᒋᑦ ᐊᔪᕐᑐᓕᓂᕐᒧᑦ ᐸᓯᔭᒃᓴᐅᔪᖃᖁᓇᒍ. ᑍᒤᓕᐅᖏᓐᓇᕐᐸᓚᐅᕐᐳᕐᓗ ᐃᓱᒪᖃᕐᓗᓂ ᕿᑐᕐᖓᖏᑕ ᓇᓪᓕᐊᓐᓂᒃ ᒎᑎᒧᑦ ᐱᔮᖅᑯᑕᐅᖏᑦᑐᒥᒃ ᐊᑭᕋᕐᑐᕐᑐᖃᑐᐃᓐᓇᕆᐊᖃᕋᓱᒋᓪᓗᓂᒋᑦ.

⁶ ᐅᓪᓗᕐᓕ ᓇᓪᓕᐅᑎᖕᒪᑦ ᕿᓚᖕᒥᐅᑍᑦ ᐊᑕᓂᐅᑉ ᓵᖓᓅᕐᕕᒃᓴᖓᑦ, ᓵᑖᓇᓯᑦᑕᐅᖅ ᐊᑭᕋᕐᑐᕐᑎ ᑖᒃᑯᓄᖓ ᐃᓚᒋᔭᐅᓚᐅᕆᕗᖅ.

⁷ ᐊᑕᓂᐅᓪᓕ ᓵᑖᓇᓯ ᐊᐱᕆᕚ, “ᖃᓄᐃᓯᒪᓕᕐᐲᑦ?” ᓵᑖᓇᓯᐅᑉ ᑭᐅᕚ, “ᓇᓂᑐᐃᓐᓇᖅ ᐊᕙᒻᒧᒐᕐᓯᒪᕗᖓ ᓄᓇᕐᔪᐊᓕᒫᒥ.”

⁸ ᐊᑕᓂᐅᓪᓗ ᐊᐱᕆᕚ, “ᐱᔨᒐ ᔫᐱ ᐃᒃᐱᒋᓯᒪᕕᐅᒃ? ᓄᓇᕐᔪᐊᓕᒫᒥ ᑖᑦᓱᑐᓇᖅ ᓱᖁᓯᔪᐃᑦᑑᑎᒋᔪᒥᒃ ᐱᑕᖃᓐᖏᓚᖅ ᐃᓄᑦᓯᐊᕙᐅᑎᒋᔪᖃᕋᓂᓗ, ᑖᑦᓱᒪ ᑐᒃᓯᐊᕐᕕᒋᖃᑦᑕᕐᐹᖓ ᑲᒪᑦᓯᐊᕋᓱᐊᕐᓗᓂᓗ ᐱᐅᖏᑦᑐᒥᒃ ᖃᓄᑐᐃᓐᓇᑦᓯᐊᖅ ᐊᑐᕐᑍᓕᓪᓗᓂ.”

⁹ ᓵᑖᓇᓯᓗ ᑭᐅᕗᖅ, “ᔫᐱᐅᑉ ᓱᓕ ᑐᒃᓯᐊᕐᕕᒋᖃᑦᑕᕋᔭᕐᐹᑏᑦ ᐃᓕᖕᓄᑦ ᐱᑦᓯᐊᕐᕕᐅᔪᓐᓁᕋᓗᐊᕈᓂ?

¹⁰ ᑍᒪᓐᖓᑦ ᓴᐳᒻᒥᔧᓐᓇᕋᕕᐅᒃ ᐃᓚᒋᔭᓕᒫᖏᓪᓗ ᐱᖁᑎᓕᒫᖏᓪᓗ ᑲᒪᒋᑦᓯᐊᕐᓗᒋᑦ, ᖃᓄᐃᓕᐅᕐᓂᓕᒫᖓᒍᓪᓗ ᓮᒻᒪᕐᑎᖃᑦᑕᕐᓯᒪᒐᕕᐅᒃ, ᐃᒻᒧᒃᓯᐅᒐᓂᒡᓗ ᐅᓄᕐᑐᐊᓗᖕᓂᒃ ᑐᓂᓯᒪᒐᕕᐅᒃ ᓄᓇᓕᓕᒫᒥᒃ ᓈᓯᓯᒪᓪᓗᐊᕐᑐᓂᒃ.

¹¹ ᒫᓐᓇᓕ ᐱᖁᑎᓕᒫᖏᓐᓂᒃ ᓄᖑᕈᑎᒐᔭᕈᕕᐅᒃ ᐃᓕᖕᓄᑦ ᑐᖅᑲᓪᓚᕆᒡᓗᓂ ᓇᕐᕈᓕᕋᔭᕐᐳᖅ!”

¹² ᑕᕝᕙ ᐊᑕᓂᖅ ᓵᑖᓇᓯᒧᑦ ᐅᖃᕐᐳᖅ, “ᑕᑯᒋᑦ, ᐱᖁᑎᓕᒫᖏᑦ ᐱᔪᓐᓇᕐᓂᕐᓄᐊᕐᐸᒃᑲ, ᔫᐱᓕ ᓇᖕᒥᓂᖅ ᐋᓐᓂᕐᑍᓕᒍ.” ᑍᒤᒻᒪᑦ ᓵᑖᓇᓯ ᑕᕝᕙᓐᖓᑦ ᕿᒪᕉᑎᕗᖅ.

ᔫᐱᐅᑉ ᕿᑐᕐᖓᖏᑕ ᐱᖁᑎᖏᑕᓗ ᓄᖑᑕᐅᓂᖏᑦ

¹³ ᐅᓪᓗᐃᓪᓕ ᐃᓚᖓᓐᓂ ᔫᐱᐅᑉ ᕿᑐᕐᖓᖏᑦ ᓂᕆᕕᒡᔪᐊᕐᑎᓪᓗᒋᑦ ᐃᕐᓂᖓᑕ ᐊᖓᔪᒃᓯᕐᐹᑉ ᐃᒡᓗᖓᓂ;

¹⁴ ᑐᓴᕐᑎᑦᓯᔨ ᐅᓪᓚᒡᓗᓂ ᔫᐱᒧᐊᕐᐳᖅ ᐅᖃᕐᓗᓂᓗ, “ᓄᓇᓕᕆᑎᓪᓗᑕ ᐱᕈᕐᓰᕕᖕᒥ ᐆᒪᔪᓄᑦ, ᓯᐅᑎᖅᑯᕐᑐᔪᓪᓗ ᖃᓂᒋᔭᑦᑎᓐᓃᓪᓗᑎᒃ ᓂᕆᓇᓱᒃᑎᓪᓗᒋᑦ.

¹⁵ ᑎᑭᑦᑐᖃᓚᐅᕐᐳᖅ ᓴᐱᐊᒥᐅᓂᒃ ᑕᒪᕐᒥᒡᓗ ᑎᒡᓕᓚᐅᕐᐰᑦ, ᐱᔨᓕᒫᑎᓪᓗ ᑐᖁᓪᓗᓂᒋᑦ ᐅᕙᖓᓕ ᐊᒥᐊᒃᑯᑑᕗᖓ ᕿᒪᒃᓯᓚᐅᕋᒪ ᑐᓴᕐᑎᑦᓱᒪᓪᓗᑎᑦ.”

¹⁶ ᓱᓕ ᑖᓐᓇ ᐅᖃᓪᓚᒃᑎᓪᓗᒍ, ᐱᔨᖓᑦᑕ ᐃᓚᖓᑦ ᕾᒋᕗᖅ ᐅᖃᕐᓗᓂᓗ, “ᑲᓪᓕᐅᑉ ᖃᐅᒻᒪᓪᓚᖕᓂᖓᓄᑦ ᓰᐱᓕᒫᑦ ᑐᖁᑕᐅᕗᑦ ᓰᐱᓕᕆᔨᓕᒫᓪᓗ, ᐅᕙᖓᓕ ᐊᒥᐊᒃᑯᑑᕗᖓ ᕿᒫᖅᑲᐅᒐᒪ ᐅᖃᐅᑎᔪᒪᓪᓗᑎᑦ.”

¹⁷ ᓱᓕᓕ ᐅᖃᕇᓚᐅᕐᑎᓐᓇᒍ, ᐱᔨᖓᑦᑕ ᐃᓚᖓᑦ ᕾᒋᕗᖅ ᐅᖃᕐᓗᓂᓗ, “ᐱᖓᓱᐃᖑᓪᓗᑎᒃ ᑲᐅᓪᑎᐊᒥᐅᑦ ᕿᒻᒥᕐᔪᐊᒃᑰᕐᑐᑦ ᐅᕙᑦᑎᓐᓄᑦ ᐅᓇᑕᕆᐊᕐᒪᑕ ᑳᒥᓕᖁᑎᓕᒫᕗᑦ ᑖᒃᑯᓄᖓ ᐱᔭᐅᕗᑦ ᐱᔨᓕᒫᑎᓪᓗ ᑐᖁᑕᐅᓪᓗᑎᒃ, ᐅᕙᖓᓕ ᐊᒥᐊᒃᑯᑑᕗᖓ ᕿᒫᖅᑲᐅᒐᒪ ᐅᖃᐅᑎᔪᒪᓪᓗᑎᑦ.”

¹⁸ ᓱᓕᓕ ᐅᖃᕇᓚᐅᕐᑎᓐᓇᒍ, ᐱᔨᖓᑦᑕ ᐃᓚᖓᑦ ᕾᒋᕗᖅ ᐅᖃᕐᓗᓂᓗ, “ᕿᑐᕐᖓᑎᑦ ᓂᕆᕕᒡᔪᐊᕐᑎᓪᓗᒋᑦ ᐃᕐᓂᕐᐱᑦ ᐊᖓᔪᒃᓯᕐᐹᑉ ᐃᒡᓗᖓᓂ,

¹⁹ ᐊᓄᕆᕐᔪᐊᕐᒧᑦ ᑎᑭᑕᐅᑲᓪᓚᖅᑲᐅᕗᑦ ᓄᓇᖃᕐᕕᐅᕙᖏᑦᑐᒥᑦ ᐱᔪᒧᑦ. ᐃᒡᓗᖓᓗ ᓱᕋᒃᑕᐅᕗᖅ ᐊᓄᕆᒧᑦ ᑕᒪᕐᒥᒡᓗ ᑐᖁᑕᐅᓪᓗᑎᒃ ᐅᕙᖓᓕ ᐊᒥᐊᒃᑯᑑᕗᖓ ᕿᒫᖅᑲᐅᒐᒪ ᐅᖃᐅᑎᔪᒪᓪᓗᑎᑦ.”

²⁰ ᔫᐱᓗ ᓂᑯᕕᓐᓇᒥ ᐊᓐᓄᕌᓂ ᐊᓕᒃᐰᑦ ᕿᒃᓵᖕᓂᕐᒧᑦ, ᓂᐊᖁᓂᓗ ᓄᔧᔭᕐᐹ, ᒪᓂᖅᑲᒧᓪᓗ ᐹᒻᒪᒃᓗᓂ ᑐᒃᓯᐊᕐᐳᖅ.

²¹ ᐅᖃᕐᓗᓂᓗ, “ᐃᕐᓂᐊᖑᓚᐅᕐᐳᖓ ᓱᓇᖃᕐᓇᖓ, ᑐᖁᓂᐊᕆᕗᖓ ᓱᓇᖃᖏᓪᓗᖓ. ᐊᑕᓂᐅᑉ ᑐᓂᓚᐅᕐᐰᑦ ᒫᓐᓇᓗ ᐊᑕᓂᐅᑉ ᑎᒍᒋᕔᑦ. ᐊᑕᓂᐅᑉ ᐊᑎᖓ ᓂᕐᑐᕐᑕᐅᓕ!”

²² ᑕᒪᒃᑯᐊᓕ ᑍᒤᒃᑲᓗᐊᕐᒪᑕ, ᔫᐱ ᐸᓯᒃᓯᖏᓐᓇᒥ ᒎᑎᒥᒃ ᑕᒪᑐᒧᖓ ᐊᔪᕐᑐᓕᓚᐅᓐᖏᓚᖅ.