ᔪᐊᓇᓯᐅᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᑕᐅᑐᓕᕐᑎᑦᓯᓂᖓ ᐃᕐᓂᐊᖑᓂᕐᒥᓂᑦ ᑕᐅᑐᖏᑦᑐᒥᒃ

¹ ᔩᓱᓯ ᐱᓱᒃᓗᓂ, ᐊᖑᒻᒥᒃ ᑕᑯᕗᖅ ᐃᕐᓂᐊᖑᓂᕐᒥᓂᑦ ᑕᐅᑐᖏᑦᑐᒥᒃ.

² ᐃᓕᓐᓂᐊᕐᑎᖏᑕᓗ ᐊᐱᕆᕚᑦ, “ᐊᔪᕆᕐᑐᐃᔩ, ᓇᓪᓕᐊᑦᑕ ᐊᔪᕐᑐᓕᓂᖓᓄᑦ ᑖᓐᓇ ᑕᐅᑐᖕᓇᓂ ᐃᕐᓂᐊᖑᓯᒪᕚ ᓇᖕᒥᓂᕐᓘᓐᓃᑦ ᐊᔪᕐᑐᓕᓂᕐᒥᓄᑦ? ᐊᖓᔪᖅᑳᖏᑕᓘᓐᓃᑦ ᐊᔪᕐᑐᓕᓂᖏᓐᓄᑦ?”

³ ᔩᓱᓯᐅᑉ ᑭᐅᕔᑦ, “ᑖᑦᓱᒪ ᑕᐅᑐᖏᓐᓂᖓ ᐊᔪᕐᑐᓕᓂᕐᒥᓄᑦ, ᐊᖓᔪᖅᑳᖏᒃᑕᓘᓐᓃᑦ ᐊᔪᕐᑐᓕᓂᖏᓐᓄᑦ ᐱᑦᔪᑎᖃᓐᖏᓚᖅ, ᑕᐅᑐᖏᓚᕐᓕ ᒎᑎᐅᑉ ᐊᔪᒐᖃᖏᓐᓂᖓ ᑖᑦᓱᒨᓇ ᓴᖅᑭᖁᓪᓗᒍ.

⁴ ᐅᓪᓘᓂᖓᓂ ᑎᓕᔨᒪ ᐱᓂᐊᕐᓂᖏᑦ ᐱᓂᐊᒐᒃᓴᕆᕙᕗᑦ; ᐅᓐᓄᐊᖑᔪᒫᕐᒪᑦ ᑭᐊᓘᓐᓃᑦ ᐱᓇᓱᐊᕐᕕᒋᔪᓐᓇᖏᑕᖓᓂᒃ.

⁵ ᓯᓚᕐᔪᐊᕐᒦᓐᓂᓐᓂ, ᓯᓚᕐᔪᐊᕐᒥᐅᑦ ᖃᐅᒪᓂᕆᕚᖓ.”

⁶ ᑍᒫᒃ ᐅᖃᕇᕋᒥ, ᓄᓇᒧᑦ ᐅᕆᐊᕐᐳᖅ, ᓄᕙᒃ ᒪᕐᕋᕐᓗ ᑲᑎᓪᓗᒋᒃ ᐊᑯᑉᐹ; ᑕᐅᑐᖏᑦᑑᑉ ᐃᔨᖏᒃ ᑕᒪᑐᒧᖓ ᒥᖑᐊᕐᐹᒃ,

⁷ ᐅᖃᐅᑎᓪᓗᒍ, “ᐃᕐᕈᕐᑐᕆᐊᕐᑐᓕᕆᑦ ᓮᓗᐊᑉ ᑕᓯᖓᓄᑦ.” ᓮᓗᐊ ᑐᑭᖃᕐᐳᖅ “ᑎᓕᔭᖅ.” ᑕᕝᕗᖓᓗ ᐂᕗᖅ ᐃᕐᕈᕐᑐᕐᓗᓂ ᑕᐅᑐᓕᕐᓗᓂᓗ ᐅᑎᕐᐳᖅ.

⁸ ᓄᓇᖅᑲᑎᖏᑦ ᑕᕝᕙ, ᑖᑦᓱᒥᖓ ᑕᑯᖃᑦᑕᕐᓯᒪᔪᑦ ᑮᓇᐅᔭᓂᒃ ᑐᒃᓯᕋᕐᑎᐅᕙᓚᐅᕐᒪᑦ, ᐅᖃᓕᕐᐳᑦ, “ᐅᓇ ᑖᓐᓇᐅᕙ ᐃᒃᓯᕙᓪᓗᓂ ᑐᒃᓯᕋᕐᑎᐅᕙᓚᐅᕐᑐᖅ?”

⁹ ᐃᓚᖏᑦ ᐅᖃᕐᐳᑦ, “ᑖᓐᓇᑦᓮᓐᓇᕐᖑᓇ”; ᐃᓚᖏᑦ ᐅᖃᕆᕗᑦ, “ᑖᓐᓇᐅᖏᑦᑐᕐᖑᓇ ᑍᓐᓇᐅᔮᑐᐃᓐᓇᕐᑐᖅ.” ᑖᓐᓇᓕ ᐅᖃᕐᐳᖅ, “ᑖᓐᓇᐅᕗᖓ.”

¹⁰ ᑕᕝᕙ ᐅᖃᐅᑎᕚᑦ, “ᖃᓄᕐᓕ ᒫᓐᓇ ᑕᐅᑐᓕᕐᐲᑦ?”

¹¹ ᑖᓐᓇ ᑭᐅᕗᖅ, “ᐊᖑᑎᐅᑉ ᔩᓱᓯᒥᒃ ᐊᑎᓕᐅᑉ ᒪᕐᕋᖅ ᓴᓇᓚᐅᕐᓗᒍ ᐃᔩᒃᑲᒡᓗ ᒥᖑᐊᕐᓗᒋᒃ ᐅᖃᐅᑎᓚᐅᕐᐹᖓ, ‘ᓮᓗᐊᒧᐊᕐᓗᑎᑦ ᐃᕐᕈᕐᑐᕆᐊᕐᑐᓕᕆᑦ’; ᑕᕝᕙ ᐂᓚᐅᕐᐳᖓ ᐃᕐᕈᕐᑐᕇᕋᒪᓗ ᑕᐅᑐᓕᓚᐅᕐᐳᖓ.”

¹² ᑖᒃᑯᐊ ᐅᖃᐅᑎᕚᑦ, “ᑍᓐᓈ ᓇᓃᑉᐸ?” ᑖᓐᓇ ᐅᖃᕐᐳᖅ, “ᖃᐅᔨᒪᓐᖏᓚᕋ.”

ᐹᕆᓯᑦ ᖃᐅᔨᓇᓱᐊᕐᓂᖓᑦ ᐋᖅᑭᒃᑕᐅᔪᒥᒃ

¹³ ᑕᕝᕙ ᐊᐱᕐᓱᓚᐅᕐᑐᑦ ᐹᕆᓯᓄᐊᕈᑎᕚᑦ ᑖᓐᓇ ᑕᐅᑐᓚᐅᖏᑦᑐᖅ.

¹⁴ ᓴᐸᑎᐅᑎᓪᓗᒍ ᔩᓱᓯᐅᑉ ᒪᕐᕋᖅ ᓴᓇᓚᐅᕐᒪᒍ ᑕᐅᑐᓚᐅᖏᑦᑐᕐᓗ ᑕᐅᑐᓕᕐᑎᓪᓗᓂᐅᒃ.

¹⁵ ᑕᕝᕙ ᐹᕆᓯᑦᑕᐅᖅ ᑖᓐᓇ ᐊᐱᕐᓱᓕᕆᕚᑦ ᖃᓄᖅ ᑕᐅᑐᓕᓚᐅᕐᒪᖔᑦ. ᑖᑦᓱᒪ ᐅᖃᐅᑎᕔᑦ, “ᒪᕐᕋᖅ ᑖᑦᓱᒪ ᐃᔨᓐᓄᑦ ᒥᖑᐊᕈᑎᒋᓚᐅᕐᐹ ᐃᒥᕐᒧᑦ ᐃᕐᕈᕐᑐᕋᒪ, ᑕᐅᑐᓕᓚᐅᕐᐳᖓ.”

¹⁶ ᑕᕝᕙ ᐹᕆᓯᑦ ᐃᓚᖏᑦ ᐅᖃᓕᕐᐳᑦ, “ᑖᓐᓇ ᐊᖑᑦ ᑍᒤᓕᐅᕐᑐᖅ ᒎᑎᒥᑦ ᐱᓐᖏᓚᖅ, ᓴᐸᑎᒥ ᐱᖁᔧᑦ ᒪᓕᖏᒻᒪᒋᑦ.” ᐃᓚᖏᓪᓕ ᐅᖃᕐᐳᑦ, “ᖃᓄᕐᓕ ᐃᓄᒃ ᐊᔪᕐᑐᓕᔪᖅ ᑍᒫᒃ ᓇᓗᓁᒃᑯᑕᕐᒥᒃ ᓴᖅᑭᑎᑦᓯᔪᓐᓇᕐᐹ?” ᑕᕝᕙᓃᑦᑐᓪᓗ ᐃᓱᒪᖃᑎᒌᒍᓐᓃᕐᐳᖅ ᐊᕕᒃᓯᒪᓕᕐᓗᑎᒃ.

¹⁷ ᑕᕝᕙ ᐹᕆᓯᑦ ᑖᓐᓇ ᑕᐅᑐᓚᐅᖏᑦᑐᖅ ᐊᐱᕆᒃᑲᓐᓂᓕᕐᐹᑦ, “ᖃᓄᕐᓕ ᑕᓐᓇ ᐅᖃᐅᓯᕆᔪᓐᓇᕐᐱᐅᒃ ᐃᓕᖕᓂᒃ ᑕᐅᑐᓕᕐᑎᑦᓯᓚᐅᕐᑐᖅ?” ᑖᑦᓱᒪ ᑭᐅᕔᑦ, “ᑖᓐᓇ ᓇᓚᐅᑦᑍᔫᕗᖅ.”

¹⁸ ᔫᑎᓪᓕ ᐅᒃᐱᕆᓐᖏᓛᑦ ᑕᐅᑐᓚᐅᖏᓐᓂᖓ ᒫᓐᓇᓗ ᑕᐅᑐᓕᕐᓂᖓ, ᑖᑦᓱᒪ ᑕᐅᑐᓕᕐᑑᑉ ᐊᖓᔪᖅᑳᖏᓐᓂᒃ ᕾᖁᔨᖅᑳᕋᑎᒃ.

¹⁹ ᕾᖕᒪᑎᒡᓗ ᔫᑎᑦ ᐊᐱᕆᕗᑦ, “ᐅᓈ ᐃᕐᓂᕆᕕᓯᒃᑯᒃ? ᑕᐅᑐᖕᓇᓂ ᐃᕐᓂᐊᖑᓯᒪᓂᕋᕐᑕᓯᒃ; ᖃᓄᕐᓕᐅᓇ ᒫᓐᓇ ᑕᐅᑐᓕᕐᐸ?”

²⁰ ᑕᐅᑐᓕᕐᑑᑉ ᐊᖓᔪᖅᑳᖏᒃ ᑭᐅᕘᒃ, “ᖃᐅᔨᒪᕗᒍᒃ ᑖᓐᓇ ᐃᕐᓂᕆᒐᑦᑎᒃᑯᒃ, ᖃᐅᔨᒪᓪᓗᓄᒡᓗ ᑕᐅᑐᖕᓇᓂ ᐃᕐᓂᐊᖑᓯᒪᓂᖓᓂᒃ;

²¹ ᖃᐅᔨᒪᓐᖏᓚᒍᒃᓕ ᖃᓄᖅ ᒫᓐᓇ ᑕᐅᑐᓕᕐᒪᖔᑦ, ᖃᐅᔨᒪᓐᖏᓐᓂᕗᒍᒡᓗ ᑭᓇᒧᑦ ᑕᐅᑐᓕᕐᑎᑕᐅᖕᒪᖔᑦ. ᐊᐱᕆᓚᐅᕐᓯᐅᒃ; ᓱᕈᓯᐅᔪᓐᓃᕋᒥ ᐃᒻᒥᓂᒃ ᑭᐅᔪᓐᓇᕐᑐᖅ.”

²² ᐊᖓᔪᖅᑳᖏᒡᓕ ᑍᒫᒃ ᐅᖃᕐᐴᒃ ᔫᑎᑦ ᓯᕘᕋᒋᒐᒥᒋᑦ, ᔫᑎᑦ ᐊᖏᖃᑎᒌᒃᓯᒪᓕᕐᒪᑕ ᓇᓪᓕᐊᑦ ᙭ᔅᑑᓯᐅᓂᕅᒃᐸᑦ ᑖᑦᓱᒥᖓ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᑦ ᐃᑎᕈᓐᓁᓪᓕᑎᑦᓯᔪᓐᓇᕐᓂᖏᓐᓂᒃ.

²³ ᑍᒤᒻᒪᑦ ᐊᖓᔪᖅᑳᖏᒃ ᐅᖃᕐᐴᒃ, “ᓱᕈᓯᐅᔪᓐᓃᕐᒪᑦ, ᐊᐱᕐᓱᓕᕐᓯᐅᒃ.”

²⁴ ᑕᕝᕙ ᑭᖑᓪᓕᕐᒥ ᑕᐅᑐᓚᐅᖏᑦᑐᖅ ᕾᖁᓕᕆᕚᑦ, ᐅᖃᐅᑎᓪᓗᒍᓗ, “ᒎᑎ ᓂᕐᑐᓚᐅᕈᒃ; ᖃᐅᔨᒪᕗᒍᑦ ᐊᖑᑦ ᑖᓐᓇ ᐊᔪᕐᑐᓕᔫᖕᒪᑦ.”

²⁵ ᑖᑦᓱᒪ ᑭᐅᕔᑦ, “ᐊᔪᕐᑐᓕᔫᖕᒪᖔᑦ ᖃᐅᔨᒪᓐᖏᓚᕋ; ᐊᑕᐅᓯᕐᒥᒡᓕ ᖃᐅᔨᒪᒐᓗᐊᕐᐳᖓ, ᑕᐅᑐᓚᐅᖏᓐᓇᒪ, ᒫᓐᓇᓗ ᑕᐅᑐᓕᕋᒪ.”

²⁶ ᑖᒃᑯᐊ ᐅᖃᐅᑎᕚᑦ, “ᖃᓄᖅ ᐱᓇᓱᐊᕐᕕᒋᓚᐅᕐᐹᑎᑦ? ᖃᓄᕐᓗ ᑕᐅᑐᓕᕐᑎᑉᐹᑎᑦ?”

²⁷ ᑖᑦᓱᒪ ᑭᐅᕔᑦ, “ᐅᖃᐅᑎᔭᕇᖅᑲᐅᕙᑦᓯ, ᓈᓚᒍᒪᖅᑲᐅᓐᖏᓚᓯᓕ, ᓱᖕᒪᑦ ᑐᓴᒃᑲᓐᓂᕈᒪᓕᕆᕕᓰ? ᑖᑦᓱᒧᖓ ᐃᓕᓐᓂᐊᕐᑎᐅᔪᒪᓕᕆᕕᓰ?”

²⁸ ᑕᕝᕙ ᐅᖃᕐᓂᕐᓗᒡᕕᒋᓪᓗᒍ ᐅᖃᐅᑎᕚᑦ, “ᐃᕝᕕᑦ ᑖᑦᓱᒪ ᐃᓕᓐᓂᐊᕐᑎᒋᕚᑎᑦ, ᐅᕙᒍᓪᓕ ᒨᓯᓯᐅᑉ ᐃᓕᓐᓂᐊᕐᑎᒋᕚᑎᒍᑦ.

²⁹ ᖃᐅᔨᒪᕗᒍᑦ ᒎᑎᐅᑉ ᒨᓯᓯ ᐅᖃᖃᑎᒋᖃᑦᑕᓚᐅᕐᒪᒍ, ᑍᓐᓇᓕ ᐊᖑᑦ, ᖃᐅᔨᒪᓐᖏᓚᕗᑦ ᓇᑭᑦ ᐱᓯᒪᖕᒪᖔᑦ.”

³⁰ ᑖᑦᓱᒪ ᑭᐅᕔᑦ, “ᑕᒪᓐᓇ ᑲᒪᓂᐊᕐᓇᑦᓯᐊᕐᐳᖅ! ᖃᐅᔨᒪᖏᓐᓇᑦᓯ ᑖᓐᓇ ᓇᑭᑦ ᐱᓯᒪᖕᒪᖔᑦ, ᑖᑦᓱᒪᓗ ᑕᐅᑐᓕᕐᑎᓚᐅᕐᐹᖓ.

³¹ ᖃᐅᔨᒪᕗᒍᓪᓕ ᒎᑎᐅᑉ ᐊᔪᕐᓂᕐᒦᑦᑐᑦ ᑐᓴᖏᒻᒪᒋᑦ; ᒎᑎᒥᒡᓕ ᑲᒪᑦᓯᐊᕐᑐᑦ ᐱᖁᔭᖓᓂᒡᓗ ᐊᑐᑦᓯᐊᕐᑐᑦ, ᒎᑎᐅᑉ ᑐᓴᕐᒪᒋᑦ.

³² ᓯᓚᕐᔫᑉ ᐱᒋᐊᕐᓂᖓᓂᑦ ᑐᓴᐅᒪᔪᖃᓐᖏᓚᖅ ᐃᕐᓂᐊᖑᓂᕐᒥᓂᑦ ᑕᐅᑐᖏᑦᑐᒥᒃ ᑕᐅᑐᓕᕐᑎᑦᓯᔪᖃᓚᐅᕐᓯᒪᖕᒪᖔᑦ.

³³ ᑖᓐᓇᓕ ᒎᑎᒥᑦ ᐱᓯᒪᖏᒃᑯᓂ, ᓱᓇᒥᒡᓘᓐᓃᑦ ᐱᓇᓱᐊᕈᓐᓇᕋᔭᓐᖏᓚᖅ.”

³⁴ ᑖᒃᑯᐊ ᑭᐅᕚᑦ, “ᐊᔪᕐᓂᕐᒥ ᐃᕐᓂᐊᖑᓯᒪᓪᓗᑎᑦ ᐱᕈᕐᓴᔭᐅᕕᒋᓪᓗᒍᓗ, ᐅᕙᑦᑎᓐᓂᒃ ᐊᔪᕆᕐᑐᐃᓇᓱᐊᕐᐲ?” ᔫᑎᓪᓗ ᐅᒃᐱᕐᓂᕐᒧᑦ ᑲᑎᒪᕕᖓᓐᓂᑦ ᐊᓂᑎᑉᐹᑦ.

ᐊᓂᕐᓂᒃᑯᑦ ᑕᐅᑐᖏᓐᓂᖅ

³⁵ ᔩᓱᓯᓕ ᑐᓴᕋᒥ ᐊᓂᑎᑕᐅᓯᒪᓕᕐᓂᖓᓂᒃ, ᑲᑎᒐᒥᐅᒡᓗ ᐅᖃᐅᑎᕚ, “ᐃᓅᑉ ᐃᕐᓂᖓᓄᑦ ᐅᒃᐱᕐᐲᑦ?”

³⁶ ᑖᑦᓱᒪ ᑭᐅᕚ, “ᓇᓪᓕᐊᖑᖕᒪᖔᑦ ᐅᖃᐅᑎᓚᐅᓐᖓ, ᑖᑦᓱᒧᖓ ᐅᒃᐱᓕᖁᓪᓗᖓ.”

³⁷ ᔩᓱᓯᐅᑉ ᐅᖃᐅᑎᕚ, “ᑕᑯᓚᐅᕐᐸᑦ, ᑖᓐᓇᐅᕗᕐᓗ ᐅᖃᖃᑎᒋᔧᑦ.”

³⁸ ᑖᓐᓇ ᐅᖃᕐᐳᖅ, “ᐊᑕᓃᖅ ᐅᒃᐱᕐᐳᖓ”; ᓵᖓᓄᓪᓗ ᓰᖅᑯᕐᐳᖅ.

³⁹ ᔩᓱᓯ ᐅᖃᕐᐳᖅ, “ᐃᖅᑲᕐᑐᐃᔭᕐᑐᕐᓗᖓ ᓯᓚᕐᔪᐊᕐᒧᑦ ᑎᑭᑉᐳᖓ, ᑕᐅᑐᖏᑦᑐᑦ ᑕᐅᑐᓕᖁᓪᓗᒋᑦ, ᑕᐅᑐᒃᑐᓪᓗ ᑕᐅᑐᒍᓐᓃᖁᓪᓗᒋᑦ.”

⁴⁰ ᐹᕆᓯᓪᓕ ᑕᕝᕙᓃᑦᑐᑦ ᐃᓚᖏᑦ, ᑕᒪᑐᒥᖓ ᐅᖃᕐᑎᓪᓗᒍ ᑐᓴᕋᒥᒃ ᐅᖃᐅᑎᕚᑦ, “ᑕᐅᑐᖏᓐᓂᕕᑖ?”

⁴¹ ᔩᓱᓯᐅᑉ ᐅᖃᐅᑎᕔᑦ, “ᑕᐅᑐᖏᒃᑯᑦᓯ, ᐸᓯᔭᒃᓴᐅᓂᖃᕋᔭᓐᖏᓚᓯ; ᒫᓐᓇᓕ ᑕᐅᑐᖕᓂᕋᕋᑦᓯ, ᐸᓯᔭᒃᓴᐅᕗᓯ ᓱᓕ.”