ᔪᐊᓇᓯᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅ ᐅᒃᐱᕆᔭᐅᖏᓐᓂᖓ ᖃᑕᓐᖑᑎᒥᓄᑦ 1 ᑕᒪᑐᒪ ᑭᖑᕐᖓᒍᑦ ᔩᓱᓯ ᒐᓕᓕᐊᒃᑯᑦ ᐃᖏᕐᕋᕗᖅ; ᔫᑎᐊᒃᑯᓪᓕ ᐃᖏᕐᕋᔪᒪᓐᖏᓚᖅ, ᔫᑎᑦ ᐊᖓᔪᖅᑳᖏᑕ ᑐᖁᑦᓱᒪᖕᒪᑦᔪᒃ. 2 ᔫᑎᑦ ᓯᓂᒃᑕᕐᕕᖕᒥ ᐊᖏᕐᕋᖃᕐᐸᓚᐅᕐᓂᕐᒥᖕᓂᒃ ᓇᓪᓕᐅᓐᓂᕐᓯᐅᕐᕕᖓᑦ ᖃᒡᓕᓕᕐᒪᑦ. 3 ᑍᒤᒻᒪᑦ ᖃᑕᓐᖑᑎᖏᑕ, ᔩᓱᓯ ᐅᖃᐅᑎᕚᑦ, “ᑕᒫᓐᖓᑦ ᐊᐅᓪᓚᕐᓗᑎᑦ ᔫᑎᐊᒧᐊᓚᐅᕆᑦ, ᐃᓕᓐᓂᐊᕐᑎᑎᑦ ᑕᑯᓂᐊᕐᒪᑕ ᐱᓇᓱᐊᕐᓂᕆᔭᕐᓂᒃ. 4 ᐱᓇᓱᐊᕐᑕᒥᖕᓂᒃ ᐃᔨᕋᕐᑐᕐᑐᖃᕈᓐᓇᖏᓚᖅ ᐃᓄᖕᓄᑦ ᖃᐅᔨᔭᐅᑦᓯᐊᕈᒪᔭᕌᖓᒥᒃ. ᑕᒪᒃᑯᓂᖓ ᐱᓇᓱᐊᖃᑦᑕᕋᕕᑦ, ᓯᓚᕐᔪᐊᓕᒫᒥ ᐃᓕᖕᓂᒃ ᖃᐅᔨᔭᐅᑎᓚᐅᕆᑦ.” 5 ᐊᒡᓛᑦ ᖃᑕᓐᖑᑎᖏᑦ ᐅᒃᐱᓚᐅᖏᒻᒪᑕ ᔩᓱᓯᒥᒃ. 6 ᔩᓱᓯᐅᑉ ᐅᖃᐅᑎᕔᑦ, “ᓱᓕ ᐱᕕᒃᓴᕋ ᓈᒻᒪᒃᓯᖏᒻᒪᑦ, ᐃᓕᑦᓯᓕ ᐱᓇᓱᐊᕐᕕᒃᓴᓯ ᖃᖓᓕᒫᖅ ᓇᓪᓕᐅᑎᓯᒪᕗᖅ. 7 ᓯᓚᕐᔪᐊᕐᒥᐅᑦ ᐆᒥᒋᔪᓐᓇᓐᖏᓛᓯ, ᐅᕙᖓᓕ ᐆᒥᒋᔭᐅᕗᖓ ᐱᐅᖏᑦᑐᒧᑦ ᐊᐅᓚᑕᐅᓂᖏᓐᓂᒃ ᓇᓗᓁᕐᓯᖃᑦᑕᕐᓂᕋ ᐱᑦᔪᑎᒋᓪᓗᒍ. 8 ᓇᓪᓕᐅᓐᓂᕐᓯᐅᕆᐊᕐᑐᓕᕆᑦᓯ; ᐅᕙᖓᓕ ᓇᓪᓕᐅᓐᓂᕐᓯᐅᕐᑐᓄᑦ ᐂᓂᐊᖏᓐᓇᒪ, ᐱᕕᒃᓴᕋ ᓱᓕ ᓈᒻᒪᒃᓯᓯᒪᖏᒻᒪᑦ.” 9 ᑕᒪᑐᒥᖓᓕ ᐅᖃᕇᕋᒥ ᒐᓕᓕᐊᒥᑦ ᓅᓚᐅᓐᖏᓚᖅ. ᔩᓱᓯᐅᑉ ᓇᓪᓕᐅᓐᓂᕐᓯᐅᕐᕕᖕᒧᑦ ᐂᖃᑕᐅᓂᖓ 10 ᖃᑕᓐᖑᑎᖏᓪᓕ ᓇᓪᓕᐅᓐᓂᕐᓯᐅᕐᑐᓄᑦ ᐂᖕᒪᑕ, ᔩᓱᓯᑦᑕᐅᖅ ᒪᓕᒃᓴᕆᕗᖅ; ᐃᓄᖕᓄᑦ ᓴᖅᑭᔮᓗᐊᕋᓂ ᖃᐅᔨᒪᔭᐅᔪᒪᖏᓐᓇᒥ. 11 ᔫᑎᑦ ᐊᖓᔪᖅᑳᖏᑕ ᕿᓂᕋᓗᐊᕐᐹᑦ ᓇᓪᓕᐅᓐᓂᕐᓯᐅᕐᑐᓂ, ᐅᖃᕐᓗᑎᒃ, “ᓇᐅᒡᓕ ᔩᓱᓯ?” 12 ᐃᓄᒐᓮᑦ ᑕᑉᕙᓃᑦᑐᑦ ᐅᖃᒪᔭᐅᑎᖃᕐᓕᕐᐳᑦ ᔩᓱᓯᒥᒃ, ᐃᓚᖏᑦ ᐅᖃᕐᐳᑦ, “ᐃᓄᑦᓯᐊᕚᓗᖏᓐᓇ,” ᐃᓚᖏᑦ ᐅᖃᕐᐳᑦ, “ᐋᒃᑬ, ᐃᓄᖕᓂᖏᓐᓇ ᑕᒪᕐᑎᑦᓯᓕᕐᑐᖅ.” 13 ᔫᑎᓪᓕ ᐊᖓᔪᖅᑳᖏᓐᓂᒃ ᓯᕘᕋᒐᒥᒃ ᐅᖃᒪᔭᐅᑎᖃᕐᓂᑎᒃ ᔩᓱᓯᒥᒃ ᑐᓵᔭᐅᑎᑦᑍᓕᕚᑦ. 14 ᓇᓪᓕᐅᓐᓂᕐᓯᐅᕐᓂᖅ ᐊᓂᒍᓕᕐᑎᓪᓗᒍ ᔩᓱᓯ ᑐᒃᓯᐊᕐᕕᒡᔪᐊᒧᐊᕐᐳᖅ ᑕᕝᕙᓂ ᐊᔪᕆᕐᑐᐃᓕᕐᓗᓂ. 15 ᔫᑎᑦ ᐊᖓᔪᖅᑳᖏᑦ ᑲᒪᔪᐊᓘᓕᕐᐳᑦ ᐅᖃᕐᓗᑎᒃ, “ᖃᓄᐊᓗᖑᓇ ᖃᐅᔨᒪᔪᐊᓘᓕᕐᐹ ᐃᓕᓐᓂᐊᕐᕕᖕᒥ ᐃᓕᓐᓂᐊᓚᐅᕐᓯᒪᓇᓃ?” 16 ᔩᓱᓯᐅᑉ ᑭᐅᕔᑦ, “ᐊᔪᕆᕐᑐᐃᕗᖓ ᐅᕙᓐᓂᑦ ᓇᖕᒥᓂᖅ ᐱᖏᑦᑐᓂᒃ, ᑖᑦᓱᒪᓐᖓᓪᓕ ᑎᓕᔨᓐᓂᑦ ᐱᔪᓂᒃ. 17 ᓇᓪᓕᐊᑦ ᒎᑎᐅᑉ ᐱᔪᒪᔭᖓᓂᒃ ᐱᓇᓱᐊᕈᒪᔪᖅ, ᖃᐅᔨᓂᐊᕐᐳᖅ ᐊᔪᕆᕐᑐᐃᔪᑎᒋᔭᒃᑲ ᒎᑎᒥᑦ ᐱᖕᒪᖔᑕ ᐅᕝᕙᓗ ᐅᕙᓐᓂᑐᐃᓐᓇᖅ ᐅᖃᓪᓚᖕᒪᖔᕐᒪ. 18 ᓇᓪᓕᐊᑦ ᐱᔪᓐᓇᕐᓂᑐᐃᓐᓇᕐᒥᒍᑦ ᐅᖃᓪᓚᒃᑐᖅ ᐃᒻᒥᓂᒃ ᓂᕐᑐᕐᑕᐅᑦᔪᑎᒃᓴᒥᓂᒃ ᐱᓇᓱᐊᕐᐳᖅ; ᓇᓪᓕᐊᓪᓕ ᑎᓕᔨᒥᓂᒃ ᓂᕐᑐᕐᑕᐅᑎᑦᓯᓇᓱᐊᕐᑐᖅ ᓱᓕᑦᓯᐊᕐᐳᖅ, ᑖᑦᓱᒪᓂᓗ ᓴᒡᓗᓂᕐᑕᖃᕋᓂ. 19 ᒨᓯᓯᐅᑉ ᐱᖁᔭᓂᒃ ᑐᓂᓯᕕᒋᓚᐅᓐᖏᓛᓰ? ᓇᓪᓕᓯᓘᓐᓃᑦ ᐱᖁᔭᓂᒃ ᒪᓕᒃᑐᖃᓐᖏᓚᓯ. ᓱᖕᒪᑦ ᑐᖁᓐᓇᓱᐊᕐᐱᓯᓐᖔ?” 20 ᐃᓄᒋᐊᒃᑐᕐᔪᐊᑦ ᑭᐅᕚᑦ, “ᐊᓂᕐᓂᕐᓗᖕᒥᒃ ᐃᓗᒻᒥᕐᑕᐅᓯᒪᕗᑎᑦ! ᑭᓇᒨᑦ ᑐᖁᑕᐅᓇᓱᐊᕐᐲᑦ?” 21 ᔩᓱᓯᐅᑉ ᑭᐅᕔᑦ, “ᐱᓇᓱᐊᕐᓂᕐᒥᒃ ᐊᑕᐅᓯᕐᒥᒃ ᓴᖅᑭᑎᑦᓯᒐᒪ, ᐃᓘᓪᓇᓯ ᑲᒪᓂᐊᕈᑎᒋᓚᐅᕐᐸᓯ. 22 ᒨᓯᓯᐅᑉ ᐱᖁᓚᐅᕐᐹᓯ ᐃᕐᓂᓯ ᑭᐱᔭᐅᖁᓪᓗᒋᑦ ᒨᓯᓯ ᓇᖕᒥᓂᖅ ᐱᒋᐊᕐᑎᑦᓯᓚᐅᖏᒃᑲᓗᐊᕐᐳᖅ, ᓯᕗᓕᓯᓕ ᐱᒋᐊᕐᑎᑦᓯᓚᐅᕐᐳᑦ, ᑍᒤᒻᒪᑦ ᓄᑲᑉᐱᐊᑦ ᑭᐱᕙᒃᐸᓯ ᓴᐸᑎᐅᑎᓪᓗᒍ. 23 ᓄᑲᑉᐱᐊᕐᓕ ᑭᐱᔭᐅᒃᐸᑦ ᓴᐸᑎᒥ, ᒨᓯᓯᐅᑉ ᐱᖁᔭᖏᓐᓂᒃ ᓯᖁᒥᑦᓯᑦᑍᓕᒪᓂᕐᒧᑦ, ᓱᖕᒪᓪᓕ ᑍᒪ ᐆᒥᒋᕕᓯᓐᖓ ᐃᓅᑉ ᑎᒥᓕᒫᖓᓂᒃ ᐋᖅᑭᒃᓯᓚᐅᕋᒪ ᓴᐸᑎᐅᑎᓪᓗᒎ? 24 ᑕᑯᒃᓴᐅᔪᑐᐃᓐᓇᖅ ᒪᓕᒡᓗᒍ ᐃᖅᑲᕐᑐᐃᓂᐊᕋᓯ, ᓈᒻᒪᓈᑦᓯᐊᕐᑐᒥᒡᓕ ᐃᖅᑲᕐᑐᐃᖃᑦᑕᕆᑦᓯ ᐱᓂᐊᕐᓂᓪᓚᕆᖓ ᒪᓕᒡᓗᒍ.” ᐃᓄᐃᑦ ᑐᑭᓯᔪᒪᓂᖓᑦ ᔩᓱᓯ ᒥᓮᐊᓯᐅᖕᒪᖔᑦ 25 ᑍᒤᒻᒪᑦ ᔨᕉᓴᓕᒻᒥᐅᑦ ᐃᓚᖏᑦ ᐅᖃᕐᐳᑦ, “ᐅᓈ ᑖᓐᓇᐅᓐᖏᓚᖅ ᐊᖓᔪᖅᑲᐅᔪᑦ ᑐᖁᑦᓱᒪᔭᖓᑦ? 26 ᑕᑯᓕᕆᑦᓯ, ᐃᓄᒐᓴᒡᔪᐊᓄᑦ ᐅᖃᓪᓚᒃᐳᖅ, ᐃᓂᕐᑎᕐᑕᐅᓐᖏᓚᕐᓘᓐᓃᑦ! ᐊᖓᔪᖅᑳᑦ ᖃᐅᔨᓪᓚᕆᓕᕐᐹᑦ ᙭ᔅᑑᓯᐅᓂᖓᓂᒃ? 27 ᙭ᔅᑑᓯᓕ ᑎᑭᑉᐸᑦ, ᖃᐅᔨᒪᔪᖃᕐᓂᐊᓐᖏᓚᖅ ᓇᑭᑦ ᐱᓯᒪᖕᒪᖔᑦ; ᐅᓇᓕ ᑕᒪᑦᑕ ᖃᐅᔨᒪᔭᕗᑦ ᓇᑭᑦ ᐱᓯᒪᖕᒪᖔᑦ.” 28 ᔩᓱᓯ ᑐᒃᓯᐊᕐᕕᒡᔪᐊᕐᒥ ᐊᔪᕆᕐᑐᐃᓪᓗᓂ, ᓂᐱᖅᑯᕐᑐᓪᓗᓂ ᐅᖃᕐᐳᖅ, “ᖃᐅᔨᒪᓪᓚᕆᒃᐱᓯᓐᖔ? ᖃᐅᔨᒪᓪᓚᕆᒃᑲᓗᐊᕐᐱᓯ ᓇᑭᑦ ᐱᓯᒪᖕᒪᖔᕐᒪ? ᐅᕙᓐᓂᒃ ᑎᑭᑎᓯᒪᖏᓐᓇᒪ; ᐅᕙᓐᓂᒃ ᑎᓕᓯᔪᖅ ᓱᓕᑦᓯᐊᕐᑑᕗᖅ, ᑖᓐᓇ ᖃᐅᔨᒪᓐᖏᑕᓯ. 29 ᐅᕙᖓᓕ ᖃᐅᔨᒪᕙᕋ, ᑖᑦᓱᒪᓐᖓᑦ ᐱᓚᐅᕋᒪ, ᑖᑦᓱᒪᓗ ᑎᓕᓚᐅᕐᒪᖓ.” 30 ᑕᕝᕙ ᑎᒍᓇᓱᐊᕋᓗᐊᕐᐹᑦ; ᐊᒃᑐᕐᑕᐅᓐᖏᓚᕐᓘᓐᓃᑦ, ᓱᓕ ᐱᔭᐅᕕᒃᓴᖓ ᓇᓪᓕᐅᑎᓯᒪᖏᒻᒪᑦ. 31 ᐃᓄᐃᑦ ᐊᒥᓱᑦ ᐅᒃᐱᕈᓱᓕᕐᐳᑦ ᑖᑦᓱᒥᖓ; ᐅᖃᕐᓗᑎᒃ, “᙭ᔅᑑᓯ ᑎᑭᒃᑯᓂ ᓇᓗᓁᒃᑯᑕᕐᓂᒃ ᐱᓇᓱᐊᕐᓂᕐᓴᐅᒐᔭᕐᐹ ᑖᑦᓱᒪᓐᖓᑦ?” ᑐᒃᓯᐊᕐᕕᒡᔪᐊᑉ ᖃᐅᔨᓴᕐᑎᖏᑦ ᑎᒍᓯᔭᕐᑐᖁᔭᐅᕗᑦ ᔩᓱᓯᒥᒃ 32 ᐹᕆᓯᓪᓕ ᑐᓴᕋᒥᒃ ᐃᓄᒐᓴᒡᔪᐊᑦ ᐃᒻᒥᖕᓄᑦ ᑍᒫᒃ ᐅᖃᐅᓯᖃᕐᑎᓪᓗᒋᑦ ᔩᓱᓯᒥᒃ, ᐹᕆᓯᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᑦ ᑐᒃᓯᐊᕐᕕᒡᔪᐊᑉ ᖃᐅᔨᓴᕐᑎᖏᓐᓂᒃ ᑎᓕᓯᕗᑦ ᔩᓱᓯ ᑎᒍᔭᐅᖁᓪᓗᒍ. 33 ᔩᓱᓯᓕ ᐅᖃᕐᐳᖅ, “ᒫᓐᓇ ᓱᓕ ᐊᑯᓂᐅᖏᑦᑐᖅ ᓇᔪᕐᓂᐊᕐᐸᑦᓯ, ᑭᖑᓂᖓᒍᓪᓗ ᑎᓕᔨᓐᓄᑦ ᐂᓂᐊᕐᐳᖓ; 34 ᕿᓂᕈᒫᕐᐸᑦᓯᓐᖓ ᓇᓂᓇᖓᓗ; ᐂᕕᒋᓂᐊᕐᑕᓐᓄᑦ ᑎᑭᑦᓱᓐᓇᖏᓐᓇᑦᓯ.” 35 ᔫᑎᓪᓕ ᐊᖓᔪᖅᑳᖏᑦ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, “ᓇᒧᓐᖓᐅᓂᐊᕋᒥᐅᓇ ᐅᕙᑦᑎᓐᓄᑦ ᓇᓂᔭᐅᔪᓐᓁᓪᓕᓂᐊᕐᓂᕋᕐᐸ? ᐅᓇ ᒍᕇᑭᑦ ᓄᓇᖏᓐᓄᐊᕈᒪᓕᕐᑐᖅ ᒍᕇᑭᓂᒃ ᐊᔪᕆᕐᑐᐃᔭᕐᑐᕈᒪᓪᓗᓃ? 36 ᐅᖃᕐᒪᑦ, ‘ᕿᓂᕈᒫᕐᐸᑦᓯᓐᖓ ᓇᓂᓇᖓᓗ, ᐂᕕᒋᓂᐊᕐᑕᓐᓄᑦ ᑎᑭᑦᓱᓐᓇᖏᓐᓇᑦᓯ.’ ᖃᓄᕐᖑᓈ ᑐᑭᓕᖕᓂᒃ ᐅᖃᓪᓚᓕᕐᑐᖅ?” ᐃᒥᖅ ᑰᒃᑐᖅ ᐃᓅᓯᕐᑖᕐᓇᕐᑐᒥᒃ 37 ᓇᓪᓕᐅᓐᓂᕐᓯᐅᕐᕕᐅᑉ ᐅᓪᓗᖏᑕ ᑭᖑᓪᓕᕐᐹᖓᓐᓂ, ᐱᕕᒃᔪᐊᖑᓂᕐᐸᐅᓕᕐᑎᓪᓗᒍ, ᔩᓱᓯ ᓂᑯᕕᑉᐳᖅ ᓂᐱᖅᑯᕐᑐᓪᓗᓂ ᐅᖃᕐᐳᖅ, “ᐃᒥᕈᒃᑐᖃᕐᐸᑦ, ᐅᕙᓐᓄᑦ ᕾᓕᕐᓕ ᐃᒥᕐᓂᐊᕐᒪᑦ. 38 ᐅᕙᓐᓄᑦ ᐅᒃᐱᕐᑐᖅ, ᓲᕐᓗ ᐊᒡᓚᖕᓂ ᐅᖃᐅᓯᐅᓯᒪᖕᒪᑦ, ‘ᐃᒦᑦ ᐃᓅᓯᑖᕐᓇᕐᑐᒥᒃ ᑰᒃᑐᑦ ᐆᒻᒪᑎᖓᓂᑦ ᑰᓕᕈᒪᕐᐳᑦ.’” 39 ᔩᓱᓯᓕ ᑕᒪᑐᒥᖓ ᐅᖃᕐᐳᖅ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐅᖃᐅᓯᖃᕐᓗᓂ, ᑖᑦᓱᒧᖓ ᐅᒃᐱᕐᑐᓄᑦ ᑐᓂᔭᐅᔪᒫᕐᑐᒥᒃ; ᑍᑦᓱᒪᓂ ᓱᓕ ᒎᑎᐅᑉ ᐊᓂᕐᓂᖓ ᑐᓂᔭᐅᓚᐅᖏᒻᒪᑦ, ᔩᓱᓯ ᓱᓕ ᓂᕐᑐᕐᓇᕐᓯᑎᑕᐅᕕᒃᓴᒥᓄᑦ ᑎᑭᐅᑎᓯᒪᓚᐅᖏᒻᒪᑦ. ᐃᓄᐃᑦ ᐊᑦᔨᒌᖏᑦᑐᒥᒃ ᐃᓱᒪᖃᕐᓂᖓᑦ ᔩᓱᓯᒥᒃ 40 ᐃᓄᐃᓪᓕ ᐃᓚᖏᑦ ᐅᖃᐅᓯᕐᓂᒃ ᑕᒪᒃᑯᓂᖓ ᑐᓴᕐᑐᑦ ᐅᖃᕐᐳᑦ, “ᐅᓇ ᓇᓚᐅᑦᑍᔪᓪᓚᕆᐅᕗᖅ.” 41 ᐃᓚᖏᓪᓕ ᐅᖃᕐᐳᑦ, “ᐅᓇ ᙭ᔅᑑᓯᐅᕗᖅ.” ᐃᓚᖏᓪᓕ ᐅᖃᕆᕗᑦ, “᙭ᔅᑑᓯ ᒐᓕᓕᐊᒥᑦ ᑎᑭᑦᑐᒃᓴᐅᕚ? 42 ᐊᒡᓔᑦ ᐅᖃᕐᓯᒪᕗᑦ, ᙭ᔅᑑᓯᒎᖅ ᑍᕕᑎᐅᑉ ᑭᖑᕚᕆᓛᕐᐹ, ᐃᕐᓂᐊᖑᓛᕐᓗᓂᓗ ᐱᑦᓕᐊᒥ, ᑍᕕᑎᐅᑉ ᓄᓇᕕᓂᖓᓂ.” 43 ᑍᒤᒻᒪᑦ ᐃᓄᒐᓴᒡᔪᐊᑦ ᐊᕕᒃᓯᒪᓕᓚᐅᕐᐳᑦ ᔩᓱᓯ ᐱᑦᔪᑎᒋᓪᓗᒍ. 44 ᐃᓚᖏᑕ ᔩᓱᓯ ᑎᒍᔪᒪᒐᓗᐊᕐᐹᑦ, ᐊᒃᑐᐃᔪᖃᓐᖏᓚᕐᓕ ᑖᑦᓱᒥᖓ. ᔫᑎᑦ ᐊᖓᔪᖅᑳᖏᑕ ᐅᒃᐱᖏᓐᓂᖓᑦ 45 ᑐᒃᓯᐊᕐᕕᒡᔪᐊᓪᓕ ᖃᐅᔨᓴᕐᑎᖏᑦ ᐅᑎᕐᒪᑕ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑕ ᐹᕆᓯᓪᓗ ᐊᐱᕆᕔᑦ, “ᓱᖕᒪᑦ ᕾᑦᔪᑎᖏᑉᐱᓯᐅᒃ?” 46 ᑐᒃᓯᐊᕐᕕᒡᔪᐊᑉ ᖃᐅᔨᓴᕐᑎᖏᑦ ᑭᐅᕗᑦ, “ᑖᑦᓱᑐᓇᖅ ᐅᖃᓪᓚᒍᓐᓇᕐᑎᒋᔪᒥᒃ ᐱᑕᖃᓐᖏᓚᖅ!” 47 ᑕᕝᕙ ᐹᕆᓯᑦ ᑭᐅᕗᑦ, “ᑖᑦᓱᒧᖓᑦᑕᐅᖅ ᓯᓔᕐᕆᔭᐅᒋᕕᓰ? 48 ᔫᑎᑦ ᐊᖓᔪᖅᑳᖏᑕ ᐃᓚᖏᓐᓂᒃ, ᐹᕆᓯᓂᒡᓘᓐᓃᑦ ᐅᒃᐱᕐᑐᖃᕐᐹ ᑖᑦᓱᒧᖓ? 49 ᐅᑯᐊ ᐃᓄᒐᓴᒡᔪᐊᑦ, ᐱᖁᔭᓂᒃ ᖃᐅᔨᒪᖏᑦᑐᑦ, ᐊᓯᕈᕐᑕᐅᔪᒫᕐᐳᑦ.” 50 ᓂᑯᑎᒨᓯᓕ ᐹᕆᓯᑦ ᐃᓚᖓᑦ ᑕᕝᕙᓃᑦᑐᖅ, ᑖᓐᓇᑦᓮᓐᓇᖅ ᔩᓱᓯᒥᒃ ᑕᑯᔭᕐᑐᓚᐅᕐᑐᖅ, ᐅᖃᕐᐳᖅ, 51 “ᐱᖁᔭᕗᑦ ᒪᓕᒡᓗᒋᑦ ᐃᓄᖕᒥᒃ ᓱᒋᐊᕐᑕᐅᖁᔨᔪᓐᓇᓐᖏᓚᒍᑦ, ᑐᓴᓚᐅᖅᑳᕋᑕ ᖃᐅᔨᓴᓚᐅᖅᑳᕋᑕᓗ ᐃᓅᑉ ᐱᓂᐊᕐᓂᕆᓯᒪᔭᖓᓂᒃ.” 52 ᑖᒃᑯᐊ ᑭᐅᕗᑦ, “ᒐᓕᓕᐊᒥᐅᖑᖃᑕᐅᒋᕖᑦ? ᑐᑭᓯᓇᓱᓚᐅᕆᑦ, ᑕᕝᕙ ᖃᐅᔨᓂᐊᕐᐳᑎᑦ ᓇᓚᐅᑦᑍᔪᒥᒃ ᒐᓕᓕᐊᒥᑦ ᐱᔪᖃᓚᐅᕐᓯᒪᖏᒻᒪᑦ.” 53 ᑕᒪᕐᒥᒃ ᐊᑐᓂ ᓇᖕᒥᓂᖅ ᐊᖏᕐᕋᒥᖕᓄᑦ ᐊᖏᕐᕋᕐᐳᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society