ᔪᐊᓇᓯᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅᑉ ᓂᕆᑎᑦᓯᓂᖓ 5,000ᓂᒃ ᒫᑎᐅᓯ 14:13-21 ; ᒫᑯᓯ 6:30-44 ; ᓘᑲᓯ 9:10-17 1 ᑕᒪᑐᒪ ᑭᖑᕐᖓᒍᑦ ᔩᓱᓯ ᐃᑳᕐᐳᕐᑕᓯᐅᑉ ᒐᓕᓕᐊᑉ ᐊᑭᐊᓄᑦ (ᑍᔭᐅᔪᒧᑦ, ᑍᐱᐅᕆᐊᓯᐅᑉ ᐃᒪᖓᓂᒃ). 2 ᐃᓄᒐᓴᒡᔪᐊᑦ ᒪᓕᒃᐹᑦ, ᓇᓗᓁᒃᑯᑕᕐᓂᒃ ᑕᑯᓚᐅᕋᒥᒃ ᖃᓂᒪᔪᓂᒃ ᐋᖅᑭᒃᓯᑎᓪᓗᒍ. 3 ᔩᓱᓯᓕ ᖃᖅᑲᒧᑦ ᒪᔪᕋᕋᒥ, ᖄᖓᓄᑦ ᐃᖏᑉᐳᖅ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ. 4 ᔫᑎᓪᓕ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᖓᑦ ᖃᒡᓕᓕᕐᐳᖅ. 5 ᔩᓱᓯ ᑕᑯᓴᕋᒥ, ᑕᑯᕗᖅ ᐃᓄᒐᓴᒡᔪᐊᓂᒃ ᕾᓕᕐᑐᓂᒃ ᐃᒻᒥᓄᑦ, ᐱᓕᑉᐴᓯᒧᑦ ᐅᖃᕐᐳᖅ, “ᖃᓄᕐᓕ ᓂᐅᕕᕈᓐᓇᕐᓂᐊᕐᐱᑖ ᐅᑯᐊ ᓂᕆᔭᒃᓴᖏᓐᓂᒃ?” 6 ᔩᓱᓯ ᑍᒫᒃ ᐅᖃᕐᐳᖅ ᐱᓕᑉᐴᓯ ᖃᐅᔨᓴᕐᓗᓂᐅᒃ, ᖃᐅᔨᒪᒐᓗᐊᕐᓗᓂ ᖃᓄᐃᓕᐅᕈᓐᓇᕐᓂᕐᒥᓂᒃ. 7 ᐱᓕᑉᐴᓯᐅᑉ ᑭᐅᕚ, “ᓯᐅᓪᕕᕆᓂᒃ 200 ᐅᖓᑖᓃᑦᑐᓂᒃ ᐊᑐᕆᐊᖃᕋᔭᕐᐳᒍᑦ ᑖᒃᑯᓂᖓ ᓂᕆᑎᑦᓯᓇᓱᒃᑯᑦᑕ ᒥᑭᔪᑯᓗᖕᒥᒡᓘᓐᓃᑦ ᐊᑐᓂᑦ ᐱᒐᓗᐊᕐᐸᑕ.” 8 ᐃᓕᓐᓂᐊᕐᑎᖏᑕ ᐃᓚᖓᑦ, ᐋᓐᑐᕉ ᓮᒨᓂᐅᑉ ᐲᑦᑐᕉᓯᐅᑉ ᓄᑲᖓ, ᐅᖃᕐᐳᖅ, 9 “ᐅᕙᓂ ᓄᑲᑉᐱᐊᕐᑕᖃᕐᐳᖅ ᓂᐊᖂᔭᓂᒃ ᑕᓪᓕᒪᓂᒃ ᐃᖃᓗᖕᓂᒡᓗ ᒪᕐᕉᖕᓂᒃ ᑕᖁᐊᖃᕐᑐᒥᒃ; ᑭᓯᐊᓂᓕ ᐃᓄᒋᐊᕌᓗᖕᓄᑦ ᑖᒃᑯᐊ ᓱᓇᐅᓐᖏᓚᑦ.” 10 ᔩᓱᓯᐅᑉ ᐅᖃᐅᑎᕔᑦ, “ᐃᓄᐃᑦ ᐃᖏᖁᓚᐅᕐᓯᐅᒃ,” ᑕᒪᓐᓇ ᓇᔪᕐᑕᖓᑦ ᓄᓇ ᐃᕕᒃᓱᒐᔮᖑᖕᒪᑦ; ᑕᕝᕙ ᐃᓄᓕᒫᑦ ᐃᖏᑉᐳᑦ, ᑖᒃᑯᐊ 5,000 ᖃᓂᒋᔮᓃᑉᐳᑦ. 11 ᔩᓱᓯᐅᑉ ᓂᐊᖂᔧᑦ ᑎᒍᕔᑦ, ᖁᔭᓕᑦᔪᑎᒋᔭᕇᕋᒥᒋᓪᓗ, ᐃᒃᓯᕙᔪᓄᑦ ᑐᓂᐅᖃᕐᑕᐅᖁᕔᑦ; ᑍᒫᒃᑕᐅᖅ ᐃᖃᓗᐃᑦ ᖁᔭᓕᑦᔪᑎᒋᓪᓗᒋᑦ ᑐᓂᒋᕔᑦ, ᓈᒻᒪᒃᓯᓪᓗᑎᒃ ᓂᕆᕗᑦ. 12 ᐊᕿᐊᑦᑐᕐᑐᐃᓐᓇᐅᖕᒪᑕ, ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᐊᒥᐊᒃᑯᒋᔭᐅᔪᑦ ᑲᑎᕐᓱᕐᓯᐅᒃ, ᒥᑭᔪᒥᒡᓘᓐᓃᑦ ᑕᒪᐅᖓᑐᐃᓐᓈᑐᖃᖁᓇᒍ.” 13 ᑕᕝᕙ ᐊᒥᐊᑯᓕᒫᓂᒃ ᑲᑎᑦᓯᒐᒥᒃ ᐃᕕᐅᔭᓂᒃ 12ᓂᒃ ᑕᑍᕗᑦ ᐊᒥᐊᒃᑯᒋᔭᐅᔪᓂᒃ ᓂᐊᖂᔭᓂᑦ ᑕᓪᓕᒪᓂᑦ, ᐃᓄᐃᑦ ᓂᕆᓚᐅᕐᑕᖏᓐᓂᑦ. 14 ᐃᓄᐃᓪᓕ ᓇᓗᓁᒃᑯᑕᕐᒥᒃ ᑕᑯᒐᒥᒃ, ᔩᓱᓯᐅᑉ ᐱᓇᓱᐊᕐᑕᖓᓂᒃ ᐅᖃᕐᐳᑦ, “ᑖᓐᓇ ᖁᓚᕐᓇᕈᓐᓃᕐᐳᖅ ᓇᓚᐅᑦᑍᔪᖕᒪᑦ ᓯᓚᕐᔪᐊᕐᒧᑦ ᑎᑭᓂᐊᕐᓯᒪᔪᖅ!” 15 ᔩᓱᓯ ᖃᐅᔨᒐᒥ ᐃᓄᐃᑦ ᖃᓄᐃᓕᐅᕈᒪᓂᖏᓐᓂᒃ, ᑎᒍᓗᒍ ᐊᖓᔪᖅᑳᕐᔪᐊᓐᖑᕐᑎᑦᓯᓇᓱᐊᕈᒪᓕᕐᒪᑕ ᐱᔪᒪᓐᖏᒐᓗᐊᕐᐸᑦ, ᑖᒃᑯᓇᓐᖓᑦ ᕿᒪᕉᑎᓪᓗᓂ ᖃᖅᑲᒧᑦ ᒪᔪᕋᕐᐳᖅ ᐃᓄᑑᓪᓗᓂ. ᔩᓱᓯᐅᑉ ᐱᓱᖕᓂᖓ ᐃᒪᐅᑉ ᖄᖓᒍᑦ ᒫᑎᐅᓯ 14:22-33 ; ᒫᑯᓯ 6:45-52 16 ᐅᓐᓄᖕᒪᓪᓕ, ᔩᓱᓯᐅᑉ ᐃᓕᓐᓂᐊᕐᑎᖏᑦ ᑕᓯᕐᒧᐊᕐᐳᑦ, 17 ᐅᒥᐊᒧᑦ ᐃᑭᓪᓗᑎᒃ, ᐅᑎᕋᓱᐊᓕᕐᐳᑦ ᑲᐲᕐᓂᐊᒧᑦ. ᑖᕐᓯᖕᒪᑦ, ᔩᓱᓯᐅᑉ ᓱᓕ ᐅᐸᓚᐅᓐᖏᒻᒪᒋᑦ. 18 ᐊᓄᕌᓕᕐᑐᐊᓘᖕᒪᑦ ᐃᒪᖅ ᒪᓪᓕᓕᕐᐳᖅ. 19 ᐃᓕᓐᓂᐊᕐᑎᑦ ᐃᐳᓪᖢᑎᒃ ᐃᖏᕐᕋᓕᕋᓗᐊᕐᑎᓪᓗᒋᑦ ᐃᒻᒪᖄ ᐱᖓᓱᓂᒃ ᓯᑕᒪᓂᒡᓘᓐᓃᑦ ᒤᓕᓂᒃ, ᑕᑯᓕᕐᐳᑦ ᔩᓱᓯᒥᒃ ᐃᒪᐅᑉ ᖄᖓᒍᑦ ᐱᓱᒃᑐᒥᒃ ᐅᒥᐊᒧᑦ ᖃᒡᓕᓕᕐᑐᒥᒃ. ᑲᑉᐱᐊᓱᓕᕐᐳᑦ, 20 ᔩᓱᓯᐅᑉ ᐅᖃᐅᑎᕔᑦ, “ᐅᕙᖓᐅᕗᖓ ᑲᑉᐱᐊᓱᒐᓯ!” 21 ᑕᕝᕙ ᐅᒥᐊᒧᑦ ᐃᑭᖁᓕᕐᐹᑦ, ᐊᑯᓂᐅᖏᑦᑐᖅ ᓄᓇᒧᑦ ᑎᑭᑉᐳᑦ ᐅᐸᒐᓱᐊᕐᑕᒥᖕᓄᑦ. ᐃᓄᐃᑦ ᕿᓂᕐᓂᖓᑦ ᔩᓱᓯᒥᒃ 22 ᖃᐅᑎᓪᓗᒍ ᐃᓄᒐᓴᒡᔪᐊᑦ ᑕᓯᐅᑉ ᐊᑭᐊᓃᑦᑐᑦ ᑕᑯᓕᕐᐳᑦ ᐅᒥᐊᖅ ᐊᑕᐅᓯᐅᖕᒪᑦ, ᖃᐅᔨᓚᐅᕐᓗᑎᒡᓗ ᔩᓱᓯ ᐅᒥᐊᒧᑦ ᐃᓕᓐᓂᐊᕐᑎᒥᓄᑦ ᐃᑭᖃᑕᐅᓚᐅᖏᒻᒪᑦ, ᐃᓕᓐᓂᐊᕐᑎᖏᓪᓕ ᐅᒥᐊᕐᑐᓯᓚᐅᕐᒪᑕ ᑖᒃᑯᑑᓪᓗᑎᒃ. 23 ᐅᒥᐊᓪᓕ ᐊᓯᖏᑦ, ᑍᐱᕆᐊᓯᒥᑦ ᐱᔪᑦ ᓄᓇᒧᑦ ᑐᓚᒋᐊᕐᑐᓕᕐᐳᑦ, ᐊᑕᓂᐅᑉ ᓂᐊᖂᔭᓂᒃ ᖁᔭᓕᑦᔪᑎᖃᓚᐅᕐᓗᓂ ᓂᕆᑎᑦᓯᕕᒋᓚᐅᕐᑕᖓᑕ ᖃᓂᒋᔮᓄᑦ. 24 ᐃᓄᒐᓴᒡᔪᐊᓪᓕ ᖃᐅᔨᒐᒥᒃ ᔩᓱᓯ ᑕᕝᕙᓃᖏᒻᒪᑦ, ᐃᓕᓐᓂᐊᕐᑎᖏᓪᓗ ᑕᕝᕙᓃᒻᒥᓇᑎᒃ, ᐅᒥᐊᒧᑦ ᐃᑭᕗᑦ ᑲᐲᕐᓂᐊᒧᓪᓗ ᐅᒥᐊᕐᑐᓕᕐᐳᑦ, ᔩᓱᓯᒥᒃ ᕿᓂᕐᓗᑎᒃ. ᔩᓱᓯᐅᑉ ᓂᐊᖂᔭᐅᓂᕋᕐᓂᖓ ᐃᓅᓯᕐᑕᓕᒃ 25 ᐃᓄᐃᑦ ᔩᓱᓯᒥᒃ ᓇᓂᓯᒐᒥᒃ ᑕᓯᐅᑉ ᐊᑭᐊᓂ, ᐅᖃᐅᑎᕚᑦ, “ᐊᔪᕆᕐᑐᐃᔩ, ᖃᖓ ᑕᒪᐅᓐᖓᕐᐲᑦ?” 26 ᔩᓱᓯᐅᑉ ᑭᐅᕔᑦ, “ᓱᓕᔪᒥᒃ ᐅᖃᐅᑎᕙᑦᓯ; ᕿᓂᕐᐸᑦᓯᓐᖓ ᓇᓗᓁᒃᑯᑍᑦ ᑕᑯᓚᐅᕐᑕᓯ ᐱᑦᔪᑎᒋᓇᒋᑦ, ᓂᕆᓚᐅᕋᑦᓯᓕ ᓂᐊᖂᔭᓂᒃ ᐊᕿᐊᑦᑐᕐᓗᓯ ᐱᑦᔪᑎᖃᕐᐳᓯ. 27 ᓂᕿᒃᓴᒥᒃ ᓄᖑᓴᕅᑦᑐᒥᒃ ᐱᓇᓱᐊᕐᓂᐊᕋᓯ, ᓂᕿᒃᓴᒥᒡᓕ ᐱᓇᓱᐊᓕᕆᑦᓯ ᐃᓅᓯᕐᑖᕐᓇᕐᑐᒥᒃ ᓄᖑᓱᐃᑦᑐᒧᑦ, ᐃᓅᑉ ᐃᕐᓂᖓᑕ ᑐᓂᓂᐊᕐᑕᖓᓂᒃ ᐃᓕᑦᓯᓐᓄᑦ; ᑖᓐᓇ ᒎᑎᐅᑉ ᐊᑖᑕᐅᑉ ᓇᓗᓁᒃᑯᓯᕐᓯᒪᖕᒪᒍ ᓈᒻᒪᒃᓴᕐᓂᕐᒥᓂᒃ.” 28 ᑕᕝᕙ ᐊᐱᕆᕚᑦ, “ᖃᓄᖅ ᐱᓇᓱᐊᕐᑐᒃᓴᐅᕕᑖ? ᒎᑎᐅᑉ ᐱᓇᓱᐊᕐᑕᐅᖁᔭᖓᓂᒃ ᐱᓇᓱᐊᕈᓐᓇᖁᓪᓗᑕ?” 29 ᔩᓱᓯᐅᑉ ᑭᐅᕔᑦ, “ᑕᕝᕙ ᒎᑎᐅᑉ ᐃᒫᒃ ᐱᖁᕚᓯ; ᐅᒃᐱᖁᓪᓗᓯ ᑎᓕᔭᖓᓄᑦ.” 30 ᑖᒃᑯᐊ ᑭᐅᕚᑦ, “ᑕᕝᕙ ᖃᓄᐃᑦᑐᒥᒃ ᓇᓗᓁᒃᑯᑕᖃᕐᓂᐊᕐᐲᑦ ᐅᕙᒍᑦ ᑕᑯᓗᑕ, ᐃᓕᖕᓄᑦ ᐅᒃᐱᓕᖁᓪᓗᑕ? ᖃᓄᐃᓕᐅᕐᓂᐊᕐᐲᑦ? 31 ᓯᕗᓕᕗᑦ ᒫᓇᒥᒃ ᓂᕿᒃᓴᒥᒃ ᓂᕆᓚᐅᕐᐳᑦ ᐃᓄᖃᖏᑦᑐᒥ; ᐊᒡᓚᖕᓂ ᐅᖃᕐᓯᒪᖕᒪᑦ, ‘ᓂᐊᖂᔭᒥᒃ ᕿᓚᖕᒥᑦ ᐱᔪᒥᒃ ᓂᕆᑎᓚᐅᕐᐰᑦ.’” 32 ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᒨᓯᓯᐅᑉ ᓂᐊᖂᔭᒥᒃ ᕿᓚᖕᒥᑦ ᐱᔪᒥᒃ ᑐᓂᓯᕕᒋᓚᐅᓐᖏᓛᓯ; ᐊᑖᑕᒪᓕ ᓂᐊᖂᔭᒥᒃ ᓂᕿᒃᓴᓪᓚᕆᖕᒥᒃ ᑐᓂᓯᕕᒋᕚᓯ ᕿᓚᖕᒥᑦ ᐱᔪᒥᒃ. 33 ᑕᕝᕙ ᒎᑎᐅᑉ ᓂᐊᖂᔭᖁᑎᖓ ᑖᓐᓇᐅᕗᖅ ᕿᓚᖕᒥᑦ ᑎᑭᑦᑐᖅ, ᐃᓅᓯᕐᒥᒡᓗ ᑐᓂᓯᔪᖅ ᓯᓚᕐᔪᐊᕐᒥᐅᓄᑦ.” 34 ᑖᒃᑯᐊ ᐅᖃᐅᑎᕚᑦ, “ᐊᑕᓃᖅ, ᓂᐊᖂᔭᒥᒃ ᑖᑦᓱᒥᖓ ᑐᓂᓯᕕᒋᑎᒍᑦ ᐱᖃᑦᑍᓇᕐᓂᐊᕐᑕᑦᑎᓐᓂᒃ.” 35 ᔩᓱᓯᐅᑉ ᐅᖃᐅᑎᕔᑦ, “ᐅᕙᖓ ᓂᐊᖂᔭᐅᕗᖓ ᐃᓅᓯᖃᕐᓇᕐᑐᖅ; ᐅᕙᓐᓄᑦ ᕾᔪᖅ ᑳᓕᕐᓂᐊᓐᖏᓚᖅ, ᐅᕙᓐᓄᓪᓗ ᐅᒃᐱᕐᑐᖅ ᐃᒥᕈᓚᐅᕐᓯᒪᓂᐊᓐᖏᓚᖅ. 36 ᒫᓐᓇᓕ ᐅᖃᐅᑎᒐᓗᐊᕋᑦᓯ ᐅᕙᓐᓂᒡᓗ ᑕᑯᓯᒪᓕᕐᓗᓯ ᐅᒃᐱᕆᓐᖏᓚᑦᓯᓐᖓ. 37 ᐊᑖᑕᒪ ᑐᓂᑦᔪᑎᒋᔭᓕᒫᖏᑦ ᐅᕙᓐᓄᐊᕐᓂᐊᕐᐳᑦ, ᐅᕙᓐᓄᐊᕐᑐᓂᒡᓗ ᖁᔭᓈᕐᓯᓂᐊᓐᖏᓚᖓ. 38 ᕿᓚᖕᒥᑦ ᑎᑭᓚᐅᕋᒪ, ᐱᔪᒪᔭᓐᓂᒃ ᐱᓇᓱᐊᕆᐊᕐᑐᕐᓇᖓ, ᑖᑦᓱᒪᓕ ᑎᓕᔨᒪ ᐱᔪᒪᔭᖓᓂᒃ ᐱᓇᓱᐊᕆᐊᕐᑐᕐᓗᖓ. 39 ᑖᑦᓱᒪ ᑎᓕᔨᒪ ᐱᔪᒪᔭᖓ ᑕᒪᑦᔭ, ᐅᕙᓐᓄᑦ ᑐᓂᓯᒪᔭᖏᓐᓂᒃ ᐊᓯᐅᔨᖁᓇᖓ, ᐆᒻᒪᕐᑎᑦᓯᖁᓪᓗᖓᓕ ᐅᓪᓗᐃᑦ ᑭᖑᓪᓕᕐᐹᖓᓐᓂ. 40 ᑕᒪᑦᔭ ᐊᑖᑕᒪ ᐱᔪᒪᔭᖓ, ᐃᕐᓂᖓᓂᒃ ᑕᑯᔪᓕᒫᑦ ᐅᒃᐱᓕᕐᓗᑎᒡᓗ ᑖᑦᓱᒧᖓ ᐃᓅᓯᕐᒥᒃ ᓄᖑᓱᐃᑦᑐᒥᒃ ᐱᖃᖁᓪᓗᒋᑦ; ᐅᕙᖓᓗ ᐆᒻᒪᕐᑎᑦᓱᒫᕐᐸᕋ ᐅᓪᓗᐃᑦ ᑭᖑᓪᓕᕐᐹᖓᓐᓂ.” 41 ᔫᑎᓪᓕ ᐊᑲᐅᒃᓴᕈᓐᓃᕐᐳᑦ ᑖᑦᓱᒥᖓ, ᐅᖃᕐᓂᖓ ᐱᓪᓗᒍ, “ᐅᕙᖓ ᓂᐊᖂᔭᐅᕗᖓ ᕿᓚᖕᒥᑦ ᑎᑭᓯᒪᔪᖅ.” 42 ᑕᕝᕙ ᐅᖃᕐᐳᑦ, “ᐅᓇ ᔩᓱᓯᐅᓐᖏᓛᖅ ᔫᓯᐱᐅᑉ ᐃᕐᓂᖓ ᐊᑖᑕᖓ ᐊᓈᓇᖓᓗ ᖃᐅᔨᒪᖏᓚᕗᑦ? ᖃᓄᐃᒻᒪᓪᓕᐅᓇ ᐅᖃᓕᕆᕙ ‘ᕿᓚᖕᒥᑦ ᑎᑭᓯᒪᕗᖓ’?” 43 ᔩᓱᓯᐅᑉ ᑭᐅᕔᑦ, “ᐊᑲᐅᒃᓴᖏᓪᓗᓯ ᐃᓕᑦᓯᓐᓄᑦ ᐅᖃᖃᑦᑕᐅᑎᓐᖏᓚᐅᕆᑦᓯ. 44 ᐅᕙᓐᓄᑦ ᕾᔪᖃᕈᓐᓇᓐᖏᓚᖅ ᐊᑖᑕᐅᑉ ᑎᓕᔨᒪ ᐅᕙᓐᓄᐊᕐᑎᖏᑉᐸᒍ; ᐅᕙᖓᓗ ᐆᒻᒪᕐᑎᑦᓱᒫᕐᐸᕋ ᐅᓪᓗᐃᑦ ᑭᖑᓪᓕᕐᐹᖓᓐᓂ. 45 ᓇᓚᐅᑦᑍᔪᑎᒍᑦ ᑎᑎᕋᕐᓯᒪᕗᑦ, ‘ᑕᒪᕐᒥᒃ ᐊᔪᕆᕐᑐᕐᑕᐅᔪᒫᕐᐳᑦ ᒎᑎᒧᑦ.’ ᓇᓪᓕᐊᑦ ᐊᑖᑕᒥᒃ ᑐᓴᕐᑐᖅ, ᑖᑦᓱᒪᓐᖓᓪᓗ ᐃᓕᓐᓂᐊᕐᓗᓂ ᑖᓐᓇ ᐅᕙᓐᓄᑦ ᕾᕗᖅ. 46 ᐊᑖᑕᒥᒃ ᑕᑯᓚᐅᕐᓯᒪᔪᖃᓐᖏᓚᖅ; ᒎᑎᒥᓪᓕ ᐱᔫᑉ ᑭᓯᒥ ᐊᑖᑕ ᑕᑯᓯᒪᕚ. 47 ᓱᓕᔪᒥᒃ, ᓱᓕᔪᒥᒃ ᐅᖃᐅᑎᕙᑦᓯ; ᐅᕙᓐᓄᑦ ᐅᒃᐱᕐᑐᖅ ᐃᓅᓯᖃᕐᐳᖅ ᓄᖑᓱᐃᑦᑐᒥᒃ. 48 ᐅᕙᖓ ᐃᓅᓯᐅᑉ ᓂᐊᖂᔭᕆᕚᖓ. 49 ᓯᕗᓕᓯ ᒫᓇᒥᒃ ᓂᕆᓚᐅᕐᐳᑦ ᐃᓄᖃᖏᑦᑐᒥ, ᑭᓯᐊᓂᓕ ᑐᖁᓚᐅᕐᐳᑦ. 50 ᓂᐊᖂᔭᕐᓕ ᑖᓐᓇᐅᕗᖅ ᕿᓚᖕᒥᑦ ᑎᑭᑦᑐᖅ; ᓇᓪᓕᐊᑦ ᑕᕝᕙᓐᖓ ᓂᕆᔪᖅ ᑐᖁᖁᓇᒍ. 51 ᐅᕙᖓ ᓂᐊᖂᔭᐅᕗᖓ ᐆᒪᔪᖅ ᕿᓚᖕᒥᑦ ᐱᓯᒪᔪᖅ; ᑭᓇᑐᐃᓐᓇᖅ ᑕᕝᕙᓐᖓᑦ ᓂᐊᖂᔭᑐᕐᑐᖅ, ᐃᓅᓯᖃᓕᕐᓂᐊᕐᐳᖅ ᐃᓱᖃᖏᑦᑐᒧᑦ; ᓂᐊᖂᔭᕐᓗ ᑐᓂᓂᐊᕐᑕᕋ ᐃᓅᓯᖃᓕᕐᑎᑦᑎᔪᓇᕐᐳᖅ ᓯᓚᕐᔪᐊᕐᒥᐅᓂᒃ, ᑖᓐᓇ ᑕᑉᕙ ᑎᒥᒐ.” 52 ᑕᕝᕙ ᔫᑎᑦ ᐃᒻᒥᖕᓄᑦ ᐊᑭᕋᕐᑑᑎᓕᕐᐳᑦ, ᐅᖃᕐᓗᑎᒃ, “ᖃᓄᖅ ᐆᒪ ᑎᒥᒥᓂᒃ ᓂᕆᑎᑦᓱᒪᕚᑎᒎᑦ?” 53 ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐃᓅᑉ ᐃᕐᓂᖓᑕ ᑎᒥᖓᓂᒃ ᓂᕆᖏᒃᑯᑦᓯ ᐊᐅᖓᓂᒡᓗ ᐃᒥᖏᒃᑯᑦᓯ, ᐃᓅᓯᖃᕈᓐᓇᓐᖏᓚᓯ ᐃᓗᑦᓯᓐᓃᑦᑐᒥᒃ. 54 ᑎᒥᓐᓂᒃ ᓂᕆᔪᖅ ᐊᐅᓐᓂᒡᓗ ᐃᒥᕐᑐᖅ ᓄᖑᓱᐃᑦᑐᒥᒃ ᐃᓅᓯᖃᕐᐳᖅ, ᐅᕙᖓᓗ ᐆᒻᒪᕐᑎᑦᓱᒫᕐᐸᕋ ᐅᓪᓗᐃᑦ ᑭᖑᓪᓕᕐᐹᖓᓐᓂ. 55 ᑎᒥᒐ ᓂᕿᒃᓴᓪᓚᕆᐅᕗᖅ, ᐊᐅᒐᓗ ᐃᒥᒃᓴᓪᓚᕆᐅᓪᓗᓂ. 56 ᓇᓪᓕᐊᑦ ᑎᒥᓐᓂᒃ ᓂᕆᔪᖅ, ᐊᐅᓐᓂᒡᓗ ᐃᒥᕐᓗᓂ ᑖᓐᓇ ᐅᕙᓐᓃᑉᐳᖅ, ᐅᕙᖓᓗ ᑖᑦᓱᒪᓃᓪᓗᖓ. 57 ᐊᑖᑕᐅᑉ ᐆᒪᔪᑉ ᑎᓕᓯᒪᖕᒪᖓ, ᐅᕙᖓᓗ ᐃᓅᕗᖓ ᐊᑖᑕᒐ ᐱᓪᓗᒍ, ᑍᒫᒃᑕᐅᖅ ᐅᕙᓐᓂᒃ ᓂᕆᔪᖅ ᐃᓅᓂᐊᕐᐳᖅ ᐅᕙᖓ ᐱᓪᓗᖓ. 58 ᑖᓐᓇ ᓂᐊᖂᔭᖅ ᕿᓚᖕᒥᑦ ᑎᑭᑦᑐᖅ, ᓯᕗᓕᓯᓕ ᓂᕆᓚᐅᕐᑕᖓᑎᑑᓐᖏᓚᖅ ᓂᕆᒐᓗᐊᕋᒥᒃ ᑐᖁᓚᐅᕐᑐᑎᑐᑦ; ᓂᐊᖂᔭᒥᒡᓕ ᑖᑦᓱᒥᖓ ᓂᕆᔪᖅ ᐃᓅᓂᐊᕐᐳᖅ ᐃᓱᖃᖏᑦᑐᒧᑦ.” 59 ᔩᓱᓯ ᑕᒪᒃᑯᓂᖓ ᐅᖃᐅᓯᖃᓚᐅᕐᐳᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂ, ᑲᐲᕐᓂᐊᒦᑦᑐᒥ ᐊᔪᕆᕐᑐᐃᓪᓗᓂ. ᐅᖃᐅᓰᑦ ᐃᓅᓯᕐᒥᒃ ᓄᖑᓱᐃᑦᑐᒥᒃ 60 ᔩᓱᓯᐅᑉ ᐃᓕᓐᓂᐊᕐᑎᖏᑦ ᐊᒥᓱᑦ, ᑕᒪᒃᑯᓂᖓ ᑐᓵᔪᑦ ᐅᖃᕐᐳᑦ, “ᐅᖃᐅᓰᑦ ᑖᒃᑯᐊ ᓇᓗᓇᓗᐊᕐᐳᑦ, ᑭᐊᓕ ᑐᑭᓯᔪᓐᓇᕐᐰᑦ?” 61 ᔩᓱᓯ ᖃᐅᔨᒪᒐᒥ ᐃᓕᓐᓂᐊᕐᑎᖏᑦ ᐅᖃᐅᓯᕐᓄᑦ ᑕᒪᒃᑯᓄᖓ ᐊᑲᐅᒃᓴᕈᓐᓃᕐᒪᑕ, ᐅᖃᐅᑎᕔᑦ, “ᑕᒪᒃᑯᓄᖓ ᐅᖃᐅᓯᕐᓄᑦ ᓴᐱᓕᕐᐱᓰ? 62 ᖃᓄᕐᓕ ᐃᓱᒪᕕᓰ ᐃᓅᑉ ᐃᕐᓂᖓ ᑕᑯᒐᔭᕈᑦᓯᐅᒃ ᖁᒻᒧᐊᓕᕐᑎᓪᓗᒍ ᓯᕗᕐᖓᓂ ᐃᓂᒋᓚᐅᕐᑕᒥᓄᑦ? 63 ᐊᓂᕐᓂᖅ ᐃᓅᓯᕐᑖᕐᑎᑦᓯᕗᖅ; ᑎᒥᐅᑉ ᐱᔪᓐᓇᕐᓂᖓ ᐃᑲᔪᕈᓐᓇᓐᖏᓚᖅ ᑕᒪᑐᒧᖓ; ᐃᓕᑦᓯᓐᓄᑦ ᐅᖃᐅᓯᕆᔭᒃᑲ ᐊᓂᕐᓂᐅᕗᑦ ᐃᓅᓯᐅᓪᓗᑎᒡᓗ. 64 ᐊᑯᓐᓇᑦᓯᓐᓃᑦᑐᖃᕐᐳᕐᓕ ᐃᓚᒋᔭᑦᓯᓐᓂᒃ ᐅᒃᐱᕈᓱᖕᓂᖃᖏᑦᑐᒥᒃ.” ᔩᓱᓯ ᐱᒋᐊᕐᓂᖓᓂᑦ ᖃᐅᔨᒪᑦᓯᐊᓚᐅᕐᒪᑦ ᓇᓪᓕᐊᖑᖕᒪᖔᑦ ᐅᒃᐱᕈᓱᖏᑦᑐᖅ, ᓇᓪᓕᐊᑦᑕᓗ ᐱᔭᐅᒃᑲᕈᒫᕐᒪᖔᒍ. 65 ᔩᓱᓯ ᐅᖃᕐᐳᖅ, “ᑕᒪᓐᓇ ᐱᑦᔪᑎᒋᓪᓗᒍ ᐅᖃᐅᑎᓚᐅᕐᐸᑦᓯ ᐅᕙᓐᓄᐊᕐᑐᖃᕈᓐᓇᓐᖏᓚᖅ ᐊᑖᑕᒧᑦ ᐱᔪᒪᓂᕐᑖᕐᑎᑕᐅᖏᒃᑯᓂ.” 66 ᑕᒪᓐᓇ ᐱᑦᔪᑎᒋᓪᓗᒍ ᔩᓱᓯᐅᑉ ᒪᓕᒃᑎᖏᑦ ᐊᒥᓱᑦ ᔩᓱᓯ ᖁᔭᓈᕐᐹᑦ ᐃᖏᕐᕋᖃᑎᒋᔪᒤᕐᓗᒍ. 67 ᑕᕝᕙ ᔩᓱᓯᐅᑉ ᐃᓕᓐᓂᐊᕐᑎᓂ 12 ᐊᐱᕆᕔᑦ, “ᐃᓕᑦᓯᑦᑕᐅᖅ ᐅᕙᓐᓂᒃ ᕿᒤᔪᒪᕕᓰ?” 68 ᓮᒨᓂ ᐲᑦᑐᕉᓯᐅᑉ ᑭᐅᕚ, “ᐊᑕᓃᖅ, ᑭᓇᒥᒡᓕ ᒪᓕᒐᒃᓴᖃᕐᓂᐊᕋᑦᑖ? ᐅᖃᐅᓯᖃᕈᓐᓇᕐᑐᑐᑎᓪᓗᑎᑦ ᐃᓅᓯᖃᕐᓇᕐᑐᓂᒃ ᐃᓱᖃᖏᑦᑐᒧᑦ. 69 ᐅᒃᐱᓕᕐᓗᑕᓗ ᖃᐅᔨᕗᒍᑦ ᒎᑎᐅᑉ ᐃᑦᔪᕐᓁᑦᑐᖁᑎᒋᖕᒪᑎᑦ.” 70 ᔩᓱᓯᐅᑉ ᑭᐅᕔᑦ, “ᐃᓕᑦᓯ 12ᓗᓯ ᓂᕈᐊᓚᐅᓐᖏᓚᑦᓯ? ᐃᓚᑦᓯᓕ ᐃᓚᖓᑦ ᓵᑖᓇᓯᐅᕗᖅ.” 71 ᔫᑕᓯᒥᒃ ᐅᖃᐅᓯᖃᓚᐅᕐᐳᖅ ᓮᒨᓂ ᐃᔅᑲᕆᐊᑎᐅᑉ ᐃᕐᓂᖓᓂᒃ, ᔫᑕᓯ ᔩᓱᓯᐅᑉ ᐃᓕᓐᓂᐊᕐᑎᖏᓐᓄᑦ 12ᓄᑦ ᐃᓚᒋᔭᐅᒐᓗᐊᕐᓗᓂ, ᑭᖑᓂᖓᒍᑦ ᔩᓱᓯᒥᒃ ᐱᔭᐅᑎᑦᓯᔪᒫᕐᒪᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society